ଧୋକା ଦେଲା ଲଘୁଚାପ, ସମ୍ଭାବନା ଆଣୁଛି ମୌସୁମୀ ଟ୍ରଫ୍ ଲାଇନ୍
1 min read
ଭୁବନେଶ୍ୱର: ଅଗଷ୍ଟରେ ଦୁଇ ଦୁଇଟି ଲଘୁଚାପ ସତ୍ତ୍ୱେ ଆବଶ୍ୟକୀୟ ବର୍ଷା ହେଲାନି। ତେବେ ଆଗକୁ ବର୍ଷାର ସମ୍ଭାବନା ଆଣୁଛି ଦୁର୍ବଳ ଥିବା ଦକ୍ଷିଣ- ପଶ୍ଚିମ ମୌସୁମୀ ଟ୍ରଫ୍ ଲାଇନ୍। ଆସନ୍ତା ତିନି ଦିନ ମଧ୍ୟରେ ଏହା ସକ୍ରିୟ ହୋଇ ୨୫ ତାରିଖ ସୁଦ୍ଧା ଉପକୂଳ ଓଡ଼ିଶା ମଧ୍ୟ ଦେଇ ଗତି କରିବ। ଏହାର ପ୍ରଭାବରେ ମୌସୁମୀ ଟ୍ରଫଲାଇନ୍ ଦକ୍ଷିଣାୟନ ଗତି କରି ସ୍ୱାଭାବିକ ସ୍ଥିତିକୁ ଫେରିବ। ଫଳରେ ଆଭ୍ୟନ୍ତରୀଣ ଓଡ଼ିଶା ସମେତ ଉପକୂଳ ଓଡ଼ିଶାରେ ବର୍ଷାର ପରିମାଣ ବଢିବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ପୂର୍ବାନୁମାନ କରିଛି।
ଚଳିତ ମୌସୁମୀ ଋତୁରେ ଜୁନ୍ ୧ରୁ ଅଗଷ୍ଟ ୨୨ ତାରିଖ ସୁଦ୍ଧା ରାଜ୍ୟରେ ୮୩୬ ଦଶମିକ ୨ ମିଲିମିଟର ବର୍ଷା ହେବା କଥା। କିନ୍ତୁ ୫୮୩ ଦଶମିକ ୭ ମିଲିମିଟର ବର୍ଷା ହୋଇଛି। ଏହା ସ୍ୱାଭାବିକ ବର୍ଷାଠାରୁ ୩୦ ପ୍ରତିଶତ କମ୍। ଏବେ ସୁଦ୍ଧା ରାଜ୍ୟର ୨୭ଟି ଜିଲ୍ଲାରେ ନିଅଣ୍ଟିଆ ବର୍ଷା ହୋଇଥିବା ବେଳେ ୩ଟି ଜିଲ୍ଲାରେ ସ୍ୱଭାବିକ ବର୍ଷା ରେକର୍ଡ କରାଯାଇଛି। କମ୍ ବର୍ଷା ପାଇଁ ୪ଟି ଜିଲ୍ଲା ଅଧିକ ପ୍ରଭାବିତ ହୋଇଛି।
ସୂଚନା ଅନୁଯାୟୀ, ଯାଜପୁରରେ ସର୍ବନିମ୍ନ ୫୪ ପ୍ରତିଶତ ବର୍ଷା ରେକର୍ଡ ହୋଇଥିବା ବେଳେ ଭଦ୍ରକରେ ୫୦, ବଲାଙ୍ଗିରରେ ୪୩, କେନ୍ଦୁଝରରେ ୪୨ଏବଂ ଅନୁଗୁଳରେ ୪୦ ପ୍ରତିଶତ କମ୍ ବର୍ଷା ହୋଇଛି। ୨୦ଟି ଜିଲ୍ଲାରେ ସ୍ୱାଭାବିକ ଠାରୁ ୧୯ ରୁ ୩୯ ପ୍ରତିଶତ କମ୍ ବର୍ଷା ହୋଇଛି। ୫ଟି ଜିଲ୍ଲାରେ ୩୯ରୁ ୫୯ ପ୍ରତିଶତ କମ୍ ବର୍ଷା ପାଇଁ ସ୍ଥିତି ସଂଗୀନ ହୋଇଛି।
