ରାଜ୍ୟରେ କୋଭିଡ଼ ସ୍ଥିତି ଓ ପରିଚାଳନା ହେବ ବୈଠକର ମୁଖ୍ୟ ଏଜେଣ୍ଡା
ଭୁବନେଶ୍ୱର: ରାଜ୍ୟରେ ଦିନ ବଢିବା ସହ ସଂକ୍ରମିତଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି । କରୋନା ସ୍ଥିତିକୁ ନିୟନ୍ତ୍ରଣରେ ଆଣିବାକୁ ବିଭିନ୍ନ ପ୍ରକାର ପଦକ୍ଷେପ ନେଉଛନ୍ତି ସରକାର । କିନ୍ତୁ ଏସବୁ ସତ୍ତ୍ୱେ ନିୟନ୍ତ୍ରଣରେ ଆସୁନି କରୋନା । ଯଦିଓ ରାଜ୍ୟରେ କରୋନାରୁ ଆରୋଗ୍ୟ ଲାଭ କରିଥିବା ସଂକ୍ରମିତଙ୍କ ସଂଖ୍ୟା ବଢୁଛି କିନ୍ତୁ ଆକ୍ରନ୍ତଙ୍କ ସଂଖ୍ୟା କମିବାର ନାଁ ନେଉ ନାହିଁ । ଆଜି ସନ୍ଧ୍ୟା ୫ଟାରେ ବସିବ ମନ୍ତ୍ରୀ ପରିଷଦ ବୈଠକ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିବ ବୈଠକ ।
ଲୋକସେବା ଭବନରେ ଅନୁଷ୍ଠିତ ହେବ ଏହି ଉଚ୍ଚ କ୍ଷମତା ସମ୍ପନ୍ନ ବୈଠକ । ନବୀନ ନିବାସରୁ ମୁଖ୍ୟମନ୍ତ୍ରୀ ଭିଡିଓ କନଫରେନ୍ସିଂ ମାଧ୍ୟମରେ ବୈଠକରେ ଉପସ୍ଥିତ ରହିବେ । ରାଜ୍ୟରେ କୋଭିଡ଼ ସ୍ଥିତି ଓ ପରିଚାଳନା ହେବ ବୈଠକର ମୁଖ୍ୟ ଏଜେଣ୍ଡା । ଏଥି ସହ ଅନ୍ୟ ୫ଟି ଏଜେଣ୍ଡା ଉପରେ ବୈଠକରେ ଆଲୋଚନା ହେବା ନେଇ ସୂଚନା ରହିଛି । ଏସବୁ ସ୍ଥିତିକୁ ଦୃଷ୍ଟିରେ ରଖି ସରକାର କିଛି ନୂଆ ଷ୍ଟ୍ରାଟେଜି ପ୍ରସ୍ତୁତ କରିପାରନ୍ତି ବୋଲି ଚର୍ଚ୍ଚା ହେଉଛି ।
