ନନ୍ଦିଘୋଷ ବ୍ୟୁରୋ: ପଶ୍ଚିମ ଏସିଆରେ ପୁଣି ଥରେ ଯୁଦ୍ଧର ବାଦଲ ଘନେଇବାରେ ଲାଗିଛି। ହର୍ମୁଜ ପ୍ରଣାଳୀ (Strait of Hormuz)ରେ ଇରାନର ଡ୍ରୋନ ଷ୍ଟ୍ରାଇକର କଡ଼ା ଜବାବ ଦେଇଛି ଆମେରିକା। ଇରାନ ସୀମା ଭିତରେ ପଶି ଆମେରିକୀୟ ସେନା ଜୋରଦାର ଆକ୍ରମଣ କରିଥିବା ସୂଚନା ମିଳିଛି। ଇରାନର ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ରାଡାର ସାଇଟଗୁଡ଼ିକ ଉପରେ ଆମେରିକା ପକ୍ଷରୁ ଏହି ବଡ଼ ଧରଣର ହମଲା କରାଯାଇଛି।
ମିଳିଥିବା ସୂଚନା ଅନୁଯାୟୀ, ଇରାନର ଗୋରୁକ ଏବଂ କେସମ ଦ୍ୱିପସ୍ଥିତ କୋଷ୍ଟାଲ ସର୍ଭେଲାନ୍ସ ରାଡାର ସାଇଟ୍କୁ ଟାର୍ଗେଟ କରିଛି ଆମେରିକା। ହର୍ମୁଜ ପ୍ରଣାଳୀ ଦିଗରେ ଆସୁଥିବା ଆମେରିକୀୟ ତଥା ଆନ୍ତର୍ଜାତୀୟ ଜାହାଜଗୁଡ଼ିକ ଉପରେ ନଜର ରଖିବା ଏବଂ ଡ୍ରୋନ ଗାଇଡ୍ କରିବା ପାଇଁ ଇରାନ ଏହି ରାଡାର ସାଇଟଗୁଡ଼ିକୁ ବ୍ୟବହାର କରୁଥିଲା। ଏହି ଆକ୍ରମଣରେ ରାଡାର ସାଇଟଗୁଡ଼ିକର ବ୍ୟାପକ କ୍ଷତି ହୋଇଥିବା ଆଶଙ୍କା କରାଯାଉଛି।
ଆମେରିକାର ୟୁନାଇଟେଡ ସେଣ୍ଟ୍ରାଲ କମାଣ୍ଡ ପକ୍ଷରୁ ଏହି ଆକ୍ରମଣକୁ ସ୍ପଷ୍ଟ କରାଯାଇଛି। ସେଣ୍ଟକମ କହିଛି ଯେ, କେବଳ ପ୍ରତିରକ୍ଷାମୂଳକ କାରଣରୁ ଏବଂ ସାମୁଦ୍ରିକ ମାର୍ଗରେ ଜାହାଜ ଚଳାଚଳର ସ୍ୱାଧୀନତା ରକ୍ଷା ଲାଗି ଆମେରିକା ଏହି ପଦକ୍ଷେପ ନେଇଛି।
ଇରାନ ପକ୍ଷରୁ ସମସ୍ତ ୪ଟି ଯାକ ଆଟାକ୍ ଡ୍ରୋନକୁ ଆମେରିକୀୟ ସେନା ସଫଳତାର ସହ ଖସାଇ ଦେଇଛି। ଆମେରିକା ସାମରିକ ବିଭାଗ ପେଣ୍ଟାଗନ ସ୍ପଷ୍ଟ ଚେତାବନୀ ଦେଇ କହିଛି ଯେ, ଆତ୍ମରକ୍ଷା ଲାଗି ଆମେରିକା ଯାହା ଉଚିତ ମନେ କରିବ, ତାହାହିଁ କରିବ। ଇରାନର କୌଣସି ବି ପ୍ରକାରର ହମଲାର ଜବାବ ଦେବାକୁ ଆମେରିକୀୟ ସେନା ସମ୍ପୂର୍ଣ୍ଣ ପ୍ରସ୍ତୁତ ରହିଛି।
ତେବେ ହର୍ମୁଜ ପ୍ରଣାଳୀ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ମେରିଟାଇମ୍ ଅଏଲ୍ ଟ୍ରେଡ୍ ରୁଟ୍ ମଧ୍ୟରୁ ଅନ୍ୟତମ। ଏଠାରେ ଆମେରିକା ଏବଂ ଇରାନ ମଧ୍ୟରେ ବଢୁଥିବା ଏହି ଆକ୍ରମଣ ଓ ପ୍ରତିଆକ୍ରମଣ ପଶ୍ଚିମ ଏସିଆର ଭୂ-ରାଜନୀତିକୁ ଅଧିକ ଜଟିଳ କରିଦେଇଛି। ସାମ୍ପ୍ରତିକ ସ୍ଥିତି ଯୋଗୁଁ ସମଗ୍ର ଅଞ୍ଚଳରେ ଶାନ୍ତି ପ୍ରତିଷ୍ଠା ହେବାର ସମ୍ଭାବନା ଆହୁରି ଦୂରେଇ ଯାଉଥିବା ଭଳି ମନେହେଉଛି, ଯାହା ବିଶ୍ୱ ବଜାର ଉପରେ ମଧ୍ୟ ପ୍ରଭାବ ପକାଇପାରେ।
