ଚେନ୍ନାଇ ସୁପର କିଙ୍ଗ୍ସ୍ ଟିମ୍ ସଦସ୍ୟଙ୍କୁ କରୋନା, ଅଭ୍ୟାସ ପୂର୍ବରୁ ସପ୍ତାହେ ବଢ଼ିଲା କ୍ୱାରେଣ୍ଟାଇନ୍

ଦୁବାଇ: ତିନିଥରର ଆଇପିଏଲ ବିଜେତା ଚେନ୍ନାଇ ସୁପର କିଙ୍ଗ୍ସ (CSK)ର କିଛି ସଦସ୍ୟ କରୋନା ସଂକ୍ରମିତ । କଣ୍ଟିଜେଣ୍ଟ ଟେଷ୍ଟ ନମୁନା କରୋନା ପଜିଟିଭ୍ ଆସିଛି । ଫଳରେ ସେମାନଙ୍କ କ୍ୱାରେଣ୍ଟାଇନ୍ ଅବଧିକୁ ବଢ଼ାଇ ଦିଆଯାଇଛି । ଆଇପିଏଲ ୧୩ ସଂସ୍କରଣ ଆରମ୍ଭରୁ ମହେନ୍ଦ୍ର ସିଂହ ଧୋନିଙ୍କ ନେତୃତ୍ୱାଧିନ ଟିମ୍ ପାଇଁ ଏହା ଏକ ବଡ଼ ଝଟକା । କାରଣ ଦୁବାଇରେ ଶୁକ୍ରବାରଠାରୁ ଖେଳାଳି ଅଭ୍ୟାସ ଆରମ୍ଭ କରିଥାନ୍ତେ ।

ଚେନ୍ନାଇ ସୁପର୍ କିଙ୍ଗ୍ସ ଟିମର ସଦସ୍ୟଙ୍କୁ କରୋନା ନେଇ ସ୍ପଷ୍ଟ ହୋଇଛି । ତେବେ, ଟିମରେ କେଉଁ ଖଳାଳି, ସହଯୋଗୀ କର୍ମଚାରୀ ଓ ଅଧିକାରୀ ସଂକ୍ରମିତ ହୋଇଛନ୍ତି ସେନେଇ କିଛି ଜଣାପଡ଼ିନାହିଁ । ଅଗଷ୍ଟ ୨୧ରେ ଦୁବାଇ ପହଞ୍ଚିବା ପରେ ସେମାନଙ୍କୁ କ୍ୱାରେଣ୍ଟାଇନରେ ରଖାଯିବା ସହ କୋଭିଡ୍ ଟେଷ୍ଟ କରାଯାଇଥିଲା । ପଜିଟିଭ୍ ଆସିବା ପରେ CSKକୁ ଆଉ ଏକ ସପ୍ତାହ ଅଧିକ କ୍ୱାରେଣ୍ଟାଇନରେ ରହିବାକୁ ପଡ଼ିବ ।

ବିସିସିଆଇ ନିୟମ ମୁତାବକ ଚେନ୍ନାଇ ସୁପର କିଙ୍ଗ୍ସର ସଦସ୍ୟ ଗସ୍ତ ପୂର୍ବରୁ ୬ ଦିନ କ୍ୱାରେଣ୍ଟାଇନରେ ଥିଲେ । ଅଗଷ୍ଟ ୨୧ରେ ଦୁବାଇ ପହଞ୍ଚିବା ପରେ କ୍ୱାରେଣ୍ଟାଇନରେ ରଖାଯାଇଥିଲା । ଭାରତରେ କରୋନା ସଂକ୍ରମଣର ବଢ଼ୁଥିବା ମାମଲାକୁ ଦେଖି ଚଳିତବର୍ଷ ଆଇପିଏଲ ୟୁଏଇରେ ସେପ୍ଟେମ୍ବର ୧୯ରୁ ଆରମ୍ଭ ହେବାକୁ ଯାଉଛି ।

ସୂଚନା ମୁତାବକ ଚେନ୍ନାଇ ସୁପର କିଙ୍ଗ୍ସର ୧୦ ଜଣଙ୍କୁ କରୋନା ହେଉଛି । ଯେଉଁଥିରେ ସହଯୋଗୀ କର୍ମଚାରୀ ଓ ଅଧିକାରୀ ରହିଛନ୍ତି । ଦୁବାଇରେ ପହଞ୍ଚିବା ପରେ ଶୁକ୍ରବାର ଚତୁର୍ଥଥର ପାଇଁ ସେମାନଙ୍କ କୋଭିଡ୍ ପରୀକ୍ଷଣ କରାଯାଇଥିଲା । ଶନିବାର ଚତୁର୍ଥ ପରୀକ୍ଷଣ ରିପୋର୍ଟ ଆସିବା ପରେ ଅଭ୍ୟାସ ଆରମ୍ଭ କରିପାରିବେ ।

ସୂତ୍ର ଅନୁସାରେ, CSK ଦୁବାଇ ପହଞ୍ଚିବା ପରେ ସମସ୍ତ ସାବଧାନତା ଅବଲମ୍ବନ କରୁଛି । ଏପରିକି ୟୁରୋପରେ ଫୁଟବଲ ଆରମ୍ଭ ପୂର୍ବରୁ କିଛି ଖେଳାଳି ସଂକ୍ରମିତ ହୋଇଥିବା ଜଣାପଡ଼ିଥିଲା । ଏଥିପାଇଁ ଆଇପିଏଲର ୮ଟି ଟିମ୍ ଓ ୧୦୦୦ରୁ ଅଧିକ ସଦସ୍ୟଙ୍କୁ ନେଇ ଆଶଙ୍କା ପ୍ରକାଶ ପାଇଥିଲା । ଏହା କୌଣସି ଟିମ୍ ସହ ହୋଇପାରେ । ଦୁର୍ଭାଗ୍ୟବଶତଃ ଚେନ୍ନାଇ ସୁପର କିଙ୍ଗ୍ସ ସହ ଏମିତି ହୋଇଛି ।