ନନ୍ଦିଘୋଷବ୍ୟୁର: ଓଡ଼ିଶା ସିଭିଲ୍ ସର୍ଭିସେସ୍ ପରୀକ୍ଷା ପାଇଁ ପ୍ରସ୍ତୁତି କରୁଥିବା ହଜାର ହଜାର ଆଶାୟୀଙ୍କ ପାଇଁ ଆସିଛି ଖୁସି ଖବର। ଏଣିକି ଓସିଏସ୍ ପରୀକ୍ଷା ଦେବା ପାଇଁ ଆଉ ରହିବନି ସର୍ବାଧିକ ପ୍ରୟାସ ସଂଖ୍ୟାର ସୀମା। ଏନେଇ ରାଜ୍ୟ କ୍ୟାବିନେଟ୍ ବୈଠକରେ ଏକ ବଡ଼ ନିଷ୍ପତ୍ତି ନିଆଯାଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଓସିଏସ୍ ପରୀକ୍ଷାରୁ ପ୍ରୟାସ ସୀମା ହଟାଇବା ପ୍ରସ୍ତାବକୁ ଅନୁମୋଦନ ମିଳିଛି।
ଓଡ଼ିଶା ସିଭିଲ୍ ସର୍ଭିସେସ୍ ନିୟମାବଳୀ, ୧୯୯୧ରେ ସଂଶୋଧନ ପାଇଁ କ୍ୟାବିନେଟ୍ ମଞ୍ଜୁରୀ ଦେଇଛି। ଏହାଦ୍ୱାରା ମୁଖ୍ୟମନ୍ତ୍ରୀ ଗତ ଅଗଷ୍ଟ ୧୫ ତାରିଖରେ କରିଥିବା ଘୋଷଣା ଏବେ ଆନୁଷ୍ଠାନିକ ଅନୁମୋଦନ ପାଇଛି। ତେବେ ନୂଆ ନିୟମ ଅନୁଯାୟୀ, ଓସିଏସ୍ ପରୀକ୍ଷାରେ ଅଂଶଗ୍ରହଣ ପାଇଁ ରହିଥିବା ସର୍ବାଧିକ ପ୍ରୟାସ ସଂଖ୍ୟାର କଟକଣାକୁ ଉଚ୍ଛେଦ କରାଯାଇଛି। ଫଳରେ ନିର୍ଦ୍ଧାରିତ ବୟସ ସୀମା, ଶିକ୍ଷାଗତ ଯୋଗ୍ୟତା ଓ ଅନ୍ୟାନ୍ୟ ଆବଶ୍ୟକ ସର୍ତ୍ତ ପୂରଣ କରୁଥିବା ପ୍ରାର୍ଥୀ ଯେତେଥର ଚାହିଁବେ ପରୀକ୍ଷା ଦେଇପାରିବେ।
ପୂର୍ବରୁ ଓସିଏସ୍ ପରୀକ୍ଷା ପାଇଁ ବିଭିନ୍ନ ବର୍ଗର ପ୍ରାର୍ଥୀଙ୍କ ନିମନ୍ତେ ଭିନ୍ନ ଭିନ୍ନ ପ୍ରୟାସ ସୀମା ରହିଥିଲା। ଅଣସଂରକ୍ଷିତ ବର୍ଗର ପ୍ରାର୍ଥୀ ସର୍ବାଧିକ ୬ ଥର ପରୀକ୍ଷା ଦେଇପାରୁଥିବା ବେଳେ ସାମାଜିକ ଓ ଶିକ୍ଷାଗତ ଅନଗ୍ରସର ବର୍ଗ (SEBC) ପ୍ରାର୍ଥୀଙ୍କ ପାଇଁ ୯ ଥର ସୁଯୋଗ ରହିଥିଲା। ଅନ୍ୟପଟେ ଅନୁସୂଚିତ ଜାତି (SC) ଓ ଅନୁସୂଚିତ ଜନଜାତି ବର୍ଗର ପ୍ରାର୍ଥୀଙ୍କ ପାଇଁ ପୂର୍ବରୁ କୌଣସି ପ୍ରୟାସ ସୀମା ନଥିଲା।
କ୍ୟାବିନେଟ୍ର ଏହି ନିଷ୍ପତ୍ତି ପରେ ଏବେ ସବୁ ବର୍ଗର ଯୋଗ୍ୟ ପ୍ରାର୍ଥୀଙ୍କ ପାଇଁ ପ୍ରୟାସ ସଂଖ୍ୟାର କଟକଣା ହଟିଛି। ଅର୍ଥାତ୍, ଜଣେ ପ୍ରାର୍ଥୀ ପୂର୍ବରୁ କେତେଥର ଓସିଏସ୍ ପରୀକ୍ଷା ଦେଇଛନ୍ତି, ଆଉ ତାଙ୍କ ପାଇଁ ବାଧକ ହେବନାହିଁ। ତେବେ ପ୍ରାର୍ଥୀଙ୍କୁ ନିର୍ଦ୍ଧାରିତ ବୟସ ସୀମା ଓ ଅନ୍ୟାନ୍ୟ ଯୋଗ୍ୟତା ମାନଦଣ୍ଡ ପୂରଣ କରିବାକୁ ପଡ଼ିବ। ଉଲ୍ଲେଖଯୋଗ୍ୟ, ପ୍ରଯୁଜ୍ୟ ନିୟମ ଅନୁଯାୟୀ ସର୍ବୋଚ୍ଚ ବୟସ ସୀମା ୪୨ ବର୍ଷ ରହିଛି।
ସାଧାରଣ ପ୍ରଶାସନ ଓ ଲୋକ ଅଭିଯୋଗ ବିଭାଗ ପକ୍ଷରୁ ଜାରି କ୍ୟାବିନେଟ୍ ପ୍ରେସ୍ ବିବରଣୀ ଅନୁଯାୟୀ, ଏହି ସଂଶୋଧନର ମୁଖ୍ୟ ଉଦ୍ଦେଶ୍ୟ ହେଉଛି ଯୋଗ୍ୟ ପ୍ରାର୍ଥୀଙ୍କୁ ଅଧିକ ସୁଯୋଗ ଦେବା ସହ ନିଯୁକ୍ତି ପ୍ରକ୍ରିୟାକୁ ଅଧିକ ନ୍ୟାୟସଙ୍ଗତ ଓ ମେଧାଭିତ୍ତିକ କରିବା। ବିଶେଷକରି, ପୂର୍ବ ନିୟମ ଅନୁଯାୟୀ ନିଜର ସମସ୍ତ ପ୍ରୟାସ ଶେଷ କରିସାରିଥିଲେ ମଧ୍ୟ ଏବେ ବି ବୟସ ସୀମା ମଧ୍ୟରେ ଥିବା ଆଶାୟୀମାନେ ଏହି ନିଷ୍ପତ୍ତିରୁ ଲାଭବାନ ହେବେ।
