ଶିଖ୍ ଶ୍ରଦ୍ଧାଳୁଙ୍କ ପାଇଁ ଖୁସି ଖବର, କରତାରପୁର ପାଇଁ ଚୁକ୍ତି ସ୍ୱାକ୍ଷର

ବହୁ ପ୍ରତୀକ୍ଷିତ କରତାରପୁର କରିଡର ଖୋଲିବ ବୋଲି ପାକ୍ ପ୍ରଧାନମନ୍ତ୍ରୀଙ୍କ ଘୋଷଣା ପରେ ଆଜି ଦୁଇ ଦେଶ ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ ହୋଇଛି । ୨ ଦେଶର ଅଧିକାରୀ ଜିରୋ ପଏଣ୍ଟରେ ଏହି ବୁଝାମଣାପତ୍ର ସ୍ୱାକ୍ଷର କରିଛନ୍ତି । ଆସନ୍ତା ନଭେମ୍ବର ୯ ତାରିଖରେ ପାକିସ୍ତାନ ପ୍ରଧାନମନ୍ତ୍ରୀ ଓ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କରତାରପୁର କରିଡରକୁ ଉଦଘାଟନ କରିବେ । 

ଦୁଇ ଦେଶ ମଧ୍ୟରେ କରତାରପୁର କରିଡର ନେଇ ବୁଝାମଣା ହୋଇଥିଲେ ମଧ୍ୟ ଶ୍ରଦ୍ଧାଳୁଙ୍କ ଠାରୁ ୨୦ ଡଲାର ଆଦାୟ ନେଇ ପାକିସ୍ତାନର ନିଷ୍ପତ୍ତି ଉପରେ ଭାରତ ସହମତି ପ୍ରକାଶ କରିନାହିଁ । ଭାରତର ବିରୋଧ ସତ୍ତ୍ୱେ କରତାରପୁର ଗୁରୁଦ୍ୱାର ଯିବାକୁ ଥିବା ତୀର୍ଥଯାତ୍ରୀଙ୍କ ଠାରୁ ପାକିସ୍ତାନ ଶୁଳ୍କ ଆଦାୟ କରିବ । ତଥାପି ଧାର୍ମିକ ଭାବନାକୁ ଆଖିରେ ରଖି ଭାରତ ଚୁକ୍ତି ସ୍ୱାକ୍ଷର କରିଛି ।

ଶିଖ୍ ଧର୍ମର ପ୍ରଣେତା ଗୁରୁ ନାନକ ଦେବଙ୍କ ୫୫୦ତମ ଜୟନ୍ତୀ ପାଇଁ ପ୍ରଥମ ଦଫାରେ ନଭେମ୍ବର ୫ ତାରିଖ ଓ ଦ୍ୱିତୀୟ ପର୍ଯ୍ୟାୟରେ ୬ ତାରିଖ ଶ୍ରଦ୍ଧାଳୁମାନେ କରତାରପୁର ଯିବେ ।

କରତାରପୁର କାହିଁକି ପ୍ରସିଦ୍ଧ ?

ଶିଖ୍ ଧର୍ମାବଲମ୍ବୀଙ୍କ ପାଇଁ ପବିତ୍ର ସ୍ଥାନମାନଙ୍କ ମଧ୍ୟରେ ଅନ୍ୟତମ ହେଉଛି କରତାରପୁର କରିଡର । କରତାରପୁର ସାହିବ ଶିଖମାନଙ୍କ ପ୍ରଥମ ଗୁରୁ, ଗୁରୁନାନକ ଦେବଙ୍କ ରହଣୀ ସ୍ଥଳ । ଗୁରୁ ନାନକ ତାଙ୍କ ଜୀବନ କାଳର ଶେଷ ୧୭ ବର୍ଷ ୫ ମାସ ୯ ଦିନ କରତାରପୁରରେ ବିତାଇ ଥିଲେ । ଏଠାରେ ଗୁରୁ ନାନକଙ୍କ ବାପା, ମାଆଙ୍କ ସହ ତାଙ୍କ ଦେହାନ୍ତ ହୋଇଥିବା ଦୃଷ୍ଟିରୁ ଏହାକୁ ଶିଖ୍ ଧର୍ମାବଲମ୍ବୀଙ୍କ ପବିତ୍ର ସ୍ଥାନ କୁହାଯାଉଛି ।

')}