କଟକ: କଟକ ବାଲିଯାତ୍ରାକୁ ନେଇ ଜୋରଦାର ପ୍ରସ୍ତୁତି ଆରମ୍ଭ । ଆଉ ମାତ୍ର ୧୪ ଦିନ ପରେ ଆରମ୍ଭ ହେବ ଓଡ଼ିଶାର ଐତିହାସିକ ବାଲିଯାତ୍ରା। ଏଥିପାଇଁ ଚଳଚଞ୍ଚଳ ହୋଇଉଠିଛି ମହାନଦୀ କୂଳର ଉପର ଓ ତଳ ପଡ଼ିଆ।
ଚଳିତବର୍ଷ ବାଲିଯାତ୍ରା ପାଇଁ ପ୍ରାୟ ୧୫୦୦ଟି ବାଣିଜ୍ୟିକ ପ୍ଲଟ୍ ଆବଣ୍ଟନ ସରିଥିବାବେଳେ ଆଉ ୩୦୦ଟି ଷ୍ଟଲ୍ ପାଇଁ ଆଜି ଅର୍ଥାତ୍ ନଭେମ୍ବର ୧୦ ତାରିଖରେ ସ୍ୱତନ୍ତ୍ର ନିଲାମ ହେବ। ସେହିପରି ନଭେମ୍ବର ୧୧ ଓ ୧୨ ତାରିଖରେ ଅବିକ୍ରି ଷ୍ଟଲ୍ ପାଇଁ ନୂଆ ପଞ୍ଜୀକରଣ କରାଯିବ। ଏହାପରେ ୧୩ ତାରିଖରେ ଶେଷ ପର୍ଯ୍ୟାୟ ନିଲାମ ହେବ।
ଅନ୍ୟପଟେ ବାଲିଯାତ୍ରା ପଡ଼ିଆରେ ଆରମ୍ଭ ହୋଇଗଲାଣି ସାଜସଜ୍ଜା ଓ ଭିତ୍ତିଭୂମି ନିର୍ମାଣ କାମ। ଅସ୍ଥାୟୀ ଷ୍ଟଲ୍, ମୁଖ୍ୟ ଗେଟ୍ ଓ ସୁରକ୍ଷା ବ୍ୟାରିକେଡ୍ ନିର୍ମାଣ ଚାଲିଛି। ଏହାସହ ମନୋରଞ୍ଜନ ପାଇଁ ବିଭିନ୍ନ ଦୋଳି ଓ ରାଇଡ୍ ମଧ୍ୟ ପଡ଼ିଆକୁ ଅଣାଯାଉଛି। ଏଥର ଲକ୍ଷାଧିକ ଲୋକଙ୍କ ସମାଗମକୁ ଆଖିରେ ରଖି ପାନୀୟ ଜଳ, ବିଦ୍ୟୁତ୍, ପରିମଳ ଓ ଜରୁରୀକାଳୀନ ଚିକିତ୍ସା ବ୍ୟବସ୍ଥା ଉପରେ ମଧ୍ୟ ପ୍ରଶାସନ ଗୁରୁତ୍ୱ ଦେଉଛି।
ତେବେ ନଭେମ୍ବର ୨୪ରୁ ଡିସେମ୍ବର ୧ ପର୍ଯ୍ୟନ୍ତ ଆଠ ଦିନ ଧରି ଚାଲିବ ଏହି ଐତିହାସିକ ମେଳା।
