ଘନାଉଛି ଆଉ ଏକ ଯୁଦ୍ଧ, ଇସ୍ରାଏଲର ପରବର୍ତ୍ତୀ ଟାର୍ଗେଟରେ ଇରାନ !

ନନ୍ଦିଘୋଷ ବ୍ୟୁରୋ : ଏବେ ପଶ୍ଚିମ ଏସିଆରେ ଅଶାନ୍ତ ପରିବେଶ । ଆଗାମୀ ସମୟରେ ମଧ୍ୟ ଜାରି ରହିପାରେ ଏପରି ପରିସ୍ଥିତି । ସେପଟେ ଆମେରିକା ମଧ୍ୟ ଇସ୍ରାଏଲକୁ ସାହାଯ୍ୟ କରିବା ନେଇ ଘୋଷଣା କରିଦେଇ ସାରିଲାଣି । ଅନ୍ୟପକ୍ଷେ ବର୍ତ୍ତମାନର ବିବାଦ ପଶ୍ଚିମ ଏସିଆରେ ତିକ୍ତକାକୁ ଆହୁରି ଘନିଭୂତ କରିଦେଇଛି, ଯାହା ଫଳରେ ଆଉ ଏକ ଗଲ୍ଫ  ଯୁଦ୍ଧ ହେବା ନେଇ ଆଶଙ୍କା ସୃଷ୍ଟି ହୋଇଛି ।

ଇସ୍ରାଏଲରେ ଏବେ ବି ଯୁଦ୍ଧ ପରିସ୍ଥିତି ଜାରି ରହିଛି  ଏବଂ ବର୍ଷ ବର୍ଷ ଧରି ପଡୋଶୀ ଦେଶରେ ମଧ୍ୟ ଆକ୍ରମଣ ହେଉଛି । ଇସ୍ରାଇଲ ଉପରେ ପାଲେଷ୍ଟାଇନ  ସଂଗଠନ ହମାସ, ଲେବାନାସ ରୁ ହିଜ୍ଜିବୁଲ୍ଲାହ, ୟମନ ରୁ ହୁତୀ ବିଦ୍ରୋହୀ, ଇରାକ ଏବଂ ସିରିଆ ଲଗାତାର ମିଶିକରି ମିଶାଇଲ ଆକ୍ରମଣ କରୁଛନ୍ତି ।  ସେପଟେ ଇରାନ ଉପରେ ବି ଆକ୍ରମଣର କଳାବାଦଲ ରହିଛି । ଏହା  ଭିତର ବି ଇସ୍ରାଏଲ ସେନା ନିଜ ଶତ୍ରୁଙ୍କୁ ଗୋଟି ଗୋଟି କରି ମାରୁଛି । ଯାହାକୁ ଦେଖିଲେ ଏହି ଯୁଦ୍ଧ ଶେଷ ହେବା ଭଳି ଲାଗୁ ନାହିଁ  ।

ଯୁଦ୍ଧ ଆରମ୍ଭ କରିଥିଲା ହମାସ କିନ୍ତୁ ଏହାକୁ ଇସ୍ରାଏଲ ଶେଷ କରିବା ପରି ଜଣାପଡୁଛି । ଅକ୍ଟୋବର ୭ , ୨୦୨୩ରେ ସର୍ବପ୍ରଥମେ ହମାସର ସେନା ଇସ୍ରାଏଲରେ ପଶି ନରସଂହାର କରିଥିଲେ । ଯାହାର ପରିଣାମ ସ୍ୱରୂପ ଇସ୍ରାଏଲ ସେନା ପାଲେଷ୍ଟାଇନ ଏବଂ ଗାଜାକୁ ଧ୍ୱସଂ କରିଦେଲାଣି । ଯାହା ପରେ ଏବେ ବିପଦରେ ରହିଛନ୍ତି ହମାସର ସହଯୋଗୀ ରାଷ୍ଟ୍ର । ସପ୍ତାହ ଧରି ଲେବନାନରେ ଜୋରଦାର ଆକ୍ରମଣ କରି ଧୂଳିସାତ୍ କରିଦେଲା ଇସ୍ରାଏଲ ସେନା । ଏହାରି ମଧ୍ୟରେ ହେଜବୁଲ୍ଲାର କାର୍ଯ୍ୟକାରୀ ପରିଷଦ ମୁଖ୍ୟଙ୍କର ମଧ୍ୟ ମୃତ୍ୟୁ ହୋଇଛି ଏବଂ ଇସ୍ରାଏଲର ପ୍ରତିରକ୍ଷା ବାହିନୀ ହୁତି ବିଦ୍ରେହୀମାନଙ୍କ ଉପରେ ବୋମା ପକାଇଛି ।

ହେଜବୁଲ୍ଲା ହେଉଛି ଲେବାନୀୟ ଆତଙ୍କବାଦୀ ସଂଗଠନ । ସୂଚନା ଅନୁଯାୟୀ, ଯେତେବେଳେ ହମାସ ଇସ୍ରାଏଲରେ ପ୍ରବେଶ କରି ହତ୍ୟାକାଣ୍ଡ ଘଟାଇଥିଲା, ସେତେବେଳେ ଇସ୍ରାଏଲ ଏହି ଆକ୍ରମଣର ପ୍ରତିଉତ୍ତର ସମାନ ଭାବେ ଭୟଙ୍କର ହେବ ବୋଲି ନିଷ୍ପତ୍ତି ନେଇଥିଲା । ପ୍ରଥମେ ଇସ୍ରାଏଲ ହମାସରେ ବଡ଼ ବଡ଼ ଏୟାରଷ୍ଟ୍ରାଇକ କରି ଧ୍ୱସଂ କରିଦେଲା । ଏହା ପରେ ଏବେ ଇସ୍ରାଏଲ ଟାଗେର୍ଟରେ ହମାସକୁ ସମର୍ଥନ କରୁଥିବା ସଂଗଠନ ଲେବନାନ ଏବଂ ହୁତୀ  ।

ନିକଟରେ ଇରାନର ରାଜଧାନୀ ତେହରାନରେ ହମାସ ମୁଖ୍ୟ ଇସମାଇଲ ହାନିଆଙ୍କୁ ହତ୍ୟା କରାଯାଇଥିଲା । ଯାହାର ଦୋଷ ଇସ୍ରାଏଲ ଉପରେ ପଡିଲା । ଏହି ଆକ୍ରମଣ ପରେ କ୍ରୋଧରେ ଜର୍ଜରିତ ଇରାନ ଏହାର ପ୍ରତିଶ୍ରୋଧ ନେବାକୁ ଅଣ୍ଟା ଭିଡିଛି । ଏବେ ଇରାନ ନା କେବଳ ହେଜବୁଲ୍ଲାକୁ ସମର୍ଥନ କରୁଛି ବରଂ ଯୁଦ୍ଧ ପାଇଁ ଯଥା ସମ୍ଭବ ସହାୟତା ମଧ୍ୟ ଯୋଗାଉଛି । ଯାହା ଫଳରେ ପଶ୍ଚିମ ଏସିଆରେ ଭୟଙ୍କର ସ୍ଥିତି ଉପୁଜୁଛି । ଏହି କ୍ଷେତ୍ରରେ ଏବେ ଏକ ବଡ଼ ଧରଣର ଯୁଦ୍ଧ ନେଇ ଆଶଙ୍କା କରାଯାଉଛି ।

ଯଦି ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧ ହୁଏ, ତେବେ ଏହାର ପ୍ରଭାବ କେବଳ ଏହି ଦୁଇ ରାଷ୍ଟ୍ର ଉପରେ ନୁହେଁ ବରଂ ଗଲ୍ଫ କ୍ଷେତ୍ରର ଅନ୍ୟ ଦେଶମାନଙ୍କରେ ଯଥା ଆରବ, କୁବେତ, ଓମାନ ଏବଂ ସଂଯୁକ୍ତ ଆରବ ରାଷ୍ଟ୍ର ମାନଙ୍କ ଉପରେ ପଡିବ । ଇରାନ ସହ ଅନେକ ସଙ୍ଗଠନ ଯେପରିକି ଲେବନାନର ହେଜବୁଲ୍ଲା, ୟମନର ହୁତୀ ବିଦ୍ରୋହୀ ଯୋଡି ହୋଇଯାଇଛନ୍ତି । ଅନ୍ୟପକ୍ଷେ ସାଉଦି ଆରବ , ସଂଯୁକ୍ତ ଆରବ ଲମିରେଟ୍ସ  ଏବଂ ଅନ୍ୟାନ୍ୟ ରାଷ୍ଟ୍ର ନୀରବ ରହିଛନ୍ତି । କତାର ଏବେ ଖୋଲାଖୋଲି ଭାବେ କାହାକୁ ସମର୍ଥନ କରିନାହିଁ କିମ୍ୱା ବିରୋଧ ମଧ୍ୟ କରିନାହିଁ । ବିଶେଷଜ୍ଞଙ୍କ ମତରେ ଯଦି ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧ ହୁଏ , ତେବେ ଏହା ଆଞ୍ଚଳିକ ବିବାଦର ରୂପ ନେଇ ପାରେ ,ଯେଉଁଥିରେ ଗଲ୍ଫ ଦେଶ ମଧ୍ୟ ଅନ୍ତର୍ଭୁକ୍ତ ହୋଇପାରନ୍ତି ।