ଆଉ ତିନି ବର୍ଷ ପରେ ପ୍ରାଇଭେଟ୍ ଟ୍ରେନ୍, ଜାଣନ୍ତୁ କେଉଁ ବର୍ଷ କେତେ ଗଡ଼ିବ ନୂଆ…
1 min read
ନୂଆଦିଲ୍ଲୀ: ଆଗାମୀ ତିନି ବର୍ଷ ମଧ୍ୟରେ ଦେଶରେ ଗଡ଼ିବ ବେସରକାରୀ ଟ୍ରେନ୍ । ପ୍ରଥମ ବ୍ୟାଚ୍ ୨୦୨୩ରେ ୧୨ଟି ଟ୍ରେନ୍ର ଚଳାଚଳ ଆରମ୍ଭ ହେବ । ଏହା ପରେ ଆଗାମୀ ଆର୍ଥିକ ବର୍ଷରେ ୪୫ଟି ଟ୍ରେନ୍ ଆରମ୍ଭ ହେବ ବୋଲି ଯୋଜନା କରାଯାଇଛି । ରେଳ ଅଧିକାରୀଙ୍କ ଅନୁଯାୟୀ, ଏହିପରି ୧୫୧ଟି ବେସରକାରୀ ଟ୍ରେନ୍ ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ୨୦୨୭ ସୁଦ୍ଧା ଆରମ୍ଭ ହୋଇଯିବ । ରେଳ ବିଭାଗ ବେସରକାରୀ କମ୍ପାନୀମାନଙ୍କୁ ନିଜ ନେଟୱାର୍କରେ ଯାତ୍ରୀବାହୀ ଟ୍ରେନ୍ ଚଲାଇବା ପାଇଁ ଆନୁଷ୍ଠାନିକ ଭାବେ ଅନୁମତି ଦେବାକୁ ଯୋଜନା ପ୍ରସ୍ତୁତ କରୁଛି । ଏହି ମାସ ଆରମ୍ଭରେ ଦେଶର ୧୦୯ ଯୋଡ଼ି ରୁଟ୍ରେ ୧୫୧ଟି ଆଧୁନିକ ଯାତ୍ରୀବାହୀ ଟ୍ରେନ୍ ଚଳାଇବା ପାଇଁ ରେଳ ବିଭାଗ ପ୍ରସ୍ତାବ ଆମନ୍ତ୍ରଣ କରିଛି ।
ରେଳ ବିଭାଗ ୨୦୨୨-୨୩ରେ ୧୨ଟି ଅତ୍ୟାଧୁନିକ ବେସରକାରୀ ଟ୍ରେନ୍ ଚଳାଇବାକୁ ଯୋଜନା କରୁଛି । ଏହା ପରେ, ୨୦୨୩-୨୪ରେ ୪୫ଟି ଟ୍ରେନ୍, ୨୦୨୫-୨୬ରେ ୫୦ ଏବଂ ପରବର୍ତ୍ତୀ ଆର୍ଥିକ ବର୍ଷରେ ୪୪ଟି ଟ୍ରେନ୍ ଆରମ୍ଭ କରିବାର ଯୋଜନା କରିଛି । ଏହିପରି, ୨୦୨୬-୨୭ ଆର୍ଥିକ ବର୍ଷ ସୁଦ୍ଧା ମୋଟ ୧୫୧ ଟ୍ରେନ୍ ଆରମ୍ଭ ଚଳାଇବା ଯୋଜନା ରହିଛି । ଏହି ପରିପ୍ରେକ୍ଷୀରେ, ୮ ଜୁଲାଇରେ ଜାରି କରାଯାଇଥିବା ଅନୁରୋଧ (RFQ) ନଭେମ୍ବର ସୁଦ୍ଧା ଚୂଡାନ୍ତ ହେବ ଏବଂ ମାର୍ଚ୍ଚ ୨୦୨୧ ସୁଦ୍ଧା ଆର୍ଥିକ ବିଡ୍ ଖୋଲାଯିବ ବୋଲି ଆଶା କରାଯାଉଛି । ଏହା ପରେ, ୩୧ ଏପ୍ରିଲ ୨୦୨୧ ସୁଦ୍ଧା ବିଡ୍ରେ ଭାଗ ନେଇଥିବା କମ୍ପାନୀ ମଧ୍ୟରୁ ଚୟନ କରାଯିବ । ଏହି ଅଧିକାରୀ କହିଛନ୍ତି ଯେ, ମୋଟ ରାଜସ୍ୱରେ ସର୍ବାଧିକ ଅଂଶ ପ୍ରଦାନ କରୁଥିବା ବିଡରମାନଙ୍କୁ ଏହି ପ୍ରକଳ୍ପ ପ୍ରଦାନ କରାଯିବ ।
ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଆମେ ଏକ ଯୋଜନା ପ୍ରସ୍ତୁତ କରିଛୁ, ଯାହା ଅଧୀନରେ ଆମେ ଘରୋଇ ଟ୍ରେନ୍ କାର୍ଯ୍ୟ ଆରମ୍ଭ କରିବାକୁ ଆଶା ରଖିଛୁ । ମାର୍ଚ୍ଚ ୨୦୨୧ ସୁଦ୍ଧା ଟେଣ୍ଡରଗୁଡିକ ଚୂଡାନ୍ତ ହେବ ଏବଂ ଟ୍ରେନ୍ ମାର୍ଚ୍ଚ ୨୦୨୩ରୁ ପରିଚାଳନା ଆରମ୍ଭ କରିବ । ରେଳବାଇ କହିଛି ଯେ ୭୦ ପ୍ରତିଶତ ଘରୋଇ ଟ୍ରେନ୍ ଭାରତରେ ପ୍ରସ୍ତୁତ କରାଯିବ । ଯାହାର ଘଣ୍ଟା ପ୍ରତି ସର୍ବାଧିକ ୧୬୦ କିଲୋମିଟର ବେଗ ରହିବ । ସେହି ଅନୁସରାରେ ଏହି ଟ୍ରେନ୍ ଗୁଡ଼ିକର ଡିଜାଇନ୍ କରାଯିବ ।
