ଦେଶରେ ୨୪ଘଣ୍ଟରେ ରେକର୍ଡ ସଂଖ୍ୟକ ସଂକ୍ରମଣ,ଗୋଟିଏ ଦିନରେ ୪୦ ହଜାର ସଂକ୍ରମିତ
ନୂଆଦିଲ୍ଲୀ: ଦେଶରେ ଗୋଟିଏ ଦିନରେ ରେକର୍ଡ ସଂକ୍ରମଣ । ଗତ ୨୪ ଘଣ୍ଟା ମଧ୍ୟରେ ୪୦ ହଜାର ୪୨୫ ଜଣ ସଂକ୍ରମିତ ହୋଇଥିବା ବେଳେ ୬୮୧ ଜଣଙ୍କ ମୃତ୍ୟୁ ହୋଇଛି । ଏଥିସହ ଦେଶରେ କରୋନା ଆକ୍ରାନ୍ତ ସଂଖ୍ୟା ୧୧ ଲକ୍ଷ ଟପିଛି । ସେହିପରି କରୋନା ମୃତ୍ୟୁ ୨୭ ହଜାର ପାର ହୋଇଛି । ଏହାସହ ଦେଶରେ ସମୁଦାୟ ସଂକ୍ରମିତଙ୍କ ସଂଖ୍ୟା ୧୧ଲକ୍ଷ ୧୮ହଜାର ୪୩ରେ ପହଞ୍ଚିଛି । ୩ଲକ୍ଷ ୯୦ ହଜାର ୪୫୯ ଆକ୍ଟିଭ୍ କେସ ରହିଥିବା ବେଳେ ୭ଲକ୍ଷରୁ ଅଧିକ ସଂକ୍ରମିତ ଚିକିତ୍ସା ପରେ ସୁସ୍ଥ ହୋଇଛନ୍ତି । ଦେଶରେ କରୋନା ଆରୋଗ୍ୟ ହାର ୬୨.୬୧ ରହିଛି ।
କରୋନା ସଂକ୍ରମିତଙ୍କ ସଂଖ୍ୟା ହିସାବରେ ଭାରତ ବିଶ୍ୱର ତୃତୀୟ ପ୍ରଭାବିତ ଦେଶ । ଆମେରିକା , ବ୍ରାଜିଲ ପରେ କରୋନା ମହାମାରୀରେ ସବୁଠୁ ଅଧିକ ପ୍ରଭାବିତ ଭାରତ ହୋଇଛି । ଯଦି ଆମେ ପ୍ରତି ୧୦ଲକ୍ଷ ଜନସଂଖ୍ୟା ଉପରେ ସଂକ୍ରମିତ ମାମଲା ଏବଂ ମୃତ୍ୟୁ ସଂଖ୍ୟାର କଥା କୁହାଯାଏ ତ ଅନ୍ୟ ଦେଶ ତୁଳନାରେ ଭାରତର ସ୍ଥିତି ବହୁତ ଭଲ ରହିଛି । ଆମେରିକାରେ ୩,୮୯୬,୮୫୫ଜଣ ସଂକ୍ରମିତ ହୋଇଥିବା ବେଳେ ବ୍ରାଜିଲରେ ୨,୦୯୯,୮୯୬ଜଣ ସଂକ୍ରମିତ ହୋଇଛନ୍ତି । ଦେଶରେ କରୋନା ମାମଲାରେ ବୃଦ୍ଧି ହେବାର ଗତି ମଧ୍ୟ ବିଶ୍ୱରେ ତୃତୀୟ ସ୍ଥାନରେ ରହିଛି।
କରୋନା ସଂକ୍ରମିତ ରାଜ୍ୟ ତାଲିକାରେ ଶୀର୍ଷରେ ରହିଛି ମହାରାଷ୍ଟ୍ର । ରାଜ୍ୟରେ ୩ ଲକ୍ଷ ୧୦ ହଜାରରୁ ଅଦିକ ପଜିଟିଭ ଚିହ୍ନଟ ହୋଇଥିବା ବେଳେ ୧୧ ହଜାରରୁ ଅଧିକ ଜୀବନ ନେଇଛି କିଲର ଭାଇରସ । ଗତ ସପ୍ତାହରେ ଦେଶରେ ୨ଲକ୍ଷ ୩୦ ହଜାରରୁ ଅଧିକ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି ୪ହଜାରରୁ ଅଧିକଙ୍କ ଜୀବନ ଯାଇଛି ।
ସର୍ବାଧିକ ଆକ୍ଟିଭ୍ କେସ ଥିବା ଶ୍ରେଷ୍ଠ ୫ଟି ରାଜ୍ୟ
ଜନସଂଖ୍ୟା ଅନୁସାରେ, ଦେଶରେ ଏହି ସମୟରେ ୪ଲକ୍ଷ କରୋନାର ଆକ୍ଟିଭ୍ କେସ ରହିଛି । ଏବଂ ସବୁଠୁ ଅଧିକ ଆକ୍ଟିଭ୍ କେସ ମହାରାଷ୍ଟ୍ରରେ ଚିହ୍ନଟ ହୋଇଛି । ମହାରାଷ୍ଟ୍ରରେ ଏକ ଲକ୍ଷରୁ ଅଧିକ ସଂକ୍ରମିତଙ୍କ ହସ୍ପିଟାଲରେ ଚିକିତ୍ସା ଚାଲିଛି । ଏହାସହ ଦ୍ୱିତୀୟ ସ୍ଥାନରେ ରହିଛି ତାମିଲନାଡ଼ୁ, ତୃତୀୟ ସ୍ଥାନରେ ରହିଛି କର୍ଣ୍ଣାଟକ ୪ର୍ଥ ନମ୍ବରରେ ରହିଛି ଆନ୍ଧ୍ରପ୍ରଦେଶ ଏବଂ ୫ମ ସ୍ଥାନରେ ରହିଛି ଦିଲ୍ଲୀ । ଏହି ୫ଟି ରାଜ୍ୟରେ ସବୁଠୁ ଅଧିକ ସକ୍ରିୟ ମାମଲା ରହିଛି । ଏହାସହ ଭାରତ ସକ୍ରିୟ ସଂକ୍ରମିତଙ୍କ ମାମଲାରେ ୪ର୍ଥ ସ୍ଥାନରେ ରହିଛି ।
