ଋଷ ପରାଜୟ ହେଲେ ଘଟିପାରେ ଆଣବିକ ଯୁଦ୍ଧ

ମସ୍କୋ: ଯୁଦ୍ଧରେ ଯଦି ଋଷର ପରାଜୟ ହୁଏ ତେବେ ଆଣବିକ ଯୁଦ୍ଧ ଘଟିପାରେ ବୋଲି ଆଶଙ୍କା ବ୍ୟକ୍ତ କରିଛନ୍ତି ଋଷର ପୂର୍ବତନ ରାଷ୍ଟ୍ରପତି ଦିମିତ୍ରି ମେଦଭେଦେବ । ୟୁକ୍ରେନ ଯୁଦ୍ଧ ପ୍ରସଙ୍ଗରେ ସେ କହିଛନ୍ତି ଯଦି ପାରମ୍ପରିକ ଯୁଦ୍ଧରେ କୌଣସି ଆଣବିକ ଶକ୍ତି ସମ୍ପନ୍ନ ରାଷ୍ଟ୍ରର ପରାଜୟ ଘଟେ ତେବେ ଆଣବିକ ଯୁଦ୍ଧ ଆଶଙ୍କାକୁ ଏଡାଇ ଦିଆଯାଇପାରିବ ନାହିଁ ।

ସେ କହିଛନ୍ତି- ଅଧିକାଂଶ ପ୍ରମୁଖ ବିବାଦରେ ଆଣବିକ ଶକ୍ତି ସମ୍ପନ୍ନ ରାଷ୍ଟ୍ରମାନେ କେବେ ବି ପରାଜିତ ହୋଇନାହା୍ନ୍ତି । ଯଦି ୟୁକ୍ରେନକୁ ପାଶ୍ଚାତ୍ୟ ରାଷ୍ଟ୍ର ଅଧିକ ଅସ୍ତ୍ର ଯୋଗାନ୍ତି ତେବେ ଆଣବିକ ଯୁଦ୍ଧ ଘଟିପାରେ ବୋଲି ସେ ସତର୍କ କରାଇଛନ୍ତି । ସେପଟେ ଯଦି ୟୁକ୍ରେନକୁ ଅଧିକ ଅସ୍ତ୍ର ଦେବା ଲାଗି ପାଶ୍ଚାତ୍ୟ ରାଷ୍ଟ୍ର ଆଗ୍ରହୀ ହୁଅନ୍ତି ତେବେ ୟୁକ୍ରେନରେ ପୁନର୍ବାର ଜୋରଦାର ଆକ୍ରମଣ ହେବ ବୋଲି ଧମକ ଦେଇଛି ଋଷ ।

ଆଜି ଜର୍ମାନୀର ରାମଷ୍ଟେନ ଏୟାରବେସରେ ଆମେରିକା ନେତୃତ୍ବରେ ମିତ୍ର ଶକ୍ତିରାଷ୍ଟ୍ରଗୁଡ଼ିକର ପ୍ରତିରକ୍ଷା ମନ୍ତ୍ରୀମାନଙ୍କ ବୈଠକ ଅନୁଷ୍ଠିତ ହେବ । ୟୁକ୍ରେନକୁ ଅଧିକ ଶକ୍ତିଶାଳୀ ଅସ୍ତ୍ର ଯୋଗାଇବା ଲାଗି ଏହି ବୈଠକରେ ନିଷ୍ପତ୍ତି ନିଆଯିବା ସମ୍ଭାବନା ରହିଛି । ସେପଟେ ୟୁକ୍ରେନକୁ ଅଧିକ ଅସ୍ତ୍ରଶସ୍ତ୍ର ନଦେବା ଲାଗି ପାଶ୍ଚାତ୍ୟରାଷ୍ଟ୍ରକୁ ଚେତାବନୀ ଦେଇଛି କ୍ରେମଲିନ । ଆମେରିକା ବା ନାଟୋ ଶକ୍ତି ୟୁକ୍ରେନକୁ ଯେକୌଣସି ଅସ୍ତ୍ର ଯୋଗାଇଲେ ବି ତାହାକୁ ଧ୍ବଂସ କରିଦିଆଯିବ ବୋଲି କହିଛି କ୍ରେମଲିନ ।