ଧୋକା ଦେଲା ବିହନ, ଧାନ ବଦଳରେ ଫଳିଲା ଅଗାଡ଼ି

ଉମରକୋଟ: ଖରା, ବର୍ଷାକୁ ଖାତିର୍ ନକରି ଚଷା ପୁଅ ଚାଷ କରିଥିଲା । ଭଲ ଫସଲ ବି ହେଲା । ଫସଲକୁ ଦେଖି ଉଲ୍ଲସିତ ଥିବା ଚାଷୀଙ୍କ ମୁହଁରେ ଏବେ ଆଉ ସେ ହସ ନାହିଁ । କାରଣ ଧୋକା ଦେଇଛି ବିହନ । ନବରଙ୍ଗପୁର ଜିଲ୍ଲା ଉମରକୋଟର ଚାଷୀ ବୁଲନ୍ଦ୍ ସିଗ୍ନେଟ୍ ବିହନ ଆଣି ଚାଷ କରିଥିଲେ । ଅମଳ ବେଳକୁ କ୍ଷେତରେ ଧାନ ବଦଳରେ ଅଗାଡ଼ି ଫଳିଛି । ଋଣ ନେଇ ଚାଷୀ ଚାଷ କରିଥିବା ବେଳେ ଚାଷୀ ଚିନ୍ତାରେ ପଡ଼ିଛନ୍ତି ।

ଧାନ କ୍ଷେତରେ ଲହରୀ ଭାଙ୍ଗୁଛି ସୁନାର ଫସଲ । ଆଉ ଦିନ କେଇଟା ପରେ ହୋଇଥାନ୍ତା ଅମଳ । ଏହାକୁ ନେଇ ଚାଷୀ ମନରେ ଖୁସି ବଦଳରେ ନିରାଶା ଖେଳି ଯାଇଛି । କାରଣ ବେସରକାରୀ ବୁଲନ୍ଦ୍ ସିଗ୍ନେଟ୍ ୫୦୫୦ ବିହନ ଚାଷୀକୁ ଧୋକା ଦେଇଛି । ଅମଳ ବେଳେ ଧାନ ବଦଳରେ କ୍ଷେତରେ ଖେଳୁଛି ଅଗାଡ଼ି ।

କୃଷି ବିଭାଗ ବିହନ ଯୋଗାଇବାରେ ବିଫଳ ହେବା ପରେ ବ୍ୟବସାୟଙ୍କ ପାଖରୁ ବିହନ କିଣିଥିଲେ ଚାଷୀ । ଆଉ ଏକର ପ୍ରତି ୩୦ରୁ ୩୫ କ୍ୱିଣ୍ଟାଲ ଧାନ ଫଳିବ ବୋଲି ଆଶା ଦେଇଥିଲା ଦୋକାନୀ । କିନ୍ତୁ ଏବେ ୩୫ କ୍ୱିଣ୍ଟାଲ ତ ଦୂରର କଥା ୫ କ୍ୱିଣ୍ଟାଇ ଧାନ ବାହରିବା ଆଶା ରଖିନାହାଁନ୍ତି ଚାଷୀ ।

ଏନେଇ କୃଷି ବିଭାଗ ଅଧିକାରୀଙ୍କୁ ପଚାରିବାରୁ ସେ ପ୍ରାଇଭେଟ୍ କମ୍ପାନୀ କଥା କହି ହାତ ଟେକି ଦେଇଛନ୍ତି । ଅମଳ ବେଳେ କ୍ଷେତରେ ଧାନ ବଦଳରେ ଅଗାଡ଼ି ଦେଖି ଚାଷୀ ହତାଶ ହୋଇପଡ଼ିଥିବା ବେଳେ ସରକାରୀ ସହାୟତା ପାଇଁ ନିବେଦନ କରିଛନ୍ତି ।