ଜଡ଼ିବୁଟି ଚିକିତ୍ସକରୁ ଦେଶୀ ଇଂଜିନିୟର ସାଜିଛନ୍ତି କୋରାପୁଟିଆ ହରି ପାଙ୍ଗି

ଭୁବନେଶ୍ୱର: ଦଇବ ସିନା ଧନ ଦେଇନି, କିନ୍ତୁ ମନ ବିଜ୍ଞାନ ଆଡ଼କୁ ମୁହାଁଇଛି। ଜଡ଼ିବୁଟି ଚିକିତ୍ସକରୁ ସେ ପାଲଟିଛନ୍ତି ଦେଶୀ ଇଂଜିନିୟର। ଆମେ ଆପଣଙ୍କୁ ଏମିତି ଜଣେ ଯୁବକଙ୍କ କଥା କହିବାକୁ ଯାଉଛୁ ଯାହାକୁ ଆର୍ଥିକ ଅନଟନ ଆଗକୁ ବଢ଼ିବାକୁ ଅଟକାଇପାରିନି । ସେ ହେଉଛନ୍ତି କୋରାପୁଟ ଜିଲ୍ଲା ସେମିଳିଗୁଡ଼ା ବ୍ଲକ ତେନ୍ତୁଳିଗୁଡ଼ା ଗାଁ ହରି ପାଙ୍ଗି ।

ହରି ପାଙ୍ଗିଙ୍କ ପରିବାର ପୁରୁଷ ପୁରୁଷ ଧରି ଜଡ଼ିବୁଟି ଚିକିତ୍ସା କରିଆସୁଛନ୍ତି । କୋରାପୁଟର ପାହାଡ଼ି ଅଂଚଳରୁ ଜଡ଼ିବୁଟି ସଂଗ୍ରହ କରି ବିଭିନ୍ନ ରୋଗ ପାଇଁ ଔଷଧ ତିଆରି କରନ୍ତି ହରି । ସେ ଜଡ଼ିବୁଟି ଚିକିତ୍ସକ ଭାବେ ଯେତିକି ନାଁ କରି ନ ଥିଲେ ଦେଶୀ ଇଂଜିନିୟର ଭାବେ କାହିଁ କେତେଗୁଣା ନାଁ କରିଛନ୍ତି ।

ହରିଙ୍କ କହିବା କଥା ହେଉଛି, କୋରାପୁଟର ଆଦିବାସୀଙ୍କ ଜୀବନଧାରଣର ମାନ ଦେଖିଲେ ତାଙ୍କୁ ଦୁଃଖ ଲାଗେ। ଆଦିବାସୀ ମହିଳାଙ୍କ ଦୁଃଖ ସେ ନିଜ ଆଖିରେ ଦେଖିଛନ୍ତି । ସେମାନଙ୍କ ଦୁଃଖ ଲାଘବ କରିବା ସହ ଜୀବନଶୈଳୀକୁ ସରଳ କରିବା ପାଇଁ ସେ କିଛି ଅଭିନବ ଯନ୍ତ୍ରପାତି ତିଆରି କରିବାକୁ ସବୁ ବେଳେ ଚିନ୍ତା କରନ୍ତି। ଆଉ ତାଙ୍କର ଉଦ୍ୟମ ବି କିଛି ଅଂଶରେ ସଫଳ ହୋଇଛି ।

ଆପଣ ଯେଉଁ ଚିତ୍ର ଦେଖୁଛନ୍ତି ତାହା ହେଉଛି ହରିଙ୍କ ଉଦ୍ଭାବନ । ଆପଣ ଏମିତି ମେସିନ୍ କେବେ କୋଉଠି ବୋଧହୁଏ ଦେଖି ନ ଥିବେ । ଏ ହେଉଛି ଜାକଫ୍ରୁଟ୍ କଟର ମାନେ ପଣସକଟା ମେସିନ୍ ।ଓଡ଼ିଶା ରୁରାଲ ଡେଭଲପମେଣ୍ଟ ଏଣ୍ଡ ମାର୍କେଟିଂ ସୋସାଇଟି (ଓରମାସ) ପଣସ ଚିପ୍ସ ପ୍ରକଳ୍ପ ପାଇଁ ହରିଙ୍କ ଏହି ମେସିନକୁ ସ୍ୱୀକୃତି ଦେଇଛି ।

ଓରମାସର ଡେପୁଟି ସିଇଓ ରୋଶନ କୁମାର କାର୍ତ୍ତିକଙ୍କ କହିବା ଅନୁସାରେ ଜଙ୍ଗଲ ବିଭାଗ, ବିଭିନ୍ନ ଏନଜିଓ ଯେଉଁମାନେ ପଣସ ଚିପ୍ସ ପ୍ରକଳ୍ପର ସହଯୋଗୀ ଅଛନ୍ତି ସେମାନେ ଏହି ମେସିନକୁ କିଣିବାକୁ ଅର୍ଡ଼ର ଦେଇଛନ୍ତି । କାର୍ତ୍ତିକ ଆହୁରି କହିଛନ୍ତି କେରଳର ପଣସକଟା ମେସିନ୍ ଅପେକ୍ଷା ହରିଙ୍କ ମେସିନ୍ ଅଧିକ କଷ୍ଟ ଇଫେକ୍ଟିଭ । ମାତ୍ର 3 ହଜାର ଟଙ୍କାରେ ହରିଙ୍କ ମେସିନ୍ ମିଳୁଥିବା ବେଳେ କେରଳୀ ମେସିନ ଦର ବହୁ ଅଧିକ ।

ତାଙ୍କ ମେସିନ୍ ସମ୍ପର୍କରେ ହରି କହନ୍ତି ଯେ, ପଣସ ଚିପ୍ସ ତିଆରି ପାଇଁ ମହିଳାମାନଙ୍କ ପଣସ କାଟିବା ବେଳର ଦୃଶ୍ୟ ଦେଖିବା ପରେ ସେ ଏହି ମେସିନ୍ ତିଆରି କରିବା ପାଇଁ ମନସ୍ଥ କରିଥିଲେ । ଆଗକୁ ସେ ଆଉ ଏକ ମେସିନ୍ ବାହାର କରିବାକୁ ଚିନ୍ତା କରୁଛନ୍ତି ଯେଉଁଥିରେ ସହଜରେ ପଣସରୁ ଚୋପା ଛଡ଼ାଇହେବ । ପଣସରୁ ଚୋପା ଛଡ଼ାଇବା ଏକ ବିରକ୍ତିକର କାମ । ପଣସରୁ ଚୋପା ଛଡ଼ାଇବା ବେଳେ ହାତ ଅଠା ହୋଇଯାଏ ।

ହରି ଆହୁରି ମଧ୍ୟ ଚିନ୍ତା କରିଛନ୍ତି ଯେ, ଆଗକୁ ସେ ଏକ ମଶା ନିବାରଣ କଏଲ ବାହାର କରିବାକୁ ଲକ୍ଷ୍ୟ ରଖିଛନ୍ତି । ବଜାରରେ ମିଳୁଥିବା ମଶା କଏଲର ଅଧିକ ଦର ଆଉ ସେଥିରୁ ବିଷାକ୍ତ ଧୂଆଁ ବାହାରୁଥିବାରୁ ଶରୀର ପାଇଁ କ୍ଷତିକାରକ। କିନ୍ତୁ ସେ ଯେଉଁ ମଶା କଏଲ ପାଇଁ ଲକ୍ଷ୍ୟ ରଖିଛନ୍ତି ତାହା ଜଙ୍ଗଲଜାତ ଦ୍ରବ୍ୟରେ ତିଆରି ହେବ, ଦର କମ୍ ରହିବ। ପରୀକ୍ଷାମୂଳକ ଭାବେ ସେ ମଶା ନିବାରଣ ପାଇଁ ଜଂଗଲଜାତ ଦ୍ରବ୍ୟକୁ ପରୀକ୍ଷା ନିରୀକ୍ଷା କରିସାରିଛନ୍ତି । ବାକି ରହିଛି  କଏଲ ତିଆରି ପାଇଁ ଏକ ମେସିନ୍ ବାହାର କରିବା । 

ହରି କିଛି ଦିନ ପୂର୍ବରୁ ବାଜରା ଅମଳ ପାଇଁ ଏକ ମେସିନ୍ ବାହାର କରିଥିଲେ । ଯେଉଁଥିରେ ବାଜରା ଉତ୍ପାଦନ ବେଳେ ଚୋପା ସଫା ହୋଇପାରିବ । ହରିଙ୍କୁ ଆଇସିଏଆର ଜଣେ ଗ୍ରାମୀଣ ତାଲିମଦାତା ଭାବେ ମାନ୍ୟତା ଦେଇଛି । ବିଭିନ୍ନ ସମୟରେ ସେ କ୍ୟାମ୍ପରେ ଯୋଗ ଦେଇ ଗ୍ରାମୀଣ ଲୋକଙ୍କୁ ତାଲିମ ଦିଅନ୍ତି ।

ଏତେ ସବୁ ଗୁଣର ଅଧିକାରୀ ହୋଇ ବି ହରି ସବୁବେଳେ ଆର୍ଥିକ ସଂକଟ ସହ ଲଢ଼େଇ କରନ୍ତି । ତାଙ୍କ କହିବା କଥା ପଇସା ଉପାର୍ଜନ କରିବାକୁ ସେ ଲକ୍ଷ୍ୟ ରଖି ନାହାନ୍ତି । ତାଙ୍କର ଲକ୍ଷ ହେଉଛି ଅଭିନବ ଉଦ୍ଭାବନ ଯାହା ଲୋକଙ୍କ ଜୀବନଧାରଣର ମାନ କମାଇପାରିବ । ଲୋକଙ୍କ ପରିଶ୍ରମ କମ୍ କରିପାରିବ । ସେ ତାଙ୍କ ଲକ୍ଷ୍ୟ ପଥରେ ଧୀରେ ଧୀରେ ସଫଳ ହେଉଛନ୍ତି ଆଉ ଆଗକୁ ଆହୁରି ସଫଳ ହେବେ ।

')}

Leave a Reply

Your email address will not be published.