ନିର୍ଦ୍ଦୟୀ ନାତୁଣୀ: ହେମଦସ୍ତା ମାଡ଼ରେ ଆଇର ମୃତ୍ୟୁ
ଭଦ୍ରକ: ଭଦ୍ରକରେ ହତ୍ୟାକାଣ୍ଡ । ଆଇମାଆକୁ ହେମଦସ୍ତା ବାଡ଼ିରେ ଛେଚି ଛେଚି ମାରିଲା ନାତୁଣୀ । ଏଭଳି ଏକ ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ଅଧିନସ୍ଥ ନପଙ୍ଗ ଗାଁରେ । ଆଇମାଆ ନାତୁଣୀ ସହ ସବୁବେଳେ ଝଗଡା କରୁଥିବାରୁ, ଆଈମାକୁ ସବୁଦିନ ପାଇଁ ରାସ୍ତାରୁ ହଟାଇଦେଲା ନାବାଳିକା ନାତୁଣୀ । ହତ୍ୟାକାଣ୍ଡ ପରେ ପୋଲିସ ଏବଂ ଗ୍ରାମବାସୀ ଙ୍କ ସମ୍ମୁଖରେ ନିଜେ ହତ୍ୟା କରିଥିବା ଘଟଣା ସ୍ୱୀକାର କରିଛି ନାବାଳିକା । ଏମିତି ଲୋମହର୍ଷଣକାରୀ ଘଟଣା ଘଟିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ଅଧିନସ୍ଥ ନପଙ୍ଗ ଗାଁରେ ।
ଘଟଣା ମୁତାବକ, ନପଙ୍ଗ ଗାଁ ର ଶଶୀ ଦାସଙ୍କ ସହ ତାଙ୍କ ନାବାଳିକା ନାତୁଣୀ ରହୁଥିଲେ । ଅଧିକାଂଶ ସମୟରେ ଆଇ ଓ ନାତୁଣୀ ଙ୍କ ମଧ୍ୟ ଝଗଡ଼ା ହେଉଥିଲା । ଗତକାଲି ରାତି ରେ ମଧ୍ୟ ଝଗଡା ହୋଇଥିଲା ଓ ପରେ ଦୁଇ ଜଣ ଗୋଟିଏ ରୁମରେ ଶୋଇଥିଲେ । ବିଳମ୍ବିତ ରାତି ସମୟ ରେ ନାବାଳିକା ଜଣକ ଚିତ୍କାର କରିଥିଲେ । ନାବାଳିକା ଜଣକର ଚିତ୍କାର ଶୁଣି, ପରିବାର ଲୋକେ ଉଠି ଯାଇ ଦେଖିଥିଲେ ଯେ ବୃଦ୍ଧା ରକ୍ତାକ୍ତ ଅବସ୍ଥାରେ ପଡିଛନ୍ତି । ଏହି ଘଟଣା ନେଇ ପୋଲିସ କୁ ଖବର ଦେଇଥିଲେ ପରିବାର ଲୋକ ଓ ଗ୍ରାମବାସୀ । ଭଣ୍ଡାରିପୋଖରୀ ପୋଲିସ ଯାଇ ନାବାଳିକା ଙ୍କୁ ଅଟକ ରଖିଛି । ତେବେ ନାବାଳିକା ଜଣକ ହେମଦସ୍ତା ବାଡ଼ି ରେ ପିଟି ହତ୍ୟା କରିଥିବା ସ୍ୱୀକାର କରିଥିବା ସୂଚନା ମିଳିଛି । ଅଧିକ ତଦନ୍ତ ପାଇଁ ଫରେନସିକ ଟିମ ଆସୁଥିବାରୁ ମୃତଦେହ ଥିବା ଘରକୁ ସିଲ କରିଛି ପୋଲିସ ।
