ଶ୍ରୀଲଙ୍କା ବିପକ୍ଷ ସିରିଜରୁ ଋତୁରାଜ ଗାଏକ୍ବାଡ ବାଦ ପଡ଼ିବା ପରେ ଶ୍ରୀକାନ୍ତଙ୍କ ସମାଲୋଚନା

ନନ୍ଦିଘୋଷ ବ୍ୟୁରୋ: ଶ୍ରୀଲଙ୍କା ବିପକ୍ଷ ଦିନିକିଆ ଏବଂ ଟି-୨୦ ସିରିଜ ପାଇଁ ଭାରତୀୟ ଦଳ ଘୋଷଣା ହୋଇଛି । ଏଥିରୁ ବାଦ୍ ପଡ଼ିଛନ୍ତି ଋତୁରାଜ ଗାଏକ୍ବାଡ । ଶୁଭମନ ଗିଲ ଦଳରେ ସ୍ଥାନ ପାଇଥିବାବେଳେ ଗାଏକ୍ବାଡ ବାଦ ପଡ଼ିଛନ୍ତି । ଯାହାକୁ ନେଇ ଭାରତୀୟ କ୍ରିକେଟ ଦଳର ପୂର୍ବତନ କ୍ରିକେଟର ତଥା ଚୟନକର୍ତ୍ତା କ୍ରିଷ୍ଣାମଚାରୀ ଶ୍ରୀକାନ୍ତ ସମାଲୋଚନା କରିଛନ୍ତି । ସେ ନିଜ ୟୁଟ୍ୟୁବ୍ ଚ୍ୟାନେଲ ଜରିଆରେ କହିଛନ୍ତି କି, ଶୁଭମନ ଗିଲ ଖରାପ ଫର୍ମ ଦେଇ ଗତି କରୁଥିଲେ ସୁଦ୍ଧା ତାଙ୍କୁ ଦଳରେ ସ୍ଥାନ ମିଳିଛି । କିନ୍ତୁ ଗାଏକ୍ବାଡଙ୍କ ଭଳି ଖେଳାଳିଙ୍କୁ କାହିଁକି ସୁଯୋଗ ମିଳୁନାହିଁ । ଗିଲଙ୍କ ଭଳି ଭାଗ୍ୟ ଗାଏକ୍ବାଡଙ୍କ ନାହିଁ । ବାରମ୍ବାର ବିଫଳ ହେଉଥିଲେ ସୁଦ୍ଧା କାହିଁକି ଗିଲଙ୍କୁ ସୁଯୋଗ ଦିଆଯାଉଛି ବୋଲି ସେ ପ୍ରଶ୍ନ ଉଠାଇଛନ୍ତି । ଟି-୨୦ ବିଶ୍ବକପ ଦଳରେ ମଧ୍ୟ ଗାଏକ୍ବାଡଙ୍କୁ ଦୂରେଇ ରଖାଯାଇଥିଲା । ସେ କହିଛନ୍ତି କି, ଯଦି ଆମେ ଗାଏକ୍ବାଡଙ୍କ ପ୍ରଦର୍ଶନ ଉପରେ ନଜର ପକାଇବା ତାହେଲେ ସେ ଜଣେ ଭଲ ଖେଳାଳି । ମାତ୍ର ତାଙ୍କୁ ବାରମ୍ବାର ପକ୍ଷପାତିତା କରାଯାଉଛି । ଦଳରେ ତାଙ୍କୁ ସୁଯୋଗ ମିଳୁନାହିଁ ।