ଭୁବନେଶ୍ବର : ମୟୂରଭଞ୍ଜ, କେନ୍ଦୁଝର, ବାଲେଶ୍ବର, ଯାଜପୁର, ଭଦ୍ରକ । ୧୫ ଦିନ ତଳେ ଏହି ପାଞ୍ଚ ଜିଲ୍ଲାରେ ଜୀବନ ନେଇଛି ହଇଜା। ଏବେ ବି ଅନେକ ରୋଗୀଙ୍କର ହସ୍ପିଟାଲରେ ଚାଲିଛି ଚିକିତ୍ସା। ସଂକ୍ରମଣର ହଟସ୍ପଟ ପାଲଟିଥିଲା ଯାଜପୁର ଜିଲ୍ଲା। ପାନୀୟ ଜଳ ବିଶୋଧନ ପାଇଁ ଯେଉଁ ସମୟସୀମା ଦିଆଯାଇଥିଲା, ତା ଭିତରେ ଲଘୁଚାପ ବର୍ଷା ଯୋଗୁଁ ବନ୍ୟା ଆସିଗଲା । ଯେଉଁଥି ପାଇଁ ବିଶୋଧନ ହୋଇପାରିଲାନି ଜଳ। ପାଣି କମିଲେ ଯାଇ ବିଶୋଧନ କାର୍ଯ୍ୟ ଆରମ୍ଭ ହେବ। ବନ୍ୟା ଓ ହଇଜାର ଡବଲ ଟେନସନ ଭିତରେ ଗତି କରୁଛନ୍ତି ରାଜ୍ୟ ସରକାର । ଏହି ଜିଲ୍ଲାରେ ଜଣ୍ଡିସ, ଡାଇରିଆ, କଲେରା ଓ ଡେଙ୍ଗୁ ସ୍ଥିତିକୁ ନେଇ ସ୍ବାସ୍ଥ୍ୟ ବିଭାଗ ସମୀକ୍ଷା କରିଥିବା ବେଳେ, ହଇଜା ଓ ବନ୍ୟା ସ୍ଥିତିକୁ ବୈଠକ ଡକାଇଥିଲା ରାଜସ୍ବ ବିଭାଗ। ଆସନ୍ତା ୨୪ ଘଣ୍ଟା ଗୁରୁତ୍ବପୂର୍ଣ୍ଣ । ଯଦି ଏହି ସମୟ ଭିତରେ ବର୍ଷା ନ ହୁଏ, ତେବେ ଟଳି ଯିବ ବନ୍ୟା। ହେଲେ ଆଉ ଏକ ଲଘୁଚାପ ନେଇ ବି ଆକଳନ କରିଛି ପାଣିପାଗ କେନ୍ଦ୍ର। ଏପରି ହେଲେ ବନ୍ୟା ତ ହେବ, ଜଳ ବିଶୋଧନ ବି ହୋଇ ପାରିବ ନାହିଁ । ଯେଉଁଥି ପାଇଁ ହଇଜା ବ୍ୟାପିବାର ସମ୍ଭାବନା ଆହୁରି ବଢିବ । ସେହିପରି ପାଣି ଛାଡ଼ିବା ପରେ ସାପ କାମୁଡ଼ା ଭୟ ବି ରହିଛି। ତେଣୁ ଆଣ୍ଟି ସ୍ନେକ ଭେନମ ମହଜୁଦ ରଖିବାକୁ ନିର୍ଦ୍ଦେଶ ଦିଆଯାଇଛି।
ସୁବର୍ଣ୍ଣରେଖା, ବୁଢ଼ାବଳଙ୍ଗ ଓ ଜଳକାରେ କମୁଛି ଜଳସ୍ତର। ଝାଡ଼ଖଣ୍ଡର ଚାନ୍ଦିଲି ଡ୍ୟାମରୁ ୯ଟି ଗେଟ ଦେଇ ବନ୍ୟାଜଳ ନିଷ୍କାସିତ ହେଉଛି। ମହାନଦୀ ଓ ବ୍ରାହ୍ମଣୀ ବେସିନରେ ବର୍ଷା ହୋଇପାରେ । ଏପରି ହେଲେ ଯାଜପୁର ଓ ଭଦ୍ରକ ପ୍ରତି ବିପଦ ଥିବା ନେଇ ସୂଚନା ଦେଇଛନ୍ତି ଜଳ ସମ୍ପଦ ପ୍ରୋକ୍ୟୋମେଣ୍ଟ ସର୍ବୋଚ୍ଚ ଯନ୍ତ୍ରୀ। ବର୍ଷା ଦିନେ ବଢ଼ିଥାଏ ଝାଡ଼ାବାନ୍ତି ରୋଗ। କାରଣ ପାଣି ବିଶୋଧନ ହୋଇ ନଥାଏ । ହେଲେ ଚଳିତ ବର୍ଷ ବର୍ଷା ଆରମ୍ଭ ପୂର୍ବରୁ ମୁଣ୍ଡ ଟେକିଲାଣି ହଇଜା। ଏଭଳି ସ୍ଥିତିରେ କିଭଳି ମୁକାବିଲା କରାଯିବ ତାକୁ ନେଇ ଚିନ୍ତାରେ ପଡିଛନ୍ତି ସରକାର।
