ବଜେଟ୍ ପାଇଁ ପ୍ରସ୍ତୁତି ଆରମ୍ଭ କଲାଣି ଅର୍ଥ ବିଭାଗ

ଭୁବନେଶ୍ୱର: ୨୦୨୨-୨୩ ଆର୍ଥିକ ବର୍ଷର ବଜେଟ୍ ପାଇଁ ଅର୍ଥ ବିଭାଗ ସବୁ ବିଭାଗର ମତାମତ ଲୋଡ଼ିଛି । ଆସନ୍ତା ଡିସେମ୍ବର ୧୫ ତାରିଖ ସୁଦ୍ଧା ପୂର୍ଣ୍ଣାଙ୍ଗ ବଜେଟ୍ ପାଇଁ ପ୍ରସ୍ତାବ ପଠାଇବା ଲାଗି ସବୁ ବିଭାଗକୁ ଚିଠି ଲେଖିଛି ଅର୍ଥ ବିଭାଗ । ସେପଟେ ରାଜ୍ୟ ସରକାରଙ୍କ ବଜେଟ୍ ପ୍ରସ୍ତୁତିକୁ ନେଇ ରାଜନୀତି ବି ଜୋର ଧରିଛି । ପଞ୍ଚାୟତ ନିର୍ବାଚନକୁ ଦୄଷ୍ଟିରେ ରଖି ସରକାର କିଛି ନୂଆ ସ୍କିମ ଘୋଷଣା କରିବେ ବୋଲି ବିରୋଧୀ କହିଛନ୍ତି । ଯାହାର ଦୃଢ ଜବାବ୍ ଦେଇଛି ଶାସକ ଦଳ ।

ଆରମ୍ଭ ହୋଇଛି ବଜେଟ୍ ପ୍ରସ୍ତୁତି । ଆଗାମୀ ବଜେଟ୍ ପାଇଁ ସବୁ ବିଭାଗକୁ ପ୍ରସ୍ତାବ ମାଗିଲା ଅର୍ଥ ବିଭାଗ । ୨୦୨୨-୨୩ ଆର୍ଥିକବର୍ଷର ପୂର୍ଣ୍ଣାଙ୍ଗ ବଜେଟ୍ କାର୍ଯ୍ୟ ଡିସେମ୍ବର ୧୫ ତାରିଖ ସୁଦ୍ଧା ଶେଷ କରିବାକୁ ଅଣ୍ଟା ଭିଡ଼ିଛି ଅର୍ଥ ବିଭାଗ । ରାଜ୍ୟର ପ୍ରାଥମିକତା ଓ ଏସଡିଜି ପାଇଁ ଚିହ୍ନଟ ହୋଇଥିବା କ୍ଷେତ୍ର ଗୁଡିକୁ ବଜେଟ୍ ପ୍ରସ୍ତୁତି ସମୟରେ ପ୍ରାଥମିକତା ଦେବା ପାଇଁ ଚିଠିରେ ପରାମର୍ଶ ଦିଆଯାଇଛି । ବିଶେଷକରି କେନ୍ଦ୍ରୀୟ ପ୍ରାୟୋଜିତ ଯୋଜନା ଓ କେନ୍ଦ୍ରୀୟ ଯୋଜନା ଗୁଡ଼ିକରେ ମିଳୁଥିବା ଅର୍ଥକୁ ଦୃଷ୍ଟିରେ ରଖି ସବୁ ବିଭାଗ ବଜେଟ୍ ପ୍ରସ୍ତୁତି କରିବାକୁ ଗୁରୁତ୍ୱ ଦିଆଯାଇଛି । ଏଥର ଲୋକାଭିମୁଖି ବଜେଟ୍ କରିବା ପାଇଁ ସରକାର ସବୁ ପ୍ରକାର ପ୍ରସ୍ତୁତି ଆରମ୍ଭ କରିଥିବା ଶାସକ ଦଳ କହିଛି ।

୨୦୨୧-୨୨ ଆର୍ଥିକ ବର୍ଷ ଶେଷ ବେଳକୁ ଋଣ ପରିମାଣ ମୋଟ ଘରୋଇ ଉତ୍ପାଦନର ୨୫ପ୍ରତିଶତ ଛୁଇଁବ । ୨୦୨୨-୨୩ ବଜେଟ୍‌ରେ ଏହାର ପରିମାଣ ସମାନ ରହିବ ବୋଲି ଅର୍ଥ ବିଭାଗ ଆକଳନ କରିଛି । ତେଣୁ ରାଜ୍ୟ ଅର୍ଥ କମିଶନ କିମ୍ବା ବ୍ୟୟ ବରାଦ ବାହାରେ କୌଣସି ଯୋଜନା ପାଇଁ ଅର୍ଥ ଆବଣ୍ଟନ ନକରିବାକୁ ଚିଠିରେ ନିର୍ଦ୍ଦେଶ ଦିଆଯାଇଛି । ସେପଟେ ପଞ୍ଚାୟତ ନିର୍ବାଚନକୁ ଆଖି ଆଗରେ ରଖି ଏଥର ବଜେଟରେ ରାଜ୍ୟ ସରକାର ଅନେକ ନୂଆ ଯୋଜନା ଆଣିବେ ବୋଲି ବିରୋଧୀ ଅଭିଯୋଗ କରିଛନ୍ତି ।

ରାଜ୍ୟ ସରକାର ଏବେ ୫ ବର୍ଷିଆ ଯୋଜନାରେ ପ୍ରାଥମିକତା ଦେଉଥିବା କ୍ଷେତ୍ର ଗୁଡ଼ିକ ନିମନ୍ତେ ବଜେଟରେ ଆବଶ୍ୟକ ବ୍ୟୟବରାଦ କରିବାକୁ ମଧ୍ୟ ଅର୍ଥ ବିଭାଗ ପରାମର୍ଶ ଦେଇଛି । ବଜେଟରେ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରସ୍ତରରେ ଆଧୁନିକ ଭିତ୍ତିଭୂମି ସୁବିଧା, ରାଜ୍ୟରେ ବିଶ୍ୱସ୍ତରୀୟ ସ୍ୱାସ୍ଥ୍ୟ ସେବା ସୁବିଧା, ଗ୍ରାମାଞ୍ଚଳରେ ପ୍ରାଥମିକ ସ୍କୁଲରେ ଆଇଟି ଭିତ୍ତିକ ଶିକ୍ଷା ନିମନ୍ତେ ବ୍ୟବସ୍ଥା ଆଦି ମାଧ୍ୟମରେ ରାଜ୍ୟର ସାମଗ୍ରିକ ଅଭିବୃଦ୍ଧି କରିବାକୁ ଲକ୍ଷ୍ୟ ରଖିଛନ୍ତି । ଏବେ ୧ ଲକ୍ଷ ୭୨ହଜାର କୋଟିରେ ବଜେଟ୍ ପହଞ୍ଚିଛି ।