ଭାଇରାଲ ହେଉଛି ବିଜେପି ନେତାଙ୍କ ଗାଡି ଭଙ୍ଗା ଭିଡିଓ, ପଦାରେ ପଡିଲା ଗୋଷ୍ଠୀ କନ୍ଦଳ

ରାଉରକେଲା: ରାଉରକେଲା ବିଜେପିରେ ଫାଟ୍ । ଦୁଇ ଯୁବ ନେତାଙ୍କ ମଧ୍ୟରେ ମାରପିଟ୍ । ଗଣ୍ଡଗୋଳ ଓ ମାରପିଟ ବେଳର ଭିଡିଓ ହେଉଛି ଭାଇରାଲ । ଯାହା ରାଉରକେଲା ବିଜେପିରେ ଚାଲିଥିବା ଗୋଷ୍ଠୀ କନ୍ଦଳକୁ ପଦାରେ ପକାଇଛି ।

ଭିଡିଓରୁ ଦେଖିବାକୁ ମିଳୁଛି, ସେକ୍ଟର ୭ ଅଞ୍ଚଳର ଜଣେ ବିଜେପି ଯୁବନେତାଙ୍କ ଘରେ ପଶି ଆଉ ଜଣେ ବିଜେପି ନେତା ଓ ତାଙ୍କର ସମର୍ଥକମାନେ ହଙ୍ଗାମା କରିଛନ୍ତି । ସେମାନେ ଗୋଟିଏ ଦୁଇ ଚକିଆ ଗାଡ଼ି ସହ ଘର ଭିତରେ ବ୍ୟାପକ ଭଙ୍ଗାରୁଜା କରିଥିବା ଭିଡିଓରେ ଦେଖିବାକୁ ମିଳିଛି ।

ମିଳିଥିବା ସୂଚନା ଅନୁସାରେ, ପରେ ଦୁଇ ପକ୍ଷ ସେକ୍ଟର ୭ ଥାନାରେ ପହଞ୍ଚି ଥିଲେ । ତେବେ ସେଠାରେ ବି ଉଭୟ ନେତା ଓ ସେମାନଙ୍କ ସମର୍ଥକ ପରସ୍ପରକୁ ଦୋଷାରୋପ କରିବା ସହ ପାଟିତୁଣ୍ଡ କରିଥିଲେ । ଦଳର ବରିଷ୍ଠ ନେତାଙ୍କ ହସ୍ତକ୍ଷେପ ପରେ ପରିସ୍ଥିତି ଶାନ୍ତ ପଡ଼ିଥିଲା ଓ ଦୁଇ ପକ୍ଷ ମଧ୍ୟରେ ଆପୋଷ ବୁଝାମଣା ହୋଇଥିଲା । ଘଟଣାକୁ ନେଇ ଉଭୟ ପକ୍ଷ ଅଭିଯୋଗ ନକରି ଥାନାରୁ ଫେରି ଆସିଥିଲେ ବୋଲି ଶୁଣିବାକୁ ମିଳୁଛି ।