ଶ୍ରୀ ରାମ କେବଳ ହିନ୍ଦୁଙ୍କର ନୁହଁନ୍ତି, ସେ ବିଶ୍ୱର ଭଗବାନ: ଫାରୁଖ ଅବଦୁଲ୍‌ଲା

ଶ୍ରୀନଗର: ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାସନାଲ୍ କନଫରେନ୍ସର ନେତା ଫାରୁଖ ଅବଦୁଲ୍ଲା ପ୍ରଭୁ ଶ୍ରୀରାମଙ୍କୁ ନେଇ ଏକ ବଡ଼ ବୟାନ ଦେଇଛନ୍ତି । ଅଖନୁରର ଏକ ରାଲିରେ ସେ କହିଛନ୍ତି, ପ୍ରଭୁ ରାମ କେବଳ ହିନ୍ଦୁଙ୍କର ନୁହଁନ୍ତି, ସେ ପୂରା ବିଶ୍ୱର ଭଗବାନ । ସେଥିପାଇଁ ଧର୍ମକୁ ଆଧାର କରି ପ୍ରଭୁଙ୍କୁ ନବାଣ୍ଟିବାକୁ ସେ ଲୋକଙ୍କୁ ଅପିଲ୍ କରିଛନ୍ତି ।

ରାଲି ବେଳେ ସେ ବିଜେପି ଉପରେ ବର୍ଷିବା ସହ କହିଛନ୍ତି, ମନ୍ଦିର କିମ୍ବା ମସଜିଦର ଲଢେଇ ନାହିଁ । ପ୍ରଭୁ ଶ୍ରୀରାମ କୌଣସି ନିର୍ଦ୍ଦିଷ୍ଟ ଧର୍ମର ନୁହଁନ୍ତି ବରଂ ସେ ସମସ୍ତଙ୍କର । ସେଥିପାଇଁ ଆମକୁ ଏକଜୁଟ୍ ହୋଇ ଚାଲିବାକୁ ପଡିବ ଏବଂ ନିଜ ସହ ନିଜ ଧର୍ମକୁ ବି ମଜଭୁତ କରିବାକୁ ପଡିବ । ଯଦି ଆମେ ଧର୍ମରୁ ପଛକୁ ହଟୁଛୁ ତେବେ ଆମେ ବର୍ବାଦ ହୋଇଯିବା। ନିଜ ଦେଶକୁ ମଜଭୁତ କରିବାକୁ ହେଲେ ଆମକୁ ଏକାଠି ହେବାକୁ ପଡିବ । ନିଜ ପିଲାଙ୍କୁ ଠିକ୍ ଧର୍ମ ଶିଖାଅ। ଚୋରି, ବେଇମାନୀ, ବଳାତ୍କାର ଭଳି ଲଜ୍ଜାଜନକ ଘଟଣା କୌଣସି ଧର୍ମ ଶିଖାଏ ନାହିଁ । ଧର୍ମ କେବଳ ସଠିକ୍ ରାସ୍ତାରେ ଚାଲିବା ଶିଖାଏ ।

ସେ ବିଜେପିକୁ ଟାର୍ଗେଟ୍ କରି କହିଛନ୍ତି, ନିର୍ବାଚନ ଆସିଲେ, ସେମାନେ ପାଖକୁ ଆସବେ ଏବଂ କହିବେ ହିନ୍ଦୁ ଧର୍ମ ବିପଦରେ ଅଛି । ଭାରତରେ ୭୦ରୁ ୮୦ ପ୍ରତିଶତ ହିନ୍ଦୁ ଧର୍ମାବଲମ୍ବୀ ।