ପାଚିଲା ଧାନ ବାସ୍ନାରେ ଗାଁ ମୁହାଁ ହେଉଛନ୍ତି ଦନ୍ତା

ବାରିପଦା: ରାଜ୍ୟରେ ବଢ଼ିଚାଲିଛି ଦନ୍ତା ଆକ୍ରମଣ। ବେତନୋଟି ରେଞ୍ଜ ଅଧିନ ନଖରା ନିକଟରେ ଦନ୍ତା ଆତଙ୍କ। ନଷ୍ଟ କରୁଛି ଏକର ଏକର ଧାନ ବିଲ। ପାଚିଲା ଧାନ ଅମଳ ଚାଲିଥିବା ବେଳେ ଧାନ ଖାଇବା ପାଇଁ ନିକଟ ଜଙ୍ଗଲରୁ ଗୋଟିଏ ଦନ୍ତା ଗାଁକୁ ପ୍ରବେଶ କରିଛି। କେବଳ ଧାନ ଫସଲ ନଷ୍ଟ କରୁଛି ତାହା ନୁହଁ, ସ୍ଥାନୀୟ ଲୋକଙ୍କ ବାଡ଼ିରେ ପଶି ପରିବା ଓ ଫଳ ମୂଳ ସବୁ ନଷ୍ଟ କରୁଛି। ସକାଳୁ ସକାଳୁ ହାତୀ ଦେଖିବା ପାଇଁ ଲୋକଙ୍କ ଭିଡ଼ ଦେଖିବାକୁ ମିଳିଛି। ସେପଟେ ଦନ୍ତାର ଗତି ବିଧି ଉପରେ ନଜର ରଖିଛି ବନ ବିଭାଗ। ସ୍ଥାନୀୟ ବାସିନ୍ଦା ଭୟଭୀତ ରହିଥିବା ବେଳେ ଲୋକଙ୍କୁ ଘରୁ ନ ବାହାରିବା ପାଇଁ ପରାମର୍ଶ ଦେଉଛି ବନ ବିଭାଗ। ଯଥାଶୀଘ୍ର ନିକଟ ଜଙ୍ଗଲରେ ଛଡ଼ାଯିବା ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି।