ଲଗାଣ ବର୍ଷାରେ ଚାଷ ଜମି ଜଳମଗ୍ନ, ବ୍ୟାପକ ଫସଲ ନଷ୍ଟ
ଜତସିଂହପୁର/ ରାଉରକେଲା: ଲଘୁଚାପ ଜନିତ ଲଗାଣ ବର୍ଷାରେ ଜଗତସିଂହପୁର ଜିଲ୍ଲା ବେହାଲ ହୋଇପଡ଼ିଛି । ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଛି । ଜିଲ୍ଲା ପାଇଁ ଚିନ୍ତା ବଢ଼ାଇଛି ହଂସୁଆ ନଦୀ । ଲଗାଣ ବର୍ଷା ଫଳରେ ନଦୀରେ ଜଳସ୍ତର ବଢ଼ୁଛି । ଯାହାକି ଲୋଙ୍କ ପାଇଁ ବିପଦ ସୃଷ୍ଟି କରୁଛି । ଲଗାଣ ବର୍ଷା ଫଳରେ ଜିଲ୍ଲାର ବିଭିନ୍ନ ଅଞ୍ଚଳ ଜଳମଗ୍ନ ହୋଇଛି । ସ୍କୁଲ ଓ ରାସ୍ତାଘାଟ ସବୁ ଜଳାବର୍ଣ୍ଣ ହୋଇଯାଇଛି । ସ୍କୁଲ ଭିତରେ ପାଣି ପଶିବା ସହ ଲୋକଙ୍କ ଘରେ ମଧ୍ୟ ପାଣି ପଶିଛି । ଜଳ ନିଷ୍କାସନର ବାଟ ନଥିବାରୁ ଚାଷ ଜମିରେ ମଧ୍ୟ ବର୍ଷା ଜଳ ମାଡ଼ିଯାଇଛି । ଫଳରେ ଫସଲ ସବୁ ନଷ୍ଟ ହୋଇଯାଇଛି ।
ଅଣ୍ଟାଏ ପାଣିରେ ବୁଡି ଉଜୁଡି ଯାଇଛି ବର୍ଷକର ଆହର । ଯାହାକୁ ନେଇ ଚିନ୍ତାରେ ଚାଷୀକୁଳ । ଜଗତସିଂହପୁର ଜିଲ୍ଲାରେ ବର୍ତ୍ତମାନ ୮୬ ହଜାର ୨୨୦ ହେକ୍ଟର ଚାଷଜମିରେ ଧାନ ଚାଷ କରାଯାଇଛି । ଜିଲ୍ଲାରେ କ୍ଷୟକ୍ଷତିର ଆକଳନ କରାଯାଉଥିବା ବେଳେ ଜଗତସିଂହପୁର, ରଘୁନାଥପୁର, ତିର୍ତ୍ତୋଲ, କୁଜଙ୍ଗ ଓ ବାଲିକୁଦା ଅଞ୍ଚଳ ଧାନ ଚାଷର କ୍ଷୟକ୍ଷତି ନେଇ ଶବିଶେଷ ତଥ୍ୟ ପ୍ରତ୍ୟେକ ତହସିଲଦାର ପ୍ରସ୍ତୁତ କରୁଛନ୍ତି । ବର୍ତମାନ ଜଗତସିଂହପୁର ଜିଲ୍ଲାରେ ୫୭୨ ମିଲିମିଟର ବର୍ଷା ହୋଇସାରିଲେଣି । ଅଣଜଳସେଚିତ ଜମି ହେକ୍ଟର ପିଛା ୬ ହଜାର ୫ ଶହ ଟଙ୍କା ରହିଥିବା ବେଳେ ଜଳ ସେଚିତ ଜମି ପାଇଁ ୧୩ ହଜାର ୫ ଶହ ଟଙ୍କା ଥିବା ଜଣାପଡ଼ିଛି ।
ଅନ୍ୟପଟେ ସୁନ୍ଦରଗଡ଼ ଜିଲ୍ଲା ଓ ରାଉରକେଲା ସହରରେ ଲଗାଣ ବର୍ଷା ଜାରି ରହିଛି । ଲଗାଣ ବର୍ଷା ଯୋଗୁଁ ରାଉରକେଲା ସହରର ପଲପଲ ବସ୍ତି ଓ ବାଲୁଘାଟ ବସ୍ତିରେ ବ୍ରାହ୍ମଣୀ ନଦୀର ବନ୍ୟାଜଳ ପ୍ରବେଶ କରିଛି । ବନ୍ୟା ଜଳ ପ୍ରବେଶ କରିବା ପରେ ଦୁଇଟି ବସ୍ତିରେ ୨୦ଟି ଘର ବନ୍ୟା ଜଳ ଘେରରେ ରହିଛି । ବ୍ରାହ୍ମଣୀ ନଦୀର ବନ୍ୟାଜଳ ଵୃଦ୍ଧି ପାଉଥିଵାରୁ ବସ୍ତି ବାସିନ୍ଦା ଭୟଭୀତ ହୋଇ ପଡିଛନ୍ତି । ପଲପଲ ବସ୍ତିରେ ଓ ବାଲୁଘାଟ ବସ୍ତିରେ ବନ୍ୟାଜଳ ପ୍ରବେଶ କରଥିିବା ସୂଚନା ପାଇ ରାଉରକେଲା ମହାନଗର ନିଗମ କମିଶନର ବସ୍ତି ଅଞ୍ଚଳ ଗସ୍ତ କରି ସ୍ଥିତି ଅନୁଧ୍ୟାନ କରିଛନ୍ତି ।
ବନ୍ୟାଜଳ ଘେରରେ ଥିବା ଲୋକଙ୍କୁ ସ୍ଥାନୀୟ ସ୍କୁଲ ଗୃହକୁ ସ୍ଥାନାନ୍ତରିତ କରାଯିବା ସହ ଅନ୍ୟ ମାନଙ୍କୁ ସ୍ଥାନାନ୍ତରିତ କରିବା ପାଇଁ ରାଉରକେଲା ମହାନଗର ନିଗମ ପକ୍ଷରୁ ବ୍ୟବସ୍ଥା ଆରମ୍ଭ କକରାଯାଇଛି । ସୁନ୍ଦରଗଡ଼ ଜିଲ୍ଲାରେ ଲଗାଣ ବର୍ଷା ସାଙ୍ଗକୁ ଉପରମୁଣ୍ଡରେ ଲଗାଣ ବର୍ଷା ଯୋଗୁଁ ମନ୍ଦିରା ଡ୍ୟାମ୍ର ଜଳସ୍ତର ବୃଦ୍ଧି ପାଇଛି । ମନ୍ଦିରା ଡ୍ୟାମ୍ରେ ୭୪ ହଜାର ୯୩୭ କ୍ୟୁସେକ୍ ଜଳ ପ୍ରବେଶ କରୁଛି । ଫଳରେ ମନ୍ଦିରା ଡ୍ୟାମ୍ର ୯ଟି ଗେଟ୍ ଖୋଲା ଯାଇଛି । ମନ୍ଦିରା ଡ୍ୟାମ୍ରେ ୬୮୦ ଫୁଟ୍ ଜଳସ୍ତର ରହିଛି । ସେହିପରି ରାଉରକେଲା ସହରର ତରକେରା ଡ୍ୟାମ୍ରେ ଜଳସ୍ତର ବୃଦ୍ଧି ପାଉଥିବାରୁ ୮ଟି ଗେଟ୍ ଖୋଲା ରହିଛି । ତରକେରା ଡ୍ୟାମର ଜଳସ୍ତର ଏବେ ୬୫୨ ଫୁଟ୍ ରହିଛି ।
