ମୁଖ୍ୟମନ୍ତ୍ରୀ ଦେଖା ନକରିବାରୁ ବିଜେପି କର୍ମୀଙ୍କ ମଧ୍ୟରେ ଅସନ୍ତୋଷ

ରାଉରକେଲା: ମୁଖ୍ୟମନ୍ତ୍ରୀ ମୋହନ ମାଝୀଙ୍କ ବିରୋଧରେ ବିଜେପି କର୍ମୀଙ୍କ ଅସନ୍ତୋଷ । ରାଉରକେଲା ବିମାନ ବନ୍ଦରରେ କିଛି ବିଜେପି କର୍ମୀଙ୍କୁ ମୁଖ୍ୟମନ୍ତ୍ରୀ ନ ଭେଟିବାରୁ ସେମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ଯାହାକୁ ନେଇ ସେମାନେ ପାଟିତୁଣ୍ଡ କରିଥିଲେ, ଆଉ କହିଥିଲେ ସମୟ ବଡ଼ ବଳବାନ ।

ସୂଚନାଯୋଗ୍ୟ, ଝାଡ଼ଖଣ୍ଡକୁ ନିର୍ବାଚନ ପ୍ରଚାରରେ ଯିବା ବେଳେ ମୁଖ୍ୟମନ୍ତ୍ରୀ ମୋହନ ମାଝୀ କିଛି ସମୟ ପାଇଁ ରାଉରକେଲା ବିମାନ ବନ୍ଦରରେ ଅଟକି ଥିଲେ । ମୁଖ୍ୟମନ୍ତ୍ରୀ ଆସୁଥିବା ଜାଣି ତାଙ୍କୁ ଭେଟିବାକୁ ସେଠାରେ ଅନେକ ବିଜେପି ନେତା ଓ କର୍ମୀ ସକାଳୁ ଅପେକ୍ଷା କରିଥିଲେ । ହେଲେ ମୁଖ୍ୟମନ୍ତ୍ରୀ କିଛି ବିଜେପି ନେତା ଓ କର୍ମୀଙ୍କୁ ଭେଟିଥିବା ବେଳେ ଆଉ କିଛି ନେତା ଓ କର୍ମୀଙ୍କୁ ଭେଟି ନଥିଲେ । ଏହାକୁ ନେଇ ଦେଖା ଦେଇଥିଲା ଅସନ୍ତୋଷ । ଯେଉଁମାନେ ମୁଖ୍ୟମନ୍ତ୍ରୀଙ୍କୁ ଭେଟି ପାରି ନଥିଲେ, ସେମାନେ ଖୋଲାଖୋଲି ଭାବେ କ୍ଷୋଭ ପ୍ରକାଶ କରିଥିଲେ ।

ଏନେଇ ସେମାନେ ପାନପୋଷ ସାଂଗଠନିକ ଜିଲ୍ଲା ସଭାପତିଙ୍କ ନିକଟରେ ନିଜ ନିଜର ଅସନ୍ତୋଷ ପ୍ରକାଶ କରିଥିଲେ । ଅସନ୍ତୁଷ୍ଟ ନେତାମାନେ କହିଛନ୍ତି, ବିଜେପି ନେତା ଓ କର୍ମୀଙ୍କ ଇଜ୍ଜତ ବୋଲି କିଛି ନାହିଁ, ଖାଲି କାମ ବେଳେ ଫୋନ କରନ୍ତି ।