ନନ୍ଦିଘୋଷ ବ୍ୟୁରୋ: ପ୍ରବଳ ବର୍ଷାରେ ବେହାଲ ରାଜଧାନୀ ଦିଲ୍ଲୀ। ଆଜି ସକାଳୁ କ୍ରମାଗତ ବର୍ଷା ଯୋଗୁ ସାରା ଦିଲ୍ଲୀରେ ଜନଜୀବନ ହୋଇଛି ବ୍ଯାହତ। ବିଭିନ୍ନ ସ୍ଥାନରେ ଫସି ରହିଛନ୍ତି ହଜାର ହଜାର ଯାନ। ଅଧିକାଂଶ ଭାଗରେ ଜଳ ପ୍ରବାହିତ ହେବା ଯୋଗୁ ଲକ୍ଷାଧିକ ଲୋକ ହୋଇଛନ୍ତି ଜଳବନ୍ଦୀ। ମେହରୁଲି-ବାଦରପୁର ରୋଡରେ ପାଣି ପ୍ରବାହିତ ହେବା ଯୋଗୁ ସେଠାରେ ନାହିଁ ନଥିବା ଅସୁବିଧା ପରିଲକ୍ଷିତ ହୋଇଛି। ସେହିପରି ଧୌଳାକୁଆଁ ଅଞ୍ଚଳରେ ବି ଲୋକମାନେ ସମସ୍ଯାର ସମ୍ମୁଖୀନ ହୋଇଛନ୍ତି। ସେଠାରେ ବର୍ଷା ଜଳ ଜମା ହୋଇ ରହିଥିବାରୁ ହଜାର ହଜାର ଯାନବାହନ ଅଟକି ରହିଥିବା ସୂଚନା ମିଳିଛି। ଗତକାଲି ବି ଦିଲ୍ଲୀ ଓ ଏନସିଆର ଅଧିକାଂଶ ଅଞ୍ଚଳରେ ପ୍ରବଳ ବର୍ଷା ହେବାରୁ ସମସ୍ଯା ସୃଷ୍ଟି ହୋଇଥିଲା। ସେପଟେ ଗୁଜରାଟରେ ବି ବନ୍ଯା ରଚୁଛି ତାଣ୍ଡବ। ବର୍ତ୍ତମାନ ସୁଦ୍ଧା ୨୮ ଜଣଙ୍କ ମୃତ୍ଯୁ ଘଟିଥିବାବେଳେ ୧୮ ହଜାର ଲୋକଙ୍କୁ ସ୍ଥାନାନ୍ତରିତ କରାଯାଇଛି। ଆଜି ୧୧ ଜିଲ୍ଲାରେ ଅତି ପ୍ରବଳ ବର୍ଷା ହେବ ବୋଲି ରେଡ ଆଲର୍ଟ ଜାରି କରିଛି ପାଣିପାଗ ବିଭାଗ। ସେହିପରି ୨୨ ଜିଲ୍ଲାକୁ ଜାରି ହୋଇଛି ୟେଲୋ ଆଲର୍ଟ। ମୋର୍ବି, ଭଦୋଦରା, ଭାରୁଚ, ଜାମନଗର, ପଞ୍ଚମହଲ, ଦ୍ବାରକାରେ ବ୍ଯାପକ କ୍ଷତି ଘଟାଇଛି ବନ୍ଯା।
