ଡାଟା ଚୋରି ଭୟ ଥିଲେ ଫୋନରୁ ହ୍ୱାଟ୍ସଆପ୍ ଡିଲିଟ୍ କରିଦିଅନ୍ତୁ: ହାଇକୋର୍ଟ
ନୂଆଦିଲ୍ଲୀ: ହ୍ୱାଟ୍ସଆପର ନୂଆ ପ୍ରାଇଭେସି ପଲିସି ବିରାେଧରେ ଦିଲ୍ଲୀ ହାଇକୋର୍ଟରେ ଦାଏର ହୋଇଥିବା ଏକ ମାମଲାର ଶୁଣାଣି ସୋମବାର ଦିନ ହୋଇଛି। ଯାଚିକା ଦାଏର କରିଥିବା ଆଇନଜୀବୀ ମନୋହର ଲାଲ୍ କହିଛନ୍ତି ଯେ ଏହି ପଲିସି ଦ୍ୱାରା ଲୋକଙ୍କ ତଥ୍ୟ ସୁରକ୍ଷିତ ହୋଇ ରହିବନାହିଁ। ଯେଉଁଥିପାଇଁ ଆଇନ ଆସିବା ଜରୁରୀ।
କେଉଁ ଡାଟା ଉପରେ ବିପଦ ରହିଛି, ସେନେଇ ହାଇକୋର୍ଟ ତାଙ୍କୁ ପଚାରିଥିଲେ। ଯାହାର ଜବାବରେ ସବୁ ତଥ୍ୟ ଲିକ୍ ହେବାର ଭୟ ରହିଛି ବୋଲି ମନୋହର କହିଥିଲେ। ପରେ କୋର୍ଟ କହିଛନ୍ତି ଯେ ସମସ୍ତେ ଏଭଳି କରନ୍ତି। ଆମେ ବୁଝିପାରୁନୁ “ଆପଣଙ୍କୁ କେଉଁଥିରେ ଅସୁବିଧା ରହୁଛି”। ଯଦି ଆପଣଙ୍କୁ ଲାଗୁଛି ହ୍ୱାଟ୍ସଆପ ଆପଣଙ୍କର ଡାଟା ଚୋରି କରୁଛି ତାହେଲେ ଏହି ଆପକୁ ଫୋନରୁ ଡିଲିଟ୍ କରିଦିଅନ୍ତୁ।
ପରେ ଅଦାଲତ ଆବେଦନକାରୀଙ୍କୁ ପଚାରିଥିଲେ ଆପଣ ଗୁଗୁଲ୍ ମ୍ୟାପ୍ ବ୍ୟବହାର କରନ୍ତି ନାହିଁ କି। କାରଣ ଏହା ମଧ୍ୟ ଲୋକଙ୍କ ତଥ୍ୟକୁ ଶେୟାର କରିଥାଏ। ତେବେ ହ୍ୱାଟ୍ସଆପ ତରଫରୁ ବରିଷ୍ଠ ଆଇନଜୀବୀ କପିଲ୍ ସିବଲ୍ ଓ ଫେସବୁକ୍ ପକ୍ଷରୁ ମୁକୁଲ ରୋହତଗି ପେସ୍ ହୋଇଥିଲେ।
ଏସମ୍ପର୍କରେ ରୋହତଗି କହିଛନ୍ତି ଯ ପ୍ରାଇଭେଟ୍ ଚର୍ଚଟ ପୂରାପୂରି ଭାବେ ଏନକ୍ରିପ୍ଟେଡ୍ ହୋଇଥାଏ। ପଲିସିରେ ଯାହା ପରିର୍ବତ୍ତନ ହୋଇଛି ତାହା କେବଳ ବିଜନେସ୍ ହ୍ୱାଟ୍ସଆପ ପାଇଁ। ତେବେ ଏହି ଆବେଦନର ଆଗାମୀ ଶୁଣାଣି ଜାନୁଆରୀ ୨୫ ତାରିଖରେ ହେବ।
ଉଲ୍ଲେଖଯୋଗ୍ୟ, ନିକଟରେ ହ୍ୱାଟ୍ସଆପ୍ ନିଜ ପ୍ରାଇଭେସି ପଲିସିରେ କିଛି ପରିବର୍ତ୍ତନ ଆଣିଥିଲା। ଯାହା ମୁତାବକ ୟୁଜର୍ସଙ୍କ ତଥ୍ୟ ଗୁଡ଼ିକୁ ଫେସବୁକ୍ ଓ ଇନଷ୍ଟାଗ୍ରାମ ସହ ଶେୟାର କରାଯିବ। ଯଦି ୟୁଜର୍ସ ମାନେ ଫେବୃଆରୀ ୮ ତାରିଖ ସୁଦ୍ଧା ଏନେଇ ସହମତି ନଦିଅନ୍ତି ତାହେଲେ ସେମାନଙ୍କ ଆକାଉଣ୍ଟ ଡିଲିଟ୍ କରି ଦିଆଯିବ। ଏହାକୁ ନେଇ ବ୍ୟବହାରକାରୀଙ୍କ ଅସନ୍ତୋଷ ପରେ କମ୍ପାନୀ ସ୍ପଷ୍ଟୀକରଣ ରଖିଥିଲା।
ଏହା ସତ୍ୱେ ବି ଏହି ପଲିସିକୁ ବ୍ୟବହାରକାରୀଙ୍କ ସମେତ ବିଭିନ୍ନ କ୍ଷୁଦ୍ର ବ୍ୟବସାୟୀ ସଂଗଠନ ମାନେ ବିରୋଧ କରିଛନ୍ତି। ଏହି ବିରୋଧର ପରିମାଣ ଏତେ ବଢୁଛି ଯେ ଏବେ ୟୁଜର୍ସ ମାନେ ହ୍ୱାଟ୍ସଆପ୍ ବଦଳରେ ସିଗନାଲ୍ ଆପ୍ ଆଡେ ଏକପ୍ରକାର ମୁହାଁଉଛନ୍ତି । ତେଣୁ ଉପଭୋକ୍ତାଙ୍କୁ ମନେଇବା ପାଇଁ ହ୍ୱାଟସ୍ଆପ୍ ପକ୍ଷରୁ ପ୍ରାଇଭେସି ପଲିସିକୁ ଆସନ୍ତା ୩ ମାସ ପାଇଁ ସ୍ଥଗିତ ରଖାଯାଇଛି।
ସୁରକ୍ଷା ଓ ବ୍ୟକ୍ତିଗତ ଗୋପନୀୟତାକୁ ନେଇ ୟୁଜର୍ସଙ୍କ ମଧ୍ୟରେ ଥିବା ବିଭ୍ରାନ୍ତକୁ ଦୂର କରିବା ପରେ ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ହ୍ୱାଟସ୍ଆପ୍ ପକ୍ଷରୁ କୁହାଯାଇଛି। ଆସନ୍ତା ଫେବୃଆରୀ ୮ ତାରିଖରେ କୌଣସି ବି ହ୍ୱାଟସ୍ଆପ୍ ଆକାଉଣ୍ଟ ସସ୍ପେଣ୍ଡ ବା ଡିଲିଟ କରିବାକୁ ପଡ଼ିବ ନାହିଁ । ହ୍ୱାଟସ୍ଆପ୍ରେ ଗୋପନୀୟତା ଏବଂ ସୁରକ୍ଷା କିଭଳି କାମ କରୁଛି ସେ ନେଇ ସୂଚନା ଦେବା ଲାଗି ଆଗକୁ ଆହୁରି ଅଧିକ କାମ ଚାଲିଛି।
