ସମ୍ବଲପୁର: ଜେରକ୍ସ ଦୋକାନୀଙ୍କୁ ମହଙ୍ଗା ପଡିଲା ଦୁର୍ବ୍ୟବହାର। ୩ଟଙ୍କା ପାଇଁ ୨୫ହଜାର ଜରିମାନା ଲଗାଇଲେ ଖାଉଟି ଅଦାଲତ। ସମ୍ବଲପୁରର ବରିଷ୍ଠ ସାମ୍ବାଦିକ ପ୍ରଫୁଲ୍ଲ କୁମାର ଦାସ ଗତ ଏପ୍ରିଲ ୨୮ତାରିଖରେ ବୁଢାରଜାର ଗୋୟଲ ପ୍ରିଣ୍ଟିଂ ଜୋନ୍ ନାମକ ଜେରକ୍ସ ସେଣ୍ଟରକୁ ଜେରକ୍ସ ପାଇଁ ଯାଇଥିଲେ। ଗୋଟିଏ କପିକୁ ଜେରକ୍ସ ପାଇଁ ୫ଟଙ୍କା ବଢାଇଥିଲେ।
ଦୋକାନୀ ଜେରକ୍ସ କରିଥିଲେ, ହେଲେ ବଳକା ୩ ଟଙ୍କା ଫେରାଇ ନଥିଲେ। ୩ ଟଙ୍କା ମାଗିବାରୁ ଦୋକାନୀ ଜଣକ ପ୍ରଫୁଲ୍ଲଙ୍କ ସହ ଯୁକ୍ତିତର୍କ କରିବା ସହ ଦୁର୍ବ୍ୟବହାର ପ୍ରଦର୍ଶନ କରିଥିବା ଅଭିଯୋଗ ହୋଇଥିଲା। ଏପରିକି ୫ ଟଙ୍କା ଫେରସ୍ତ ସହ ଭିକାରୀକୁ ୫ ଟଙ୍କା ଦାନ କଲି ବୋଲି କହିଥିଲେ। ଏହାଦ୍ଵାରା ପ୍ରଫୁଲ୍ଲ ଗଭୀର ଅପମାନିତ ହେବା ସହ ମାନସିକ ଚାପଗ୍ରସ୍ତ ହୋଇ ଖାଉଟି ଅଦାଲତଙ୍କ ଦ୍ବାରସ୍ଥ ହୋଇଥିଲେ।
ଖାଉଟି ଅଦାଲତ ଏହାର ଶୁଣାଣି କରି ଦୋକାନୀକୁ ଦୋଷୀ ସାବ୍ୟସ୍ତ କରିଛନ୍ତି। ଦୋକାନୀ ଜଣକ କୌଣସି ରସିଦ କିମ୍ବା ବିଲ୍ ନଦେଇ ଅସାଧୁ ଉପାୟରେ ବ୍ୟବସାୟ କରୁଥିବା ଅଦାଲତ ଦର୍ଶାଇଛନ୍ତି । ତାଙ୍କ ରାୟରେ ବଳକା ୩ ଟଙ୍କା ଫେରସ୍ତ ସହ ମାନସିକ ଅଶାନ୍ତି ଏବଂ ନିର୍ଯାତନା ପାଇଁ ୩୦ ଦିନ ମଧ୍ୟରେ ଆବେଦନକାରୀଙ୍କୁ ୨୫ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ସମୟସୀମା ମଧ୍ୟରେ ଜରିମାନା ନଦେଲେ ବାର୍ଷିକ ୯ ପ୍ରତିଶତ ହାରରେ ସୁଧ ଦେବାକୁ ରାୟରେ ଉଲ୍ଲେଖ ରହିଛି।
