ଛଟେଇ ପ୍ରତିବାଦରେ ବଲାଙ୍ଗୀର କଲେଜ ଓ ହସ୍ପିଟାଲରେ ଉତ୍ତେଜନା

ବଲାଙ୍ଗୀର: ବିନା କାରଣରେ ୧୬୭ ସଫେଇ ଓ ସୁରକ୍ଷା କର୍ମୀଙ୍କୁ ଛଟେଇ । ଯାହାକୁ ନେଇ ବଲାଙ୍ଗୀର ମେଡିକାଲ କଲେଜ ଓ ହସ୍ପିଟାଲରେ ପ୍ରକାଶ ପାଇଛି ଉତ୍ତେଜନା । ଛଟେଇ ପ୍ରତିବାଦରେ ମେଡିକାଲ କଲେଜ ସୁପରିଟେଣ୍ଡେଣ୍ଟଙ୍କୁ ଘେରିଛନ୍ତି ଅଭିଯୋଗକାରୀ । ୨ ଘଣ୍ଟାରୁ ଅଧିକ ସମୟ ଧରି ମେଡିକାଲ ସୁପରିଟେଣ୍ଡେଣ୍ଟକୁ ଅଟକ ରଖିବା ସହ ଠେଲାପେଲା କରିଥିଲେ ସଫେଇ ଓ ସୁରକ୍ଷାକର୍ମୀ I

ଖବର ପାଇ ଟାଉନ୍ ଥାନା ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲେ । ଠିକା ସଂସ୍ଥା ମାଧ୍ୟମରେ ସଫେଇ କର୍ମଚାରୀ ଓ ସୁରକ୍ଷାକର୍ମୀ ନିଯୁକ୍ତି ପାଇଥିଲେ । ସେମାନଙ୍କର ଆଉ ୪ ମାସ ପରେ ଚୁକ୍ତି ସରିବ । ହେଲେ ମେଡିକାଲ ସୁପରିଟେଣ୍ଡେଣ୍ଟ ଅନ୍ୟ ଏକ ଠିକା ସଂସ୍ଥା ସହ ଚୁକ୍ତି କରି ଶହ ଶହ କର୍ମଚାରୀଙ୍କୁ ଛଟେଇ କରି ଦେଇଛନ୍ତି । ନିଯୁକ୍ତି ସମୟରେ ଠିକା ସଂସ୍ଥା କର୍ମଚାରୀଙ୍କଠାରୁ ଜଣକ ପିଛା ୭୦ ହଜାର ଟଙ୍କା ଲେଖାଏଁ ନେଇଥିବା ଅଭିଯୋଗ କରିଛନ୍ତି କରିଛନ୍ତି ଏହି କର୍ମଚାରୀମାନେ । ଲକ୍ଷାଧିକ ଟଙ୍କା ନେଇ ନୂତନ ସଂସ୍ଥା ସହ ମେଡିକାଲ କର୍ତ୍ତୃପକ୍ଷ ଚୁକ୍ତି କରିଥିବା ଅଭିଯୋଗ କରିଛନ୍ତି ଠିକା କର୍ମଚାରୀ । ସେପଟେ ଠିକା କର୍ମଚାରୀ ଅଭିଯୋଗକୁ ଅସ୍ଵୀକାର କରିଛନ୍ତି ମେଡିକାଲ କର୍ତ୍ତୃପକ୍ଷ ।