ପ୍ରଧାନମନ୍ତ୍ରୀ କାର୍ଯ୍ୟାଳୟ ଉପରେ ଥିଲା ଚୀନ୍ ଗୁଇନ୍ଦାଙ୍କ ନଜର, ଦଲାଇ ଲାମା ବି ସ୍କାନରରେ ଥିଲେ
ନୂଆଦିଲ୍ଲୀ: ଭାରତରେ ଚୀନର ଗୁଇନ୍ଦାଗିରି । ପ୍ରଧାନମନ୍ତ୍ରୀ କାର୍ଯ୍ୟାଳୟ(ପିଏମ୍ଓ) ସହିତ ଦଲାଇ ଲାମା ଏବଂ ଭାରତରେ ଲଗାଯାଇଥିବା ସୁରକ୍ଷା ଉପକରଣ ଉପରେ ମଧ୍ୟ ଚୀନ ଗୁଇନ୍ଦାଙ୍କ ନଜର ଥିଲା । ଚୀନ ଗୁଇନ୍ଦା ନେଟଓ୍ୱର୍କ ସହ ପଚରାଉଚରା ବେଳେ ଏହି ଖବର ବାହାରକୁ ଆସିଛି । ଏହି ଗୁଇନ୍ଦା ନେଟଓ୍ୱର୍କ ଭାରତୀୟ ମନ୍ତ୍ରାଳୟରେ କାମ କରୁଥିବା ଉଚ୍ଚ ଅଧିକାରୀ ଏବଂ ପ୍ରଶାସନିକ ଅଧିକାରୀଙ୍କ ସମ୍ପର୍କିତ ସୂଚନା ଚୀନ ପଠାଉଥିଲେ ।
ଧରାପଡ଼ିଥିବା ଚୀନ ଗୁଇନ୍ଦା କିଙ୍ଗ ସିକୁଙ୍କୁ ପଚରାଉଚରା ବେଳେ ଜଣାପଡ଼ିଛି ଯେ, ପିଏମ୍ଓ ସମେତ ବଡ଼ କାର୍ଯ୍ୟାଳୟର ସୂଚନା ଦେବାକୁ ଚୀନ ନିଜ ଗୁଇନ୍ଦା ଟିମକୁ ନିର୍ଦ୍ଦେଶ ଦେଇଥିଲା । ପିଏମ୍ଓରେ କାର୍ଯ୍ୟରତ ଅଧିକାରୀଙ୍କ ମଧ୍ୟରୁ କିଏ ସର୍ବାଧିକ ଗୁରୁତ୍ୱପୂର୍ଣ୍ଣ, କିଏ କେଉଁ ପଦରେ ନିଯୁକ୍ତ ଏବଂ କେତେ ପ୍ରଭାବଶାଳୀ, ଏହି ସବୁ ସୂଚନା ପାଇଁ କୁହାଯାଇଥିଲା ।
ରାକେଟରେ କୋଲକାତାର ମହିଳା ମଧ୍ୟ ସାମିଲ ଥିଲେ
ଚୀନ ଗୁଇନ୍ଦା ନେଟଓ୍ୱର୍କରେ ମହାବୋଧି ମନ୍ଦିରର ଏକ ପ୍ରମୁଖ ବୌଦ୍ଧ ଭିକ୍ଷୁ ଏବଂ କୋଲକାତାର ଏକ ପ୍ରଭାବଶାଳୀ ମହିଳା ଜଣଙ୍କ ସାମିଲ ହୋଇଥିବା କଥା ମଧ୍ୟ ସାମ୍ନାକୁ ଆସିଥିଲା । କୁହାଯାଉଛି ଯେ, କିଙ୍ଗ ସି ସହିତ ଏହି ମହିଳା ଜଣଙ୍କୁ ସାକ୍ଷାତ କରାଯାଇଥିଲା । ଯିଏ କି ତାକୁ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ଦେଉଥିଲା । ଏବଂ କିଙ୍ଗ ତାକୁ ଟ୍ରାନ୍ସଲେଟ୍ କରି ଚୀନ ପଠାଉଥିଲା ।
ସାମ୍ୱାଦିକଙ୍କ ସମେତ ୩ଜଣ ତିହାର ଜେଲରେ ବନ୍ଦ
ଚୀନ ଗୁଇନ୍ଦାଙ୍କୁ ପଚରାଉଚରା ବେଳେ ତଦନ୍ତକାରୀ ଏଜେନ୍ସଙ୍କ ହାତରେ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ହସ୍ତଗତ ହୋଇଛି । ତଦ୍ନୁଯାୟୀ ପିଏମ୍ଓ ଅଧିକାରୀ ଏବଂ ଦଲାଇ ଲାମାଙ୍କ ପ୍ରତିଟି ଗତିବିଧିର ସୂଚନା ନିଆଯାଉଥିଲା । ଏହି ମାମଲାରେ ଦିଲ୍ଲୀ ପୋଲିସ ସ୍ପେଶାଲ ସେଲ ଗତ ମାସରେ କିଙ୍ଗ ସି ସହିତ ତାଙ୍କ ନେପାଳୀ ସାଥି ଶେର ବାହାଦୂର ଏବଂ ଭାରତୀୟ ସାମ୍ୱାଦିକ ରାଜୀବ ଶର୍ମାଙ୍କୁ ଗିରଫ କରାଯାଇଛି । ସେମାନେ ଏବେ ତିହାର ଜେଲରେ ଅଛନ୍ତି ।
ସୂଚନା ଯୋଗ୍ୟ ଯେ, ଗତ ଅଗଷ୍ଟରେ ଚୀନର ଏହି ଗୁଇନ୍ଦା ନେଟଓ୍ୱର୍କ ସମ୍ପର୍କରେ ଜଣାପଡ଼ିଥିଲା । ଚୀନ ନାଗରିକ ଚାର୍ଲି ପେଙ୍ଗ୍ ଓରଫ ଲୁଆ ସଙ୍ଗକୁ ଗିରଫ କରାଯାଇଥିଲା । ଏହା ପରେ ତଦନ୍ତକାରୀ ସଂସ୍ଥା ପକ୍ଷରୁ ଅଧିକ ଖୋଳତାଡ଼ ଆରମ୍ଭ ହୋଇଥିଲା । ଦିଲ୍ଲୀରେ ଆଇଟି ବିଭାଗର ରେଡ୍ ସମୟରେ ଚୀନର ଗୁଇନ୍ଦା ରାକେଟର ପର୍ଦ୍ଧାଫାସ ହୋଇଥିଲା ।
