ଛତିଶଗଡ଼ ଜିଲ୍ଲାପାଳଙ୍କୁ ଦାଦାଗିରି ପଡିଲା ମହଙ୍ଗା, ଦାୟିତ୍ୱରୁ ହଟାଇଲେ ସରକାର

ରାୟପୁର: କୋଭିଡ୍ ପାଇଁ ଦେଶର ଅନେକ ଅଂଚଳରେ ଲକଡାଉନ୍ ଜାରି ରହିଛି । ଏଭଳି ପରିସ୍ଥିତିରେ କିଛି ଅମାନିଆ ଲକଡାଉନ୍ ଉଲ୍ଲଂଘନ କରି ସଂକ୍ରମଣ ପ୍ରସାର କରିବାରେ ମୁଖ୍ୟ ଭୂମିକା ନିର୍ବାହ କରୁଛନ୍ତି ।ପ୍ରଶାସନ ଲକଡାଉନକୁ କଠୋରତାର ସହ ଲାଗୁ କରିବା ପାଇଁ ଉଦ୍ୟମ କରୁଛି । କିନ୍ତୁ ତାହାର ଅର୍ଥ ନୁହେଁ ଗୋଟିଏ ଜିଲ୍ଲାର ସର୍ବୋଚ୍ଚ ଅଧିକାରୀ ନିଜ ପଦମର୍ଯ୍ୟଦାକୁ ଭୁଲିଯିବେ । ଛତିଶଗଡ଼ର ସୁରଜପୁରର ଜିଲ୍ଲାପାଳ ରଣବୀର ଶର୍ମା ନିଜ ପଦର ମର୍ଯ୍ୟଦାକୁ ଭୁଲି ଯାହା କରିଛନ୍ତି ଏବେ ତା’ର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏହି ଭିଡିଓରେ ଜିଲ୍ଲାପାଳ ଜଣେ ଯୁବକଙ୍କୁ ଚାପୁଡା ମାରୁଥିବା ଦେଖିବାକୁ ମିଳୁଛି । ଭିଡିଓ ଭାଇରାଲ ହେବା ପରେ ଛତିଶଗଡ଼ ସରକାର ଡ୍ୟାମେଜ୍ କଣ୍ଟ୍ରୋଲ ମୋଡକୁ ଆସିଛନ୍ତି । ଜିଲ୍ଲାପାଳ ରଣବୀରଙ୍କୁ ମୁଖ୍ୟମନ୍ତ୍ରୀ ଭୁପେଶ ବଘେଲ ତୁରନ୍ତ ହଟାଇବାକୁ ନିର୍ଦ୍ଦେଶ ଦେଇଛନ୍ତି ।

ଘଟଣା କ’ଣ ଥିଲା ?
ଜିଲ୍ଲାପାଳ ରଣବୀର ଶର୍ମା ସୁରଜପୁର ସହର ଦେଇ ଯାଉଥିବା ବେଳେ ଜଣେ ଯୁବକଙ୍କ ଲକଡାଉନ୍ ମଧ୍ୟରେ ଗାଡି ନେଇ ଯାଉଥିବା ଦେଖିବାକୁ ପାଇଥିଲେ । ସେ ନିଜ ଗାଡି ଅଟକାଇ ଯୁବକଙ୍କୁ ବାହାରକୁ ବାହାରିବାର କାରଣ ପଚାରିଥିଲେ । ଯୁବକ ଜଣକ ଔଷଧ କିଣିବାକୁ ବାହାରିଥିବା କହିଥିଲେ । ଯୁବକଙ୍କ କଥା ଶୁଣିବା ଜିଲ୍ଲାପାଳ ଚାଲିଯାଇଥିଲେ । ତେବେ ଗାଡି ନିକଟରୁ ଫେରି ଆସି ସେ ଯୁବକଙ୍କୁ ମେଡିସିନ୍ ପ୍ରେସକ୍ରିପସନ ଦେଖାଇବାକୁ କହିଥିଲେ । ଆଉ ମଧ୍ୟ ଯୁବକଙ୍କ ଫୋନ୍ ମାଗି ତଳକୁ ଫୋପାଡି ଭାଙ୍ଗି ଦେଇଥିଲେ । ଯୁବକ ଜଣକ ଭିଡିଓ ସୁଟିଂ କରୁଥିବା ଜିଲ୍ଲାପାଳ ଅଭିଯୋଗ କରିଥିଲେ ।ତେବେ ଯୁବକ ସେ ଭିଡିଓ ସୁଟିଂ କରୁନଥିବା କହିଥିଲେ । ଏହାପରେ ଜିଲ୍ଲାପାଳ ନିଜେ ଯୁବକଙ୍କୁ ଚାପୁଡା ମାରିବା ସହିତ ପାଖରେ ଥିବା ସିପାହୀଙ୍କୁ ଯୁବକଙ୍କୁ ମାରିବା ପାଇଁ କହିଥିଲେ । ଏହି ଘଟଣାର ଭିଡିଓ ପରେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଥିଲେ ।

ଜିଲ୍ଲାପାଳ ମାଗିଲେ କ୍ଷମା
ଭିଡିଓ ଭାଇରାଲ ହେବା ପରେ ଜିଲ୍ଲାପାଳ ରଣବୀର ଶର୍ମା ଭୁଲ ପାଇଁ କ୍ଷମା ମାଗିଛନ୍ତି । ସେ ଗୋଟିଏ ଭିଡିଓ ପୋଷ୍ଟ୍ କରି ଆବେଗରେ ଆସି ଏପରି କରିଥିବା କହିଛନ୍ତି । ଅନ୍ୟପକ୍ଷରେ ଆଇଏସ ସଂଘ ଘଟଣାକୁ ନିନ୍ଦା କରି ଟ୍ୱିଟ୍ କରିଛି । ସୁରଜପୁର ଜିଲ୍ଲାପାଳଙ୍କ ବ୍ୟବହାର ଉଚିତ ନଥିଲା ବୋଲି ସଂଘ ପକ୍ଷରୁ କୁହାଯାଇଛି । ପ୍ରଶାସନିକ ଅଧିକାରୀ ମାନେ ସବୁବେଳେ ବିଶେଷକରି ବର୍ତ୍ତମାନର କଠିନ ସମୟରେ ଅଧିକ ସମ୍ବେଦନଶୀଳ ହେବାର ଆବଶ୍ୟକତା ରହିଛି ବୋଲି ସଂଘ କହିଛି ।

ସୋସିଆଲ ମିଡିଆରେ ନିନ୍ଦା
ଜିଲ୍ଲାପାଳ କ୍ଷମା ମାଗି ସାରିଲା ପରେ ମଧ୍ୟ ସୋସିଆଲ ମିଡିଆରେ ତାଙ୍କୁ ସମାଲୋଚନା ଜାରି ରହିଛି । ସୋସିଆଲ ମିଡିଆରେ ଟ୍ୱଇଟ୍ ଓ ପୋଷ୍ଟ ଜରିଆରେ ତାଙ୍କୁ ତାଙ୍କ ବ୍ୟବହାର ପାଇଁ ନିନ୍ଦା କରାଯାଉଛି । ଆଦିତ୍ୟ ରାଜ କୌଲ ନାମକ ୟୁଜର ଟ୍ୱିଟ୍ କରି ପଚାରିଛନ୍ତି ଯେ, ରାସ୍ତା ଉପରେ ଯଦି ଜଣେ ଜିଲ୍ଲାପାଳ ଏପରି ବ୍ୟବହାର କରିପାରୁଛନ୍ତି ତେବେ ଘରେ ସେ କେଉଁଭଳି ବ୍ୟବହାର କରୁଥିବେ ? ମୁଁ ଏହି ଜିଲ୍ଲାପାଳଙ୍କ ପରିବାର କଥା ଭାବି ଦୁଃଖିତ