ନୂଆଦିଲ୍ଲୀ: ବହୁଚର୍ଚ୍ଚିତ ରାଜୀବ ଗାନ୍ଧୀ ହତ୍ୟା ମାମଲା। ୬ ଅଭିଯୁକ୍ତଙ୍କୁ ମୁକ୍ତ କରିବା ନେଇ ନିଷ୍ପତ୍ତିର ପୁନଃସମୀକ୍ଷା ଲାଗି ସୁପ୍ରିମକୋର୍ଟରେ କେନ୍ଦ୍ର ସରକାର କରିଛନ୍ତି ଆବେଦନ। କେନ୍ଦ୍ର ସରକାର ଦର୍ଶାଇଛନ୍ତି ଏହି ଗୁରୁତ୍ବପୂର୍ଣ୍ଣ ମାମଲାରେ ଅଧିକ ଶୁଣାଣି ହୋଇନାହିଁ, ଯାହାକି ପ୍ରାକୃତିକ ନ୍ୟାୟର ବିରୁଦ୍ଧାଚରଣ କରୁଛି। ଏହା ସହ ମୁକ୍ତି ନିର୍ଦ୍ଦେଶ ନ୍ୟାୟର ବାର୍ତ୍ତା ପ୍ରତି ଏକ ଅବମାନନା। ଦୋଷୀମାନଙ୍କୁ ଖଲାସ କରିବା ଯୋଗୁ ଭାରତରେ ପ୍ରବଳ ବିରୋଧାଭାସ ସୃଷ୍ଟି ହୋଇଛି ଏବଂ ଶାନ୍ତି, ସ୍ଥିରତା ଓ ଆପରାଧିକ ନ୍ୟାୟିକ ବ୍ୟବସ୍ଥାରେ ଚାପ ସୃଷ୍ଟି କରିଛି।
ସରକାର ପୁଣି କହିଛନ୍ତି, ମୁକୁଳିଥିବା ୬ ଜଣଙ୍କ ମଧ୍ୟରୁ ୪ଜଣ ସିଂହଳୀ ଏବଂ ଆତଙ୍କବାଦୀ ଭାବେ ଦୋଷୀ ସାବ୍ୟସ୍ତ ହୋଇଥିଲେ। ଭାରତର ଜଣେ ପୂର୍ବତନ ପ୍ରଧାନମନ୍ତ୍ରୀଙ୍କୁ ହତ୍ୟା ପରି ଏକ ବୀଭତ୍ସ ଘଟଣା ଘଟିଥିଲା । ସେମାନଙ୍କୁ ମୁକ୍ତି ନିର୍ଦ୍ଦେଶ ଦେବା ଆନ୍ତର୍ଜାତିକ ନିୟମର ଉଲ୍ଲଂଘନ କରୁଛି । ମୁଖ୍ୟ ଅଭିଯୁକ୍ତ ନଳିନୀ ସମେତ ୬ ଦୋଷୀଙ୍କୁ ଗତ ୧୧ ତାରିଖରେ ଖଲାସ ଲାଗି କୋର୍ଟ ଦେଇଥିଲେ ନିର୍ଦ୍ଦେଶ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ପ୍ରାୟ ୩୨ ବର୍ଷ ପରେ ଜେଲରୁ ମୁକୁଳିଥିଲେ ନଳିନୀଙ୍କ ସମେତ ଶ୍ରୀହରନ, ସନ୍ଥନ, ମୁରୁଗାନ, ରର୍ବଟ ପୟାସ ଓ ଆର.ପି. ରବିଚନ୍ଦ୍ରନ । ୧୯୯୧ ମେ ୨୧ରେ ତାମିଲନାଡୁର ଶ୍ରୀପେରୁମ୍ବୁଦୁରରେ ଘଟିଥିବା ଆତ୍ମଘାତୀ ବିସ୍ଫୋରଣରେ ରାଜୀବଙ୍କ ସମେତ ୧୬ ଜଣଙ୍କର ହୋଇଥିଲା ନିଧନ । ଦୋଷୀମାନଙ୍କୁ ମୁକୁଳାଇବା ଲାଗି ଉଭୟ ଏଆଇଡିଏମକେ ଓ ଡିଏମକେ ଚଳାଇଥିଲେ ଉଦ୍ୟମ । ଦୋଷୀଙ୍କ ଖଲାସ ନିର୍ଦ୍ଦେଶକୁ ସମାଲୋଚନା କରିଥିଲେ କଂଗ୍ରେସ ସମେତ ବିଭିନ୍ନ ରାଜନୈତିକ ଦଳ।
