ଦଶମ ଓ ଦ୍ୱାଦଶ ଅଫଲାଇନ୍ ପରୀକ୍ଷା ପାଇଁ CBSEର ଗାଇଡଲାଇନ୍
1 min read
ନୂଆଦିଲ୍ଲୀ: ଦ୍ୱାଦଶ ଓ ଦଶମ ଶ୍ରେଣୀ ପିଲାଙ୍କ ଅଫ୍ ଲାଇନ୍ ଟର୍ମ-୧ ପରୀକ୍ଷା ପାଇଁ CBSE ଜାରି କଲା ଗାଇଡଲାଇନ୍ । ଦ୍ୱାଦଶ ଶ୍ରେଣୀ ପିଲାଙ୍କ ପରୀକ୍ଷା ନଭେମ୍ବର ୧୬ରୁ ଆରମ୍ଭ ହେଉଥିବା ବେଳେ ଦଶମ ପିଲାଙ୍କ ପରୀକ୍ଷା ଗୋଟିଏ ଦିନ ପରେ ଅର୍ଥାତ ନଭେମ୍ବର ୧୭ ତାରିଖରୁ ଆରମ୍ଭ ହେବ ।
ଦ୍ୱାଦଶ ଶ୍ରେଣୀ ପିଲା ୧୯ଟି ବିଷୟରେ ପରୀକ୍ଷା ଦେବାକୁ ଥିବା ବେଳେ ଦଶମ ପିଲା ୯ଟି ବିଷୟରେ ପରୀକ୍ଷା ଦେବେ । ବାକି ପରୀକ୍ଷା ଗ୍ରୁପରେ କରାଯିବ ।
ପରୀକ୍ଷା ଦେବାକୁ ଅନୁମତି ପାଇଥିବା ଛାତ୍ରଛାତ୍ରୀଙ୍କ ପାଇଁ OMR ଆନସାର ସିଟ୍ସ ପରୀକ୍ଷା କେନ୍ଦ୍ରକୁ ପଠାଯିବ ବୋଲି ସିବିଏସଇ ପକ୍ଷରୁ କୁହାଯାଇଛି । ସ୍କୁଲ ତରଫରୁ OMR ସିଟ୍ ଡାଉନଲୋଡ଼ ପରେ A4 ସାଇଜର ପ୍ରିଣ୍ଟ ବାହାର କରି ପିଲାଙ୍କ ମଧ୍ୟରେ ବଣ୍ଟିବାକୁ ବୋର୍ଡ ପକ୍ଷରୁ କୁହାଯାଇଛି ।
ଶୀତ ଆରମ୍ଭ ହୋଇ ଯାଇଥିବାରୁ ସକାଳ ୧୦ଟା ୩୦ ବଦଳରେ ୧୧ଟା ୩୦ରେ ପରୀକ୍ଷା ଆରମ୍ଭ ହେବ । ପରୀକ୍ଷା ସମୟ ୯୦ ମିନିଟ ରହିବ । ଏହାସହ ପିଲାମାନଙ୍କୁ ଅଧିକ ୩୦ ମିନିଟ ସମୟ ଦିଆଯିବ ।
କିଛିଦିନ ପୂର୍ବରୁ ଦିଲ୍ଲୀ ସରକାରୀ ସ୍କୁଲ ପ୍ରିନ୍ସପାଲ ଆସୋସିଏସନ ତରଫରୁ ସିବିଏସଇ ପାଖରେ ଏତେ ପରିମାଣରେ OMR ସିଟ୍ସର ପ୍ରିଣ୍ଟ କରିବାକୁ ଅକ୍ଷମତା ପ୍ରକାଶ କରାଯାଇଥିଲା । ପୂର୍ବ ଭଳି ବିଦ୍ୟାଳୟଗୁଡ଼ିକୁ ପ୍ରଶ୍ନପତ୍ର ସହ ଆନସାର ସିଟ୍ସ ମଧ୍ୟ ପଠାଇବାକୁ ସିବିଏସଇକୁ ଅନୁରୋଧ କରାଯାଇଥିଲା ।
