ପଞ୍ଜାବ ମୁଖ୍ୟମନ୍ତ୍ରୀଙ୍କ ଘର ନିକଟରୁ ମିଳିଲା ଅଫୁଟା ବୋମା

ଚଣ୍ଡିଗଡ: ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ବାସଭବନ ନିକଟରୁ ମିଳିଲା ଅଫୁଟା ବୋମା। ଚଣ୍ଡିଗଡର କଂସଲ ଗାଁରେ ଥିବା ଏକ ଆମ୍ବ ତୋଟାରୁ ଅଫୁଟା ବୋମା ଜବତ ହୋଇଛି। ଯେଉଁଠାରେ ବୋମା ମିଳିଛି ସେଠାରୁ ପଞ୍ଜାବ ମୁଖ୍ୟମନ୍ତ୍ରୀ ଏବଂ ହରିୟାଣା ମୁଖ୍ୟମନ୍ତ୍ରୀଙ୍କ ଘର ପାଖାପାଖି ୨ କିଲୋମିଟର ଦୂରରେ ଅବସ୍ଥିତ। ଦୁଇଜଣ ମୁଖ୍ୟମନ୍ତ୍ରୀଙ୍କ ହେଲିପ୍ୟାଡ୍ ଠାରୁ ଏହି ସ୍ଥାନ ମାତ୍ର ୧ କିଲୋମିଟର ଦୂରରେ ଅବସ୍ଥିତ। ଏହି ଖବର ସାମ୍ନାକୁ ଆସିବା ପରେ ସମସ୍ତ ଅଞ୍ଚଳରେ ଭୟର ବାତାବରଣ ଖେଳିଯାଇଛି।
ପୋଲିସ ଘଟଣା ସ୍ଥଳରେ ପହଞ୍ଚି ଉକ୍ତ ଅଞ୍ଚଳକୁ ସିଲ୍ କରି ଛାନଭିନ୍ ଆରମ୍ଭ କରିଛି। ବୋମାକୁ ନିଷ୍କ୍ରିୟ କରାଯିବା ପାଇଁ ପୋଲିସ ପକ୍ଷରୁ ଉଦ୍ୟମ କରାଯାଉଛି। ଘଟଣା ସ୍ଥଳରେ ସୁରକ୍ଷା କର୍ମୀ, ବୋମା ନିଷ୍କ୍ରିୟକାରୀ ଦଳ ପହଞ୍ଚି ବୋମାକୁ ନିଷ୍କ୍ରିୟ କରିବା ପାଇଁ ଲାଗିଛନ୍ତି। ତେବେ ଏଠାରେ ପ୍ରଶ୍ନ ଉଠୁଛି କିଏ ଏବଂ କାହିଁକି ଏଠି ବୋମା ରଖିଛି ? ଏନେଇ ପୋଲିସ ତଦନ୍ତ ଜାରି ରଖିଛି । ପୋଲିସ ଓ ସୁରକ୍ଷା କର୍ମୀ ସମ୍ପୂର୍ଣ୍ଣ ଅଞ୍ଚଳକୁ ସୁରକ୍ଷା ଦେଉଛନ୍ତି।