ଡ୍ରଗ୍ସ ମାମଲା, ୨୦୧୯ ପାର୍ଟି ଉପରେ କରଣ ଜୋହରଙ୍କୁ ଜେରା କରିବ NCB

ମୁମ୍ବାଇ: ବଲିଉଡ ସହ ଡ୍ରଗ୍ସ ଲିଙ୍କର ଛାନଭିନ୍ କରୁଥିବା ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (NCB) କରଣ ଜୋହରଙ୍କୁ ସମନ୍ ଜାରି କରିଛି । ବଲିଉଡର ଜଣାଶୁଣା ଚେହେରା ତଥା ନିର୍ଦ୍ଦେଶକ କରଣ ଜୋହରଙ୍କୁ ପଚରାଉଚରା ପାଇଁ ସମନ ଜାରି କରିଛି ମୁମ୍ବାଇ ଏନସିବି । ଏନସିବି ଅନୁସାରେ- କରଣ ଜୋହର କୌଣସି ମାମଲାରେ ସନ୍ଦିଗ୍ଧ ନୁହଁନ୍ତି । ଡ୍ରଗ୍ସ ସମ୍ବନ୍ଧିତ ମାମଲାରେ ଏନସିବି କରଣଙ୍କ ଠାରୁ କିଛି ସୂଚନା ଜାଣିବାକୁ ଚାହୁଁଛି ।

ଏନସିବି ସୂତ୍ର ଅନୁସାରେ, କରଣ ଜୋହର ନିଜେ ଏନସିବିରେ ହାଜର ହେବା ଆବଶ୍ୟକ ନାହିଁ । କରଣ ତାଙ୍କ ପ୍ରତିନିଧିକୁ ମଧ୍ୟ ପଠାଇ ପାରିବେ । ତେବେ, କରଣ ଜୋହରଙ୍କୁ ତାଙ୍କର ଇଲେକ୍ଟ୍ରୋନିକ ଉପକରଣର ବିବରଣୀ ଦେବାକୁ କହିଛି ଏନସିବି । ଯେଉଁସବୁ ଉପକରଣ ୨୦୧୯ ଜୁଲାଇରେ ତାଙ୍କ ଘରେ ଆୟୋଜିତ ପାର୍ଟି ସୁଟ୍ ପାଇଁ ବ୍ୟବହାର କରାଯାଇଥିଲା ।

ବୁଧବାର ଏନସିବି କରଣଙ୍କୁ ସମନ ପଠାଇଛି । ୨୦୧୯ରେ ହୋଇଥିବା ପାର୍ଟିର ସମସ୍ତ ତଥ୍ୟ ଦେବାକୁ ଏନସିବି କହିଛି । ପାର୍ଟିରେ କିଏ କିଏ ସାମିଲ୍ ଥିଲେ ? କେଉଁ କ୍ୟାମେରାରେ ଭିଡିଓ ସୁଟ୍ ହୋଇଥିଲା ? ପାର୍ଟିକୁ ଆମନ୍ତ୍ରଣ ପାଇଁ ନିମନ୍ତ୍ରଣ କାର୍ଡ ଦିଆଯାଇଥିଲା କି ? ଏମିତି ଅନେକ ପ୍ରଶ୍ନର ଉତ୍ତର ଶୁକ୍ରବାର (ଡିସେମ୍ବର ୧୮ ତାରିଖରେ) ଦେବାକୁ କୁହାଯାଇଛି ।

ପୂର୍ବରୁ ଡ୍ରଗ୍ସ ମାମଲାରେ ଏନସିବି ଦୀପିକା ପାଦୁକୋନ୍, ସାରା ଅଲ୍ଲୀ ଖାଙ୍କ ଭଳି ବଲିଉଡର ଚିହ୍ନା ଚେହେରାକୁ ଜେରା କରିଥିବା ବେଳେ ରିୟା ଚକ୍ରବର୍ତ୍ତୀଙ୍କୁ ଗିରଫ କରିଥିଲା ।