ନନ୍ଦିଘୋଷ ବ୍ୟୁରୋ : ପୁଣି ଇତିହାସ ରଚିବ ଭାରତ । ଜାନୁଆରୀ ୧୨ ତାରିଖରେ ଉତକ୍ଷେପଣ ହେବ PSLV C-62 ରକେଟ୍ । ଶ୍ରୀହରିକୋଟା ସତୀଶ ଧାଓ୍ବନ ମହାକାଶ କେନ୍ଦ୍ରରୁ ପ୍ରଥମ ଲଞ୍ଚପ୍ୟାଡରୁ ଉତକ୍ଷେପଣ କରିବ ଭାରତୀୟ ମହାକାଶ ଗବେଷଣା ସଂସ୍ଥା ISRO । ଏହା ISROର ୧୦୧ ତମ କକ୍ଷପଥ ମିଶନ । ଏହି ରକେଟରେ ୧୯ଟି ଉପଗ୍ରହ ମହାକାଶକୁ ପଠାଯିବ । ଏଥିରେ ରହିଛି ଭାରତର ପେଲୋଡ୍ EOS N1 । ଏହାକୁ ଅନବେଶା ମଧ୍ୟ କୁହାଯାଏ । ଏହାଦ୍ବାରା ମହାକାଶ ଉପରୁ ଭାରତ ଉପରେ ନଜର ରଖାଯିବ । ଏହା ଏକ ଗୁପ୍ତଚର କ୍ୟାମେରା । ଏହାକୁ ଡିଆଡିଓ ଡିଜାଇନ୍ କରିଥିବା ସୂଚନା ରହିଛି । ଶ୍ରୀହରିକୋଟା ସତୀଶ ଧାଓ୍ବନ ମହାକାଶ କେନ୍ଦ୍ର ଉପରେ ଏବେ ସାରା ଦେଶର ଫୋକସ ରହିଛି ।
ଉତ୍ତର ପ୍ରଦେଶରେ ପ୍ରକାଶ ପାଇଥିବା SIR ତାଲିକାକୁ ନେଇ ତୁମ୍ବିତୋଫାନ୍
ନନ୍ଦିଘୋଷ ବ୍ୟୁରୋ : ଉତ୍ତର ପ୍ରଦେଶରେ ପ୍ରକାଶ ପାଇଥିବା SIR ତାଲିକାକୁ ନେଇ ତୁମ୍ବିତୋଫାନ୍ । ତାଲିକାରୁ ବାଦ ପଡିଛନ୍ତି ୨ କୋଟି ୮୯ ଲକ୍ଷ ଭୋଟର । ଜଣେ କଂଗ୍ରେସ ନେତାଙ୍କ ପୁରା ପରିବାର ତାଲିକାରୁ ବାଦ ପଡିଥିବା ଅଭିଯୋଗ ହୋଇଛି । କଂଗ୍ରେସ ନେତା ଗୁରଦୀପ ସିଂହ ସପଲ ଏବଂ ତାଙ୍କ ପରିବାର ଏହି ତାଲିକାରୁ ଗାଏବ ହୋଇଥିବା ସେ ସୋସିଆଲ ମିଡ଼ିଆରେ ଉଲ୍ଲେଖ କରିଛନ୍ତି । ସେ କଂଗ୍ରେସ ନେତା ହୋଇଥିବାରୁ ତାଙ୍କୁ ଟାର୍ଗେଟ୍ କରାଯାଇଛି ବୋଲି ସେ ଅଭିଯୋଗ ଆଣିଛନ୍ତି । ନିର୍ବାଚନ କମିଶନ କାହା ନିର୍ଦ୍ଦେଶରେ କାମ କରୁଛନ୍ତି ବୋଲି ସେ ପ୍ରଶ୍ନ କରିଛନ୍ତି । ଭୋଟ ତାଲିକାରୁ ଯେଉଁମାନଙ୍କର ନାମ ବାଦ ଦିଆଯାଇଛି ସେମାନଙ୍କୁ ପୁନଃ ସାମିଲ କରିବା ପାଇଁ ସେ ଦାବି କରିଛନ୍ତି । ତାଙ୍କ ନାମ 2003 ଭୋଟର ତାଲିକାରେ ତାଲିକାଭୁକ୍ତ ଥିଲା । ଚଳିତଥର ବି ନିର୍ବାଚନ କମିଶନଙ୍କ ଆବଶ୍ୟକ ଅନୁଯାୟୀ ଆବଶ୍ୟକୀୟ କାଗଜପତ୍ର ଦାଖଲ କରିଥିଲେ ଗୁରୁଦୀପ । ତା ସତ୍ବେ ବି କିଭଳି ତାଙ୍କ ନାଁ କଟିଲା ବୋଲି ସେ ପ୍ରଶ୍ନ କରିଛନ୍ତି । ଗତକାଲି ପ୍ରକାଶ ପାଇଛି ଉତ୍ତର ପ୍ରଦେଶ ତାଲିକା ।
ବିଗ୍ ବି’ଙ୍କୁ ଭେଟିଲେ ହାର୍ଦ୍ଧିକ ପାଣ୍ଡ୍ୟାଙ୍କ ଗାର୍ଲଫ୍ରେଣ୍ଡ, ଭିଡିଓ ହେଉଛି ଭାଇରାଲ
ବିଗ୍ ବି’ଙ୍କୁ ଭେଟିଲେ ହାର୍ଦ୍ଧିକ ପାଣ୍ଡ୍ୟାଙ୍କ ଗାର୍ଲଫ୍ରେଣ୍ଡ, ଭିଡିଓ ହେଉଛି ଭାଇରାଲ
ନନ୍ଦିଘୋଷ ବ୍ୟୁରୋ: ବଲିଉଡ଼ ସୁପରଷ୍ଟାର ତଥା ମହାନାୟକ ଅଭିତାଭ ବଚ୍ଚନ ଯେଉଁଠିକୁ ଯାଇଥାନ୍ତି, ଯାହାକୁ ଭେଟିଥାନ୍ତି ତାହା ଖବର ସିରୋନାମା ପାଲଟି ଯାଇଥାଏ । ଏବେ ବିଗ ବି’ଙ୍କ ଏମିତି ଏକ ଭିଡିଓ ସୋସିଆଲ ମିଡ଼ିଆରେ ଭାଇରାଲ ହେଉଛି । ଏଥିରେ ସେ ଜଣେ ଯୁବତୀଙ୍କ ସହ କଥା ହେଉଥିବା ଦେଖିବାକୁ ମିଳୁଛି । ଏହି ଯୁବତୀ ଜଣଙ୍କ ଆଉ କେହି ନୁହେଁ, ଭାରତୀୟ କ୍ରିକେଟ ଟିମର ଅଲରାଉଣ୍ଡର ହାର୍ଦ୍ଧିକ ପାଣ୍ଡ୍ୟାଙ୍କ ଗାର୍ଲଫ୍ରେଣ୍ଡ ମାହିକା ।
ଭିଡିଓରେ ଅମିତାଭ ଏବହ ମାହିକାଙ୍କ ସହ ହାର୍ଦ୍ଧିକଙ୍କୁ ବି ଦେଖିବାକୁ ମିଳୁଛି । ଯାହା ସୋସିଆଲ ମିଡିଆରେ ଅପଲୋଡ ହେବା ପରେ ଭାଇରାଲ ହେବାରେ ଲାଗିଛି । ଏହାସହ ଭିଡିଓଟିକୁ ୟୁଜର୍ସ ବହୁତ ପସନ୍ଦ କରୁଛନ୍ତି । ଭିଡିଓରେ ଅମିତାଭ ମାହିକାଙ୍କ ସହ କଥା ହେଉଥିବା ଦେଖିବାକୁ ମିଳୁଛି ।
ରାଲାଏନ୍ସ ଫାଉଣ୍ଡେସନର ‘ୟୁନାଇଟେଡ ଇନ୍ ଟ୍ରାୟମ୍ଫ’ ଇଭେଣ୍ଟକୁ ହାର୍ଦ୍ଧିକ ଗାର୍ଲଫ୍ରେଣ୍ଡ ମାହିକାଙ୍କ ସହ ଯାଇଥିଲେ । ଏଥିରେ ବିଗ୍ ବି’ ବି ଯୋଗ ଦେଇଥିଲେ । ଏହି ସମୟରେ ହାର୍ଦ୍ଧିକ ମାହିକାଙ୍କୁ ଅମିତାଭଙ୍କ ସହ ପରିଚିତ କରାଇଥିଲେ । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଅମିତାଭ ବଚ୍ଚନ ପାଣ୍ଡ୍ୟାଙ୍କୁ ଆଲିଙ୍ଗନ କରିଥିଲେ । ଏହାପରେ ପାଣ୍ଡ୍ୟା ମାହିକାଙ୍କୁ ତାଙ୍କ ସହ ସାକ୍ଷାତ କରାଇଥିଲେ ।
ଅମିତାଭ ମାହିକାଙ୍କୁ କିଛି କହୁଥିବା ଭିଡିଓରେ ଦେଖିବାକୁ ମିଳୁଛି । ଆଉ ଅଭିତାଭଙ୍କ କଥା ଶୁଣି ମାହିକା ହସିବା ସହ ଧନ୍ୟବାଦ ଜଣାଉଛନ୍ତି ।
ରାଜ୍ୟରେ ସଂପୂର୍ଣ୍ଣ ଠପ୍ ଧାନ କିଣା, ଶୀତ କାକରରେ ଅମଳ ଫସଲ ଧରି ବସି ରହିଛନ୍ତି ଅନ୍ନଦାତା
ନନ୍ଦିଘୋଷ ବ୍ୟୁରୋ : ରାଜ୍ୟରେ ସଂପୂର୍ଣ୍ଣ ଠପ୍ ଧାନ କିଣା। ମିଲର୍ସଙ୍କ ଆନ୍ଦୋଳନ ଜାରି। ଶୀତ କାକରରେ ଧାନବସ୍ତା ଧରି ବସି ରହିଛନ୍ତି ଅନ୍ନଦାତା। ସରକାର କେବେ କିଣିବେ ଚାଷୀଙ୍କ ଧାନ, ତାହା ଏବେ ବି ଅସ୍ପଷ୍ଟ। ଯାହାକୁ ନେଇ ସାରା ଓଡ଼ିଶାରେ ତୀବ୍ର ହେବାରେ ଲାଗିଛି ଚାଷୀ ଅସନ୍ତୋଷ। ଧାନକିଣାରେ ଅବ୍ୟବସ୍ଥାକୁ ନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଛି ବିଜେଡି। ବିଧାୟକ ଅରୁଣ ସାହୁ କହିଛନ୍ତି, ସରକାର କହିଲେ ମନ୍ତ୍ରୀମାନେ ମଣ୍ଡି ଜଗିବେ। ହେଲେ ଏବେ ମନ୍ତ୍ରୀଙ୍କ ଘରକୁ ଜଗୁଛନ୍ତି ପୋଲିସ। ଶୀତ କାକରରେ ମଣ୍ଡି ଆଗରେ ବସିଛନ୍ତି କୃଷକ ଭାଇ। କିନ୍ତୁ ସରକାର ଚାଷୀଙ୍କ ଠାରୁ ଧାନ କିଣିବାରେ ହେଉଛନ୍ତି ଅସମର୍ଥ। ଯଦି ସବୁ ଚାଷୀଙ୍କ ଠାରୁ ସରକାର ଧାନ କିଣିବେ ନାହିଁ, ତେବେ ଏହା ବିରୋଧରେ ଆନ୍ଦୋଳନକୁ ଜୋରଦାର କରିବ ବୋଲି ଚେତାବନୀ ଦେଇଛି ଦଳ। ସେହିପରି ସରକାର ଜାଣିଶୁଣି ଚାଷୀଙ୍କ ଧାନ କିଣୁନାହାନ୍ତି ବୋଲି ଅଭିଯୋଗ କରିଛି କଂଗ୍ରେସ।
ଅନ୍ୟପଟେ ରାଜ୍ୟରେ ମିଲର୍ସ ଆନ୍ଦୋଳନକୁ ନେଇ ଭିନ୍ନ ଯୁକ୍ତି ବାଢିଛନ୍ତି ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତ। ମିଲର୍ସଙ୍କ ୪ ଦଫା ଦାବି ପୂରଣର କୌଣସି ଯଥାର୍ଥତା ନାହିଁ ବୋଲି ସିଧାସିଧା କହିଛନ୍ତି ମନ୍ତ୍ରୀ। ଏବେ ଧାନ କିଣା ସିଜିନ ଚାଲିଛି, ତେଣୁ ସରକାରଙ୍କୁ ହରଡ଼ ଘଣାରେ ପକାଇବାକୁ ମିଲର୍ସ ଚେଷ୍ଟା କରୁଛନ୍ତି ବୋଲି କହିଛନ୍ତି ମନ୍ତ୍ରୀ। ସେପଟେ କିନ୍ତୁ ନିଜ ଜିଦରେ ଅଟଳ ରହିଛନ୍ତି ମିଲର୍ସ। ଧାନ କିଣା ବନ୍ଦ ଓ ଟୋକନ ସମସ୍ୟାରେ ଘାଣ୍ଟି ହେଉଛନ୍ତି ଅନ୍ନଦାତା। ଏଯାଏଁ ୩୦ ପ୍ରତିଶତ ଧାନ କିଣା ଯାଇଥିବା ବେଳେ, ସରକାରଙ୍କ ପାରିବାପଣକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ।
ଜି ରାମ ଜି ସପକ୍ଷରେ ମୁଖ୍ୟମନ୍ତ୍ରୀଙ୍କ ଓକିଲାତି…
ଭୁବନେଶ୍ବର : MNREGA ଠାରୁ ଭିବି-ଜି-ରାମ-ଜି ଯୋଜନା ଭଲ। ନୂଆ ଯୋଜନା ସପକ୍ଷରେ ଅନେକ ଯୁକ୍ତି ଦର୍ଶଆଇ ଏହା ଭଲ ବୋଲି ସାର୍ଟିଫିକେଟ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ବିଜେପି ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ରାଜ୍ୟ ସଭାପତି, ମନ୍ତ୍ରୀ, ବିଧାୟକଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀ ବୁଝାଇଛନ୍ତି, ଭିବି ଜି ରାମ ଜୀ କାହିଁକି MNREGA ଠାରୁ ଭଲ। ପୁରୁଣା ଯୋଜନାରେ ଦୋଷ ଦୁର୍ବଳତା ଥିଲା, ବାଟବାରଣା ହେଉଥିଲା। ନୂଆ ଯୋଜନାରେ ସ୍ବଚ୍ଛତା ଓ ଦକ୍ଷତା ବଢିବ। ଲୋକଙ୍କୁ କାମ ଅଧିକ ଦିନର ମିଳିବା ନିଶ୍ଚିତ। କାମ ନ ମିଳିଲେ ଭତ୍ତା ମିଳିବ ବୋଲି କହିଛନ୍ତି ମୁଖ୍ୟମନ୍ତ୍ରୀ। ସେ ଅଭିଯୋଗ କରିଛନ୍ତି, ରାଜନୈତିକ ଫାଇଦା ପାଇଁ ୨୦୦୯ରେ ନରେଗା ଯୋଜନାରେ ଉପା ସରକାର ଯୋଡ଼ିଥିଲେ ମହାତ୍ମା ଗାନ୍ଧୀଙ୍କ ନାମ। ନାଁ ପରିବର୍ତ୍ତନ ହେଲା କିନ୍ତୁ ଢାଞ୍ଚା ପରିବର୍ତ୍ତନ ହେଲାନି। ପ୍ରତି ପରିବାରକୁ ବର୍ଷକୁ ଶହେ ଦିନ କାମର ଗ୍ୟାରେଣ୍ଟି ଦିଆଯାଇଥିଲା। କିନ୍ତୁ ଆଉଟକମ ଥିଲା ୫୦ ପ୍ରତିଶତ। କାମ ନ ମିଳିଲେ ଭତ୍ତା ବ୍ୟବସ୍ଥା ବି ନଗଣ୍ୟ ଥିଲା। ଦୁର୍ବଳ ତଦାରଖ ଯୋଗୁଁ ଦୁର୍ନୀତି ହୋଇଛି, ଯୋଜନା ବିଫଳ ହୋଇଛି ବୋଲି କହିଛନ୍ତି ମୋହନ ମାଝୀ। ତାଙ୍କ ମତରେ ପ୍ରଧାନମନ୍ତ୍ରୀଙ୍କ ଲକ୍ଷ୍ୟ ବିକଶିତ ଭାରତ, ସେଥିପାଇଁ ନୂଆ ଯୋଜନାରେ ବିକଶିତ ଯୋଡ଼ା ଯାଇଛି। ବିରୋଧଥୀ ଅଯଥା ରାଜନୀତି କରୁଥିବା ସେ ଅଭିଯୋଗ କରିଛନ୍ତି।
ଭିବି ଜି ରାମ ଜି ଯୋଜନା ରାଶିରେ କେନ୍ଦ୍ର-ରାଜ୍ୟର ଅଂଶ ବଦଳିଛି। ଆଗରୁ ଓଡ଼ିଶା ଓ କେନ୍ଦ୍ର ସରକାର ପାଇଁ ଏହା ଥିଲା ୧୦ : ୯୦ । ଏବେ ତାହା ୪୦ : ୬୦ ପ୍ରତିଶତ ହେବ। ଏହା ଦ୍ଵାରା ରାଜ୍ୟର ଆର୍ଥିକ ବୋଝ ବଢ଼ିବ। ମୁଖ୍ୟମନ୍ତ୍ରୀ କହିଛନ୍ତି, ସାରା ଦେଶ ପାଇଁ ଏହି ଯୋଜନା ହୋଇଛି। କୌଣସି ରାଜ୍ୟ ଏହାକୁ ବିରୋଧ କରିନାହାନ୍ତି। ସେପଟେ କଂଗ୍ରେସ କହିଛି, ମୋହନ ମାଝୀ ତାଙ୍କ ପଦବୀ ବଞ୍ଚାଇବା ପାଇଁ ଏପରି କହିଛନ୍ତି। ଆର୍ଟିଫିସିଆଲ ଇଣ୍ଟେଲିଜେନ୍ସ, ଜିପିଏସ୍ ଏବଂ ମୋବାଇଲ ଜରିଆରେ ନୂଆ ଯୋଜନାରେ ସ୍ବଚ୍ଛତା ଯାଞ୍ଚ କରାଯିବାର ବ୍ୟବସ୍ଥା ରହିଛି। ଭିବି ଜି ରାମ ଜି କୁ ଆରମ୍ଭରୁ ବିରୋଧ କରୁଥିବା କଂଗ୍ରେସ ଆସନ୍ତା ଜାନୁଆରୀ ୩୦ରେ ଦେଶବ୍ୟାପୀ ଆନ୍ଦୋଳନର ଡାକରା ଦେଇଛି।
ସେଲିବ୍ରିଟିଙ୍କ ପ୍ରଚାର ନିକୋଟିନ୍ ସେବନ ପ୍ରତି କରୁଛି ଆକୃଷ୍ଟ…
ଭୁବନେଶ୍ବର : ତମ୍ବାଖୁକୁ ପାନ ମସଲା, ମଦ ବଦଳରେ ସୋଢା । ଏପରି କହି ଟିଭିରେ ବିଜ୍ଞାପନ ଆସୁଛି । ତାକୁ ପୁଣି ପ୍ରଚାର କରୁଛନ୍ତି ବଡ଼ ବଡ଼ ସେଲିବ୍ରିଟି । କ୍ରୀଡାବିତ ହୁଅନ୍ତୁ ବା ସିନେ ତାରକା, ସମସ୍ତେ ମାତିଛନ୍ତି ଏପରି ବିଜ୍ଞାପନରେ । ସେମାନଙ୍କୁ ଆଦର୍ଶ ଭାବି ଦେଖନ୍ତି ଫ୍ୟାନ । ଯେଉଁଥି ପାଇଁ ସେମାନେ ଯାହା ପ୍ରଚାର କରନ୍ତି, ତାକୁ ଆଦରି ନିଅନ୍ତି ଫ୍ୟାନସ୍ । ହେଲେ ଏଥି ପାଇଁ ଓଡ଼ିଶାର ୫୦ ପ୍ରତିଶତ ଲୋକ ତମ୍ବାଖୁ ସେବନ କରି ବିପଦ ଆଡ଼କୁ ମୁହାଁଉଛନ୍ତି । ତମ୍ବାଖୁ ନିରକାରଣ ରାଜ୍ୟସ୍ତରୀୟ ଟ୍ରେନିଂ କାର୍ଯ୍ୟକ୍ରମରେ ସରକାର ଏଥି ପାଇଁ ଚିନ୍ତା ପ୍ରକଟ କରିଛନ୍ତି । ନିକୋଟିନ ନାହିଁ କହି ବିଜ୍ଞାପନ କରୁଛନ୍ତି । ହେଲେ ସେହି ତଥାକଥିତ ପାନ ମସଲା ଓ ସୋଢା ଲୋକଙ୍କ ସ୍ବାସ୍ଥ୍ୟ ବିଗାଡୁଛି । ଏଥି ପାଇଁ କର୍କଟ, ବ୍ରନକାଇଟିସ୍, ଉଚ୍ଚ ରକ୍ତଚାପ, ହୃଦଘାତ, ମଧୁମେୟ, ଶ୍ରବଣ ଓ ଦୃଶ୍ୟ ଶକ୍ତି ହ୍ରାସ ହେଉଛି । ତେବେ ସବୁଠାରୁ ବଡ଼ ଅସୁବିଧା ଉପୁଜୁଛି, ଯେବେ ପୁରୁଷ ନପୁଂଶକ ହେଉଥିବାବେଳେ ମହିଳାଙ୍କ ପ୍ରସବଜନିତ ସମସ୍ୟା ଦେଖାଯାଉଛି । ଲୋକେ ଯାହାଙ୍କୁ ରୋଲ ମଡେଲ ଭାବେ ଗ୍ରହଣ କରିଛନ୍ତି, ସେମାନେ ଏପରି ବିଜ୍ଞାପନ ନକରି ଯୁବ ପୀଢୀଙ୍କ ପାଇଁ ସକରାତ୍ମକ ବାର୍ତ୍ତା ଦେବାକୁ ସ୍ବାସ୍ଥ୍ୟ ବିଭାଗ ପରାମର୍ଶ ଦେଇଛି ।
୨୦୧୨ ମସିହାରୁ ତମ୍ବାଖୁ ଉପରେ ରୋକ ଲାଗିଛି । ହେଲେ ଏହା ଧର୍ମକୁ ଆଖିଠାର ପରି । ଦୋକାନରେ ମାଳମାଳ ତମ୍ବାଖୁ ସାମଗ୍ରୀ ବିକ୍ରି ହେଉଛି । ସାମାଜିକ କର୍ମୀଙ୍କ ପକ୍ଷରୁ ଚାପ ପଡ଼ିଲେ, ଚଢାଉ କରାଯାଉଛି । ହେଲେ ଏହାର ବିକ୍ରି ଉପରେ ବ୍ରେକ ଲାଗୁନି । କେବଳ ନାଁକୁ ମାତ୍ର ପ୍ୟାକେଟରେ ଲେଖାଯାଉଛି ଏହା ସ୍ବାସ୍ଥ୍ୟ ପ୍ରତି ହାନିକାରକ । ସଚିନ ତେନ୍ଦୁଲକର ପରି ଖେଳାଳୀ ଏ ଦିଗରେ ବଡ଼ ଉଦାହରଣ ସୃଷ୍ଟି କରିଛନ୍ତି । ବ୍ୟାଟରେ ତମ୍ବାଖୁ କମ୍ପାନୀ ଷ୍ଟିକର ଲଗାଇବାକୁ ତାଙ୍କ ପାଖକୁ ଅଫର ଆସିଥିଲା । ଏଥି ପାଇଁ କୋଟିଏ ଟଙ୍କା ବି ତାଙ୍କୁ ମିଳିଥାନ୍ତା । ହେଲେ ସେ ଏହାକୁ ଗ୍ରହଣ କରି ନଥିଲେ । କାରଣ ଜୀବନ ସାରା ତମ୍ବାଖୁ କି ମଦର ପ୍ରଚାର କରିବେନି ବୋଲି ସଚିନ ନିଜ ପିତା ରମେଶ ତେନ୍ଦୁଲକରଙ୍କ ପାଖରେ ଶପଥ କରିଥିଲେ । ଆଜି ଯାଏଁ ସଚିନ ଏହି ଶପଥକୁ ପାଳନ କରିଥିବାରୁ ସବୁ ବର୍ଗ ପାଇଁ ଆଦର୍ଶ ହୋଇ ରହିଛନ୍ତି ।
ମନ୍ତ୍ରିମଣ୍ଡଳ ସମ୍ପ୍ରସାରଣ ସସପେନ୍ସ , ୧୯ ମାସ ପରେ ବିଜେପିରେ ଛିଣ୍ଡୁନି ଅଙ୍କ
ଭୁବନେଶ୍ବର : ମନ୍ତ୍ରିମଣ୍ଡଳ ସମ୍ପ୍ରସାରଣ ସସପେନ୍ସ । ମୁହଁ ଖୋଲିଲେ ବିଜେପି ବିଧାୟକ । ମୁଖ୍ୟମନ୍ତ୍ରୀଙ୍କ ନିଷ୍ପତ୍ତିକୁ ଆଶାୟୀଙ୍କ ଅପେକ୍ଷା । ବିଜେଡି କହିଲା ସରକାରରେ ସବୁ ଅଧାଗଢା । ୬ଟି ମନ୍ତ୍ରୀପଦ ଖାଲି, ଛିଣ୍ଡୁନି ନିଗମ ଓ ବୋର୍ଡ ଅଙ୍କ। ଏହାରି ଭିତରେ ମୋହନ ସରକାରଙ୍କୁ ବିତିଛି ୧୯ ମାସ । କେବେ ହେବ ମନ୍ତ୍ରିମଣ୍ଡଳ ସମ୍ପ୍ରସାରଣ ତାହା ବି ସସପେନ୍ସରେ । ଯାହାକୁ ନେଇ ବିଜେପିରେ ନାନା ଚର୍ଚ୍ଚା ଆଉ ଆକଳନ ଲାଗି ରହିଛି । ବିଜେପି ବିଧାୟକ ମନୋରଂଜନ ଦ୍ୟାନ ସାମନ୍ତରାୟ କହିଛନ୍ତି, ମନ୍ତ୍ରିମଣ୍ଡଳ ଓ ନିଗମ ନିଷ୍ପତ୍ତି ମୁଖ୍ୟମନ୍ତ୍ରୀଙ୍କ ଇଚ୍ଛାଧୀନ ବ୍ୟାପାର । ଦଳ ତାଙ୍କୁ ଯେଉଁ ଦାୟିତ୍ବ ଦେବେ ତାହାକୁ ସେ ତୁଲାଇବେ ବୋଲି କହିଛନ୍ତି ।
ନିୟମ ଅନୁସାରେ ମନ୍ତ୍ରିମଣ୍ଡଳରେ ୨୨ ଜଣ ସଦସ୍ୟ ରହିବା କଥା । ମୁଖ୍ୟମନ୍ତ୍ରୀଙ୍କ ସହ ବର୍ତ୍ତମାନ ୧୫ ଜଣ ସଦସ୍ୟ ଅଛନ୍ତି । ୬ଟି ମନ୍ତ୍ରିପଦ ୧୯ ମାସ ହେବ ଖାଲିପଡିଛି । ମୁଖ୍ୟମନ୍ତ୍ରୀ କାହାକୁ ମନ୍ତ୍ରିମଣ୍ଡଳରେ ସାମିଲ କରିବେ ଓ କାହାକୁ ବାଦ ଦେବେ ତାହାକୁ ନେଇ ପାଓ୍ବାର କରିଡରେ ଜୋରଦାର ଚର୍ଚ୍ଚା । ଏପରିକି ମନ୍ତ୍ରିମଣ୍ଡଳ ସଂପ୍ରସାରଣବେଳେ କିଛି ମନ୍ତ୍ରୀଙ୍କ ବିଭାଗ ଅଦଳବଦଳ କରିପାରନ୍ତି ମୁଖ୍ୟମନ୍ତ୍ରୀ । ଏପରି ସ୍ଥିତିରେ ବିଜେଡିର ବରିଷ୍ଠ ବିଧାୟକ ଅରୁଣ ସାହୁ ଶାସକ ଦଳକୁ କଟାକ୍ଷ କରିଛନ୍ତି । ବିଜେପି ସରକାର ସବୁଥିରେ ବିଫଳ । ତେଣୁ ମନ୍ତ୍ରିମଣ୍ଡଳ ଓ ନିଗମ ନିଷ୍ପତ୍ତିରେ ମଧ୍ୟ ସମାନ ସ୍ଥିତି । ମନ୍ତ୍ରିମଣ୍ଡଳ ରେସରେ ବିଜେପି ବିଧାୟକ ଈରାଶିଷ ଆଚାର୍ଯ୍ୟ, ଅମର ନାୟକ, ମାନସ ଦତ୍ତ, ଜୟ ନାରାୟଣ ମିଶ୍ର, ମନୋରଂଜନ ଦ୍ୟାନ ସାମନ୍ତରାୟ , ବାବୁ ସିଂଙ୍କ ଆଦି ନାଁ ଚର୍ଚ୍ଚାରେ ଅଛି । ସେହିପରି ନିଗମ ଓ ବୋର୍ଡକୁ ନେଇ ମଧ୍ୟ ଦଳର ବହୁନେତାଙ୍କ ନାଁ ଚର୍ଚ୍ଚାରେ ରହିଛି ।
ବରଗଡ଼ ନାବାଳିକା ଦୁଷ୍କର୍ମ ମାମଲା: ଦୋଷୀ ସାବ୍ୟସ୍ତ ଅପରାଧୀକୁ ଫାଶୀ ଦଣ୍ଡ…
ବରଗଡ଼ : ନାବାଳିକା ଦୁଷ୍କର୍ମକାରୀଙ୍କୁ ମିଳିଲା ଫାଶୀ ଦଣ୍ଡ। ପୋକସୋ ଆଇନରେ ଦୋଷୀ ସାବ୍ଯସ୍ତ ହେଲ ଅପରାଧୀ ପ୍ରଶାନ୍ତ ବାଗ। ୨୦୨୪ରେ ୬ବର୍ଷ ଝିଅକୁ ଅତି ନିର୍ମମ ଭାବେ ଦୁଷ୍କର୍ମ କରି ହତ୍ଯା କରିଥିଲା ପ୍ରଶାନ୍ତ ବାଗ। ଘଟଣା ଥିଲା ଏମିତି। ୨୦୨୪ ମସିହା ନଭେମ୍ବର ୧୫ ତାରିଖ। ନାବାଳିକା ପୀଡ଼ିତାଙ୍କୁ ମାଛ ଧରିବା ନାଁରେ ପୋଖରୀ କୂଳକୁ ଡାକି ନେଇ ଦୁଷ୍କର୍ମକାରୀ ପ୍ରଶାନ୍ତ ବାଗ ଘଟାଇଥିଲା ପାଶବିକ କାଣ୍ଡ। ଘଟଣା ସମ୍ପର୍କରେ କେହି ଜାଣିଯିବା ଆଶଙ୍କା କରି ପୀଡ଼ିତାଙ୍କୁ ମାରିବାକୁ ମଧ୍ଯ ପଛାଇନଥିଲା ଏହି ନରପିଶାଚ। ଏକ ବେଲଟରେ ବେକକୁ ଚାପିବା ସହିତ ମୁଣ୍ଡକୁ ପଥରରେ ଛେଚି ଅତି ନୃଶଂସ ଭାବେ ହତ୍ଯା କରିଥିଲା ଅଭିଯୁକ୍ତ। ପରେ ନାବାଳିକାର ମୃତଦେହକୁ ନିକଟରେ ଥିବା ଏକ ଧାନ ବିଲରେ ଫିଙ୍ଗିଦେଇଥିଲା ହତ୍ଯାକାରୀ ପ୍ରଶାନ୍ତ। ପରବର୍ତ୍ତୀ ସମୟରେ ପୀଡ଼ିତା ଜଣଙ୍କୁ ପରିବାର ଲୋକେ ଖୋଜାଖୋଜି କରିବା ସହ ଅଭିଯୁକ୍ତକୁ ପଚରାଉଚରା କରିଥିଲେ। ଅଭିଯୁକ୍ତର ଗାଲରେ ରକ୍ତଛିଟା ଦେଖି ପରିବାର ଲୋକଙ୍କ ସନ୍ଦେହ ଘନୀଭୂତ ହୋଇଥିଲା। ହେଲେ କିଛି ଜାଣି ନଥିବା ଭଳି ଅଭିନୟ କରିଥିଲା ହତ୍ଯାକାରୀ ପ୍ରଶାନ୍ତ। ଏ ନେଇ ପାଇକମାଳ ଥାନାରେ ଏକ ନିଖୋଜ ରିପୋର୍ଟ ଋଜୁ ପରେ ପୋଲିସ ଆରମ୍ଭ କରିଥିଲା ତଦନ୍ତ। ତଦନ୍ତକାରୀ ଅଧିକାରୀ ଭାବେ ତତ୍କାଳୀନ ପଦମପୁର ଆଇଆଇସି ମମତା ନାୟକ ଘଟଣାର ତଦନ୍ତ ବେଳେ ପୂରା କ୍ରାଇମ ସ୍ପଟ ସମ୍ପର୍କରେ ଜାଣିବାକୁ ପାଇଥିଲେ। ପ୍ରଥମେ ଦୁଷ୍କର୍ମ ଓ ପରେ ହତ୍ଯା କରି ସ୍ଥାନୀୟ ଅଞ୍ଚଳରେ ଚହଳ ପକାଇଦେଇଥିଲା ନରପିଶାଚ ପ୍ରଶାନ୍ତ ବାଗ। ଏ ନେଇ ଥାନାରେ ମାମଲା ଋଜୁ କରିବା ସହ ତ୍ବରିତ ଦଣ୍ଡ ବିଧାନ ନିର୍ଦ୍ଦେଶ ଦେଇଥିଲେ ତତ୍କାଳୀନ ଏସପି। ରକ୍ତ ନମୁନାକୁ ଭୁବନେଶ୍ବର ସ୍ଥିତ ରାଜ୍ଯ ଫରେନସିକ ଲ୍ଯାବକୁ ପଠାଯାଇଥିଲା। ପାରିପାର୍ଶ୍ବିକ ପରିସ୍ଥିତି, ସାଇଣ୍ଟିଫିକ ଏଭିଡେନସକୁ ଗୁରୁତର ସହ ବିଚାରକୁ ନିଆଯାଇଥିଲା। ଆଉ ମାତ୍ର ୨୦ ଦିନ ଭିତରେ ତଦନ୍ତ ସାରି ଚାର୍ଜସିଟ ଦାଖଲ କରିଥିଲା ପୋଲିସ। ଏହାସହ ପୋକସୋ ଆଇନ ଅନ୍ତର୍ଗତ କେସଟି ପଞ୍ଜୀକୃତ ହେବା ପରେ ୩୭ ଜଣଙ୍କ ସାକ୍ଷ୍ଯ ଗ୍ରହଣ, ୫୫ଟି ଡକ୍ଯୁମେଣ୍ଟ ଆଧାରରରେ ଅଭିଯୁକ୍ତ ବିରୋଧରେ ଅପରାଧ ପ୍ରମାଣିତ ହୋଇଥିଲା। ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି ବରଗଡ଼ ଅତିରିକ୍ତ ଜିଲ୍ଲା ଦୌରାଜଜ ଦୋଷୀ ବିରୋଧରେ ଶୁଣାଇଛନ୍ତି ଦୃଷ୍ଟାନ୍ତମୂଳକ ଫାଶୀ ଦଣ୍ଡାଦେଶ। ଘଟଣାକୁ ରେୟାରେଷ୍ଟ ଅଫ ରେୟାର ଶ୍ରେଣୀରେ ଅନ୍ତର୍ଭୁକ୍ତ କରିବା ସହ ପୀଡ଼ିତାଙ୍କ ପରିବାରକୁ ୧୫ ଲକ୍ଷ ଟଙ୍କାର କ୍ଷତିପୂରଣ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଗତ ଡିସେମ୍ବର ୨୬ ତାରିଖରେ ପୋକସୋ ଅଦାଲତ ଅଭିଯୁକ୍ତକୁ ଦୋଷୀ ସାବ୍ଯସ୍ତ କରିଥିଲେ। ଆଜି ଦୁଷ୍କର୍ମକାରୀକୁ ଫାଶୀ ଦଣ୍ଡାଦେଶ ଦେଇ ବିରଳ ଉଦାହରଣ ସୃଷ୍ଟି କରିଛନ୍ତି ବରଗଡ଼ ଏଡିଜେ କୋର୍ଟ। ଖାଲିସେତିକି ନୁହେଁ. ଦୁଷ୍କର୍ମ ପୀଡ଼ିତାଙ୍କୁ ଏତେ କମ ସମୟରେ ନ୍ଯାୟ ପ୍ରଦାନ କରିବା ନ୍ଯାୟିକ ପ୍ରକ୍ରିୟାର ବିଶ୍ବସନୀୟତାକୁ ମଜବୁତ କରିଛି।. ସେପଟେ ଏହି ଦଣ୍ଡାଦେଶ ପରେ ପୋଲିସ ଡିଜି ୱାଇ.ବି ଖୁରାନିଆ ବରଗଡ଼ ଏସପିଙ୍କୁ ଅଭିନନ୍ଦନ ଜଣାଇଛନ୍ତି।
ଭେନେଜୁଆଲା କ୍ଷମତା ଲୋଭ; ଟ୍ରମ୍ପଙ୍କୁ ନିଜ ନୋବେଲ ପୁରସ୍କାର ସମର୍ପଣ କରିବାକୁ ମାରିଆଙ୍କ ଘୋଷଣା
ଭେନେଜୁଆଲା କ୍ଷମତା ଲୋଭ; ଟ୍ରମ୍ପଙ୍କୁ ନିଜ ନୋବେଲ ପୁରସ୍କାର ସମର୍ପଣ କରିବାକୁ ମାରିଆଙ୍କ ଘୋଷଣା
ନନ୍ଦିଘୋଷ ବ୍ୟୁରୋ: ଭେନେଜୁଆଲାରେ ନିକୋଲସ ମାଦୁରୋଙ୍କ ଶାସନର ଅନ୍ତ ପରେ ଅନ୍ତରିମ ରାଷ୍ଟ୍ରପତି ଶପଥ ନେଇଛନ୍ତି । ୩୦ ଦିନ ମଧ୍ୟରେ ଭେନେଜୁଆଲାରେ ନିର୍ବାଚନ କରାଯିବାକୁ ଟ୍ରମ୍ପ ଘୋଷଣା କରିଛନ୍ତି । ଏହାରି ଭିତରେ ବିରୋଧୀ ଦଳ ନେତା ତଥା ୨୦୨୫ ନୋବେଲ ଶାନ୍ତି ବିଜେତା ମାରିଆ କୋରିନା ମଚାଡୋ ଚର୍ଚ୍ଚାରେ ରହିଛନ୍ତି । ମାଦୁରୋଙ୍କ ବିରଫଦାରୀର କିଛି ଘଣ୍ଟା ପରେ ମଚାଡୋ ଘୋଷଣା କରିଥିଲେ ସ୍ବାଧୀନତାର ସମୟ ଆସିଛି । ଦୀର୍ଘବର୍ଷର ଦମନ ପରେ ଏବେ ବିରୋଧୀ ଦେଶର କ୍ଷମତା ସମ୍ଭାଳିବାର ସମ୍ଭାବନା ଥିବା ସେ ସଙ୍କେତ ଦେଇଥିଲେ । ହେଲେ ଆମେରିକା ରାଷ୍ଟ୍ରପତିଙ୍କ ତାଙ୍କ ପ୍ରତି ଆସ୍ଥା ନଥିବା ସ୍ପଷ୍ଟ ହେବା ପରେ ଏବେ ତାଙ୍କୁ ଖୁସି କରିବାକୁ ମଚାଡୋ ଉଦ୍ୟମ କରୁଛନ୍ତି । ଏପରିକି ନୋବେଲ ପାଇଁ ବିଳିବିଳେଇ ହେଉଥିବା ଟ୍ରମ୍ପଙ୍କୁ ସେ ତାଙ୍କର ଏହି ପୁରସ୍କାର ସମର୍ପଣ କରିବାକୁ ଘୋଷଣା କରିଛନ୍ତି ।
ଅନ୍ୟପକ୍ଷେ, ମାଦୁରୋଙ୍କ ବିରଫଦାରୀ ପରେ ଦେଶକୁ ଫେରି କ୍ଷମତା ହାସଲ କରିବାକୁ ଆଶା ବାନ୍ଧିଥିବା ମଚାଡୋଙ୍କୁ ଟ୍ରମ୍ପଙ୍କ ତରଫରୁ ଲାଗିଥିଲା ଶକ୍ତଧକ୍କା । କାରଣ ଟ୍ରମ୍ପ ଖୋଲାଖୋଲି କହିଥିଲା ମଚାଡୋଙ୍କୁ କ୍ଷମତା ହସ୍ତାନ୍ତର କରିବାକୁ ତାଙ୍କୁ କୌଣସି ଆଗ୍ରହ ନାହିଁ । ଟ୍ରମ୍ପ କହିଥିଲେ, ମଚାଡୋଙ୍କୁ ପ୍ରତି ନା ଦେଶ ଭିତରେ କୌଣସି ସମର୍ଥନ ଅଛି ନା ସମ୍ମାନ ରହିଛି । ଟ୍ରମ୍ପଙ୍କ ଏମିତି ବୟାନ ପରେ ମଚାଡୋଙ୍କ ରାଜନୈତିକ ସ୍ଥିତି ଦୁର୍ବୃଳ ହେବାରେ ଲାଗିଛି । ମାଦୁରୋଙ୍କ ଗିରଫଦାରୀ ପରେ ସେ ରାଷ୍ଟ୍ରପତି ଗାଦିରେ ବସିବେ ବୋଲି ଦାବି କରିବା ସହ ଟ୍ରମ୍ପଙ୍କ ଅନୁସାରେ ସବୁ ହେବ ବୋଲି କହିଥିଲେ । ଆଉ ଏହାରି ଭିତରେ ସେ ତାଙ୍କ ନୋବେଲ ପୁରସ୍କାର ଟ୍ରମ୍ପଙ୍କୁ ସମର୍ପଣ କରିବାକୁ ଘୋଷଣା କରିଛନ୍ତି ।
ଫକ୍ସ ନ୍ୟୁଜକୁ ଏକ ସାକ୍ଷାତକାରରେ ମଚାଡୋ କହିଛନ୍ତି, ମୁଁ ମୋର ନୋବେଲ ଶାନ୍ତି ପୁରସ୍କାର ରାଷ୍ଟ୍ରପତି ଟ୍ରମ୍ପଙ୍କୁ ସମର୍ପଣ କରିବାକୁ ଚାହୁଁଛି । ସେ କହିଥିଲେ, ମୋତେ ଏହି ପୁରସ୍କାର ମିଳିବା ଜାଣିବା କ୍ଷଣି ଏହାକୁ ଟ୍ରମ୍ପଙ୍କୁ ସମର୍ପଣ କରିବାକୁ ନିଷ୍ପତ୍ତି ନେଇଥିଲି । ଚମାଡୋଙ୍କ ଅନୁସାରେ ଜାନୁଆରୀ ୩ ତାରିଖରେ ଆମେରିକା ଦ୍ବାରା ନିଆଯାଇଥିବା କାର୍ଯ୍ୟାନୁଷ୍ଠାନ ତାହା କରି ଦେଖାଇଲା, ଯାହାକୁ ସାରା ଦୁନିଆ ଅସମ୍ଭବ ବୋଲି କହୁଥିଲା ।
ଆଇପିଏଲରୁ ଆଉଟ ବାଂଲାଦେଶୀ ଖେଳାଳି ମୁସ୍ତାଫିଜୁର ରହମାନଙ୍କୁ କେକେଆର କେତେ ଦେବ କ୍ଷତିପୂରଣ ?
ଆଇପିଏଲରୁ ଆଉଟ ବାଂଲାଦେଶୀ ଖେଳାଳି ମୁସ୍ତାଫିଜୁର ରହମାନଙ୍କୁ କେକେଆର କେତେ ଦେବ କ୍ଷତିପୂରଣ ?
ନନ୍ଦିଘୋଷ ବ୍ୟୁରୋ: ବିବାଦ ମଧ୍ୟରେ ବାଂଲାଦେଶର ଷ୍ଟାର ଦ୍ରୁତ ବୋଲର ମୁସ୍ତାଫିଜୁର ରହମାନ ୨୦୨୬ ଆଇପିଏଲରେ ଅଂଶଗ୍ରହଣ କରିପାରିବେନି । ବିସିସିଆଇ ନିର୍ଦ୍ଦେଶରେ ମୁସ୍ତାଫିଜୁରଙ୍କୁ କେକେଆର ନିଜ ଟିମରୁ ରିଲିଜ କରି ସାରିଛି । ମୁସ୍ତାଫିଜୁର ଆଇପିଏଲରୁ ବାହାର ହେବା ପରେ ବାଂଲାଦେଶରେ ବୋବଲା ହେଉଛି । ଏହାସହ ବିସିସିଆଇର ନିଷ୍ପତ୍ତିକୁ କଡ଼ା ସମାଲୋଚନା କରାଯାଉଛି ।
ଏପରିକି ବାଂଲାଦେଶ କ୍ରିକେଟ ବୋର୍ଡ (ବିସିବି) ନିଜ ଜାତୀୟ ଦଳକୁ ଭାରତରେ ଟି-୨୦ ଖେଳିବାକୁ ନପଠାଇବାକୁ ଘୋଷଣା କରିଛି । ବିସିବି ବାଂଲାଦେଶର ମ୍ୟାଚକୁ ଶ୍ରୀଲଙ୍କା ସିଫ୍ଟ କରିବାକୁ ଚାହୁଁଛି । ଏତିପାଇଁ ବୋର୍ଡ ତରଫରୁ ଆଇସିସିକୁ ଚିଠି ଲେଖଯାଇଛି । ଆଇସିସି କି ନିଷ୍ପତ୍ତି ନେଉଛି, ତାହା ଦେଖିବାକୁ ବାକି ରହିଛି । ପ୍ରଶ୍ନ ଉଠୁଛି, ଆଇପିଏଲରୁ ଆଉଟ ହେବା ପରେ ମୁସ୍ତାଫିଜୁରଙ୍କୁ କ୍ଷତିପୂରଣ ମିଳିବ କି ? ଯଦି ମିଳିବ ତେବେ କିଏ ଦେବ ? ବିସିସିଆଇ ନା କେକେଆର ?
ରିପୋର୍ଟ ଅନୁସାରେ ବିସିସିଆଇ ନିର୍ଦ୍ଦେଶରେ କେକେଆର ମୁସ୍ତାଫିଜୁରଙ୍କୁ ରିଲିଜ କରିଛି । ହେଲେ ଏହି ନିଷ୍ପତ୍ତିରେ ମୁସ୍ତାଫିଜୁରଙ୍କୁ କୌଣସି ଆର୍ଥିକ କ୍ଷତିପୂରଣ ମିଳିବାର ସମ୍ଭାବନା ନାହିଁ । କେକେଆର ତାଙ୍କୁ ନିଲାମରେ ୯.୨୦ କୋଟି ଟଙ୍କାରେ କିଣି ଥିଲା । ତାଙ୍କୁ ନେବାକୁ ସିଏସକେ ଓ ଡିସି ମଧ୍ୟ ନିଲାମୀ ଡାକିଥିଲେ ।
ସର୍ତ୍ତ କ’ଣ ରହିଛି ?
ସୂଚନାଯୋଗ୍ୟ, ଆଇପିଏଲ ଖଷଳାଳିଙ୍କ ଦରମାର ବୀମା କରାଯାଇଥାଏ । ହେଲେ ବିଦେଶୀ ଖେଳାଳିଙ୍କୁ ଏହାର ଲାଭ ସେତେବେଳେ ମିଳିଥାଏ ଯେତେବେଳେ ସେମାନେ ଆହତ ହୁଅନ୍ତି କିମ୍ବା ଟୁର୍ଣ୍ଣାମେଣ୍ଟ ସମୟରେ ସମସ୍ୟା ହେଲେ । ଏମିତି ସ୍ଥିତିରେ ଦରମାର ୫୦ ପ୍ରତିଶତ ମିଳିଥାଏ । ମୁସ୍ତାଫିଜୁରଙ୍କ କ୍ଷେତ୍ରରେ ନା ସେ ଆହତ ହୋଇଚନ୍ତି ନା କ୍ରିକେଟକୁ ନେଇ କୌଣସି କାରଣରୁ ବାହାର ହୋଇଚନ୍ତି । ଏଥିପାଇଁ ସେ ବୀମାକ୍ଷେତ୍ରରେ କଭର ହେଉନାହାନ୍ତି । ଏହି କାରଣରୁ କେକେଆର ତାଙ୍କୁ ଟଙ୍କା ଦେବାକୁ ଆଇନଗତ ବାଧ୍ୟ ନୁହେଁ ।
CASରେ ଆବେଦନ କରିବେ କି ମୁସ୍ତାଫିଜୁର ?
ପିଟିଆଇ ଅନୁସାରେ, ମୁସ୍ତାଫିଜରଙ୍କ ପାଖରେ ଆଇନଗତ ରାସ୍ତା ଆପଣାଇବାର ଅଧିକାର ରହିଛି । ହେଲେ ଆଇପିଏଲ ଭାରତୀୟ ଆଇନ ଅଧୀନରେ ଆଓୁଛି । କୌଣସି ବିଦେଶୀ ଖେଳାଳି କୋର୍ଟ ଅଫ୍ ଅର୍ବିଟ୍ରେଶନ ଫର ସ୍ପୋର୍ଟ (CAS) ରାସ୍ତା ଆପଣାଇବାକୁ ଚାହିଁ ନଥାନ୍ତି । ଆିନଗତ ପ୍ରକ୍ରିୟା ଲମ୍ବା ଓ ଜଟିଳ ହୋଇଥାଏ । ଆଉ ଏହାରି ଭିତରେ ବାଂଲାଦୋ କ୍ରିକେଟ ବୋର୍ଡ ବି ମୁସ୍ତାଫିଜୁରଙ୍କ ଏନଓସି ନେଇ ସାରିଛି । ଯେଉଁ କାରଣରୁ ତାଙ୍କ ପକ୍ଷ ଆହୁରି ଦୁର୍ବଳ ହୋଇଯାଇଛି ।
ବିସିବି ଟି-୨୦ ବିଶ୍ବକପରେ ନିଜ ଟିର ମ୍ୟାଚ ଭାରତରୁ ହଟାଇ ଶ୍ରୀଲଙ୍କାରେ କରିବାକୁ ଦାବି କରିଛି । ଯାହାକୁ ବାଂଲାଦେଶ ପ୍ରତିଶୋଧଶତ୍ମକ କାର୍ଯ୍ୟାନୁଷ୍ଠାନ ବୋଲି କୁହାଯାଉଛି । ଭାରତ ଓ ବାଂଲାଦେଶ ମଧ୍ୟରେ ବର୍ତ୍ତମାନ ଚାଲିଥିବା ତିକ୍ତତା ମଧ୍ୟ ଏକ କାରଣ ବୋଲି କୁହାଯାଉଛି । ପରିସ୍ଥିତି ବଦଳି ଥାଏ । ତେଣୁ କୌଣସି ଖେଳାଳି କି ବୋର୍ଡ ଆଇନଗତ ମୁକାବିଲା କରିବାକୁ ଚାହିଁ ନଥାଏ ।