ନନ୍ଦିଘୋଷ ବ୍ୟୁରୋ: ସ୍ଥଗିତ ରହିଲା ତ୍ରି-ସ୍ତରୀୟ ପଞ୍ଚାୟତ ଉପ ନିର୍ବାଚନ । ଜୁନ ୨୩ରେ ହେବାକୁ ଥିବା ପଞ୍ଚାୟତ ଉପନିର୍ବାଚନ ସ୍ଥଗିତ ରଖାଯାଇଛି । ରାଜ୍ୟ ନିର୍ବାଚନ ଆୟୋଗଙ୍କ ପ୍ରେସମିଟରେ ଏହି ସୂଚନା ଦିଆଯାଇଛି । ସଅଳ ମୌସୁମୀ ଆସୁଥିବାରୁ ବର୍ଷା ଆଶଂକାରେ ଉପନିର୍ବାଚନକୁ ସ୍ଥଗିତ ରଖାଯାଇଛି ।
ମୋଟ ୧୧୩୧ଟି ପଦବୀ ପାଇଁ ଭୋଟିଂ ହୋଇଥାନ୍ତା । ଜିଲ୍ଲା ଅଧିକାରୀ ଓ ଆଶାୟୀ ପ୍ରାର୍ଥୀମାନେ ବର୍ଷା ଋତୁ ପାଇଁ ନିର୍ବାଚନ ସ୍ଥଗିତ ରଖିବାକୁ ପ୍ରସ୍ତାବ ଦେଇଥିଲେ । ପରବର୍ତ୍ତୀ ତାରିଖ ସମୟ ଦେଖି ଘୋଷଣା କରାଯିବ ବୋଲି ରାଜ୍ୟ ନିର୍ବାଚନ କମିଶନ ପକ୍ଷରୁ ସୂଚନା ଦିଆଯାଇଛି ।
ନନ୍ଦିଘୋଷ ବ୍ୟୁରୋ: ଯୁକ୍ତଦୁଇ ପରୀକ୍ଷା ଫଳ ପ୍ରକାଶ ପାଉଛି । ତିନି ବିଭାଗ କଳା, ବିଜ୍ଞାନ ଓ ବାଣିଜ୍ୟ ସହ ଧନ୍ଦାମୂଳକ ପରୀକ୍ଷର ଉଭୟ ରେଗୁଲାର ଓ ଏକ୍ସ-ରେଗୁଲାର ପରୀକ୍ଷା ଫଳ ଏକା ସଙ୍ଗରେ ପ୍ରକାଶ ପାଇଛି । ବିଭାଗୀୟ ମନ୍ତ୍ରୀ ପରୀକ୍ଷା ପୁସ୍ତକ ଉନ୍ମୋଚନ କରିଥିଲେ ।
ମୋଟ ୮୨.୭୬ ପ୍ରତିଶତ ରେଜଲ୍ଟ ହୋଇଥିବା ବେଳେ ପୁଣି କମାଲ କରିଛନ୍ତି ଛାତ୍ରୀ । ୮୭.୨୪ ପ୍ରତିଶତ ଛାତ୍ରୀ ପାସ୍ କରିଥିବା ବେଳେ ୭୭.୮୮ ପ୍ରତିଶତ କୃତକାର୍ଯ୍ୟ ହୋଇଛନ୍ତି । କଳାରେ ୮୦.୫୧ ପ୍ରତିଶତ ରେଜଲ୍ଟ ହୋଇଥିବା ବେଳେ ବିଜ୍ଞାନରେ ୮୭.୪୯ ପ୍ରତିଶତ ପାସ କରିଛନ୍ତି । ସେହିପରି ବାଣିଜ୍ୟରେ ୮୧.୭୧ ପ୍ରତିଶତ ରେଜଲ୍ଟ ହୋଇଥିବା ବେଳେ ଧନ୍ଦାମୂକଳ ପରୀକ୍ଷାରେ ୬୦.୫୬ ପ୍ରତିଶତ ଛାତ୍ରଛାତ୍ରୀ ପାସ୍ କରିଛନ୍ତି ।
କଳାରେ ବରଗଡ଼ ଜିଲ୍ଲାରେ ସର୍ବାଧିକ ରେଜଲ୍ଟ ହୋଇଛି । ସେହିପରି କଳାରେ ଗଣଶିକ୍ଷା ମନ୍ତ୍ରୀଙ୍କ ଜିଲ୍ଲା ନବରଙ୍ଗପୁରରେ ପାସହାର ସର୍ବନିମ୍ନ ରହିଛି । ଉଭୟ ବିଜ୍ଞାନ ଓ ବାଣିଜ୍ୟରେ ପାସହାର ନୟାଗଡ଼ ଜିଲ୍ଲାରେ ସର୍ବାଧିକ ରହିଛି । ବିଜ୍ଞାନରେ ବୌଦ୍ଧ ଜିଲ୍ଲାର ପାସହାର ସର୍ବନିମ୍ନ ହୋଇଥିବା ବେଳେ କାଣିଜ୍ୟରେ ବଲାଙ୍ଗୀର ଜିଲ୍ଲାର ପାସ ହାର ସର୍ବନିମ୍ନ ରହିଛି ।
ବିଜ୍ଞାନରେ ପାସ ହାର ୮୭. ୫୦ ପ୍ରତିଶତ ରହିଛି । ବିଜ୍ଞାନରେ ୯୦ ପ୍ରତିଶତରୁ ଅଧିକ ମାର୍କ ରଖିଛନ୍ତି ୧୯୦୬ ଜଣ ଛାତ୍ରଛାତ୍ରୀ । ପ୍ରଥମ ଶ୍ରେଣୀରେ ୫୪ ହଜାର ୯୪୭ ଜଣ ପାସ କରିଛନ୍ତି । ସେହିପରି ଦ୍ଵିତୀୟ ଶ୍ରେଣୀରେ ୨୬ ହଜାର ୪୨୪ ଓ ତୃତୀୟ ଶ୍ରେଣୀରେ ୧୪ ଗହାର ୯୫୪ ଜଣ ପାସ କରିଛନ୍ତି । ନୟାଗଡ଼ ଜିଲ୍ଲାରେ ବିଜ୍ଞାନରେ ସର୍ବାଧିକ ୯୭.୫୮ ପ୍ରତିଶତ ଛାତ୍ରଛାତ୍ରୀ ପାସ କରିଛନ୍ତି ।
କଳାରେ ପାସ ହାର ୮୦. ୫୧ ପ୍ରତିଶତ ରହିଛି । ୯୦ ପ୍ରତିଶତରୁ ଅଧିକ ମାର୍କ ରଖି ୧୭୧ ଜଣ ପାସ କରିଛନ୍ତି । ପ୍ରଥମ ଶ୍ରେଣୀରେ ୪୦ ହଜାର ୩୭ ଜଣ ଛାତ୍ରଛାତ୍ରୀ ପାସ କରିଛନ୍ତି । ସେହିପରି ଦ୍ଵିତୀୟ ଶ୍ରେଣୀରେ ୩୬ ହଜାର ୮୬୬ ଓ ତୃତୀୟ ଶ୍ରେଣୀରେ ୧ ଲକ୍ଷ୧୯ ହଜାର ୧୬୮ ଜଣ ପାସ କରିଛନ୍ତି । କଳାରେ ବରଗଡ଼ରେ ସର୍ବାଧିକ ୮୭.୬୦ ପ୍ରତିଶତ ଛାତ୍ରଛାତ୍ରୀ ପାସ କରିଛନ୍ତି ।
ବାଣିଜ୍ୟରେ ପାସ ହାର ୮୩.୨୦ ପ୍ରତିଶତ ରହିଛି । ୯୦ ପ୍ରତିଶତରୁ ଅଧିକ ମାର୍କ ରଖିଛନ୍ତି ୨୦୪ ଜଣ ଛାତ୍ରଛାତ୍ରୀ । ପ୍ରଥମ ଶ୍ରେଣୀରେ ୬ ହଜାର୯୩୦, ଦ୍ଵିତୀୟ ଶ୍ରେଣୀରେ ୪ ହଜାର ୫୨୫, ତୃତୀୟ ଶ୍ରେଣୀରେ ୯ ହଜାର ୨୧୬ ଜଣ ପାସ କରିଛନ୍ତି । ବାଣିଜ୍ୟରେ ନୟାଗଡ଼ରେ ସର୍ବାଧିକ ୯୩. ୭୧ ପ୍ରତିଶତ ଛାତ୍ରଛାତ୍ରୀ ପାସ କରିଛନ୍ତି ।
ଧନ୍ଦାମୂଳକ ଶିକ୍ଷାରେ ପାସ ହାର ୬୦.୫୭ ପ୍ରତିଶତ ରହିଛି । ଜଣେ ୯୦ ପ୍ରତିଶତରୁ ଅଧିକ ମାର୍କ ରଖିଛନ୍ତି । ପ୍ରଥମ ଶ୍ରେଣୀରେ ୬୭୮, ଦ୍ଵିତୀୟ ଶ୍ରେଣୀରେ ୧୭୫୮ ଓ ତୃତୀୟ ଶ୍ରେଣୀରେ ୭୮୧ ଜଣ ପାସ କରିଛନ୍ତି । ବାଲେଶ୍ଵରରେ ସର୍ବାଧିକ ୮୩.୮୩ ପ୍ରତିଶତ ଛାତ୍ରଛାତ୍ରୀ ପାସ କରିଛନ୍ତି ।
chseodisha.nic.in ଓ odisharesults.nic.in ୱେବସାଇଟରେ ରେଜଲ୍ଡ ଦେଖି ପାରିବେ ।
ନନ୍ଦିଘୋଷ ବ୍ୟୁରୋ: ୫୦ରୁ ଅଧିକ ଲୋକଙ୍କୁ ହତ୍ୟା କରି କୁମ୍ଭୀରଙ୍କୁ ଖୁଆଉ ଥିବା ସିରିୟଲ କିଲର ଦେବେନ୍ଦ୍ର ଶର୍ମା (୬୭) ଓରଫ ଡକ୍ଟର ଡେଥ୍ ଗିରଫ । ରାଜସ୍ଥାନର ଏକ ଆଶ୍ରମରେ ପୂଜାରୀ ବେଶରେ ଲୁଚିଥିବା ବେଳେ ସୋମବାର ସନ୍ଧ୍ୟାରେ ପୋଲିସ ଗିରଫ କରିଛି । ଆୟୁର୍ବଦ ଡକ୍ଟରରୁ ସିରିୟଲ କିଲର ବନିଥିବା ଦେବେନ୍ଦ୍ର ପରୋଲରେ ଯାଇଥିବା ବେଳେ ଫେରାର ହୋଇଯାଇଥିଲା । ତା’ ବିରୋଧରେ ଏକାଧିକ ଲୋକଙ୍କୁ ହତ୍ୟା କରିଥିବା ଅଭିଯୋଗରେ ମାମଲା ରହିଛି । ଦିଲ୍ଲୀ, ରାଜସ୍ଥାନ ଓ ହରିୟାଣାରେ ଭିନ୍ନ ଭିନ୍ନ ମାମଲାରେ ତାକୁ ଆଜୀବନ ଜଲ ଦଣ୍ଡାଦେଶ ହୋଇଛି । ଗୁରୁଗ୍ରାମର ଏକ କୋର୍ଟରେ ତାକୁ ମୃତ୍ୟୁଦଣ୍ଡ ଦିଆଯାଇଥିଲା । ୫୦ରୁ ଅଧିକ ଲୋକଙ୍କ ହତ୍ୟାରେ ସେ ସମ୍ପୃକ୍ତ ଥିବା ପୋଲିସ ସନ୍ଦେହ କରୁଛି ।
ଡେପୁଟି କମିଶନ ଅଫ ପୋଲିସ ଆଦିତ୍ୟ ଗୌତମ କହିଛନ୍ତି ୨୦୦୨ରୁ ୨୦୦୪ ମଧ୍ୟରେ ଏକାଧିକ ଟ୍ରକ ଓ ଟ୍ୟାକ୍ସି ଡ୍ରାଇଭରଙ୍କୁ ନୃଶଂସ ଭାବେ ହତ୍ୟା କରିଥିବା ଅଭିଯୋଗରେ ତିହାର ଜେଲରେ ଆଜୀବନ କାରା ଦଣ୍ଡାଦେଶ କାଟୁଥିଲା । ୨୦୨୩ ଅଗଷ୍ଟରେ ପରୋଲରେ ବାହାରକୁ ଆସିଥିଲା । ଦେବେନ୍ଦ୍ର ଏବଂ ତା’ର ସହଯୋଗୀମାନେ ଡ୍ରାଇଭରଙ୍କୁ ଭଡ଼ାରେ ଯିବା ପାଇଁ ଡକାଉଥିଲେ । ଏହାପରେ ସେମାନଙ୍କୁ ହତ୍ୟା କରିବା ପରେ ଗାଡ଼ିକୁ ବ୍ଲାକ ମାର୍କେଟରେ ବିକ୍ରି କରି ଦେଉଥିଲେ । ଏହାପରେ ପ୍ରମାଣ ନଷ୍ଟ କରିବା ପାଇଁ ଶବକୁ ଉତ୍ତର ପ୍ରଦେଶର କାସଗଞ୍ଜରେ ହଜାରା ନାଳରେ କୁମ୍ଭୀରଙ୍କୁ ଖାଇବାକୁ ଫିଙ୍ଗି ଦେଉଥିଲେ ।
ଆଦିତ୍ୟ ଗୌତମଙ୍କ ଅନୁସାରେ ଦେବେନ୍ଦ୍ରର ଲମ୍ବା ଅପରାଧିକ ଇତିହାସ ରହିଛି । ଯେଉଁଥିରେ ହତ୍ୟା, ଅପହରଣ ଓ ଡକାୟତି ଭଳି ୨୭ରୁ ଅଧିକ ମାମଲା ରହିଛି । ୧୯୯୫ରୁ ୨୦୦୪ ପର୍ଯ୍ୟନ୍ତ କିଡନୀ ପ୍ରତ୍ୟାରୋପଣ ରାକେଟ୍ ଚଲାଇବା ପାଇଁ କୁଖ୍ୟାତ ଥିଲା । ବିଏଏମଏସ (ଆୟୁର୍ବେଦକ ଚିକିତ୍ସା ଓ ସର୍ଜରୀ)ରେ ସ୍ନାତ ଡିଗ୍ରୀଧାରୀ ଦେବେନ୍ଦ୍ର ୧୯୮୪ରେ ରାଜସ୍ଥାନରେ ଏକ କ୍ଲିନୀକ ଖୋଲିଥିଲା । ରାଜ୍ୟା ଏକାଧିକ ଡାକ୍ତର ଓ ମଧ୍ୟସ୍ଥିଙ୍କ ଜରିଆାରେ ୧୨୫ରୁ ଅଧିକ ଅବୈଧ କିଡନୀ ପ୍ରତ୍ୟାରୋପଣ କରିଥିବା ପୋଲିସ ଆଗରେ ସ୍ବୀକାର କରିଥିଲା ।
ପୋଲିସ ସୂଚନା ଅନୁସାରେ, ୧୯୯୫ରୁ ୨୦୦୪ ମଧ୍ୟରେ ଏକ ଗ୍ୟାଙ୍ଗ ଗଢ଼ିଥିଲା । ଯେଉଁମାନେ ଏଲପିଜି ସିଲିଣ୍ଡର ନେଉଥିବା ଗାଡିକୁ ଅଟକାଉ ଚାଳକଙ୍କୁ ମାରିବା ପରେ ସିଲିଣ୍ଡର ସହ ଗାଡ଼ି ଲୁଟି ନେଉଥିଲେ । ଟ୍ରକ ଲୁଟ ପରେ ଗ୍ୟାଙ୍ଗର ସଦସ୍ୟମାନେ ଟ୍ରକକୁ କବାଡ ବଜାରରେ ବିକ୍ରି କରି ଦେଉଥିଲେ । ସେହିପରି ଟ୍ୟାକ୍ସି ଡ୍ରାଇଭରମାନଙ୍କୁ ଟାର୍ଗେଟ କରି ହତ୍ୟା କରୁଥିଲା । ତା’ ଉପରେ ଦୁଇ ଡର୍ଜନରୁ ଅଧିକ ଲୋକଙ୍କୁ ହତ୍ୟା କରିଥିବା ସନ୍ଦେହ କରାଯାଉଛି । ପଚରାଉଚରା ବେଳେ ସେ ଏକ ଗ୍ୟାଙ୍ଗର ସଦସ୍ୟ ଥିବା ମଧ୍ୟ ସ୍ବୀକାର କରିଥିଲା । ପ୍ରତି ମାମଲା ପାଇଁ ୭ ଲକ୍ଷ ଟଙ୍କା ନେଉଥିଲା ।
ଦେବେନ୍ଦ୍ର କିଡନୀ ରାକେଟ ଓ ସିରିୟଲ ହତ୍ୟା ମାମଲାରେ ୨୦୦୪ରେ ଗିରଫ ହୋଇଥିଲା । ତିହାର ଜେଲରେ ଥିବା ବେଳେ ୨୦୨୩ରେ ପରୋଲରେ ଆସି ଫେରାର ହୋଇଯାଇଥିଲା । ଅପରାଧ ଶାଖାକୁ ତା’ର ସନ୍ଦାନ କାମ ଦିଆଯାଇଥିଲା । ଅଲିଗଡ଼, ଜୟପୁର, ଦିଲ୍ଲୀ, ଆଗରା ଓ ପ୍ରୟାଗରାଜ ସମେତ ଅନ୍ୟ ସହରରେ ପ୍ରାୟ ୬ ମାସ ଯାଞ୍ଚ ପରେ ଦୌସାର ଏକ ଆଶ୍ରମରେ ଥିବା ତଦନ୍ତକାରୀ ଟିମ୍ ଜାଣିବାକୁ ପାଇଥିଲା । ନକଲି ପରିଚୟ ପତ୍ର କରି ସେଠାରେ ଆଧ୍ୟାତ୍ମିକ ବ୍ୟକ୍ତି ଭାବେ ରହୁଥିଲା ।
ସୂଚନାଯୋଗ୍ୟ, ଏହା ପ୍ରଥମ ଘଟଣା ନୁହେଁ, ପରୋଲରେ ଆସିବା ପରେ ଦେବେନ୍ଦ୍ର ଫେରାର ହେବା । ୨୦୨୦ ଜାନୁଆରୀ ୨୮ରେ ୨୦ ଦିନିଆ ପରୋଲରେ ଯାଇ ଫେରାର ହୋଇଯାଇଥିଲା । ୭ ମାସ ଫେରାର ରହିବା ପରେ ଅପରାଧ ଶାଖା ତାକୁ ଦିଲ୍ଲୀରୁ ଫିରଫ କରିଥିଲା ।
ନନ୍ଦିଘୋଷ ବ୍ୟୁରୋ: କଚ୍ଚା ରାସ୍ତାରେ ଗାଁରେ ପହଞ୍ଚି ପାରିଲାନାହିଁ ଆମ୍ଵୁଲାନ୍ସ । ଲୋକମାନଙ୍କ ସହାୟତାରେ ଖଟିଆରେ ବୁହା ହୋଇ ଆମ୍ବୁଲାନ୍ସ ନିକଟକୁ ଆସିଲେ ରୋଗୀ। ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ସାରସକଣା ବ୍ଲକ ପଞ୍ଚମତଳିଆ ଗାଁରେ । ବିଡିଓ ଏବଂ ଠିକାଦାରଙ୍କ ପାଇଁ ହନ୍ତସନ୍ତ ଗ୍ରାମବାସୀ ହେଉଥିବା ଅଭିଯୋଗ ହୋଇଛି । ମନରେଗାରେ ଅଧା କାମ କରି କେବଳ ମାଟି ପକାଇ ଟଙ୍କା ହରିଲୁଟ୍ । ପଞ୍ଚମତଳିଆ ଗାଁକୁ ସଂଯୋଗ ରାସ୍ତାର ଉନ୍ନତିକରଣ କାର୍ଯ୍ୟ ଆରମ୍ଭ ହୋଇଥିଲା । ମନରେଗା ଯୋଜନାରେ ତରବରିଆ ଭାବେ ମାଟି ପକାଇ କଚ୍ଚା ରାସ୍ତା ନିର୍ମାଣ କରି ରାସ୍ତା କାମ ସାରିଦେଲେ ଠିକାଦାର ।
କାଳ ବୈଶାଖୀ ବର୍ଷାରେ କଚ୍ଚା ରାସ୍ତାରେ ଯିବା କଷ୍ଟକର ହୋଇପଡୁଛି । କେବଳ ମାଟି ପକାଇବାକୁ ଗ୍ରାମବାସୀ ବାରଣ କରିଥିଲେ ମଧ୍ୟ ବିଡିଓ ଏବଂ ଠିକାଦାର କର୍ଣ୍ଣପାତ କରିନଥିଲେ । ରାସ୍ତାରେ ବାଇକ୍ କିମ୍ୱା ଆମ୍ବୁଲାନ୍ସ ଟିଏ ଗାଁ ମଧ୍ୟକୁ ଯିବା ଏବେ ସମ୍ଭବ ହେଉନଥିବା ଅଭିଯୋଗ କରିଛନ୍ତି ଗ୍ରାମବାସୀ। ଗାଁର ଜଣେ ବ୍ୟକ୍ତିର ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ଆମ୍ବୁଲାନ୍ସକୁ ଡକାଯାଇଥିଲା। କିନ୍ତୁ ରାସ୍ତାଟି ବିପର୍ଯ୍ୟୟ ଅବସ୍ଥାରେ ଥିବାରୁ ଗାଁକୁ ପସିପରିଲାନି ଆମ୍ବୁଲାନ୍ସ। ଶେଷରେ ଲୋକମାନଙ୍କ ସହାୟତାରେ ଖଟିଆରେ ବୁହା ହୋଇ ଆମ୍ବୁଲାନ୍ସ ନିକଟକୁ ଆସିଥିଲା ରୋଗୀ।
ନନ୍ଦିଘୋଷ ବ୍ୟୁରୋ: ଜୁଲାଇ ୧୫ରୁ ଆରମ୍ଭ ହେବ ଯୁକ୍ତ ୩ ପ୍ରଥମ ବର୍ଷ ପାଠପଢ଼ା । ଦଶହରା ପୂର୍ବରୁ ସରିବ କ୍ୟାମ୍ପସ ନିର୍ବାଚନ । ସେଥିପାଇଁ ଆରମ୍ଭ ହୋଇଛି ଆଗୁଆ ଆବେଦନ। ଗତକାଲି ସୁଦ୍ଧା ୯୮ ହଜାର ଛାତ୍ର ଛାତ୍ରୀ କରିଛନ୍ତି ଆବେଦନ । ଏପ୍ରିଲ ୧୬ ତାରିଖରୁ ଆରମ୍ଭ ହୋଇଥିଲା ଯୁକ୍ତ ୩ ଆବେଦନ । ବିଜ୍ଞପ୍ତିରେ ସ୍ପଷ୍ଟ ହୋଇଥିଲା ଯେ ପର୍ଯ୍ୟନ୍ତ ଯୁକ୍ତ ୨ ରେଜଲ୍ଟ ବାହାରିନାହିଁ ସେ ପର୍ଯ୍ୟନ୍ତ ଆବେଦନ ପ୍ରକ୍ରିୟା ଚାଲିବ । ପ୍ରଥମ ଥର ପାଇଁ ରେଜଲ୍ଟ ବାହାରିବା ପୂର୍ବରୁ ଆବେଦନ ପ୍ରକ୍ରିୟା ଆରମ୍ଭ କରାଯାଇଛି । କାରଣ ଗତବର୍ଷ ଆଡମିସନ ପ୍ରକ୍ରିୟା ଶେଷ କରିବାକୁ ଡିସେମ୍ବର ହୋଇଯାଇଥିଲା । ତେଣୁ ଏଥର ଶୀଘ୍ର ନାମଲେଖା କରି ଜୁନରେ ସିଟ୍ ଆଲୋକେସନ ସହ ଜୁଲାଇ ୧୫ରୁ କ୍ଲାସ ଆରମ୍ଭ ହେବ। ତେଣୁ ଏଥର ଶୀଘ୍ର ଆବେଦନ ପ୍ରକ୍ରିୟା ଆରମ୍ଭ କରାଯାଇଥିଲା । ଯେଉଁଥିରେ କୌଣସି ଅସ୍ଵାଭାବିକତା ନାହିଁ। କଲେଜ ଇଲେକ୍ସନ ପାଇଁ ଚିନ୍ତା କରୁଛି ଉଚ୍ଚଶିକ୍ଷା ବିଭାଗ । ଏଣୁ ସଠିକ୍ ସମୟରେ ସବୁ ଶେଷ କରିବାକୁ ହେଲେ ପ୍ରକ୍ରିୟାକୁ ତ୍ୱରିତ କରିବାକୁ ହେବ । ଯେଉଁମାନେ ଜାଣିନାହାନ୍ତି ପ୍ରକ୍ରିୟା ସେଇମାନେ ଅଯଥା ଦୋଷ ଲଦୁଥିବା କହିଛନ୍ତି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜ ।
ନନ୍ଦିଘୋଷ ବ୍ୟୁରୋ: ମହିଳା ସରକାରୀ କର୍ମଚାରୀଙ୍କ ମାତୃତ୍ଵ ଛୁଟି ନେଇ ଦୂରହେଲା ଦ୍ୱନ୍ଦ୍ୱ । ସ୍ଥିରୀକୃତ ହେଲା ୧୮୦ ଦିନର ଛୁଟି ପାଇଁ ନିର୍ଦ୍ଦିଷ୍ଟ ନିୟମ । ସମ୍ଭାବ୍ୟ ପ୍ରସବ ତାରିଖର ୩ ମାସ ପୂର୍ବରୁ, ପ୍ରସବ ତାରିଖର ଛଅ ମାସ ମଧ୍ୟରେ ୧୮୦ ଦିନର ମାତୃତ୍ଵ ଛୁଟି ମିଳିବ । ମାତୃତ୍ଵ ଛୁଟି ଏକକାଳୀନ ନିରବଚ୍ଛିନ୍ନ ଭାବେ ବା ବିଭିନ୍ନ ପର୍ଯ୍ୟାୟରେ ନିଆଯାଇପାରିବ । ପ୍ରସବ ଯେକୌଣସି ସ୍ଵୀକୃତିପ୍ରାପ୍ତ ଚିକିତ୍ସାଳୟରେ ହେବା ଆବଶ୍ୟକ । ଜଣେ ମହିଳା ସରକାରୀ କର୍ମଚାରୀ ଶିଶୁ ଜନ୍ମ ସମୟରେ ସରକାରୀ ସେବାରେ ନ ଥାଇ ପରବର୍ତ୍ତୀ ସମୟରେ ସେବାରେ ଯୋଗଦେବା ପରେ, ଗର୍ଭପାତ, ଜନ୍ମିତ ଶିଶୁର ମୃତ୍ୟୁ ଓ ମୃତ ଶିଶୁ ଜନ୍ମ କ୍ଷେତ୍ରରେ ମଧ୍ୟ ଛୁଟି ନେବାର ନିର୍ଦ୍ଦିଷ୍ଟ ନିୟମ କରାଯାଇଛି ।
ଜଣେ ମହିଳା ସରକାରୀ କର୍ମଚାରୀ ଦୁଇଟିରୁ କମ୍ ଜୀବିତ ପିଲାଙ୍କ ପାଇଁ, ମାତୃତ୍ୱ ସମୟରେ ୧୮୦ ଦିନ ପର୍ଯ୍ୟନ୍ତ ଛୁଟି ପାଇବାର ନିୟମ ରହିଛି। କିନ୍ତୁ ମାତୃତ୍ଵ ଛୁଟି କେଉଁ ଅବଧି ଭିତରେ ନିଆଯାଇପାରିବ, ସେ ବିଷୟରେ ଥିବା ଦ୍ୱନ୍ଦ୍ୱ ଦୂର ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏ ସମ୍ପର୍କିତ ପ୍ରସ୍ତାବକୁ ଅନୁମୋଦନ ଦେଇଛନ୍ତି। ଏହା ଦ୍ୱାରା ମହିଳା ସରକାରୀ କର୍ମଚାରୀ ମାନେ ମାତୃତ୍ୱ କ୍ଷେତ୍ରରେ ଛୁଟି ପାଇବାରେ ଯେଉଁ ସମସ୍ୟାର ସମ୍ମୁଖୀନ ହେଉଥିଲେ ତାହା ଦୂର ହୋଇଛି । ଯଦି ମାତୃତ୍ଵ ଛୁଟି ସମୟରେ ଜଣେ ମହିଳା ସରକାରୀ କର୍ମଚାରୀଙ୍କୁ ଉଚ୍ଚ ପଦବୀକୁ ପଦୋନ୍ନତି ଦିଆଯାଏ, ତେବେ ତାଙ୍କର ସେହି ଉଚ୍ଚ ପଦବୀରେ ଯୋଗଦାନ ରିପୋର୍ଟ ଯେଉଁଦିନ ଉପଯୁକ୍ତ କର୍ତ୍ତୃପକ୍ଷ ପାଇବେ ସେହିଦିନ ସେ ସେହି ଯୋଗ ଦେଲେ ବୋଲି ଧରାଯିବ। ସେ ତାଙ୍କର ମାତୃତ୍ଵ ଛୁଟିର ଅବଶିଷ୍ଟ ଅବଧି ନିରବଚ୍ଛିନ୍ନ ଭାବେ ନେଇପାରିବେ ।
ନନ୍ଦିଘୋଷ ବ୍ୟୁରୋ: ପାକିସ୍ତାନ ଗୁଇନ୍ଦା ଏଜେଣ୍ଟଙ୍କ ସହ ରହିଛି ସମ୍ପର୍କ। ହରିୟାଣାର ୟୁଟ୍ଯୁବର ଜ୍ୟୋତି ମାଲହୋତ୍ରା ଏହା ମାନିଥିବା ସୂଚନା ମିଳିଛି। ନୂଆଦିଲ୍ଲୀସ୍ଥିତ ପାକ୍ ହାଇକମିଶନର ତତକାଳୀନ କର୍ମକର୍ତ୍ତା ଡାନିସଙ୍କ ସହ ତାଙ୍କର ସମ୍ପର୍କ ଥିବା ସେ ସୂଚନା ଦେଇଛନ୍ତି। ୨୦୨୩ରେ ପ୍ରଥମ ଥର ଲାଗି ଡାନିସଙ୍କ ସହ ଯୋଗାଯୋଗରେ ଆସିଥିଲେ ଜ୍ୟୋତି। ପାକିସ୍ତାନକୁ ଯିବା ସକାଶେ ଭିସା ଲାଗି ସେ ଡାନିସଙ୍କୁ ଯୋଗାଯୋଗ କରିଥିବା ଜ୍ୟୋତି କହିଥିବା ସୂଚନା ମିଳିଛି। ଅପରେସନ ସିନ୍ଦୂର ପରେ ଗତ ମେ ୧୩ରେ ଡାନିସଙ୍କୁ ବହିଷ୍କାର କରାଯାଇଥିଲା। ସେପଟେ ଜ୍ୟୋତିଙ୍କ ସମ୍ପର୍କରେ ମୁହଁ ଖୋଲିଛନ୍ତି କୋଲକାତାର ୟୁଟ୍ୟୁବର ସୌମିତ ଭଟ୍ଟାଚାର୍ଯ୍ୟ। ସେ କହିଛନ୍ତି- ଜ୍ୟୋତିଙ୍କୁ ସେ ଏନେଇ ସନ୍ଦେହ କରିପାରୁନାହାନ୍ତି। ଅଯୋଧ୍ୟା ରାମ ମନ୍ଦିର ପ୍ରତିଷ୍ଠା ବେଳେ ଜ୍ୟୋତିଙ୍କ ସହ ତାଙ୍କର ଦେଖା ହୋଇଥିଲା ବୋଲି କହିଛନ୍ତି ସୌମିତ। ପାକ୍ ଲିଙ୍କ ନେଇ ହୋଇଥିବା ଅଭିଯୋଗ ଖବର ଶୁଣି ସେ ହତବାକ ହୋଇଯାଇଥିଲେ ବୋଲି କହିଛନ୍ତି ସୌମିତ। ଜ୍ୟୋତିଙ୍କ ବିରୋଧରେ ଭାରତୀୟ ନ୍ୟାୟ ସଂହିତା ଓ ଅଫିସିଆଲ ସିକ୍ରେଟ ଆକ୍ଟ-୧୯୨୩ ଅନୁସାରେ ମାମଲା ରୁଜୁ ହୋଇଛି।
ନନ୍ଦିଘୋଷ ବ୍ୟୁରୋ: ବହୁଚର୍ଚ୍ଚିତ ରାନ୍ୟା ରାଓ ସୁନା ଚୋରାଚାଲାଣ ମାମଲା। କର୍ଣ୍ଣାଟକର ଏକ ମେଡିକାଲ କଲେଜରେ ପ୍ରବର୍ତ୍ତନ ନିର୍ଦ୍ଦେଶାଳୟର ରେଡ। ତୁମାଲକୁରୁସ୍ଥିତ ଏହି ମେଡିକାଲ କଲେଜ ସହ ରାଜ୍ଯ ଗୃହମନ୍ତ୍ରୀ ଜି. ପରମେଶ୍ବରଙ୍କ ସମ୍ପର୍କ ଥିବା ସୂଚନା ମିଳିଛି। ତୁମାକୁରୁସ୍ଥିତ ଶ୍ରୀ ସିଦ୍ଧାର୍ଥ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସେସ ଆଣ୍ଡ ରିସର୍ଚ୍ଚ ସେଣ୍ଟରର ଅଧ୍ୟକ୍ଷ ପରମେଶ୍ବର ରହିଥିବା ସୂଚନା ମିଳିଛି। ଇଡି ରେଡ ବେଳେ ମନ୍ତ୍ରୀ ଘରେ ନଥିବା ସୂଚନା ମିଳିଛି। ଅଭିନେତ୍ରୀ ରାନ୍ୟା ରାଓଙ୍କ ସୁନା ଚୋରାଚାଲାଣ ମାମଲା ସହ ମେଡିକାଲ କଲେଜର ସମ୍ପୃକ୍ତି ଆସିବା ପରେ ଇଡି ରେଡ ହୋଇଛି। ଇଡି ତଦନ୍ତ ବେଳେ ରାନ୍ୟା ରାଓଙ୍କ ସହ ମେଡିକାଲ କଲେଜର ଆର୍ଥିକ କାରବାର ମଧ୍ୟରେ ଲିଙ୍କ ଥିବା ସୂଚନା ମିଳିଥିଲା। ବିଦେଶରୁ ସୁନା ଚୋରାଚାଲାଣ ନେଇ ଗତ ମାର୍ଚ୍ଚ ୩ରେ ବେଙ୍ଗାଳୁରୁ ବିମାନ ବନ୍ଦରରୁ ଗିରଫ ହୋଇଥିଲେ ରାନ୍ଯା ରାଓ। ତେବେ ଜି. ପରମେଶ୍ବରଙ୍କ ଲିଙ୍କକୁ ରାଜନୈତିକ ଗୋଟିଚାଳନା ବୋଲି କହିଛନ୍ତି କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡି.କେ. ଶିବକୁମାର।
ନନ୍ଦିଘୋଷ ବ୍ୟୁରୋ: ମାସେ ପରେ ପିସିସି ଟିମର ହେବ ସଂପ୍ରସାରଣ । ପିସିସିର ନୂଆ ଟିମକୁ ନେଇ ମୁହଁ ଖୋଲିଛନ୍ତି ପିସିସି ସଭାପତି ଭକ୍ତଚରଣ ଦାସ l ନୂଆ ଟିମକୁ ନେଇ କଂଗ୍ରେସ ନେତାମାନେ ଧଯ୍ୟ ଧରନ୍ତୁ ବୋଲି ସେ କହିଛନ୍ତି। ଟିମରେ ସାମିଲ ବଡ କଥା ନୁହେଁ, କଂଗ୍ରେସ ପାଇଁ କାମ କରିବାକୁ ନେତାଏ ଆଗ୍ରହ ପ୍ରକାଶ କରିବା ଦରକାର l ବହୁ ନେତା ୨୫ ବର୍ଷ ହେବ କଂଗ୍ରେସରେ ଥିବାରୁ ପଦ ଦରକାର ବୋଲୁ କହୁଛନ୍ତି । ପଦ ନୁହେଁ କଂଗ୍ରେସ ସମସ୍ତଙ୍କୁ ସମ୍ମାନ ଦେବ । ଯିଏ କାମ କରିବ , ସେ ସମ୍ମାନ ପାଇବ । ନୂଆ ଟିମରେ ପରିବର୍ତ୍ତନର ଆବଶ୍ୟକତା । ୩୦ ଜଣିଆ ଟିମରେ ଆଠ ଜଣ ଆଦିବାସୀ ଅଛନ୍ତି, ୭ଜଣ obc ଅଛନ୍ତି, ସବୁ ଜାତିର ନେତାଙ୍କୁ ନେଇ ଛୋଟ ଟିମ୍ ହୋଇଛି । ନିର୍ବାଚିତ ବିଧାୟକମାନଙ୍କୁ ଟିମରେ ଗୁରୁତ୍ବ ଦିଆଯାଇଛି l ସେମାନଙ୍କୁ ପଦ ପଦବୀ ଦେଇ ଦଳୀୟ କାମ କରିବେ l ଏକ ମାସ ପରେ ଟିମର ସଂପ୍ରସାରଣ କରାଯିବ l ବହୁ ଲୋକଙ୍କୁ ପୁଣି ଟିମରେ ସାମିଲ କରାଯିବ ବୋଲିସ ଭକ୍ତ କହିଛନ୍ତି।
ନନ୍ଦିଘୋଷ ବ୍ୟୁରୋ: ବିଶ୍ବର ସବୁଠାରୁ ଶକ୍ତିଶାଳୀ ରାଷ୍ଟ୍ର ଆମେରିକା ଏବେ ନିଜ ସୁରକ୍ଷା ନେଇ ଚିନ୍ତିତ। ଆକ୍ରମଣରୁ ବର୍ତ୍ତିବା ଲାଗି ଦେଶରେ ଗୋଲଡେନ ଡୋମ ମିସାଇଲ ସିଲଡ ସିଷ୍ଟମ ପ୍ରତିଷ୍ଠା କରାଯିବ ବୋଲି ସୂଚନା ଦେଇଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ । ଆସନ୍ତା ତିନି ବର୍ଷରେ ଏହି ଯୋଜନା ରୂପରେଖ ନେବ । ଏଥିଲାଗି ପ୍ରାରମ୍ଭିକ ଭାବେ ଖର୍ଚ୍ଚ ହେବ ୨୫ ବିଲିୟନ ଡଲାର । ମୋଟ ବଜେଟ ପରିମାଣ ରହିବ ୧୭୫ ବିଲିୟନ ଡଲାର । ସ୍ବଦେଶୀ କାରିଗରିଭିତ୍ତିରେ ଏହି ସିଷ୍ଟମ ପ୍ରତିଷ୍ଠା ହେବ । ଦେଶବାସୀଙ୍କ ସୁରକ୍ଷା ଦୃଷ୍ଟିରୁ ଏହି ଯୋଜନା କାର୍ଯ୍ୟକାରୀ ହେବ ବୋଲି କହିଛନ୍ତି ଟ୍ରମ୍ପ । ଏହି ସିଷ୍ଟମ କାର୍ଯ୍ୟକାରୀ ହେଲେ ପୃଥିବୀର ଯେ କୌଣସି ଦିଗରୁ ଆସୁଥିବା ମିସାଇଲକୁ ଖସାଇଦିଆଯାଇପାରିବ । ଏପରିକି ସ୍ପେସରୁ ଆସୁଥିବା କ୍ଷେପଣାସ୍ତ୍ରକୁ ବି ନଷ୍ଟ କରିଦିଆଯାଇପାରିବ । ଏହି କାର୍ଯ୍ଯକ୍ରମର ମୁଖ୍ୟ ହେବେ ୟୁଏସ ସ୍ପେସ ଫୋର୍ସ ଜେନେରାଲ ମାଇକେଲ ଗୁଟଲିନ । ବଡ଼କଥା ହେଉଛି ଆମେରିକାର ଏହି ଅଭିଯାନରେ ବି ସାମିଲ ହେବ କାନାଡା । ଏହି ବଜେଟ ପରିମାଣ ଆସନ୍ତା ୨୦ ବର୍ଷ ମଧ୍ୟରେ ୫୪୨ ବିଲିୟନ ଡଲାର ଟପିବ ବୋଲି ସୂଚନା ମିଳିଛି। ବାଲିଷ୍ଟିକ ମିସାଇଲ କ୍ଷେତ୍ରରେ ଆମେରିକାକୁ ଚୀନ ଟକ୍କର ଦେଉଥିବାବେଳେ ରୁଷ ବି ଇଣ୍ଟରକଣ୍ଟିନେଣ୍ଟାଲ ରେଞ୍ଜ ମିସାଇଲ ସିଷ୍ଟମ ବିକଶିତ କରୁଛି। ଏହାକୁ କାଉଣ୍ଟର କରିବା ଲାଗି ଆମେରିକା ଏହି ପଦକ୍ଷେପ ନେଇଛି। ଗୋଲଡେନ ଡୋମ ହେଉଛି ମଲ୍ଟିଲେୟାର ଡିଫେନ୍ସିଭ ସିଷ୍ଟମ। ବାଲିଷ୍ଟିକ, ହାଇପରସୋନିକ ଓ କ୍ରୁଜ ମିସାଇଲରୁ ଦେଶକୁ ରକ୍ଷା କରିବ।
