ଗଞ୍ଜାମ: ତାରାତରିଣୀ ପୀଠର ଉନ୍ନତିକରଣ ପାଇଁ ଆରମ୍ଭ ହୋଇଯାଇଛି ସଫେଇ କାର୍ଯ୍ୟ ।  ଗତ କିଛିଦିନ ତଳେ ପୀଠର ଉନ୍ନତିକରଣ ପାଇଁ ପ୍ୟାକେଜ୍‌ ଘୋଷଣା କରିଥିଲେ ମୁଖ୍ୟମନ୍ତ୍ରୀ । ଘୋଷଣା ପରେ ସ୍ଥାନୀୟବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା । ମୁଖ୍ୟମନ୍ତ୍ରୀଙ୍କୁ ଭେଟି ଧନ୍ୟବାନ ମଧ୍ୟ ଜଣାଇଥିଲେ ତାରାତାରିଣୀ ସେବାୟତ ।

ତେବେ ମୁଖ୍ୟମନ୍ତ୍ରୀଙ୍କ ଘୋଷଣା ପରେ ଏବେ ସ୍ଥାନୀୟବାସୀଙ୍କ ପକ୍ଷରୁ ଆରମ୍ଭ ହୋଇଯାଇଛି ମନ୍ଦିର ଚାରିପଟୁ ସଫେଇ କାର୍ଯ୍ୟ । ସ୍ଥାନୀୟ ସରପଞ୍ଚଙ୍କ ନେତୃତ୍ୱରେ ସ୍ଥାନୀୟ ଲୋକେ, ବ୍ଲକ କର୍ମଚାରୀ ଓ ବିଜୁ ଯୁବବାହିନୀ ମିଳିତଭାବେ ସଫେଇ କାର୍ଯ୍ୟ କରିଛନ୍ତି । ଏହାସହ ପୀଠ ପରିସରରେ ପ୍ଲାଷ୍ଟିକ ବ୍ୟବହାର ନକରିବାକୁ ଶ୍ରଦ୍ଧାଳୁଙ୍କୁ ସଚେତନ କରିଛନ୍ତି ।

ପାରାଦୀପ: କରୋନା ଭାଇରସ୍‌କୁ ନେଇ ପାରାଦୀପରେ ହାଇଆଲର୍ଟ । ବନ୍ଦରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି । ଗତ ୧୦ ଦିନ ହେବ କରୋନା ଆକ୍ରାନ୍ତ ଦେଶରୁ ଆସୁଥିବା ୧୪ଟି ଜାହାଜର କର୍ମଚାରୀଙ୍କୁ ପାରଦୀପ ବନ୍ଦରରେ ଓହ୍ଲାଇବାକୁ ବାରଣ କରିଛି ପ୍ରଶାସନ ।

ଗତ ଶୁକ୍ରବାର ଚୀନରୁ ଆସିଥିବା ଏକ ଭାରତୀୟ ଜାହାଜର କର୍ମଚାରୀଙ୍କୁ ମଧ୍ୟ ସ୍ଥଳଭାଗକୁ ଓହ୍ଲାଇବା ପାଇଁ ବାରଣ କରିଥିଲା ପ୍ରଶାସନ । ସେପଟେ ବନ୍ଦର ଚିକିତ୍ସାଳୟ ପରିସରରେ ପ୍ରଶାସନ ପକ୍ଷରୁ ସଚେତନତା, ସେବା ଓ ସୁରକ୍ଷାକୁ ନେଇ ଏକ କର୍ମଶାଳା ଅନୁଷ୍ଠିତ ହୋଇଯାଇଛି ।

କନ୍ଧମାଳ: ପଥର ତଳୁ ବାହାରୁଛି ଡିଜେଲ । କନ୍ଧମାଳ ଜିଲ୍ଲା ଦାରିଙ୍ଗବାଡି ତିନି ଛକରୁ ପରପଙ୍ଗା ରାସ୍ତାରେ ଥିବା ବିଲ ମଝିରେ ପଥର ତଳୁ ଡିଜେଲ ବାହାରୁଥିବା ଦେଖିବାକୁ ମିଳିଛି । ଏ ସମ୍ପର୍କରେ ଜଣା ପଡିବା ପରେ ସେଠାରୁ ଡିଜେଲ ସଂଗ୍ରହ କରିବା ପାଇଁ ଲୋକଙ୍କ ଭିଡ ଜମିଛି ।

୩ ଶହ ମିଟର ଦୂରରେ ଏକ ପେଟ୍ରୋଲ ଟାଙ୍କ ରହିଥିବାରୁ ସମ୍ଭବତଃ ଏହି ଡିଜେଲ ସେଠାରୁ ଲିକ୍‌ ହେଉଛି ବୋଲି ସନ୍ଦେହ କରାଯାଉଛି । ତେବେ ସେମାନଙ୍କ ଡିଜେଲ ଷ୍ଟକ ଠିକ୍‌ ରହିଛି ବୋଲି ପମ୍ପ ପକ୍ଷରୁ କୁହାଯାଇଛି । ତେବେ ପଥର ପାଖରେ ଡିଜେଲ କେମିତି ଆସିଲା ତାକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ଘଟଣା ସମ୍ପର୍କରେ ଜାଣିବା ପରେ ପୋଲିସ ସେଠାରେ ପହଞ୍ଚି ଅଧିକ ପଚରାଉଚୁରା ଆରମ୍ଭ କରିଛି ।

ସମ୍ବଲପୁର: ତଦନ୍ତରେ ଅବହେଳା ନେଇ ଥାନା ଏସ୍‌ଆଇ ନିଲମ୍ବିତ । ସମ୍ବଲପୁର ଅଇଁଠାପାଲି ଏସ୍‌ଆଇ ଯୁଗଳ କିଶୋର ସା ନିଲମ୍ବିତ ହୋଇଛନ୍ତି । ଏକ ହତ୍ୟା ମାମଲାର ତଦନ୍ତ କରୁଥିବା ବେଳେ ୧୨୦ ଦିନ ମଧ୍ୟରେ ଚାର୍ଜସିଟ ଦାଖଲ କରିବାର ଥିଲା ।

ହେଲେ ଏଥିରେ ବିଳମ୍ବ ହେବାରୁ ଅପରାଧୀ କୋର୍ଟରୁ ବେଲ୍‌ ପାଇବାରେ ସକ୍ଷମ ହୋଇଥିଲା । ଯାହା ପରେ ସମ୍ବଲପୁର ଏସ୍‌ପି ଏଥିରେ ଅସନ୍ତୋଷ ପ୍ରକାଶ କରିବା ସହିତ ଏସ୍‌ଆଇଙ୍କୁ ନିଲମ୍ବନ କରିଛନ୍ତି ।

ବାରିପଦା: ଧାର ଟଙ୍କା ମାଗିବାରୁ ନାବଳିକାଙ୍କ ସହ ଅସଦାଚରଣ ।  ଗୁରୁତର ଅବସ୍ଥାରେ  ନାବାଳିକା ପିଆରଏମ୍‌ରେ ଭର୍ତ୍ତି ହୋଇଛନ୍ତି । ଘଟଣାରେ ଦୁଇ ଯୁବକ ଅଟକଙ୍କୁ ପୋଲିସ ଅଟକ ରଖିଥିବା ବେଳେ ୩ଜଣ ଫେରାର ହୋଇଯାଇଛନ୍ତି ।

ବାରିପଦା କଳିକାପୁର ଅଞ୍ଚଳରେ ଘଟିଛି ଏହି ଅଭାବନୀୟ ଘଟଣା । ଧାର ନେଇଥିବା ଟଙ୍କା ମାଗିବାରୁ  ୫ଜଣ ଦୁର୍ବୃତ୍ତ ଏହି ଆତଙ୍କ ଖେଳାଇଥିଲେ । ଘରେ ପସି ପରିବାର ଉପରେ ଆକ୍ରମଣ ସହ ନାବାଳିକା ସହ ଅସଦାଚରଣ କରିଥିଲେ ।

ଏନେଇ ବାରିପଦା ଥାନାରେ ପରିବାର ପକ୍ଷରୁ ଅଭିଯୋଗ ପରେ ୨ ଦୁବୃତ୍ତଙ୍କୁ ଅଟକ ରଖିଛି ପୋଲିସ। ହେଲେ ଆଉ ତିନି ଅଭିଯୁକ୍ତ ଫେରାର ହୋଇଯାଇଥିବା ସୂଚନା ମିଳିଛି । ଅଭିଯୁକ୍ତମାନେ ହେଲେ ରମେଶ ଟୁଡୁ, ବାଙ୍ଗୁରୁ ଟୁଡୁ, ଭାନୁ ଦାସ ଓ କାହ୍ନା ଦାସ ।