ରାୟଗଡ଼ା: ସ୍ୱାମୀର ଟାଙ୍ଗିଆ ଚୋଟରେ ସ୍ତ୍ରୀର ମୃତ୍ୟୁ । ରାୟଗଡ଼ା ଥାନା କୁଡିଙ୍ଗଗୁଡା ଗାଁର ସତାନା ଜାକାକା ତାଙ୍କ ପତ୍ନୀ ବାନାଇ ଜାକାକାଙ୍କୁ ହତ୍ୟା କରିଛି । ଗତ କିଛି ଦିନ ହେଲା ସ୍ୱାମୀ, ସ୍ତ୍ରୀଙ୍କ ମଧ୍ୟରେ କଳହ ଲାଗି ରହିଥିଲା ।

ଗତକାଲି ମଧ୍ୟ ଗଣ୍ଡଗୋଳ ହୋଇଥିଲା । ତେବେ ରାତିରେ ସତାନା ସ୍ତ୍ରୀଙ୍କୁ ଟାଙ୍ଗିଆରେ ଆକ୍ରମଣ କରିଥିଲା । ପରେ ଏନେଇ ନିଜେ ଥାନାରେ ସୂଚନା ଦେଇଥିଲା।

ଟାଉନ୍‌ ଥାନା ପୋଲିସ ଗାଁରେ ପହଞ୍ଚି ଆହତ ବାନାଇଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି। ପୋଲିସ ସତାନାକୁ ଗିରଫ କରି ପଚରାଉଚରା କରୁଛି।

ସମ୍ବଲପୁର: ପୋଲରେ ଝୁଲିଛି ଧାନ ବୋଝେଇ ଟ୍ରକ୍‌, ଯାତାୟତ ଠପ୍‌ । ରେଢାଖୋଲ ପଟୁ ଏକ ଧାନ ବୋଝେଇ ଟ୍ରକ୍‌ ସମ୍ବଲପୁର ଯାଉଥିଲା । ତେବେ ରେଢାଖୋଲ ଓ ଚାରମାଲ ମଝିରେ ଥିବା ସିଙ୍ଗଲ ବ୍ରିଜ ଉପରେ ଟ୍ରକଟି ଝୁଲନ୍ତା ଅବସ୍ଥାରେ ରହିଛି ।

ଫଳରେ ଜାତୀୟ ରାଜପଥରେ ଗତକାଲି ରାତି ୧୧ଟାରୁ ଯାତାୟତ ସଂପୂର୍ଣ୍ଣ ବନ୍ଦ ରହିଛି । ବ୍ରିଜର ଉଭୟ ପାଖରେ ଶହ ଶହ ବସ ଓ ଟ୍ରକ ଅଟକି ରହିଛି । ରାସ୍ତା ଦେଇ ବରଗଡ଼, ସମ୍ବଲପୁର, ଝାରସୁଗୁଡା, ରାଉରକେଲା, ସୁନ୍ଦରଗଡ଼ ପରି ବିଭିନ୍ନ ସହରରୁ ନାଇଟ୍‌ କୋଚ ବସ ଯାତାୟତ କରେ । ତେବେ କାଲିଠୁ ଗାଡ଼ି ଚଳାଚଳ ମଧ୍ୟ ଅଚଳ ରହିଛି ।

ପୁରୀ: ଆଜି ଶ୍ରୀମନ୍ଦିରରେ ଶ୍ରୀଜିଉଙ୍କ ବନକ ଲାଗି ନୀତି । ଦ୍ୱିତୀୟ ଭୋଗ ମଣ୍ଡପରେ ଅପରାହ୍ନ ୪ଟାରୁ ରାତି ଆଠଟା ପର୍ଯ୍ୟନ୍ତ ମହାପ୍ରଭୁଙ୍କ ଏହି ଗୁପ୍ତନୀତି ଅନୁଷ୍ଠିତ ହେବ । ଦତ୍ତ ମହାପାତ୍ର ଓ ସିଂହାରୀ ସେବକ ମାନେ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର କରିବେ । ଏହି ନୀତି ବେଳେ ଶ୍ରୀଜିଉଙ୍କର ପାରମ୍ପରିକ ରଙ୍ଗ, ହିଙ୍ଗୁଳ, ହରିତାଳ, କର୍ପୁର, କସ୍ତୁରୀ ଇତ୍ୟାଦି ବ୍ୟବହାର କରାଯାଇ ଶୃଙ୍ଗାର କରାଯିବ । ଏହି ଗୁପ୍ତନୀତି ପାଇଁ ସଂଧ୍ୟା ୪ଟାରୁ ୪ ଘଣ୍ଟା ସାଧାରଣ ଦର୍ଶନ ବନ୍ଦ ରହିବ । ରାତି ଆଠଟା ପରେ ଦର୍ଶନ ସ୍ୱାଭାବିକ ହେବ ବୋଲି  ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।

ଭଦ୍ରକ: କୁହୁଡ଼ି ଯୋଗୁ ଆମ୍ବୁଲାନ୍ସକୁ ପିଟିଲା ଆମ୍ବୁଲାନ୍ସ । ୨ ରୋଗୀଙ୍କ ସହ ୪ ଆହତ । ଆଜି ଭୋରରୁ ଭଦ୍ରକ ଡାହାଣୀଗଢିଆ ନିକଟରେ ଦୁର୍ଘଟଣା ଘଟିଛି। ଘନ କୁହୁଡ଼ି ଯୋଗୁ ଆମ୍ବୁଲାନ୍ସ ଡ୍ରାଇଭର ଆଗକୁ ଦେଖିନପାରିବାରୁ ଦୁର୍ଘଟଣା ଘଟିଥିବା ସୂଚନା ମିଳିଛି । କୋଲକତା ଦେବଡାରୁ ଦୁଇ ଜଣ ରୋଗୀଙ୍କୁ ନେଇ କଟକ ଆସୁଥିଲା ଆମ୍ବୁଲାନ୍ସ । ହେଲେ ଡାହାଣୀଗଢିଆ ନିକଟରେ ଏକ ଟ୍ରଲରକୁ ସାଇଡ୍‌ ଦେବା ବେଳେ କୁହୁଡି ଯୋଗୁ ଆଗକୁ ଦେଖିପାରିନଥିଲା।

ଫଳରେ ଆଗରେ ଯାଉଥିବା ଆଉ ଏକ ଆମ୍ବୁଲାନ୍ସକୁ ଧକ୍କା ଦେଇଥିଲା । ଦୁର୍ଘଟଣାରେ ଦୁଇ ଜଣ ରୋଗୀଙ୍କ ସହ ୪ ଜଣ ଆହତ ହୋଇଛନ୍ତି । ଘଟଣା ସ୍ଥଳରେ ପୋଲିସ ପହଞ୍ଚି ସମସ୍ତ ଆହତଙ୍କୁ ଉଦ୍ଧାର କରି ଭଦ୍ରକ ମେଡିକାଲରେ ଭର୍ତ୍ତି କରିଛି ।

ନୟାଗଡ଼: ଗ୍ୟାସ ଲିକ୍‌ ହୋଇ ନିଆଁ ଲାଗି ସ୍ୱାମୀ ସ୍ତ୍ରୀ ଗୁରୁତର । ନୟାଗଡ଼ ଶରଣକୂଳ ଥାନା ଗୋଲଗାଁରେ ଏଭଳି ଘଟଣା ସାମନାକୁ ଆସିଛି । ଗତକାଲି ରାତିରେ ଗାଁର ରଶ୍ମିତା ଦଳବେହେରା ରୋଷେଇ ପାଇଁ ଗ୍ୟାସ୍ ଲଗାଇଥିଲେ । ତେବେ ଗ୍ୟାସ ଲିକ ହୋଇ ନିକଟରେ ଥିବା କିରୋସିନ ଜାରରେ ଲାଗିଯାଇଥିଲା ।

ରଶ୍ମିତାଙ୍କୁ ବଞ୍ଚାଇବାକୁ ଯାଇ ତାଙ୍କ ସ୍ୱାମୀ ମଧ୍ୟ ଗୁରୁତର ହୋଇଛନ୍ତି । ଉଭୟଙ୍କୁ ପ୍ରଥମେ ନୟାଗଡ଼ ଓ ପରେ ଗୁରୁତର ଅବସ୍ଥାରେ ଭୁବନେଶ୍ୱର ସ୍ଥାନାନ୍ତର କରାଯାଇଛି ।