ନୂଆଦିଲ୍ଲୀ: ପୂର୍ବ ଲଦାଖର ପେଙ୍ଗାଙ୍ଗ୍ ହ୍ରଦର ଦକ୍ଷିଣ ତଟରେ ଚୀନକୁ ପଛଘୁଂଚା ଦେବାକୁ ପଡିଛି । ଅଗଷ୍ଟ ୨୯-୩୦ ତାରିଖ ରାତିରେ ଭାରତୀୟ ଯବାନ ଏହାର ଶିଖର ଉପରେ କବଜା କରିଛନ୍ତି । ଏବେ ଭାରତୀୟ ସେନା ଚୀନର ପ୍ରତ୍ୟକ ଗତିବିଧି ଉପରେ ଏହିଠାରୁ ନଜର ରଖିପାରିବ । ସାମରିକ ଦୃଷ୍ଟିକୋଣରୁ ଭାରତକୁ ଏହି ଲାଭ ମିଳିବା ପଛରେ ଅଛି ଏକ ଗୁପ୍ତ ଫୋର୍ସ-ଏଷ୍ଟାବ୍ଲିସମେଣ୍ଟ୍ ୨୨(ଟୁଟୁ) । ଏହାକୁ ମଧ୍ୟ ସ୍ପେଶାଲ ଫ୍ରଣ୍ଟିୟର ଫୋର୍ସ (SFF) ବୋଲି କୁହାଯାଇଥାଏ । SFF ନାମରେ ପରିଚିତ ଏହି ଫୋର୍ସକୁ ସିଧାସଳଖ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ନିୟନ୍ତ୍ରଣ କରାଯାଇଥାଏ । ଅର୍ଥାତ ଏହା ଉପରେ ସେନାର ସେତେଟା ନିୟନ୍ତ୍ରଣ ନଥାଏ । ଆସନ୍ତୁ ଜାଣିବା SFF କ’ଣ ? କେମିତି ଏହା ଦଗାବାଜ୍ ଚୀନକୁ ମୁହଁତୋଡ୍ ଜବାବ ଦେଇଥିଲା ।
SFF ର ସବୁ କମାଣ୍ଡୋ ପାରଙ୍ଗମ ପାରାଟ୍ରୁପର
SFFର ଜନ୍ମ ୧୯୬୨ର ଯୁଦ୍ଧ ସହ ହୋଇଥିଲା । ୧୯୬୨ ଯୁଦ୍ଧରେ ଭାରତ ପରାସ୍ତ ହେବା ପରେ ଏଭଳି ଗୋଟିଏ ଗୁପ୍ତ ଫୋର୍ସର ଆବଶ୍ୟକତାକୁ ଅନୁଭବ କରିଥିଲେ ଭାରତ ସରକାର । ଏହି ଆବଶ୍ୟକତାରୁ ଜନ୍ମ ନେଇଥିଲା SFF । ସ୍ପେଶାଲ ଫ୍ରଣ୍ଟିୟର ଫୋର୍ସ । ଯାହାର ଏକ ମାତ୍ର କାମ ହେଉଛି ସୀମାରେ ଶତ୍ରୁକୁ ଚମକାଇବା । ଅଚାନକ ପହଂଚିବା ଓ ଶତ୍ରୁକ ଆବାକାବା କରି ମିଶନ ଶେଷ କରିବା । ଏହି କମାଣ଼୍ଡୋଙ୍କୁ ଆପଣ ଜ୍ୟାକ୍ ଅଫ୍ ଅଲ୍ ଟ୍ରେଡସ ବୋଲି ମଧ୍ୟ କହିପାରିବେ । କାରଣ ଏମାନେ ଆକାଶରୁ ଲମ୍ଫ ଦେଇ ପାରନ୍ତି । ପାଣିରେ ବୁଡି ଶତ୍ରୁକ ଚମକାଇ ପାରନ୍ତି । ୧୯୬୨ର ଯୁଦ୍ଧ ସରୁସରୁ ଏହାର ଗଠନ ହୋଇ ସାରିଥିଲା । ଏଥିରେ ଭାରତରେ ରହୁଥିବା ତିବ୍ବତୀୟ ଶରଣାର୍ଥୀଙ୍କୁ ସାମିଲ କରାଯାଇଥାଏ । ଆରମ୍ଭରେ ସେମାନଙ୍କୁ ଇଣ୍ଟେଲିଜେନ୍ସ ବ୍ୟୁରୋ (ଆଇବି) ରିସର୍ଚ୍ଚ ଆଣ୍ଡ୍ ଆନାଲିସିସ୍ ୱିଙ୍ଗ୍(RAW0 ଓ ଆମେରିକାର CIA ପ୍ରଶିକ୍ଷଣ ଦେଇଥିଲା । ଅନେକ ବର୍ଷ ପର୍ଯ୍ୟନ୍ତ SFFକୁ ଚୀନର ଆଣବିକ ମିଶାଇଲ ମୁତୟନ ଉପରେ ନଜର ରଖିବାକୁ କୁହାଯାଇଥିଲା । ଏହାର ମୁଖ୍ୟାଳୟ ଉତ୍ତରାଖଣ୍ଡର ଚକରାତାରେ ରହିଛି । SFFରେ ଅତିକମରେ ୫ ବାଟାଲିଅନ ରହିଛି । ଏହି ୫ ବାଟାଲିୟନରେ ଅଛନ୍ତି ପାହାଡି ଯୁଦ୍ଧରେ ମାହିର ୫ ହଜାର କମାଣ୍ଡୋ । ଏହି ସମସ୍ତ କମାଣ୍ଡୋ ପାରଟ୍ରୁପର ଅଟନ୍ତି । ଅର୍ଥାତ ଆବଶ୍ୟକ ସ୍ଥଳେ ସେମାନଙ୍କୁ ଆକାଶମାର୍ଗରୁ ମୁତୟନ କରାଯାଇ ପାରିବ ।
Establishment 22 ନାମ କେମିତି ମିଳିଲା ?
ସ୍ପେଶାଲ ଫ୍ରଣ୍ଟିୟର ଫୋର୍ସର ପ୍ରଥମ ଆଇଜି ଥିଲେ ମେଜର ଜେନରାଲ (ଅବସରପ୍ରାପ୍ତ) ସୁଜନ ସିଂହ । ସେ ଦ୍ୱିତୀୟ ବିଶ୍ୱଯୁଦ୍ଧ କାଳରେ ୨୨ ମାଉଣ୍ଟେନ୍ ରେଜିମେଣ୍ଟର କମାଣ୍ଡର ଥିଲେ । ତାଙ୍କୁ ମିଲିଟାରି କ୍ରସରେ ସମ୍ମାନିତ କରାଯାଇଥିଲା । ବ୍ରିଟିଶ-ଭାରତୀୟ ସେନାରେ ତାଙ୍କର ବେସ ଖାତିର ଥିଲା । ଯେହେତୁ ସେ ୨୨ ମାଉଣ୍ଟେନ୍ ରେଜିମେଣ୍ଟରେ ଥିଲେ ତେଣୁ କାଳାନ୍ତରରେ ଏହି ଫୋର୍ସର ନାମ ଏଷ୍ଟାବ୍ଲିସମେଣ୍ଟ୍ ଟୁ ଟୁ ପଡିଥିଲା ।
ଭୟଙ୍କର ଥଣ୍ଡାରେ ଖାଲି ବାନିୟନ ପିନ୍ଧି ଖେଳନ୍ତି କମାଣ୍ଡୋ
ସେନାରେ ଏବେ ସାମିଲ ଥିବା କିମ୍ବା ଅବସର ନେଇଥିବା କୌଣସି ଅଧିକାରୀ ଏଷ୍ଟାବ୍ଲିସମେଣ୍ଟ୍ ଟୁ ଟୁ ବାବଦରେ କେବେ ମଧ୍ୟ ମୁହଁ ଖୋଲିବେ ନାହିଁ । ଶନିବାର ଅପରେସନରେ ଏଷ୍ଟାବ୍ଲିସମେଣ୍ଟ୍ ଟୁ ଟୁ ସାମିଲ ଥିଲା କି ନାହିଁ ସେ ବାବଦରେ କୌଣସି ଅଧିକାରୀ କିଛି ମଧ୍ୟ କହିବେ ନାହିଁ । କିନ୍ତୁ ସମସ୍ତେ ଏହା କୁହନ୍ତି ଯେ, ଲଦାଖ ଓ ଅନ୍ୟ ସ୍ଥାନରେ SFFର ବାଟାଲିୟନ ମୁତୟନ ଅଛି । ୧୫ କର୍ପସର ମୁଖ୍ୟ ରହିଥିବା ଲେଫ୍ଟେନାଣ୍ଟ୍ ଜେନରଲ ସୈୟଦ ଆତା ହୁସନୈନ୍(ଅବସରପ୍ରାପ୍ତ) କୁହନ୍ତି ଯେ, ଲଦାଖରେ ଥିବାବେଳେ ମୋ ସହ ‘ବିକାସ’ ୟୁନିଟ ଥିଲା । ମୁଁ ସେମାନଙ୍କୁ ୧୬ ହଜାର ଫୁଟ ଉଚ୍ଚତାରେ ବାନିୟନ ପିନ୍ଧି ଭଲିବଲ ଖେଳୁଥିବା ଦେଖିଛି । ସେହି ମାଟି ସହ ସେମାନଙ୍କ ଭାବନାତ୍ମକ ସଂପର୍କ ବେସ ମଜଭୁତ । ଏଥିରୁ ସେମାନଙ୍କୁ ଅପରେସନରେ ଫାଇଦା ମିଳିଥାଏ ।
SFF ବାବଦରେ କହିବା ମନା
ଜଣେ ଅବସରପ୍ରାପ୍ତ ଜେନରାଲଙ୍କ ଅନୁସାରେ ‘‘ ଆମେ ସେମାନଙ୍କ ବାବଦରେ ଜାଣିଛୁ । କିନ୍ତୁ ସେମାନଙ୍କ ଉପସ୍ଥିତିର କୌଣସି ରେକର୍ଡ ନାହିଁ । ଆମ ମଧ୍ୟରୁ ଯେଉଁମାନେ ସେମାନଙ୍କ ସହ କାମ କରିଛନ୍ତି ସେମାନେ ଶପଥ ଦ୍ୱାରା ବନ୍ଧା’’ । ସେହିଭିଳି ସର୍ଜିକାଲ ଷ୍ଟ୍ରାଇକ୍ ସମୟରେ ଉତ୍ତର କମାଣ୍ଡର ମୁଖ୍ୟ ଥିବା ଡିଏସ ହୁଡ୍ଡା(ଅବସରପ୍ରାପ୍ତ) କହିଛନ୍ତି ଯେ, ଚୀନକୁ କୂଟନୈତିକ, ଆର୍ଥିକ ଓ ସାମରିକ ଉତ୍ତର ଦେବାର ସମୟ ଆସିଛି । ସେନା ଯେକୌଣସି ଚ୍ୟାଲେଂଜର ଉତ୍ତର ଦେବାକୁ ପ୍ରସ୍ତୁତ ଅଛି ।
ମିଶନ କାଳରେ SFF ଅଧିକାରୀ ସହିଦ
SFFର ଜଣେ କମ୍ପାନୀ କମାଣ୍ଡର ମିଶନ କାଳରେ ସହିଦ ହୋଇଥିବା କୁହାଯାଉଛି । ଏହା ସହ ଜଣେ ଜୁନିୟର କମାଣ୍ଡୋ ମଧ୍ୟ ଆହତ ହୋଇଛନ୍ତି । ପେଙ୍ଗାଙ୍ଗ୍ ହ୍ରଦର ଦକ୍ଷୀଣ ଦୀଗରେ ଅପରେଶନ ଚାଲୁଥିବା ବେଳେ ଅଗଷ୍ଟ ୨୯-୩୦ରାତିରେ ଲାଣ୍ଡ୍ ମାଇନ୍ ବିସ୍ଫୋରଣରେ ଏହି ଘଟଣା ଘଟିଥିଲା । ୧୯୬୨ ମସିହାରେ ବିଛାଯାଇଥିବା ଲ୍ୟାଣ୍ଡ୍ ମାଇନ୍ ଉପରେ ପାଦ ପଡିବାରୁ କଂପାନୀ କମଣ୍ଡାରଙ୍କ ମୃତ୍ୟୁ ହୋଇଥିବା କୁହାଯାଉଛି ।
