ଭୁବନେଶ୍ବର: ବିଏମସି କାର୍ଯ୍ୟାଳୟରେ ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣା। ୩ ଜଣଙ୍କୁ ବାନ୍ଧିଛି ପୋଲିସ। ବିଜେପି କର୍ପୋରେଟର ଜୀବନ ରାଉତ, ରଶ୍ମୀ ମହାପାତ୍ର ଓ ଦେବାଶିଷ ପ୍ରଧାନଙ୍କୁ ଗିରଫ କରିଛି ପୋଲିସ। ସମସ୍ତ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି। ସେମାନଙ୍କ ବିରୋଧରେ ବିଏନଏସର ଧାରା ୩୩୩, ୧୩୨, ୧୨୧-୧, ୧୨୧-୨, ୧୦୯, ୩୫୧-୨, ୬୨, ୧୪୦-୨, ୩୦୪, ୫୪, ଧାରା ୬୧-୨, ଧାରା ୧୮୯-୨ ଲାଗିଛି। ଜୀବନ ରାଉତ ୨୯ ନମ୍ବର ଓ୍ବାର୍ଡର ବିଜେପି କର୍ପୋରେଟର। ଗିରଫ ଅଭିଯୁକ୍ତ ବିଜେପି କର୍ମୀ ଓ ନେତା। ପ୍ରଶ୍ନ ଉଠୁଛି କାହିଁକି ଗିରଫ ହେବେନି ଜଗନ୍ନାଥ ପ୍ରଧାନ ? କାରଣ ଜଗନ୍ନାଥ ପ୍ରଧାନଙ୍କ ନାଁରେ ହୋଇଛି ଅଭିଯୋଗ। ଆକ୍ରମଣକାରୀ ନେଇଥିଲେ ଜଗନ୍ନାଥ ପ୍ରଧାନଙ୍କ ନାଁ। ଏହି ଘଟଣା ପରେ ପଦାରେ ପଡ଼ିଛି ବିଜେପିର ଦାଦାଗିରି। ଅଭିଯୁକ୍ତଙ୍କ ଗିରଫ ଦାବିରେ ରାଜରାସ୍ତାକୁ ଓହ୍ଲାଇଥିବା ବିଜେଡି ନେତାଙ୍କୁ ଗିରଫ କରିଛି ପୋଲିସ। ଅନ୍ୟପଟେ ସମସ୍ତ ଅଭିଯୁକ୍ତଙ୍କୁ ଗିରଫ କରାନଯିବା ପର୍ଯ୍ୟନ୍ତ ବିଏମସି ସେବା ଦେବନି ବୋଲି ଚେତାବନୀ ଦେଇଛନ୍ତି ବିଏମସି ମେୟର। ଅଭିଯୋଗ ଶୁଣାଣି ବେଳେ ଅତିରିକ୍ତ କମିଶନର ରତ୍ନାକର ସାହୁଙ୍କୁ ଆକ୍ରମଣ କରିଛନ୍ତି କିଛି ଦୁର୍ବୃତ୍ତ। ଆକ୍ରମଣ ବେଳର ଭିଡିଓ ଲାଗିଛି ନନ୍ଦିଘୋଷ ଟିଭି ହାତରେ। ଯେଉଁ ଭିଡିଓରେ ଅତିରିକ୍ତ କମିଶନରଙ୍କୁ ଦୁର୍ବୃତ୍ତମାନେ ଘୋଷାଡି ଘୋଷାଡ଼ି ନେବା ସହ ଗୋଇଠା ମାରୁଥିବା ଦେଖିବାକୁ ମିଳିଛି। ସରକାରୀ ଅଧିକାରୀଙ୍କ ମାଡ଼ ମାରିବା ଘଟଣାକୁ ସହଜରେ ଗ୍ରହଣ କରିପାରୁନାହାନ୍ତି ସରକାରୀ କର୍ମଚାରୀ। ତୁରନ୍ତ ଅଭିଯୁକ୍ତଙ୍କ ଗିରଫ ଦାବିରେ ରାଜରାସ୍ତାକୁ ଓହ୍ଲାଇଛନ୍ତି କର୍ପୋରେଟର ଓ କର୍ମଚାରୀ। ଏହାସହ ଓଏଏସ ସଂଘ ମଧ୍ୟ ଆକ୍ରମଣ ଘଟଣାକୁ କଡ଼ା ନିନ୍ଦା କରିଛି। ଏନେଇ ଥାନାରେ ଏତଲା ଦିଆଯାଇଛି। ଆହତ ଅତିରିକ୍ତ କମିଶନର ଏଫଆଇଆରରେ ସାଂଘାତିକ ଅଭିଯୋଗ ଆଣିଛନ୍ତି। ତାଙ୍କ କହିବା ଅନୁସାରେ, ଜଗନ୍ନାଥ ପ୍ରଧାନଙ୍କ ନାଁରେ କିଛି ଦୁର୍ବୃତ୍ତ ତାଙ୍କୁ ଆକ୍ରମଣ କରିଥିଲେ। ଜଗନ୍ନାଥ ପ୍ରଧାନଙ୍କୁ କ୍ଷମା ମାଗିବା ପାଇଁ କହିଥିଲେ ଆକ୍ରମଣକାରୀ। ଏହାସହ ଛଡାଇ ନେଇଥିଲେ ମୋବାଇଲ ଫୋନ୍। ମୋବାଇଲ ଛଡ଼ାଇ ନେବା ପରେ ହ୍ବାଟ୍ସଆପ ଷ୍ଟାଟସରେ ଦେଇଥିଲେ ଆପତ୍ତିଜନକ ଛବି। ପୋଲିସ ନିକଟରେ ଏହାର ସ୍କ୍ରିନସଟ୍ ଦାଖଲ ହୋଇଛି। ଅନ୍ୟପଟେ ଶୀଘ୍ର କାର୍ଯ୍ୟନୁଷ୍ଠାନ ନେବାକୁ ଦାବି କରିଛନ୍ତି ବିଏମସି କମିଶନର। ଆଗରୁ କେବେ ଏମିତି ହୋଇନଥିଲା, ଏହା ପ୍ରଥମ। ଦୁର୍ବୃତ୍ତମାନେ ରତ୍ନାକର ସାହୁଙ୍କୁ ଜୋରଦାର ଆକ୍ରମଣ କରିଛନ୍ତି। ଏଠି ସୂଚନା ଯୋଗ୍ୟ ଯେ, ଜୀବନ ରାଉତ ପୂର୍ବରୁ ମଧ୍ଯ ବନ୍ଧାହୋଇଥିଲେ । ପୋଲିସକୁ ଦୁର୍ବ୍ୟବହାର ଅଭିଯୋଗରେ ବନ୍ଧା ହୋଇଥିଲେ ବିଜେପି କର୍ପୋରେଟର ଜୀବନ ରାଉତ।….ସେପଟେ bmc ସଫେଇ କର୍ମଚାରୀଙ୍କ କାର୍ଯ୍ୟବନ୍ଦ ପ୍ରତିବାଦରେ ଝାଡୁ ନ କରି ସେବା ବନ୍ଦ କରିଛନ୍ତି ୱାର୍ଡ ନମ୍ବର 44ର ସଫେଇ କର୍ମଚାରୀ।…
ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାକୁ ମାନସ ମଙ୍ଗରାଜଙ୍କ ନିନ୍ଦା
ନନ୍ଦିଘୋଷ ବ୍ୟୁରୋ: ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାକୁ ବିଜେଡି ସାଂସଦ ମାନସ ମଙ୍ଗରାଜଙ୍କ ନିନ୍ଦା । କହିଲେ, ଜଣେ ସରକାରୀ ଅଧିକାରୀଙ୍କ ଉପରେ ଏଭଳି ପାଶବିକ ଆକ୍ରମଣ ଅତ୍ୟନ୍ତ ଦୁଃଖଦାୟକ । ଆମ ସମାଜରେ ହିଂସାର କୌଣସି ସ୍ଥାନ ନାହିଁ । ହିଂସା ଭିଆଇ ବିଜେପି ସମର୍ଥକ ଏକ ଭୟର ବାତାବରଣ ସୃଷ୍ଟି କରିବାକୁ ଚାହୁଁଛନ୍ତି ବୋଲି ଟ୍ବିଟ୍ କରି କହିଛନ୍ତି ମାନସ ।
ଏଭଳି କାଣ୍ଡ ପାଇଁ ବିଜେପି ସମର୍ଥକଙ୍କୁ ଲଜ୍ଜା ଲାଗିବା କଥା । ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯିବା ଦରକାର । ସରକାରୀ ଅଧିକାରୀଙ୍କ ସୁରକ୍ଷା ନେଇ ସରକାର ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି ମାନସ ମଙ୍ଗରାଜ ।
ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାକୁ ନେଇ ନବୀନଙ୍କ ଉଦବେଗ
ନନ୍ଦିଘୋଷ ବ୍ୟୁରୋ: ଆଜି ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାରେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ଗଭୀର ଉଦବେଗ ପ୍ରକାଶ କରିଛନ୍ତି । ଏନେଇ ସେ ସୋସିଆଲ ମିଡିଆ ଏକ୍ସରେ ନିଜର କ୍ଷୋଭ ପ୍ରକାଶ କରିଛନ୍ତି । ନବୀନ କହିଛନ୍ତି, ଏଇ ଘଟଣାର ଭିଡିଓ ମୋତେ ଶକ୍ତ ଆଘାତ ଦେଇଛି । ଜଣେ ବରିଷ୍ଠ ଓଏଏସ ଅଧିକାରୀ ଅତିରିକ୍ତ ଶାସନ ସଚିବ ପାହ୍ୟାର ଅଧିକାରୀଙ୍କୁ ଯେଉଁ ଭଳି ନିର୍ମମ ଭାବେ ଆକ୍ରମଣ କରାଯାଇଛି ତାହା ଅତ୍ୟନ୍ତ୍ୟ ନିନ୍ଦନୀୟ ।
ଆଗକୁ ନବୀନ କହିଛନ୍ତି, ବିଏମସିର ଅତିରିକ୍ତ କମିଶନର ରତ୍ନାକର ସାହୁଙ୍କୁ ତାଙ୍କ କାର୍ଯ୍ୟାଳୟରୁ ଘୋଷାଡ଼ି ନୃଶଂସ ଭାବେ ବିଧା ଗୋଇଠା ମରାଯାଇଛି । ଏସବୁ ଘଟଣା ଜଣେ ବିଜେପି କର୍ପୋରେଟର ଠିଆ ହୋଇ ଦେଖୁଛନ୍ତି । ସେହି ବିଜେପି କର୍ପୋରେଟର ସଂପର୍କ ହାରି ଯାଇଥିବା ବିଜେପି ବିଧାୟକ ପ୍ରାର୍ଥୀଙ୍କ ସହ ରହିଛି । ବଡ଼ କ୍ଷୋଭର ବିଷୟ ହେଲାଏହି ଘଟଣା ରାଜଧାନୀର ଛାତି ଉପରେ ଦିନ ଦ୍ବିପ୍ରହରରେ ଘଟିଛି । ଯେତେବେଳେ କି ଅଫିସର ଜଣକ ଅଫିସରେ ବସି ଜନ ଅଭିଯୋଗ ଶୁଣୁଥିଲେ । ଏନେଇ ମୁଁ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଶୀଘ୍ର କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛି । ଏହାସହିତ ଯେଉଁମାନେ ଏଥିରେ ଅଭିଯୁକ୍ତ ସେମାନଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଯେଉଁ ରାଜନେତା ଏହି ଲଜ୍ଜାଜନକ କାଣ୍ଡ ଭିଆଇବା ପଛରେ ଅଛନ୍ତି ତାଙ୍କ ବିରୋଧରେ ଆକ୍ସନ ନେବାକୁ ମଧ୍ୟ ଦାବି କରିଛି । ସଂପୃକ୍ତ ଅଫିସର ନାଁ ନେଇଥିବା ଦୁର୍ବୃତ୍ତମାନେ ଅପରାଧୀଙ୍କ ଭଳ ବ୍ୟବହାର କରିଥିଲେ । ଯଦି ଜଣେ ବରିଷ୍ଠ ଅଧିକାରୀ ତାଙ୍କ କାର୍ଯ୍ୟାଳୟରେ ସୁରକ୍ଷିତ ନାହାଁନ୍ତି ତା’ହେଲେ ରାଜ୍ୟର ଆଇନଶୃଙ୍ଖଳା କେଉଁସ୍ତରକୁ ଗଲାଣି ବୁଝିହେଉଛି । ରାଜ୍ୟର ସାଧାରଣ ନାଗରିକଟିଏ କେତେ ସୁରକ୍ଷିତ ଏଥିରୁ ବେଶ ଅନୁମେୟ କରିହେଉଛି । ମୁଁ ଆଶା କରୁଛି ମୁଖ୍ୟମନ୍ତ୍ରୀ ତୁରନ୍ତ ଆକ୍ସନ ନେଇ ଲୋକଙ୍କ ଆଶା ବିଶ୍ବାସକୁ ବଜାୟ ରଖନ୍ତୁ । ଏଭଳି ଜଘନ୍ୟ କାଣ୍ଡ କରୁଥିବା ବ୍ୟକ୍ତି ଯଦି ଦଣ୍ଡିତ ନହୁଏ ତାହେଲେ ଓଡି଼ଶାବାସୀ କେବେ ବି କ୍ଷମା ଦେବେନି । ଏହି ଘଟଣାକୁ ନେଇ ପୂର୍ବତନ ରାଜ୍ୟପାଳଙ୍କ ପୁଅ ଜଣେ ଏଏସଓଙ୍କୁ କିପରି ମାଡ ମାରିଥିଲେ ତାର ଉଦାହରଣ ଦେଇଛନ୍ତି ନବୀନ ।
ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣା, କାଲିଠୁ ସମୂହ ଛୁଟିରେ ଯିବାକୁ ଓଏଏସ ଅଧିକାରୀଙ୍କ ନିଷ୍ପତ୍ତି
ନନ୍ଦିଘୋଷ ବ୍ୟୁରୋ: ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣା । ଓଏଏସ୍ ସଂଘର ଚରମ ନିଷ୍ପତ୍ତି । ଅନିର୍ଦ୍ଦିଷ୍ଟ କାଳ ପାଇଁ ସମୂହ ଛୁଟିରେ ରହିବେ ଓଏଏସ୍ ଅଧିକାରୀ । ଆସନ୍ତାକାଲିଠୁ ସମୂହ ଛୁଟିରେ ରହିବେ ଓଏଏସ୍ ଅଧିକାରୀ । ସମସ୍ତ ଅଭିଯୁକ୍ତ ଗିରଫ ନହେବା ପର୍ଯ୍ୟନ୍ତ ଜାରି ରହିବ ପ୍ରତିବାଦ ।
ଭଦ୍ରକ ଜିଲ୍ଲାପାଳଙ୍କୁ ଚିଠି ଲେଖିଲେ ଓଏଏସ୍ ସଂଘର ଜିଲ୍ଲା ଶାଖା । ଏହା କେବଳ ଗୋଟିଏ ଘଟଣା ନୁହେଁ, ବର୍ଷକ ଭିତରେ ସରକାରୀ ଅଧିକାରୀଙ୍କ ଉପରେ ଆକ୍ରମଣ ବଢିବାରେ ଲାଗିଛି । ଯାହାକି ସରକାରୀ ଅଧିକାରୀଙ୍କୁ ବିଚଳିତ କରିବା ସହ ଆତ୍ମସମ୍ମାନକୁ ଆଘାତ ଦେଉଛି । ଜଣେ କର୍ତ୍ତବ୍ୟରତ ଅଧିକାରୀଙ୍କୁ ଆକ୍ରମଣ ପ୍ରାଶାସନିକ ବ୍ୟବସ୍ଥାକୁ ଆକ୍ରମଣ ସହ ସମାନ । ଏଣିକି ସମସ୍ତ ସରକାରୀ କାର୍ଯ୍ୟାଳୟରେ ଅଧିକାରୀଙ୍କ ସୁରକ୍ଷା ସୁନିଶ୍ଚିତ କରିବାକୁ ଦାବି କରିଛନ୍ତି ଓଏଏସ ଅଧିକାରୀ । ଯେପର୍ଯ୍ୟନ୍ତ ସୁରକ୍ଷା ସୁନିଶ୍ଚିତ କରିନାହାନ୍ତି, ସେ ପର୍ଯ୍ୟନ୍ତ ଜୁଲାଇ ୧ ତାରିଖରୁ ଅର୍ଦ୍ଦିଷ୍ଟ କାଳପାଇଁ ସମୁହ ଛୁଟିରେ ରହିବେ ଅଧିକାରୀ ।
OAS ସଂଘ ନିଷ୍ପତ୍ତିକୁ IAS ସଂଘର ସମର୍ଥନ
ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣା । ଓଏଏସ ସଂଘର ସଙ୍କଳ୍ପକୁ ସମର୍ଥନ ଜଣାଇଲା ଆଇଏଏସ ସଂଘ । ଗୃହ ଓ ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଉଷା ପାଢ଼ୀ ଆକ୍ରମଣ ଘଟଣାକୁ ନିନ୍ଦା କରିବା ସହ ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ପୋଲିସ ଡିଜି ଓ ନଗର ଉନ୍ନୟନ ମନ୍ତ୍ରୀଙ୍କ ସହ ଏ ବାବଦରେ ଆଲୋଚନା କରିଛନ୍ତି । ଏପରି ଘଟଣା ଦୁର୍ଭାଗ୍ୟଜନକ ବୋଲି ଆଇଏଏସ ଓ ଓଏଏସ ସଂଘ ମିଳିତ ଭାବେ ସୂଚନା ଦେଇଛନ୍ତି । ରତ୍ନକର ସାହୁଙ୍କ ଆକ୍ରମଣ ଘଟଣାରେ ଯେଉଁମାନେ ସଂପୃକ୍ତ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି ଆଇଏଏସ ଓ ଓଏଏସ ସଂଘ ।
ଦୁନିଆରେ ଜଣିଏ ମାତ୍ର ରହିବେ କ୍ୟାପଟେନ କୁଲ୍: ଧୋନୀ ପଞ୍ଜିକରଣ କଲେ ଟ୍ରେଡମାର୍କ
ନନ୍ଦିଘୋଷ ବ୍ୟୁରୋ: ଦୁନିଆରେ ଆଉ କେହି ହୋଇ ପାରିବେନି କ୍ୟାପଟେନ କୁଲ । ଆଉ କେହି ଏହି ଟ୍ରେଡମାର୍କକୁ କରି ପାରିବେନି ବ୍ୟବହାର । କାରଣ, ଭାରତୀୟ କ୍ରିକେଟର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ କ୍ୟାପଟେନ୍ କୁଲ୍ ଟ୍ରେଡମାର୍କକୁ ନିଜ ନାଁରେ ପଞ୍ଜିକୃତ କରି ନେଇଛନ୍ତି । ଖେଳ ପ୍ରଶିକ୍ଷଣ, ପ୍ରଶିକ୍ଷଣ ସୁବିଧା ଓ ସର୍ପୋଟ କୋଚିଂ ସେବା ପାଇଁ କ୍ଲାସ-୪୧ ଅନୁସାରେ ଧୋନୀ ଏହାକୁ ପଞ୍ଜିକୃତ କରିଛନ୍ତି । ଏହି ଟ୍ରେଡମାର୍କ ନା କେବଳ ତାଙ୍କ ନାମକୁ ଆଇନଗତ ସୁରକ୍ଷା ଦେବେ ବରଂ ଏହା ତାଙ୍କ ବ୍ରାଣ୍ଡଭେଲୁ ଓ ପରିଚୟକୁ ବି ଆହୁରି ଦୃଢ଼ କରିବ ।
ଧୋନୀଙ୍କ ଓକିଲ ମାନସୀ ଅଗ୍ରଓ୍ବାଲ ଏହି ସୂଚନା ଦେବା ସହ କହିଛନ୍ତି, ପଳର୍ବରୁ ସମାନ ଟ୍ରେଡମାର୍କ ଥିଲେ ବି ବ୍ୟକ୍ତିଗତ ବ୍ରାଣ୍ଡିଂ ଓ ପରିଚୟ ସହ ଜଡିତ ବିଶିଷ୍ଠତା କେମିତି ଆଇନଗତ କାମରେ ଆସିଥାଏ ଏହି ମାମଲା ଦର୍ଶାଉଛି ।
ସୂଚନାଯୋଗ୍ୟ, ଧୋନୀଙ୍କ କ୍ୟାପଟେନ କୁଲ୍ ଟ୍ରେଡମାର୍କକୁ ପ୍ରଥମେ ଟ୍ରେଡମାର୍କ ଧାରା ୧୧(୧) ଅନୁସାରେ ବିରୋଧ କରାଯାଇଥିଲା । କାରଣ ଏହି ନାଁରେ ପୂର୍ବରୁ ଏକ ଟ୍ରେଡମାର୍କ ପଞ୍ଜିକୃତ ଥିଲା । ଏମିତି ସ୍ଥିତିରେ ନୂଆ ଟ୍ରେଡମାର୍କ ଭ୍ରମ ସୃଷ୍ଟି କରିପାରିଥାନ୍ତା । ଧୋନୀଙ୍କ ତରଫରୁ ନିବେଦନ କରାଯାଇଥିଲା, କ୍ୟାପଟେନ କୁଲ ନାମ ତାଙ୍କ ସହ ବହୁତ ବର୍ଷରୁ ଜୋଡି ହୋଇ ରହିଛି । ଏହାକୁ ଜନତା, ମିଡିଆ ଓ ପ୍ରଶଂସକ ଆଦରି ନେଇଛନ୍ତି । ଏହା କେବଳ ଏକ ଉପନାମ ନୁହେଁ, ଏହା ଧୋନୀଙ୍କ ବ୍ୟବସାୟିକ ପରିଚୟ ବନି ସାରିଛି । ଧୋନୀଙ୍କ ଲୋକପ୍ରିୟତା, ମିଡିଆ ପ୍ରସାରଣ ଓ ପ୍ରଶଂସକଙ୍କ ଭଲ ପାଇବା କାରଣରୁ ଏହା କୌଣସି ଭ୍ରମ ସୃଷ୍ଟି କରିବ ନାହିଁ । ଧୋନୀଙ୍କ ଏହି ଟ୍ରେଡମାର୍କ ଛକ୍ତ ଟ୍ରେଡମାର୍କ ପୂର୍ବରୁ ରହିଛି ଓ ଅଧିକ ଲୋକପ୍ରିୟ ବୋଲି ଆବେଦନରେ କୁହାଯାଇଥିଲା । ଟ୍ରେଡମାର୍କ ରେଜିଷ୍ଟ୍ରୀ ଏହି ଆବେଦନକୁ ଗ୍ରହଣ କରିବା ସହ ସ୍ବୀକାର ମଧ୍ୟ କରିଛନ୍ତି କ୍ୟାପଟେନ କୁଲ କେବଳ ଏକ ସାଧାରଣ ଶବ୍ଦ ନୁହେଁ, ଏହା ଧୋନୀଙ୍କ ବ୍ୟକ୍ତିତ୍ବ, ବ୍ରାଣ୍ଡ ଓ ଛବିର ଏକ ଅଂଶ ।
ରଥଯାତ୍ରା ପରେ ମୋହନ ସରକାରଙ୍କ ମନ୍ତ୍ରିମଣ୍ଡଳ ସମ୍ପ୍ରସାରଣ, ପଦ୍ମ ଶିବିର ଉଷ୍ମ
ନନ୍ଦିଘୋଷ ବ୍ୟୁରୋ: ରଥଯାତ୍ରା ପରେ ମୋହନ ମନ୍ତ୍ରିମଣ୍ଡଳର ସମ୍ପ୍ରସାରଣ । ଖାଲି ପଡିଥିବା ୬ଟି ମନ୍ତ୍ରିପଦ ପୂରଣ ହେବା ସହ ବିବାଦୀୟ ମନ୍ତ୍ରୀଙ୍କ ବିଭାଗ ଅଦଳବଦଳ କରିବେ ମୁଖ୍ୟମନ୍ତ୍ରୀ । ତାକୁ ନେଇ ଶାସକ ଦଳରେ ଆରମ୍ଭ ହୋଇଛି ଚର୍ଚ୍ଚା । ମନ୍ତ୍ରିମଣ୍ଡଳ ସମ୍ପ୍ରସାରଣରେ ମୋହନଙ୍କ ଟିମରେ କିଏ ସାମିଲ ହେବେ ଓ କିଏ ବାଦ ପଡିବେ ତାହାକୁ ନେଇ ପାଓ୍ବାର କରିଡରରେ କସରତ ଆରମ୍ଭ ହୋଇଛି । ବିଜେପି ମନ୍ତ୍ରୀ ଓ ବିଧାୟକ କହିଛନ୍ତି, ମୁଖ୍ୟମନ୍ତ୍ରୀ ସବୁ ଦୃଷ୍ଟିକୁ ବିଚାର କରି ମନ୍ତ୍ରିମଣ୍ଡଳ ସମ୍ପ୍ରସାରଣ କରିବେ । ଯାହାକୁ ନେଇ ବିଜେପି ଅନ୍ଦର ମହଲରେ ଉଷ୍ମତା ବଢି ବାରେ ଲାଗିଛି ।
ବର୍ଷେ ପରେ ମୁଖ୍ୟମନ୍ତ୍ରୀ ମୋହନ ମାଝୀ ମନ୍ତ୍ରିମଣ୍ଡଳରେ ସମ୍ପ୍ରସାରଣ କରିବେ । ମୋହନଙ୍କ ମନ୍ତ୍ରିମଣ୍ଡଳରେ ୧୫ ଜଣ ମନ୍ତ୍ରୀ ସ୍ଥାନ ପାଇଛନ୍ତି । ଅଧାଗଢା ମନ୍ତ୍ରିମଣ୍ଡଳକୁ ନେଇ ବିଜେପି ସରକାର ବର୍ଷେ ହେବ ଚାପରେ ଅଛି । ତାହାରି ଭିତରେ କିଛି ମନ୍ତ୍ରୀଙ୍କ କାର୍ଯ୍ୟକାଳପ ପାଇଁ ବଦନାମ ହୋଇଛି ବିଜେପି ସରକାର । ନିଜ ବିଭାଗର ଦାୟିତ୍ବ ସଠିକ ଭାବେ ତୁଳାଇ ପାରୁ ନଥିବାରୁ ଅଯଥା ସରକାରଙ୍କ ବିରୋଧରେ ବିବାଦ ମୁଣ୍ଡ ଟେକୁଛି । ବିରୋଧୀ ଏସବୁକୁ ମୁଖ୍ୟ ପ୍ରସଙ୍ଗ କରି ସରକାରଙ୍କୁ ଟାର୍ଗେଟ କରିବା ସହ ସିଧା ମୁଖ୍ୟମନ୍ତ୍ରୀଙ୍କୁ ନିଶାଣ କରୁଛନ୍ତି । ଯାହାକୁ ନେଇ ତୃତୀୟ ମହଲା ଚିନ୍ତାରେ ପଡିଯାଇଛି । ଚଳିତ ରଥଯାତ୍ରାରେ ମହାବିଭ୍ରାଟକୁ ନେଇ ହୁଲସ୍ତୁଲ ହେଉଛି ରାଜ୍ୟ । ରଥଯାତ୍ରା ଦାୟିତ୍ବରେ ଥିବା ମନ୍ତ୍ରୀମାନେ ନିଜର ଦାୟିତ୍ବ ଠିକ ସେ ତୁଲାଇ ନଥିବାରୁ ଏପରି ଅଘଟଣ ଘଟିଛି ବୋଲି ଅଭିଯୋଗ ହୋଇଛି । ତେଣୁ ରଥ ପରେ ମୋହନଙ୍କ ଅଧାଗଢା ମନ୍ତ୍ରିମଣ୍ଡଳକୁ ପୂରା କରିବା ସହ ବିବାଦୀୟ ମନ୍ତ୍ରିଙ୍କୁ ବିଭାଗ ପରିବର୍ତ୍ତନ କରାଯିବ । ବିଜେପି ବିଧାୟକ ଓ ମନ୍ତ୍ରୀମାନେ ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ମାପିଚୁପି ବୟାନ ରଖିଛନ୍ତି ।
ମନ୍ତ୍ରିମଣ୍ଡଳ ସମ୍ପ୍ରସାରଣ ଚର୍ଚ୍ଚାକୁ ନେଇ ଶାସକ ଦଳରେ ଗୁଞ୍ଜରଣ ଆରମ୍ଭ ହେବା ପରେ ମୁଖ୍ୟମନ୍ତ୍ରୀ ନିଜ ଟିମରେ କାହାକୁ ରଖିବେ ଓ କାହାକୁ ବାଦ ଦେବେ ତାକୁ ନେଇ ବିଜେପି ଅନ୍ଦର ମହଲର ଚର୍ଚ୍ଚା ଜୋର ଧରିଛି । ଡାଇରିଆ, ରଥଯାତ୍ରା ବିଭ୍ରାଟ, ଆଳୁ ସଙ୍କଟ, ନାରୀ ନିର୍ଯାତନା ପ୍ରସଙ୍ଗରେ ସରକାରଙ୍କୁ କଡା ସମାଲୋଚନା କରିଛନ୍ତି ବିରୋଧୀ । ବହୁମନ୍ତ୍ରୀଙ୍କ ପାଖରେ ଏକାଧିକ ବିଭାଗ ଥିବାରୁ ସେମାନଙ୍କଠାରୁ କିଛି ବିଭାଗ କଢା ଯିବ । ୧୭ଟି ଜିଲ୍ଲା ମନ୍ତ୍ରୀ ଶୂନ୍ୟ ଥିବାରୁ ଏହି ଜିଲ୍ଲାରୁ ଦକ୍ଷ ବିଧାୟକଙ୍କୁ ମୋହନ ନିଜ ଟିମରେ ସାମିଲ କରିବା ନେଇ ଚର୍ଚ୍ଚା ହେଉଛି । ଚର୍ଚ୍ଚାରେ ଥିବା ବହୁ ଯୁବ ବିଧାୟକଙ୍କୁ ସମ୍ପ୍ରସାରଣରେ ସୁଯୋଗ ମିଳିପାରେ ।
ବ୍ୟବସ୍ଥା ଅନୁସାରେ ରାଜ୍ୟରେ ମୁଖ୍ୟମନ୍ତ୍ରୀଙ୍କୁ ବାଦ ଦେଇ ୨୧ ଜଣ ମନ୍ତ୍ରୀ ରହିପାରିବେ । ମୋହନଙ୍କ ମନ୍ତ୍ରୀ ମଣ୍ଡଳରେ ୧୫ ଜଣ ମନ୍ତ୍ରୀ ସ୍ଥାନ ପାଇଛନ୍ତି । ରଥ ପରେ ପ୍ରଥମ ମନ୍ତ୍ରିମଣ୍ଡଳ ସମ୍ପ୍ରସାରଣ ନେଇ ଚର୍ଚ୍ଚା ଏବେ ଜୋରଦାର ହୋଇଛି । ଯାହାକୁ ନେଇ ଆଶାୟୀମାନେ ଲବି ମଧ୍ୟ ଆରମ୍ଭ କରି ଦେଇଛନ୍ତି ।
ତେଜିଲା ଧାନକିଣା ବିବାଦ: ଜୁଲାଇ ୩୦ ପର୍ଯ୍ୟନ୍ତ ତାରିଖ ବଢ଼ାଇବାକୁ ବିଜେଡିର ଦାବି
ନନ୍ଦିଘୋଷ ବ୍ୟୁରୋ: ଖରିଫ ଋତୁ ଭଳି ରବି ଋତୁରେ ବି ଧାନ କିଣାରେ ଅବ୍ୟବସ୍ଥା ସାମ୍ନାକୁ ଆସିଛି । ଚାଷୀଙ୍କ ପାଖରେ କ୍ବିଣ୍ଟାଲ କ୍ବିଣ୍ଟାଲ ଧାନ ଥିବା ବେଳେ ସରକାର ଧାନ ସଂଗ୍ରହ ପାଇଁ ମଣ୍ଡି ବନ୍ଦ କରିବାକୁ ବସିଛନ୍ତି । ଚାଷୀ ଟୋକନ ଧରି ବସିଛନ୍ତି, ହେଲେ ଧାନ ବିକିବାକୁ ସକ୍ଷମ ହେଉନାହାନ୍ତି । ମଣ୍ଡିରେ ବର୍ଷାରେ ଧାନ ଭିଜୁଥିବା ବେଳେ ଏହାର ସୁରକ୍ଷା ପାଇଁ କିଛି ବ୍ୟବସ୍ଥା ନାହିଁ । ଏମିତି ସ୍ଥିତିରେ ଜୁନ୍ ୩୦ ସୁଦ୍ଧା ମଣ୍ଡି ବନ୍ଦ କରିବାକୁ ସରକାର ନିଷ୍ପତ୍ତି ନେଇଥିବା ବେଳେ ଏହାକୁ ଜୁଲାଇ ୩୦ ଯାଏଁ ବଢାଇବାକୁ ବିଜେଡି ଦାବି କରିଛି । ସେପଟେ ଚାଷୀଙ୍କ ଧାନ ସରକାର ନ କିଣିଲେ ରାଜରାସ୍ତାକୁ ଓହ୍ଲାଇବାକୁ କଂଗ୍ରେସ ଚେତାବନୀ ଦେଇଛି । ଏହି ପ୍ରସଙ୍ଗରେ ବିଭାଗୀୟ ମନ୍ତ୍ରୀ କହିଛନ୍ତି, କାହାର ଟୋକନ ଲାପ୍ସ ହେବ ନାହିଁ, ସମସ୍ତଙ୍କ ଧାନ କିଣାଯିବ । ସେପଟେ ବ୍ରହ୍ମଗିରି, ପୁରୀ ସଦର ଓ କଣାସ ବ୍ଲକରେ ବିକ୍ଷୋଭ କରିଛନ୍ତି ଚାଷୀ ।
ପୁଣି ଧାନ କିଣାରେ ବିଭ୍ରାଟ । ଖରିଫ ଭଳି ରବିରେ ବି ଚାଲିଛି ରୀତିମତ କଟନୀ ଛଟନୀ । ଧାନ କିଣା ଅବ୍ୟବସ୍ଥା ଦୂର ନହେଲେ ଆନ୍ଦୋଳନ ହେବ ବୋଲି କଂଗ୍ରେସ ଚେତାବନୀ ଦେଇଛି । ଚାଷୀଙ୍କ ସମସ୍ତ ଧାନ କିଣିବା ସହ ଅବଧି ଜୁଲାଇ ୩୦ ତାରିଖ ଯାଏଁ ବଢାଇବାକୁ ବିଜେଡି ଦାବି ରଖିଛି । କିଷାନ କଂଗ୍ରେସ ମଧ୍ୟ ଧାନ କିଣା ଅବ୍ୟବସ୍ଥା ନେଇ ମୁଖ୍ୟମନ୍ତ୍ରୀ ଓ ଯୋଗାଣ ମନ୍ତ୍ରୀଙ୍କୁ ପତ୍ର ଲେଖିଛି । ମନ୍ତ୍ରୀ କହିଛନ୍ତି, ଗତବର୍ଷ ଅପେକ୍ଷା ଏ ବର୍ଷ ଅଧିକ ଧାନ କିଣିଛୁ । କାହାର ଟୋକନ ଲାପ୍ସ ହେବ ନାହିଁ । ସମସ୍ତଙ୍କ ଧାନ କିଣାଯିବ । ବର୍ଷା ଯୋଗୁଁ ଧାନ ଅମଳ ଓ ସଂରକ୍ଷଣରେ ଚାଷୀ ବ୍ୟସ୍ତ ଥିବା ବେଳେ ଧାନ କିଣା ନେଇ ଜୁନ୍ ୩୦ ଯାଏଁ ସରକାରଙ୍କ ଅବଧି ଅଡ଼ୁଆରେ ପକାଇଛି । ଏହି ପ୍ରସଙ୍ଗକୁ ଗମ୍ଭୀରତାର ସହ ନେଇଛନ୍ତି ବିରୋଧୀ କଂଗ୍ରେସ ଓ ବିଜେଡି । ଧାନକିଣା ଅବଧି ଜୁଲାଇ ୩୦ ଯାଏଁ ବୃଦ୍ଧି କରିବାକୁ ବିଜେଡି ସାମ୍ବାଦିକ ସମ୍ମଳିନୀ ଜରିଆରେ ଦାବି କରିଛି । ସବୁ ଚାଷୀଙ୍କ ଆଖି ସ୍କାନ କରି ଧାନ କିଣା ସୁନିଶ୍ଚିତ କରିବାକୁ ମନ୍ତ୍ରୀ ଦେଇଥିବା ପ୍ରତିଶ୍ରୁତି କାମରେ ଲଗାଇବାକୁ ବିଜେଡି ଦାବି କରିଛି ।
ଖରିଫ ଋତୁରେ ୭୪ ଲକ୍ଷ ମେଟ୍ରିକ ଟନ ଧାନ ସଂଗ୍ରହ ହୋଇଥିଲା । ରବି ଋତୁରେ ଏବେ ସୁଦ୍ଧା ୧୯ ଲକ୍ଷ ମେଟ୍ରିକ ଟନ ଧାନ ସଂଗ୍ରହ ହେଲାଣି । ଗତବର୍ଷ ଅପେକ୍ଷା ଏଥର ଅଧିକ ଧାନ ସରକାର କିଣିଛନ୍ତି ବୋଲି ମନ୍ତ୍ରୀ କହିଛନ୍ତି । ହେଲେ ମନ୍ତ୍ରୀଙ୍କ କହିବା ଅନୁସାରେ ଗ୍ରାଉଣ୍ଡ ଜିରୋରେ କାମ ହେଉନାହିଁ ବୋଲି ବିରୋଧୀ ଅଭିଯୋଗ କରିଛନ୍ତି । ଜିଲ୍ଲାସ୍ତରରେ ଅଧିକାରୀମାନେ ମନମାନୀ କରୁଛନ୍ତି । ଚାଷୀଙ୍କୁ କଟନୀ ଛଟନୀ ନାଁରେ ହଇରାଣ ହରକତ କରୁଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି । ଅବଧି ସମୟରେ ଯେଉଁମାନଙ୍କର ଆଖି ସ୍କାନ ହୋଇଥିବ, ସେମାନଙ୍କ ଧାନ ନିଶ୍ଚିତ କିଣାଯିବ ବୋଲି ମନ୍ତ୍ରୀ କହିଛନ୍ତି ।
ଧାନରେ କ୍ବିଣ୍ଟାଲ ପିଛା ୮ ଶହ ଟଙ୍କା ଇନପୁଟ ସବସିଡି ନେଇ ସରକାର ବାହାବା ନେବାକୁ ବସିଥିବା ବେଳେ ଗ୍ରାଉଣ୍ଡ ଜିରୋରେ ଚାଷୀଙ୍କ ଅବସ୍ଥା ସଙ୍ଗୀନ । ପ୍ରତି କ୍ବିଣ୍ଟାଲରେ ୧୫ରୁ ୨୦ କେଜି କଟନୀ ଛଟନୀ ହେଉଥିବା ବେଳେ ଏବେ ଚାଷୀଙ୍କ ଧାନର ସୁରକ୍ଷା ପାଇଁ ମଣ୍ଡିରେ କିଛି ବ୍ୟବସ୍ଥା ନାହିଁ । ତା’ ସାଙ୍ଗକୁ ଧାନ କିଣା ପାଇଁ ସୀମିତ ଅବଧି ଚାଷୀମାନଙ୍କୁ ଚିନ୍ତାରେ ପକାଇଛି ।
ଉତ୍ତର ଓଡ଼ିଶା ଉବୁଟୁବୁ: ସୁବର୍ଣ୍ଣରେଖା, ବୁଢାବଳଙ୍ଗ ଓ ଜଳକା ଅବବାହିକାରେ ବନ୍ୟା ପରିସ୍ଥିତି
ନନ୍ଦିଘୋଷ ବ୍ୟୁରୋ: ସପ୍ତାହେ ନପୂରୁଣୁ ପୁଣି ଉତ୍ତର ବାଲେଶ୍ୱରରେ ବନ୍ୟା ସ୍ଥିତି । ଝାଡ଼ଖଣ୍ଡ ଗାଲୁଡି ବ୍ୟାରେଜ ପାଣିରେ ଉତ୍ତର ଓଡ଼ିଶାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ସୁବର୍ଣ୍ଣରେଖା ଦ୍ୱିତୀୟ ବନ୍ୟାକୁ ନେଇ ଲୋକଙ୍କ ମଧ୍ୟରେ ଭୟର ବାତାବରଣ ଖେଳିଯାଇଛି । ସେପଟେ ଆଗାମୀ ତିନି ଦିନ ପାଇଁ ଉପରମୁଣ୍ଡରେ ପ୍ରବଳ ବର୍ଷା ଅନୁମାନ ବଢ଼ାଇ ଦେଇଛି ଅଧିକ ଚିନ୍ତା । ମୟୂରଭଞ୍ଜ ଜିଲ୍ଲାରେ ବି ଲଘୁଚାପ ଜନିତ ପ୍ରବଳ ବର୍ଷା ଜାରି ରହିଛି ।
ସୁବର୍ଣ୍ଣରେଖାର ବନ୍ୟାଜଳ ପାଇଁ ଜଳେଶ୍ଵର, ବସ୍ତା, ବାଲିଆପାଳ, ଭୋଗରାଇ, ରେମୁଣା, ସଦର ବ୍ଳକର ୪୬ଟି ପଞ୍ଚାୟତ ପ୍ରଭାବିତ ହୋଇଛି । ଗାଁ ରାସ୍ତାରେ ଚାଲୁଛି ଆଣ୍ଠୁଏ ଉଚ୍ଚର ପାଣି । ଚାଷ ବାସ କଥା କହିଲେ ନସରେ । ଚାରିଆଡେ ସୃଷ୍ଟି ହୋଇଛି ନଦୀର ଭ୍ରମ । ଗାଲୁଡି ବ୍ୟାରେଜର ଗେଟ ଖୋଲିବା ଫଳରେ ନଦୀରେ ବନ୍ୟା ପାଣି ଆସି ଉତ୍ତର ବାଲେଶ୍ବରକୁ ଜଳମଗ୍ନ କରିଛି । ଅପରାହ୍ନ ୪ଟା ସୁଦ୍ଧା ସୁବର୍ଣ୍ଣରେଖାର ଜଳସ୍ତର ରାଜଘାଟଠାରେ ୧୧.୫୩ ମିଟର ରହିଛି । ଯାହା ବିପଦ ସଂକେତ ୧୦.୩୬ ମିଟରରୁ ଢେର ଉପରେ । ଉପରେ ମୁଣ୍ଡରେ ଅଧିକ ବର୍ଷାରେ ଭୟାବହ ସ୍ଥିତି ଉପୁଜିବାର ଆଶଙ୍କା କରାଯାଇଛି । ସେପଟେ ବୁଢାବଳଙ୍ଗ ନଦୀର ବନ୍ୟା ଜଳ ସତର୍କ ସଂକେତ ତଳକୁ ଖସି ୭.୨୧ରୁ ନିମ୍ନରେ ୬.୬୦ରେ ରହିଛି । ଅନ୍ୟପଟେ ଜଳକା ନଦୀର ଜଳସ୍ତର ବିପଦ ସଂକେତ ୬.୫୦ ମିଟରରୁ ଉପରେ ୬.୭୦ ମିଟର ଥିଲେ ବି ବନ୍ୟା ପାଣି ଧୀରେ ଧୀରେ ହ୍ରାସ ପାଉଛି । ବନ୍ୟା ମୁକାବିଲା ପାଇଁ ଜିଲ୍ଲାରେ ୨୯୧୬ ଜଣ ଲୋକଙ୍କୁ ଆଶ୍ରୟସ୍ଥଳୀକୁ ସ୍ଥାନାନ୍ତରିତ କରାଯାଇଛି । ସବୁ ସ୍ଥାନରେ ଓଡ୍ରାଫର ୪ ଓ ଅଗ୍ନିଶମ ବିଭାଗର ୮ଟି ଟିମ ମୁତୟନ ହୋଇଛନ୍ତି । ବିଚ୍ଛିନ୍ନ ଅଞ୍ଚଳକୁ ଏସଆରସି ବୋଟ ମାଧ୍ୟମରେ ଲୋକଙ୍କୁ ଯିବା ଆସିବା ସୁବିଧା ଯୋଗାଇ ଦିଆଯାଉଛି । ଏଥିସହ ୨୪ ଘଣ୍ଟିଆ ଜରୁରୀକାଳୀନ ନମ୍ବର ଜାରି କରାଯିବା ସହିତ ବରିଷ୍ଠ ଅଧିକାରୀଙ୍କୁ ବିଭିନ୍ନ ବ୍ଲକ ଦାୟିତ୍ୱ ଦେଇଛନ୍ତି ଜିଲ୍ଲାପାଳ ।
ମୟୂରଭଞ୍ଜ ଜିଲ୍ଲାରେ ଲଘୁଚାପ ଜନିତ ପ୍ରବଳ ବର୍ଷା ଜାରି ରହିଛି । ମାଟି ଅତଡା ଖସି ଶିମିଳିପାଳ ଅଭୟାରଣ୍ୟ ଭିତରେ ଥିବା ଗୁଡୁଗୁଡିଆ ଓ କାଳିକାପ୍ରସାଦକୁ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ସେପଟେ ବର୍ଷାକୁ ଦୃଷ୍ଟିରେ ରଖି ଜିଲ୍ଲାର ସମସ୍ତ ବିଦ୍ୟାଳୟ ଗୋଟିଏ ଦିନ ପାଇଁ ଛୁଟି ଘୋଷଣା କରାଯାଇଛି । ଅଙ୍ଗନବାଡି କେନ୍ଦ୍ର ଗୁଡିକୁ ୩ ଦିନ ପାଇଁ ବନ୍ଦ ରଖିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।
ଭଦ୍ରକରେ ୩ ଦିନ ଧରି ଲଗାଣ ବର୍ଷାରେ ତଳମୁଣ୍ଡରେ ଉଛୁଳୁଛି ବୈତରଣୀ ଓ ସାଳନ୍ଦୀ ନଦୀ । ସାଳନ୍ଦୀ ନଦୀରେ ଭର୍ତ୍ତି ହୋଇ ରହିଥିବା ମଇଁଶିଆ ଦଳ ଉପର ମୁଣ୍ଡରୁ ଭାସି ଆସିବାରୁ ଆରଡି ତିନିତର ନଦୀଘାଟରେ ଯାତାୟତ ବନ୍ଦ ରହିଛି । ଫଳରେ ନଦୀର ଉଭୟ ପାର୍ଶ୍ବରେ ଶହଶହ ଯାତ୍ରୀ ଅଟକି ରହିଛନ୍ତି ।
ବିଏମସି ଅତିରିକ୍ତ କମିଶନରଙ୍କୁ ମାଡ ଘଟଣା: ବିଜେପି କର୍ପୋରେଟରଙ୍କ ସମେତ ତିନି ଗିରଫ
ନନ୍ଦିଘୋଷ ବ୍ୟୁରୋ: ବିଏମସି କାର୍ଯ୍ୟାଳୟରେ ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାରେ ୩ ଜଣଙ୍କୁ ଗିରଫ କଲା ପୋଲିସ । ବିଜେପି କର୍ପୋରେଟର ଜୀବନ ରାଉତ, ରଶ୍ମୀ ମହାପାତ୍ର ଏବଂ ଦେବାଶିଷ ପ୍ରଧାନଙ୍କୁ ବାନ୍ଧିଲା ପୋଲିସ । ସମସ୍ତ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ।
ଜୀବନ ରାଉତ ୨୯ ନମ୍ବର ଓ୍ବାର୍ଡର ବିଜେପି କର୍ପୋରେଟର । ଗିରଫ ଅଭିଯୁକ୍ତ ବିଜେପି କର୍ମୀ ଓ ନେତା । ତେବେ ଜଗନ୍ନାଥ ପ୍ରଧାନ ଗିରଫ ନହେବାକୁ ନେଇ ପ୍ରଶ୍ନ ଉଠିବାରେ ଲାଗିଛି । କାରଣ ଜଗନ୍ନାଥ ପ୍ରଧାନଙ୍କ ନାଁରେ ହୋଇଛି ଅଭିଯୋଗ । ଆକ୍ରମଣକାରୀ ନେଇଥିଲେ ଜଗନ୍ନାଥ ପ୍ରଧାନଙ୍କ ନାଁ । ଏହି ଘଟଣା ପରେ ପଦାରେ ପଡ଼ିଛି ବିଜେପିର ଦାଦାଗିରି ।
ସେପଟେ ଅଭିଯୁକ୍ତଙ୍କ ଗିରଫ ଦାବିରେ ରାଜରାସ୍ତାକୁ ଓହ୍ଲାଇଥିବା ବିଜେଡି ନେତାଙ୍କୁ ଗିରଫ କରିଛି ପୋଲିସ । ଅନ୍ୟପଟେ ସମସ୍ତ ଅଭିଯୁକ୍ତଙ୍କୁ ଗିରଫ କରା ନଯିବା ପର୍ଯ୍ୟନ୍ତ ବିଏମସି ସେବା ଦେବନି ବୋଲି ଚେତାବନୀ ଦେଇଛନ୍ତି ବିଏମସି ମେୟର । ଅପରପକ୍ଷରେ ସମସ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବାକୁ ଓଏଏସ ସଂଘ ଦାବି କରିଛି । ଘଟଣା ପଛରେ ଥିବା ମୁଖ୍ୟ ଷଡ଼ଯନ୍ତ୍ରକାରୀଙ୍କୁ ତୁରନ୍ତ ଗିରଫ କରିବାକୁ ଦାବି ହୋଇଛି । ଏଭଳି ଆକ୍ରମଣକୁ ବର୍ବରୋଚିତ କହିଛି ଓଏଏସ ସଂଘ । ନ୍ୟାୟ ନମିଳିଲେ କଲମ ଛାଡ଼ ଆନ୍ଦୋଳନ କରିବାକୁ ସଂଘ ଚେତାବନୀ ଦେଇଛି ।
ଅଭିଯୋଗ ଶୁଣାଣି ବେଳେ ଆଜି ଅତିରିକ୍ତ କମିଶନର ରତ୍ନାକର ସାହୁଙ୍କୁ ଆକ୍ରମଣ କରିଛନ୍ତି କିଛି ଦୁର୍ବୃତ୍ତ । ଆକ୍ରମଣ ବେଳର ଭିଡିଓ ଲାଗିଛି ନନ୍ଦିଘୋଷ ଟିଭି ହାତରେ । ଯେଉଁ ଭିଡିଓରେ ଅତିରିକ୍ତ କମିଶନରଙ୍କୁ ଦୁର୍ବୃତ୍ତମାନେ ଘୋଷାଡି ଘୋଷାଡ଼ି ନେବା ସହ ଗୋଇଠା ମାରୁଥିବା ଦେଖିବାକୁ ମିଳିଛି । ସରକାରୀ ଅଧିକାରୀଙ୍କ ମାଡ଼ ମାରିବା ଘଟଣାକୁ ସହଜରେ ଗ୍ରହଣ କରିପାରୁନାହାନ୍ତି ସରକାରୀ କର୍ମଚାରୀ । ତୁରନ୍ତ ଅଭିଯୁକ୍ତଙ୍କ ଗିରଫ ଦାବିରେ ରାଜରାସ୍ତାକୁ ଓହ୍ଲାଇଛନ୍ତି କର୍ପୋରେଟର ଓ କର୍ମଚାରୀ । ଏହାସହ ଓଏଏସ ସଂଘ ମଧ୍ୟ ଆକ୍ରମଣ ଘଟଣାକୁ କଡ଼ା ନିନ୍ଦା କରିଛି । ଏନେଇ ଥାନାରେ ଏତଲା ଦିଆଯାଇଛି ।
ଆହତ ଅତିରିକ୍ତ କମିଶନର ଏଫଆଇଆରରେ ସାଂଘାତିକ ଅଭିଯୋଗ ଆଣିଛନ୍ତି । ତାଙ୍କ କହିବା ଅନୁସାରେ, ଜଗନ୍ନାଥ ପ୍ରଧାନଙ୍କ ନାଁରେ କିଛି ଦୁର୍ବୃତ୍ତ ତାଙ୍କୁ ଆକ୍ରମଣ କରିଥିଲେ । ଜଗନ୍ନାଥ ପ୍ରଧାନଙ୍କୁ କ୍ଷମା ମାଗିବା ପାଇଁ କହିଥିଲେ ଆକ୍ରମଣକାରୀ । ଏହାସହ ମୋବାଇଲ ଛଡ଼ାଇ ନେଇଥିଲେ । ମୋବାଇଲ ଛଡ଼ାଇ ନେବା ପରେ ହ୍ବାଟ୍ସଆପ ଷ୍ଟାଟସରେ ଦେଇଥିଲେ ଆପତ୍ତିଜନକ ଛବି । ପୋଲିସ ନିକଟରେ ଏହାର ସ୍କ୍ରିନସଟ୍ ଦାଖଲ ହୋଇଛି ।
ଅନ୍ୟପଟେ ଶୀଘ୍ର କାର୍ଯ୍ୟନୁଷ୍ଠାନ ନେବାକୁ ଦାବି କରିଛନ୍ତି ବିଏମସି କମିଶନର । ଆଗରୁ କେବେ ଏମିତି ହୋଇ ନଥିଲା, ଏହା ପ୍ରଥମ । ଦୁର୍ବୃତ୍ତମାନେ ରତ୍ନାକର ସାହୁଙ୍କୁ ଜୋରଦାର ଆକ୍ରମଣ କରିଛନ୍ତି । ସୂଚନାଯୋଗ୍ୟ, ଜୀବନ ରାଉତ ପୂର୍ବରୁ ମଧ୍ୟ ବନ୍ଧା ହୋଇଥିଲେ । ପୋଲିସକୁ ଦୁର୍ବ୍ୟବହାର ଅଭିଯୋଗରେ ବନ୍ଧା ହୋଇଥିଲେ ବିଜେପି କର୍ପୋରେଟର ଜୀବନ ରାଉତ ।
ବିଏମସି ଅତିରିକ୍ତ କମିଶନରଙ୍କୁ ମାଡ଼: ଜନ ଶୁଣାଣି ଚାଲିଥିବା ବେଳେ ଅଫିସରେ ପଶି ଘୋଷାଡ଼ିବା ସହ ପିଟିଲେ ୫ ଦୁର୍ବୃତ୍ତ
ନନ୍ଦିଘୋଷ ବ୍ୟୁରୋ: ବିଏମସି କାର୍ଯ୍ୟାଳୟରେ ଗୁଣ୍ଡାଗିରି । ଅଫିସ ଭିତରେ ପଶି ଅତିରିକ୍ତ କମିଶନରଙ୍କୁ ଆକ୍ରମଣ । ସୋମବାର ଅଭିଯୋଗ ଶୁଣାଣି ଚାଲିଥିବାବେଳେ ୫ ଜଣ ଦୁର୍ବୃତ୍ତ ଜୋର ଜବରଦସ୍ତ ଧଶେଇ ପଶି ଅଧିକାରୀଙ୍କୁ ମାଡ଼ ମାରି ଲହୁଲୁହାଣ କରିଛନ୍ତି । ଯାହାକୁ ନେଇ ସାରା ରାଜ୍ୟର ଚର୍ଚ୍ଚା । ମେୟରଙ୍କ ଅଭିଯୋଗ, ରାଜ୍ୟରେ ଭୁଶୁଡ଼ିଗଲାଣି ଆଇନଶୃଙ୍ଖଳା । ମାଡ଼ ମାରିଥିବା ଯୁବକଙ୍କ ଗିରଫ ଦାବିରେ ଧାରଣା ଦେଲେ ବିଏମସି କର୍ମଚାରୀ ।
ମାଡ଼ ଓ ଦୁର୍ବ୍ୟବହାରର ଶିକାର ହୋଇଛନ୍ତି ଭୁବନେଶ୍ବର ମହାନଗର ନିଗମର ଅତିରିକ୍ତ କମିଶନର ରତ୍ନାକର ସାହୁ । ବିଏମସି କାର୍ଯ୍ୟାଳୟରେ ଅଭିଯୋଗ ଶୁଣାଣି ଚାଲିଥିବାବେଳେ ଏପରି ଆକ୍ରମଣର ଶିକାର ହେଲେ ଅତିରିକ୍ତ କମିଶନର । ଯାହାକୁ କର୍ମଚାରୀ ମହଲରେ ଭୟର ବାତାବରଣ । ଏପରି କାଣ୍ଡକୁ ବିରୋଧ କରିବା ସହ ଅଭିଯୁକ୍ତଙ୍କ ଗିରଫଦାରି ଦାବିରେ ଧାରଣା ଦେଲେ ସମସ୍ତ କର୍ମଚାରୀ । ଏପରି କାଣ୍ଡ ଜନୈକ ବିଜେପି ନେତାଙ୍କ ଲୋକ କରିଥିବା ଅଭିଯୋଗ ହୋଇଛି ।
କମିଶନରଙ୍କ ଅନୁପସ୍ଥିତିରେ ଅତିରିକ୍ତ କମିଶନର ରତ୍ନାକର ସାହୁ ଲୋକଙ୍କ ଅଭିଯୋଗ ଶୁଣୁଥିଲେ । ୫ ଜଣ ଯୁବକ ଚାମ୍ବରକୁ ଧଶେଇ ପଶି ବିଜେପି ନେତାଙ୍କୁ କ’ଣ କହିଲେ ବୋଲି ପ୍ରଶ୍ନ କରିଥିଲେ । ଗୋଟିଏ ୱାର୍ଡର ସ୍ବଚ୍ଛ ସାଥୀ ଓ ସୁପରଭାଇଜରଙ୍କ ଅଭିଯୋଗକୁ ନେଇ ତଦନ୍ତ କରୁଥିଲେ ଅତିରିକ୍ତ କମିଶନର । ବିଜେପି ନେତାଙ୍କୁ କାହିଁକି ଦୁର୍ବ୍ୟହାର କଲ ବୋଲି କହି ମାଡ଼ ମାରିବା ସହିତ ଜବରଦସ୍ତ ଟେକି ନେଇଥିଲେ ।
କାର୍ଯ୍ୟାଳୟରେ ପଶି ଏପରି ଅଧିକାରୀଙ୍କୁ ମାଡ଼ ମାରିବା ଘଟଣାକୁ ତୀବ୍ର ନିନ୍ଦା କରିଛନ୍ତି ବିଏମସି ମେୟର ସୁଲଷାଚନା ଦାସ । ସେ କହିଛନ୍ତି, ସିସିଟିଭି କ୍ୟାମେରା ଥାଇ ଦୁର୍ବୃତ୍ତ ଏପରି ସାହସ କରିପାରିଲେ । ବିଏମସି କାର୍ଯ୍ୟାଳୟର କୌଣସି କର୍ମଚାରୀ ସୁରକ୍ଷିତ ନୁହଁନ୍ତି । ଏ ନେଇ ଥାନାରେ ଅଭିଯୋଗ କରାଯାଇଛି । ସିସିଟିଭି ଫୁଟେଜରେ ଆକ୍ରମଣକାରୀଙ୍କ ଦୃଶ୍ୟ ରେକର୍ଡ ହୋଇଛି । ଲୋକଙ୍କ ସେବା ପାଇଁ ବିଏମସିର ଅଧିକାରୀଠାରୁ ଆରମ୍ଭ କରି ଜନ ପ୍ରତିନିଧି ଓ ଝାଡୁଦାର ପର୍ଯ୍ୟନ୍ତ କାମ କରୁଛନ୍ତି । ଯଦି ସେବା ଯୋଗାଉଥିବା ଅଫିସରେ କର୍ମଚାରୀ ସୁରକ୍ଷିତ ନୁହଁନ୍ତି ତା’ହେଲେ ରାଜ୍ୟରେ ଆଇନଶୃଙ୍ଖଳା ସ୍ଥିତି କେଉଁ ସ୍ତରକୁ ଗଲାଣି ସେ ନେଇ ପ୍ରଶ୍ନ ଉଠାଇଛନ୍ତି ମେୟର । ସେପଟେ ଏହି ଘଟଣାକୁ ନେଇ କଡ଼ା ସମାଲୋଚନା କରିଛନ୍ତି କଂଗ୍ରେସ ଓ ବିଜେଡି ।
ଅଭିଯୋଗ ପରେ ଖାରବେଳନଗର ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି । ପ୍ରଶ୍ନ ଉଠୁଛି, କାର୍ଯ୍ୟରତ ଅଧିକାରୀଙ୍କୁ ଅଫିସ ଭିତରେ ମାଡ଼ ମାରିବାକୁ ସାହସ କଲେ କିପରି ଦୁର୍ବୃତ୍ତ ? କାହା ପ୍ରରୋଚନାରେ ଘଟିଲା ଏପରି କାଣ୍ଡ ? ଯାହାକୁ ନେଇ ସବୁ ମହଲରେ ଚର୍ଚ୍ଚା ।