ନନ୍ଦିଘୋଷ ବ୍ୟୁରୋ : ବନ୍ଧୁଙ୍କ ବିରୋଧରେ ଅଭିଯୋଗ ଆଣିଲେ ବନ୍ଧୁ । ମଧ୍ୟପ୍ରଦେଶର ନର୍ମଦାପୁରମରେ ଜଣେ ଯୁବକ ତାଙ୍କ ଭଲ ବନ୍ଧୁଙ୍କ ଲିଙ୍ଗ ପରିବର୍ତ୍ତନ କରି ତାଙ୍କୁ ଯୌନ ଶୋଷଣ କରିଥିବା ଅଭିଯୋଗ ହୋଇଛି। ପୀଡିତା ତାଙ୍କ ବନ୍ଧୁଙ୍କ ବିରୋଧରେ ମାମଲା ରୁଜୁ କରିଛନ୍ତି। ପୀଡିତା ଭୋପାଳର ଏକ ପୋଲିସ ଷ୍ଟେସନରେ ଅଭିଯୁକ୍ତ ଶୁଭମ ଯାଦବଙ୍କ ବିରୋଧରେ ଅଭିଯୋଗ କରିଛନ୍ତି। ଶୁଭମ ନର୍ମଦାପୁରମର ଗ୍ୱାଲଟୋଲିର ବାସିନ୍ଦା। ଅଭିଯୋଗ ଅନୁଯାୟୀ, ଅଭିଯୁକ୍ତ ତନ୍ତ୍ରବିଦ୍ୟା ବ୍ୟବହାର କରି ପୀଡିତାଙ୍କ ଲିଙ୍ଗ ପରିବର୍ତ୍ତନ କରିଥିଲେ। ତା’ପରେ ସେ ତାଙ୍କୁ ଝିଅ ଭାବରେ ରହିବାକୁ ବାଧ୍ୟ କରିଥିଲେ। ପୀଡିତା କହିଛନ୍ତି ଯେ ଅଭିଯୁକ୍ତ ପ୍ରଥମେ ତାଙ୍କୁ ନିଶା ଦେଇଥିଲେ, ତା’ପରେ ୧୮ ଦିନ ପର୍ଯ୍ୟନ୍ତ ଛୁରୀ ଦେଖାଇ ବନ୍ଧକ ରଖି ତାଙ୍କ ସହିତ ଖରାପ ବ୍ୟବହାର କରିଥିଲେ।
ଅଭିଯୁକ୍ତ ଶୁଭମ ପୀଡିତାଙ୍କୁ ଧମକ ମଧ୍ୟ ଦେଉଥିଲା । ଯଦି ସେ କାହାକୁ କହେ, ତେବେ ତାକୁ ବଦନାମ କରିଦେବ । ଏମିତିକି ପୀଡିତାଙ୍କ ନାମ ବଦଳାଇ ଟ୍ବିଙ୍କଲ ରଖିଥିଲା । ସେହି ନାମରେ ମଧ୍ୟ ପରିଚୟ ପତ୍ର ତିଆରି କରିଥିଲା । ଫଳରେ ସବୁଦିନ ପାଇଁ ଯେପରି ପ୍ରମାଣ ଲିଭିଯିବ ।
ଅନ୍ୟପଟେ ପୀଡିତା ଏହା ମଧ୍ୟ କହିଛନ୍ତି, ଶୁଭମ ତାଙ୍କୁ ଇନ୍ଦୋର ନେଇଯାଇଥିଲେ, ଯେଉଁଠାରେ ତାଙ୍କୁ ବଳପୂର୍ବକ ଲିଙ୍ଗ ପରିବର୍ତ୍ତନ ଅସ୍ତ୍ରୋପଚାର କରାଯାଇଥିଲା। ଘଟଣା ପରେ ପୀଡିତା ଘରୁ ବାହାରକୁ ଯାଇପାରି ନଥିଲେ। ଅଭିଯୁକ୍ତ ଶୁଭମ ପୀଡିତାଙ୍କୁ କହିଥିଲେ ଯେ ସେ ଏକ ଦୁର୍ଘଟଣାର ସମ୍ମୁଖୀନ ହୋଇଛନ୍ତି ବୋଲି ସମସ୍ତଙ୍କୁ କହିବାକୁ। ପୀଡିତା କହିଛନ୍ତି ଯେ ତାଙ୍କ ପରିବାରର କାହାକୁ ଏ ବିଷୟରେ କୌଣସି ସୂଚନା ନଥିଲା।
ଘଟଣା ପରେ ପୀଡିତା ଜଣକ ଘରେ ୬ ମାସ ପର୍ଯ୍ୟନ୍ତ ରହିଥିଲେ। ଭୟ ଏତେ ଥିଲା ଯେ ସେ ଘରୁ ବାହାରକୁ ଯିବା କମ କରିଦେଇଥିଲେ। କାରଣ ଅଭିଯୁକ୍ତ ତାଙ୍କୁ ସମାଜରେ ରହିବାକୁ ଦେବେ ନାହିଁ ଓ ତାଙ୍କୁ ବଦନାମ କରିବେ ବୋଲି ଧମକ ଦେଇ ଆସୁଥିଲେ। ଏହି ସମ୍ପୂର୍ଣ୍ଣ ମାମଲାର ଅଭିଯୋଗ ପରେ, ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
