ନନ୍ଦିଘୋଷ ବ୍ୟୁରୋ : ପୁରୀ ଶ୍ରୀଗୁଣ୍ଡିଚା ମନ୍ଦିର ନିକଟରେ ଦଳାଚକଟାରେ ୩ ଶ୍ରଦ୍ଧାଳୁଙ୍କ ମୃତ୍ୟୁ ଘଟଣା। ଆଜିଠୁ ଦୁଇ ଦିନ ସାକ୍ଷ୍ୟ ଓ ତଥ୍ୟ ଗ୍ରହଣ କରିବେ ଉନ୍ନୟନ କମିଶନର। ଆଜି ଭୁବନେଶ୍ୱରରେ ଓ ଜୁଲାଇ ୧୦ ତାରିଖ ପୁରୀରେ ଉନ୍ନୟନ କମିଶନରଙ୍କୁ ସାକ୍ଷାତ ବ୍ୟବସ୍ଥା କରାଯାଇଛି । କେଉଁ ପରିସ୍ଥିତିରେ ଏହି ଘଟଣା ଘଟିଲା। ସେ ସମ୍ପର୍କରେ କୌଣସି ବ୍ୟକ୍ତି କିମ୍ବା ସଂସ୍ଥା ଘଟଣାକୁ ନେଇ କୌଣସି ସୂଚନା କିମ୍ବା ଭିଡିଓ ତଥ୍ୟ ଥିଲେ, ଏହାକୁ ଆସନ୍ତା ୨୦ ତାରିଖ ସୁଦ୍ଧା ଇମେଲେ ଯୋଗେ ପଠାଇ ପାରିବେ। ଏଥିଲାଗି ଇମେଲ୍ ଜାରି କରାଯାଇଛି। [email protected] ଇ-ମେଲ ଯୋଗେ ପଠାଇବାକୁ ଅନୁରୋଧ କରାଯାଇଛି। ଆଗ୍ରହୀ ବ୍ୟକ୍ତିମାନେ ରାଜ୍ୟ ଅତିଥି ଭବନ ଏବଂ ଜୁଲାଇ ୧୦ ତାରିଖ ଅପରାହ୍ଣ ୩ଟା ପରେ ପୁରୀ ସ୍ପେଶାଲ ସର୍କିଟ ହାଉସ ଠାରେ ଉନ୍ନୟନ ଆୟୁକ୍ତ ତଥା ଅତିରିକ୍ତ ମୁଖ୍ୟ ଶାସନ ସଚିବଙ୍କୁ ସାକ୍ଷାତ କରି ଏ ସଂପର୍କରେ ତଥ୍ୟ ରଖିପାରିବେ। ସେହିପରି ଏ ସଂପର୍କିତ ଅଧିକ ସୂଚନା ପାଇଁ ଟେଲିଫୋନ ନମ୍ବର ଜାରି କରାଯାଇଛି। ଟେଲିଫୋନ ନମ୍ବର ହେଉଛି ୦୬୭୪-୨୫୩୬୮୮୨ ଏବଂ ୨୩୯୧୯୭୦। ଏଥିଲାଗି ଯୋଜନା ଓ ସଂଯୋଜନ କାର୍ଯ୍ୟାଳୟରେ ଯୋଗାଯୋଗ କରି ପାରିବେ ବୋଲି ମଧ୍ୟ ସୂଚନା ଦିଆଯାଇଛି
ଆଜି ସର୍ବଭାରତୀୟ ସ୍ତରରେ ଶ୍ରମିକ ସଂଗଠନର ବନ୍ଦ ଡାକରା , ଦେଶବ୍ୟାପୀ ଅଖ ଚକ ବନ୍ଦ
ନନ୍ଦିଘୋଷ ବ୍ୟୁରୋ : କେନ୍ଦ୍ର ସରକାରଙ୍କ ଜନ ବିରୋଧୀ ଓ ଶ୍ରମିକ ବିରୋଧୀ ନିତି ବିରୁଦ୍ଧରେ ଦେଶବ୍ୟାପୀ ଆନ୍ଦୋଳନକୁ ଓହ୍ଲାଇଛନ୍ତି ୧୦ଟି କେନ୍ଦ୍ରୀୟ ଶ୍ରମିକ ସଂଗଠନ। ୧୭ ଦଫା ଦାବିରେ ୧୦ଟି ବିଭିନ୍ନ କେନ୍ଦ୍ରୀୟ ଶ୍ରମିକ ସଙ୍ଗଠନ ପକ୍ଷରୁ ବିକ୍ଷୋଭ କରାଯାଉଛି। ବିଭିନ୍ନ ସ୍ଥାନରେ ଏହାର ପ୍ରଭାବ ଦେଖିବାକୁ ମିଳିଛି। ଭୁବନେଶ୍ୱର ରେଳ ଷ୍ଟେସନରେ ପ୍ରତିବାଦ କରାଯିବା ସହ ରେଳ ରୋକ ହୋଇଛି। ସେହିପରି ଭୁବନେଶ୍ୱର ସରକାରୀ ବସଷ୍ଟାଣ୍ଡରେ ବିକ୍ଷୋଭ ହୋଇଛି। ଶ୍ରମିକ ବିରୋଧୀ ୪ଟି ଶ୍ରମ କୋର୍ଡ ବାତିଲ କରିବା, ରାଷ୍ଟ୍ରାୟତ ଉଦ୍ୟୋଗର ଘରୋଇ କରଣ ବନ୍ଦ କରିବାକୁ ଦାବି ହୋଇଛି। ESI, EPF ଓ ଗ୍ରାଚ୍ୟୁଇଟିରୁ ସିଲିଂ ହଟାଇବା, ଦରଦାମ ନିୟନ୍ତ୍ରଣ, ସର୍ବନିମ୍ନ ମଜୁରୀ ମାସିକ ୨୬ ହଜାର ଟଙ୍କା କରିବା, ଅଙ୍ଗନବାଡ଼ି କର୍ମୀଙ୍କୁ ଶ୍ରମିକ ମାନ୍ୟତା ଦେବାକୁ ଦାବି ହୋଇଛି। ଆନ୍ଦୋଳନକୁ ୧୦ଟି କେନ୍ଦ୍ରୀୟ ଶ୍ରମିକ ସଂଗଠନ ସହିତ ବିଭିନ୍ନ ରାଜନୈତିକ ଦଳ ସମର୍ପଥନ କରିଛନ୍ତି।
ସାରା ଓଡ଼ିଶାରେ ପୁଣି ନବୀନ କ୍ରେଜ୍
ନନ୍ଦିଘୋଷ ବ୍ୟୁରୋ: ରାଜ୍ୟରେ ପୁଣି ନବୀନ ଲହର। ହସ୍ପିଟାଲରୁ ଡିସଚାର୍ଜ ହେବା ପରେ ଓଡ଼ିଶାରେ ପୁଣି ଖେଳିଯାଇଛି ନବୀନ କ୍ରେଜ୍। ପୁଣିଥରେ ନବୀନ ପଟନାୟକ ଓଡ଼ିଶାର ନେତୃତ୍ୱ ନିଅନ୍ତୁ ବୋଲି ଜୋରସୋରରେ ଉଠିଲାଣି ସ୍ଵର। ନବୀନ ସୁସ୍ଥ ହେବା ପରେ ନେତା ଓ ଜନତା ମଧ୍ୟରେ ଉତ୍ସାହ ଓ ଉତ୍କଣ୍ଠା ଭରିଯାଇଛି।
ହସ୍ପିଟାଲ ଛାଡିଲେ ନବୀନ। ଓଡ଼ିଶା ଫେରିବାକୁ ନେଇ ବଢୁଛି ଉତ୍କଣ୍ଠା। ନେତା ଓ ଜନତାଙ୍କ ମନରେ ଖୁସିର ଲହରୀ। ନେତୃତ୍ଵ ନେବାକୁ ଉଠିଲାଣି ସ୍ଵର। ନବୀନ ପଟ୍ଟନାୟକ, ଓଡିଶା ଲୋକଙ୍କ ଇମୋସନ। ଓଡିଶାବାସୀଙ୍କ ସୁଖ ଦୁଃଖର ସାଥୀ।ଓଡିଶାବାସୀ ମଧ୍ୟ ନବୀନଙ୍କ ସହ ସବୁବେଳେ ରହିଛନ୍ତି। ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ହସ୍ପିଟାଲରୁ ଡିସଚାର୍ଜ ପରେ ଓଡିଶାବାସୀଙ୍କ ମନରେ ଖେଳିଯାଇଛି ଉତ୍ସାହ।
୨୪ ବର୍ଷ ଶାସନରେ ନବୀନଙ୍କ ଓଡିଶା ପ୍ରତି ଅବଦାନକୁ ଝୁରୁଛନ୍ତି ଲୋକେ। କହୁଛନ୍ତି, ନବୀନଙ୍କ ନେତୃତ୍ଵ ଥିଲେ ଆଜି ଓଡ଼ିଶାର ଅବସ୍ଥା ଏଭଳି ହୁଅନ୍ତାନି। ନବୀନଙ୍କ ପ୍ରତି ଲୋକଙ୍କ ଭଲ ପାଇବା ଅତୁଟ ରହିଛି କହିଛନ୍ତି ଦଳର ବରିଷ୍ଠ ନେତା। ଓଡିଶାବାସୀଙ୍କ ଗୋଟିଏ ଇଚ୍ଛା, ନବୀନ ବାବୁ ଯେମିତି ଓଡ଼ିଶାର ନେତୃତ୍ଵ ନେଉଥିଲେ ସେମିତି ନିଅନ୍ତୁ। ଓଡ଼ିଶାର ସମସ୍ୟା ଆଉ ରହିବନି। ନବୀନ ସମ୍ପୂର୍ଣ ସୁସ୍ଥ ହୋଇଥିବାରୁ ଲୋକେ ଓ ବିଜେଡି ନେତାମାନେ ଉତ୍ସାହିତ।ଡିସଚାର୍ଜ ଖବର ଶୁଣି ଓଡିଶାବାସୀଙ୍କ ମନରେ ବଢିଛି ଉତ୍ସାହ। ନବୀନଙ୍କ ପ୍ରତି ଓଡିଶାବାସୀଙ୍କ ଯେଉଁ ଶ୍ରଦ୍ଧା ତାହା କଳ୍ପନା କରିହେବ ନାହିଁ। ସାରା ଦେଶରେ ନବୀନ ପଟନାୟକ ସବୁଠାରୁ ଲୋକପ୍ରିୟ ନେତାଭାବେ ପରିଗଣିତ। ପୁଣି ବିଜେଡି ଓଡ଼ିଶାରେ ଶକ୍ତିଶାଳି ଦଳ ଭାବେ ଛିଡା ହେବ। ଲୋକମାନେ ସ୍ୱତଃପ୍ରବୃତ ଭାବେ ତାଙ୍କ ନେତାଙ୍କୁ ଦେଖିବା ପାଇଁ ଭିଡ ଜମାଇବେ ।
ନବୀନଙ୍କ ନେତୃତ୍ବରେ ୨୪ ବର୍ଷ ଧରି ଓଡିଶାର ବିକାଶ ବିଭିନ୍ନ କ୍ଷେତ୍ରରେ ଶୀର୍ଷରେ ରହିଥିଲା। ପ୍ରାକୃତିକ ବିପର୍ଯ୍ୟୟ ମୁକାବିଲା ଠାରୁ ଆରମ୍ଭ କରି ଶିକ୍ଷା, ଦେଶରେ ରୋଲ୍ ମଡେଲ ସାଜିଥିଲା ଓଡ଼ିଶା। ବିଜୁ ସ୍ଵାସ୍ଥ୍ୟ କାର୍ଡ ଠାରୁ ଆରମ୍ଭ କରି ଶିଳ୍ପାୟନ ଯାଏ ନବୀନଙ୍କ ଅବଦାନକୁ ଝୁରୁଛନ୍ତି ଓଡ଼ିଶାବାସୀ।ଖାସ୍ ସେଥିପାଇଁ ନବୀନଙ୍କ ସୁସ୍ଥ ହେବା ଖବର ଓଡିଶାବାସୀଙ୍କ ମନରେ ଖୁସିର ଲହରୀ ଖେଳିଯାଇଛି…
ମୁଖ୍ୟମନ୍ତ୍ରୀ ହେଉକି ବିରୋଧୀ ଦଳ ନେତା ସବୁବେଳେ ଓଡିଶାବାସୀଙ୍କ ଚିନ୍ତା କରନ୍ତି ନବୀନ। ଓଡିଶାବାସୀ କିପରି ଖୁସିରେ ରହିବେ, ଓଡ଼ିଶା ବିକାଶ ଦିଗରେ କିପରି ଆଗେଇବ ସେ ଚିନ୍ତା କରିଥାନ୍ତି। ଯେଉଁଥିପାଇଁ ଓଡିଶାବାସୀଙ୍କ ହୁଦୟରେ ସ୍ଵତନ୍ତ୍ର ସ୍ଥାନ ଅଧିକାର କରିଛନ୍ତି ନବୀନ।
ଅଘଟଣ ପରେ ଭାଙ୍ଗିଲା ନିଦ: ସରକାରଙ୍କ ଫୋକସରେ ଶୃଙ୍ଖଳିତ ଦିଅଁ ଦର୍ଶନ
ନନ୍ଦିଘୋଷ ବ୍ୟୁରୋ: ରଥଯାତ୍ରାରେ ଅଘଟଣ ଓ ବିଶୃଙ୍ଖଳା ପରେ ସରକାରଙ୍କ ଚେତା ପଶିଛି । ପୁରୀକୁ ଯାଉଥିବା ଶ୍ରଦ୍ଧାଳୁମାନେ କିପରି ସୁରୁଖୁରୁରେ ଦର୍ଶନ କରି ଫେରିବେ ତାହାକୁ ନେଇ ସରକାର ବଡ ଯୋଜନା କରୁଥିବା ଆଇନ ମନ୍ତ୍ରୀ କହିଛନ୍ତି। ଆଇନ ମନ୍ତ୍ରୀଙ୍କ ଘୋଷଣା ପରେ ବିଜେଡି କହିଛି ସରକାର ବାହାସ୍ଫୋଟ ଛାଡ଼ି ପୁରୀର ବିକାଶ କରନ୍ତୁ । ପୁରୀର ବିକାଶ କାମ ସରକାର ବନ୍ଦ କରିଥିବାରୁ ଅଘଟଣ ଘଟିଲା। କଂଗ୍ରେସ ମଧ୍ୟ ସରକାରଙ୍କୁ ଟାର୍ଗେଟ କରି ଚଳିତ ରଥଯାତ୍ରା ପରିଚାଳନା ପାଇଁ ଦାୟୀ କରିଛି ।
ଅଘଟଣ ପରେ ପଶିଲା ଚେତା । ସରକାରଙ୍କ ଫୋକସରେ ଶୃଙ୍ଖଳିତ ଦିଅଁ ଦର୍ଶନ । ବିଜେଡି କହିଲା, ବାହାସ୍ଫୋଟ ଛାଡି କର ବିକାଶ । କଂଗ୍ରେସର କଟାକ୍ଷ, ଚୋରଗଲା ପରେ ପଶିଲା ବୁଦ୍ଧି ।.. ..ଚଳିତ ବର୍ଷ ରଥଯାତ୍ରାରେ ଅଘଟଣ ଓ ମହାବିଭ୍ରାଟ ପାଇଁ ରାଜ୍ୟ ସରକାର ସମାଲୋଚନାର ଶିକାର ହୋଇଛନ୍ତି । ଶରଧାବାଲି ଦଳାଚକଟାରେ ୩ଜଣଙ୍କ ମୃତ୍ୟୁ ହେବା ସହ ବହୁ ଲୋକ ଆହତ ହେଲେ । ରଥଯାତ୍ରାର ପରିଚାଳନା ଫେଲ ମାରିବାରୁ ନନ୍ଦିଘୋଷ ରଥ ସିଂହଦ୍ଵାରରୁ ଇଞ୍ଚେ ବି ଘୁଞ୍ଚିଲାନି । ଯାହାକୁ ନେଇ ଜଗନ୍ନାଥପ୍ରେମୀଙ୍କ ମନରେ ଦାରୁଣ ଆଘାତ ଲାଗିଲା । ସରକାରଙ୍କୁ ଟାର୍ଗେଟ କଲେ ବିରୋଧୀ। ଏହାପରେ ସରକାରଙ୍କ ନିଦ ଭାଙ୍ଗିଛି ।
ଆସନ୍ତା ବର୍ଷ ଠାରୁ କିଭଳି ଶ୍ରଦ୍ଧାଳୁମାନେ ଶୃଙ୍ଖଳିତ ଦର୍ଶନ କରିପାରିବେ ? ଏପରିକି ୨୫ ଲକ୍ଷ ଶ୍ରଦ୍ଧାଳୁଙ୍କୁ କିପରି ମ୍ଯାନେଜ କରାଯାଇପାରିବ ସେନେଇ ପ୍ଲାନ ପ୍ରସ୍ତୁତ କରୁଛନ୍ତି ସରକାର । ଆଇନ ମନ୍ତ୍ରୀ କହିଛନ୍ତି ଚଳିତ ବର୍ଷ ୧୫ ଲକ୍ଷ ଭକ୍ତଙ୍କ ସମାଗମ ହୋଇଥିଲl । ଆଗକୁ ୨୫ ଲକ୍ଷ ଭକ୍ତ ପୁରୀ ଆସି କେମିତି ଶୃଙ୍ଖଳିତ ଦର୍ଶନ କରି ଫେରିବେ ସେ ନେଇ ଯୋଜନା କରାଯାଉଛି । ଆସନ୍ତା ୨୦ ବର୍ଷକୁ ଆଖି ଆଗରେ ରଖି ଏହି ରୂପରେଖ ପ୍ରସ୍ତୁତ କରାଯାଉଛି । ଟ୍ରାଫିକ ପରିଚାଳନା, ଭିଡ଼ ନିୟନ୍ତ୍ରଣ, ପାର୍କିଂ, ରାସ୍ତା ପ୍ରଶସ୍ତିକରଣ ସହ ନୂଆ ରାସ୍ତା ନିର୍ମାଣ ପାଇଁ ଯୋଜନା କରାଯାଇଛି ।
ସେପଟେ ସରକାରଙ୍କ ଏପରି ଏକ ଯୋଜନାକୁ କଟାକ୍ଷ କରିଛି ବିଜେଡି । ବରିଷ୍ଠ ବିଜେଡି ବିଧାୟକ ଅରୁଣ ସାହୁ କହିଛନ୍ତି, ରଥଯାତ୍ରାରେ ଅଘଟଣ ପରେ ଅଘଟଣ ଘଟିଗଲା । ରାଜ୍ୟ ସରକାର କେବଳ ବଢ଼ାଚଡା କରି କହୁଛନ୍ତି । ପୁରୀରେ କେତେ ଲୋକ ରଥଯାତ୍ରା ଦେଖିପାରିବେ ତାହାର ରିସର୍ଚ୍ଚ କରାଯାଉଛି । ସତ୍ୟ ପଦାକୁ ଆସିବ। ଏଥର ରଥଯାତ୍ରାରେ ଅଘଟଣ ଘଟିବାର କାରଣ ହେଉଛି ପୁରୀରେ ଯେତେ ସବୁ ବିକାଶ କାମ ହେଉଥିଲା ତାକୁ ବନ୍ଦ କରି ଦିଆଯାଇଛି ।
ଗୋଟେ ପଟେ କାମ ବନ୍ଦ କଲେ। ଅପରପଟେ ଲୋକଙ୍କ ଭାବାବେଗ ସହ ଖେଳିଲେ । ଯାହା ଫଳରେ ଅଘଟଣ ଘଟିଲା। ଯୋଜନା ଠିକ୍ କଲେ ନାହିଁ, କି କାହା ଠାରୁ ଠିକ୍ ପରାମର୍ଶ ନେଲେ ନାହିଁ । କାରଣ ସେମାନେ ଭାବୁଛନ୍ତି ସବୁ ଜାଣିଛନ୍ତି । ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ଯେ ଚୋର ଗଲା ପରେ ପୋଲିସ୍ ଆସିଲା । ଘରପୋଡ଼ି ପରେ ଦମକଳ ଆସିବା ପରି କାମ କରୁଛନ୍ତି ରାଜ୍ୟ ସରକାର । ଲୋକେ ମଲା ପରେ ସରକାରଙ୍କ ଚେତାପଶିଲା। କାହିଁକି ରଥଯାତ୍ରା ପୂର୍ବରୁ ସରକାର ଶୃଙ୍ଖଳିତ ବ୍ୟବସ୍ଥା କଲେ ନାହିଁ ? ରଥଯାତ୍ରାରେ ବହୁତ ବଡ଼ ଅଘଟଣ ଘଟିଲା । ଲୋକେ ଅଶାନ୍ତି ହୋଇ ଫେରିଛନ୍ତି ବୋଲି କଂଗ୍ରେସ ଅଭିଯୋଗ କରିଛି।
ଚଳିତ ବର୍ଷ ରଥଯାତ୍ରାକୁ ସରକାର ଯେମିତି ପରିଚାଳନା କରିବା କଥା ତାହା କରିବାରେ ବିଫଳ ହେବା ପରେ ପୁଣିଥରେ ଆଇନ ମନ୍ତ୍ରୀଙ୍କ ବୟାନକୁ ନେଇ ଘେରିଛନ୍ତି ବିରୋଧୀ। କେବଳ କଥା ନୁହେଁ, ସରକାର କାମରେ କରି ଦେଖାନ୍ତୁ ବୋଲି ମୁଖ୍ୟ ବିରୋଧୀ ବିଜେଡି ପରାମର୍ଶ ଦେଇଛି।
ରଥ ଉପରେ ସେବାୟତ ମୋବାଇଲ ଧରିବା ଘଟଣା : ଥାନାରେ ଏତଲା
ନନ୍ଦିଘୋଷ ବ୍ୟୁରୋ: ରଥ ଉପରେ ମୋବାଇଲ ଫୋନ ବ୍ୟବହାର ନେଇ କଟକଣା ଥିବା ସତ୍ତ୍ବେ ଏହାକୁ କିଛି ସେବାୟତ ମାନିନାହାନ୍ତି। ରଥ ଉପରର ଭିଡିଓ ଏବଂ ଫଟୋ ବିଭିନ୍ନ ସୋସିଆଲ ମିଡ଼ିଆରେ ଦେଖିବାକୁ ମିଳୁଛି। ଏ ନେଇ ତଦନ୍ତ କରି ଆଇନ ଅନୁସାରେ କାର୍ଯ୍ୟାନୁଷ୍ଠାନ ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସିଂହଦ୍ୱାର ଥାନାରେ ଏତଲା ଦିଆଯାଇଅଛି। ଶ୍ରୀମନ୍ଦିର ସୁରକ୍ଷା ପ୍ରଶାସକ ଦାୟିତ୍ୱରେ ଥିବା ସ୍ୱତନ୍ତ୍ର ଅଧିକାରୀ ଥାନାରେ ରିପୋର୍ଟ କରିଥିବା ବେଳେ ବିହିତ କାର୍ଯ୍ୟାନୁଷ୍ଠାନ ପାଇଁ ଉଲ୍ଲେଖ କରିଛନ୍ତି।…
ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ପ୍ରାଥମିକ ତଦନ୍ତ ରିପୋର୍ଟ ଦାଖଲ
ନନ୍ଦିଘୋଷ ବ୍ୟୁରୋ: ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ପ୍ରାଥମିକ ତଦନ୍ତ ରିପୋର୍ଟ ଦାଖଲ। ବିମାନ ଦୁର୍ଘଟଣା ତଦନ୍ତକାରୀ ସଂସ୍ଥା AAIB ଏୟାର ଇଣ୍ଡିଆ-୧୭୧ ବିମାନ ଦୁର୍ଘଟଣାର ପ୍ରାଥମିକ ତଦନ୍ତ ରିପୋର୍ଟ ଦାଖଲ କରିଛି। ପ୍ରାରମ୍ଭିକ ରିପୋର୍ଟରେ ଫ୍ଲାଇଟ୍ ଡାଟା ରେକର୍ଡର୍ FDR ଏବଂ କକପିଟ୍ ଭଏସ୍ ରେକର୍ଡର CVRରୁ ମିଳିଥିବା ତଥ୍ୟ, ପ୍ରତ୍ୟକ୍ଷଦର୍ଶୀଙ୍କ ବୟାନ, ରାଡାର ତଥ୍ୟ ଏବଂ ବିମାନର କାର୍ଯ୍ୟଦକ୍ଷତା ନେଇ ପ୍ରାରମ୍ଭିକ ବୈଷୟିକ ମୂଲ୍ୟାଙ୍କନ ପରେ ରିପୋର୍ଟ ଉପସ୍ଥାପନ ହୋଇଛି। ଏହି ରିପୋର୍ଟକୁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ DGCA, ଏୟାର ଇଣ୍ଡିଆ ଏବଂ ଅନ୍ୟାନ୍ୟ ବିମାନ ଚଳାଚଳ ଅଂଶୀଦାରମାନଙ୍କୁ ପ୍ରଦାନ କରାଯାଇଛି।AAIB ଏପର୍ଯ୍ୟନ୍ତ ଏହି ରିପୋର୍ଟକୁ ସାଧାରଣ ଲୋକଙ୍କ ପାଇଁ ପ୍ରକାଶ କରିନାହିଁ। ଘଟଣାର ଅଧିକ ତଦନ୍ତ ଜାରି ରହିଛି। ଆଗାମୀ ସପ୍ତାହ ମଧ୍ୟରେ ଏକ ବିସ୍ତୃତ ଚୂଡ଼ାନ୍ତ ରିପୋର୍ଟ ଆସିବାର ଆଶା କରାଯାଉଛି।ଦୁର୍ଘଟଣା ପାଇଁ କୌଣସି ଯାନ୍ତ୍ରିକ ତ୍ରୁଟି କିମ୍ବା ପ୍ରକ୍ରିୟାଗତ ତ୍ରୁଟି ରହିଛି କି ନାହିଁ ଏହା ମଧ୍ୟ ଯାଞ୍ଚ କରୁଛନ୍ତି କର୍ତ୍ତୃପକ୍ଷ। ଜୁନ୍ ୧୨ ତାରିଖରେ ଏୟାର ଇଣ୍ଡିଆର ଲଣ୍ଡନ ଯାଉଥିବା ବିମାନ AI-୧୭୧ ଦୁର୍ଘଟଣାଗ୍ରସ୍ତ ହୋଇଥିଲା। ଉଡ଼ାଣ ଭରିବାର କିଛି ସମୟ ପରେ ଅହମ୍ମଦାବାଦର ବିଜେ ମେଡିକାଲ କଲେଜ ହଷ୍ଟେଲର ଏକ କୋଠାକୁ ଖସି ପଡିଥିଲା ଏହି ବିମାନ ।
ରୋଜଗାରର ରାହା ଦେଖାଇଲା ୟୁଟ୍ୟୁବ୍, ଛେଳି ଚାଷରୁ ସ୍ବାବଲମ୍ବୀ
ନନ୍ଦିଘୋଷ ବ୍ୟୁରୋ: ୟୁଟ୍ୟୁବର କମାଲ । ୟୁଟ୍ଯୁବ ଦେଖି ବନିଗଲେ ଛେଳି ଚାଷୀ । ଛେଳି ଚାଷ କରି ଚର୍ଚ୍ଚାରେ ଦାରିଙ୍ଗବାଡି ବ୍ଲକ ଦାସିଙ୍ଗବାଡି ପଞ୍ଚାୟତ ଲୁଙ୍ଗାରବାଡ଼ି ଗାଁର ଗୁଲସନ ପ୍ରଧାନ । ନିଜେ ଛେଳି ଚାଷ କରି ଅନ୍ଯକୁ ଦାଦନ ଖଟିବାକୁ ନଯାଇ ଛେଳି ଚାଷ କରିବାକୁ ଦେଉଛନ୍ତି ପରାମର୍ଶ ।
ରୋଜଗାରର ରାହା ଦେଖାଇଲା ୟୁଟ୍ୟୁବ୍ । ଦାଦନ ଖଟିବାକୁ ନଯାଇ ଆପଣାଇଲେ ଛେଳି ଚାଷ । ହାଇବ୍ରିଡ ଛେଳି ଚାଷ କରି ଚର୍ଚ୍ଚାରେ ଦାରିଙ୍ଗବାଡି ବ୍ଲକ ଦାସିଙ୍ଗବାଡି ପଞ୍ଚାୟତ ଲୁଙ୍ଗାରବାଡ଼ି ଗାଁର ଗୁଲସନ ପ୍ରଧାନ । ଗୁଲସନ ଯୁକ୍ତ ୨ ଶିକ୍ଷା ଲାଭ ପରେ ଡ୍ରାଇଭର ଭାବେ କାମ କରୁଥିଲେ । ହେଲେ ଏକ ଆକସିଡେଣ୍ଟ ପରେ ସେ ଆଉ ଗାଡି ଚଲାଇ ପାରିଲେ ନାହିଁ । ଶେଷରେ ୟୁଟ୍ଯୁବ ଦେଖି ବନିଗଲେ ଛେଳି ଚାଷୀ । ପ୍ରଥମେ ୧୬ ଗୋଟି ହାଇବ୍ରିଡ ଛେଳି ଆଣି ଚାଷ ଆରମ୍ଭ କରିଥିବା ବେଳେ ବର୍ତ୍ତମାନ ତାହା ୬୩ରେ ପହଞ୍ଚିଲାଣି । ତାଙ୍କୁ ଚାଷ କାର୍ଯ୍ଯରେ ତାଙ୍କ ସ୍ତ୍ରୀ ସାହାର୍ଯ୍ଯ କରୁଛନ୍ତି ।
ଗୁଲସନ ହାଇବ୍ରିଡ ଛେଳି ଚାଷ କରି ନିଜେ ସ୍ଵାବଲମ୍ବୀ ହେବା ସହ ଅଞ୍ଚଳରେ ବେକାର ଯୁବକ ଓ ଯୁବତୀ ମାନଙ୍କୁ ଛେଳି ଚାଷ କରିବାକୁ ଉପଦେଶ ଦେଉଛନ୍ତି । ଛେଳି ମାନଙ୍କ ମାର୍କେଟରେ ବି ବେଶ ଚାହିଦା ରହିଛି । ତେବେ ଛେଳି ମାନଙ୍କୁ ରଖିବାକୁ ଗୁହାଳ ଖଣ୍ଡେ ନଥିବାରୁ ଜରି ପାଲରେ କୁଡିଆ କରି ରଖିଛନ୍ତି ଗୁଲସନ । ଗୁହାଳ ଖଣ୍ଡେ ପାଇଁ ବ୍ଲକ ପ୍ରଶାସନ ନିକଟରେ ସେ ଅନେକ ଗୁହାରି କରିଥିଲେ ବି କୌଣସି ସୁଫଳ ମିଳିପାରିନାହିଁ । ଯଦି ସରକାର ସହାୟତା ଯୋଗାଇ ଦିଅନ୍ତେ ତାହାଲେ ଗୁଲସନ ଭଲ ଛେଳି ଚାଷ କରିପାରନ୍ତେ ।
ଅଙ୍ଗନବାଡ଼ି କର୍ମୀଙ୍କ ଘରେ ଚାଲିଛି କୋମଳମତି ଶିଶୁଙ୍କ ପାଠପଢା
ନନ୍ଦିଘୋଷ ବ୍ୟୁରୋ: ବଲାଙ୍ଗୀର ଜିଲ୍ଲା ତୁରେକେଲା ବ୍ଲକରେ ଦିଗହରା ପାଲଟିଛି ମହିଳା ଓ ଶିଶୁ ବିକାଶ ଯୋଜନା । ଅଧପନ୍ତରିଆ ଅବସ୍ଥାରେ କୁଇବାହାଲ ପଞ୍ଚାୟତର ସମରସିଂ ଗାଁରେ ଥିବା ଅଙ୍ଗନବାଡି କେନ୍ଦ୍ରର କୋଠା । ଦୀର୍ଘ ବର୍ଷେ ବିତିଥିଲେ ବି କୋଠାଟି ସଂପୂର୍ଣ୍ଣ ହୋଇପାରୁନଥିବାରୁ ଅଙ୍ଗନବାଡି କର୍ମୀଙ୍କ ଘରେ ଚାଲିଛି କୋମଳମତି ଶିଶୁଙ୍କ ପାଠପଢା । ସମସ୍ଯା ପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେଉନଥିବା ଅଭିଯୋଗ ।
ଉପାନ୍ତ ଅଞ୍ଚଳରେ ପ୍ରାକ ଶିକ୍ଷାର ବିକଳ ଚିତ୍ର । ଅଙ୍ଗନବାଡି କର୍ମୀ ଅଛନ୍ତି ଅଥଚ ନାହିଁ ଅଙ୍ଗନବାଡି ଗୃହ । କର୍ମୀଙ୍କ ଘରେ ଚାଲିଛି କୋମଳମତି ଶିଶୁଙ୍କ ପାଠପଢା । ବଲାଙ୍ଗୀର ଜିଲ୍ଲା ତୁରେକେଲା ବ୍ଲକ କୁଇବାହାଲ ପଞ୍ଚାୟତର ସମରସିଂ ଗାଁରେ ଦେଖିବାକୁ ମିଳିଛି ଏଭଳି ଅବ୍ଯବସ୍ଥା । ସମରସିଂ ଗାଁରେ ଥିବା ଅଙ୍ଗନବାଡି କେନ୍ଦ୍ରର ଘର ଅଧପନ୍ତରିଆ ଅବସ୍ଥାରେ ପଡିରହିଥିବାରୁ ସମସ୍ଯାର ସମ୍ମୁଖୀନ ହେଉଛନ୍ତି ପିଲା ।
ଗାଁରେ ବର୍ଷେ ହେଲା ଅଙ୍ଗନବାଡି କେନ୍ଦ୍ର ନିମନ୍ତେ ନୂତନ ଘର ନିର୍ମାଣ ଚାଲିଛି । ହେଲେ ତାହା ସରିବାର ନାଁ ଧରୁନି । ଜିଲ୍ଲା ପ୍ରଶାସନ ଓ ସ୍ଥାନୀୟ ରାଜନେତା ଏଥିପ୍ରତି ଦୃଷ୍ଟି ଦେଉନଥିବାରୁ ଏଭଳି ସମସ୍ୟା ଉପୁଜିଥିବା ଅଭିଯୋଗ ହୋଇଛି । ଏନେଇ ନନ୍ଦିଘୋଷ ଟିଭି ପ୍ରତିନିଧି ତୁରେକେଲା ସିଡିପିଓଙ୍କୁ ପଚାରିବାରୁ ସେ କହିଛନ୍ତି, ସମସ୍ଯା ସଂପର୍କରେ ପ୍ରଶାସନକୁ ଚିଠି ଲେଖିଛୁ । ଅନୁଦାନ ଆସିଲେ କାମ ହେବ । ଏଭଳି ସମସ୍ଯା ଭିତରେ ଥିବା ଅଙ୍ଗନବାଡି କେନ୍ଦ୍ରର ଭାଗ୍ଯ କେବେ ବଦଳିବ ? ଅଧପନ୍ତରିଆ କୋଠା କାମ କେବେ ନିର୍ମାଣ ସରିବ ? ଏ ଦିଗରେ ଜିଲ୍ଲା ଅଧିକାରୀ ଦୃଷ୍ଟି ଦେବାକୁ ସାଧାରଣରେ ଦାବି ଜୋର ଧରିଛି ।
ଦେଢ କୋଟି ଟଙ୍କାରେ ବିକ୍ରି ହୋଇଗଲା ଡାକ୍ତର ବାଞ୍ଜେରୀ ଗାଁ
ନନ୍ଦିଘୋଷ ବ୍ୟୁରୋ: ବିକ୍ରି ହେଇଗଲା ସଂପୂର୍ଣ୍ଣ ଗାଁ । ଗଜପତି ଜିଲ୍ଲା ଗୋଷାଣୀ ବ୍ଲକର ବାଞ୍ଜେରୀ ଗାଁ ଏବେ ମାଟିରେ ମିଶିବାକୁ ଯାଉଛି । ବାଞ୍ଜେରୀ ଗାଁରେ ଥିବା ସରକାରୀ କୋଠା ମଧ୍ଯ ପ୍ରଶାସନ ଆଖିକୁ ଦେଖାଗଲା ନାହିଁ । ବିକ୍ରି ପାଇଁ ଅନୁମୋଦନ କରି ମ୍ୟାପ ପ୍ରଦାନ କରିଦେଲେ। ସାଧାରଣ ପଦର ଜମି ଭଳି ଯୋଜନାବଦ୍ଧ ଭାବେ ଜିଲ୍ଲା ନିବନ୍ଧକଙ୍କ କାର୍ଯ୍ୟାଳୟରେ ସାରିଦେଲେ ବିକ୍ରି ପ୍ରକିୟା । ଏବେ ଶହେ ଆଦିବାସୀ ପରିବାର କୁଆଡେ ଯିବେ ? ତାକୁ ନେଇ ଯୁଦ୍ଧଂ ଦେହୀ ଡାକରା ଦେଲାଣି ଆଦିବାସୀ ମହାସଂଘ ।
ଦେଢ କୋଟି ଟଙ୍କାରେ ବିକ୍ରି ହୋଇଗଲା ଡାକ୍ତର ବାଞ୍ଜେରୀ ଗାଁ । ଜିଲ୍ଲା ନିବନ୍ଧକଙ୍କ କାର୍ଯ୍ଯାଳୟରେ ସରିଗଲା ବିକ୍ରି ପ୍ରକ୍ରିୟା । ସଂପୂର୍ଣ୍ଣ ଗାଁକୁ ବିକିଦେଲେ ଜମିର ମାଲିକ ଏମ. ଚନ୍ଦ୍ରଶେଖର ରାଓ । ଗାଁ ସମେତ ଆଖପାଖ ୪୨ ଏକର ଚାଷ ଜମିକୁ ୧ କୋଟି ୪୪ ଲକ୍ଷ ଟଙ୍କାରେ ବିକି ଦେଲେ । ଯାହାର ଷ୍ଟାମ୍ପ ଖର୍ଚ୍ଚ ବାବଦକୁ ୭ ଲକ୍ଷ ଏବଂ ଅନ୍ଯ ଏକ ୫ ଏକର ଜମିକୁ ୮ ଲକ୍ଷ ୫୦ ହଜାର ଟଙ୍କାରେ ବ୍ରହ୍ମପୁରର ଜଣେ ମହିଳାଙ୍କୁ ବିକ୍ରି କରିଦିଆଗଲା । ଯାହାକୁ ନେଇ ଗୋଷାଣୀ ବ୍ଲକ ଅନ୍ତର୍ଗତ ଡାକ୍ତର ବାଞ୍ଜେରୀ ଗାଁର ୫ ଶହରୁ ଉର୍ଦ୍ଧ୍ଵ ଅଧିବାସୀଙ୍କ ଭବିଷ୍ଯତ ଏବେ ଅନ୍ଧାରରେ । ବାଞ୍ଜେରୀ ଗାଁରେ ବହୁ ମୂଲ୍ଯର କୋଠାବାଡି ସହ ସରକାରଙ୍କ ଅନେକ ଯୋଜନା ଥିବା ସତ୍ତ୍ଵେ ଷଡ଼ଯନ୍ତ୍ର କରି ସାଧାରଣ ପଦର ଜମି ଦେଖାଇ ଜମିର ମ୍ୟାପ ପ୍ରଦାନ କରାଯାଇଥିବା ଅଭିଯୋଗ ହୋଇଛି। ସବୁଠାରୁ ବଡକଥା ହେଲା ଗ୍ରାମବାସୀଙ୍କୁ ନଜଣାଇ ଜାଗା ବିକ୍ରି କରାଯାଇଛି ।
ଡାକ୍ତର ବାଞ୍ଜେରୀ ଗାଁକୁ ବିକ୍ରି ପାଇଁ ଜିଲ୍ଲା ନିବନ୍ଧକଙ୍କ କାର୍ଯ୍ଯାଳୟରେ କାଗଜପତ୍ର ଚାଲିଥିବା ନେଇ ପୂର୍ବରୁ ଖବର ପାଇ ପ୍ରଶାସନ ନିକଟରେ ଗ୍ରାମବାସୀ ଅଭିଯୋଗ କରିଥିଲେ । କିନ୍ତୁ ଆଦିବାସୀଙ୍କ ଅଭିଯୋଗକୁ କେହି କର୍ଣ୍ଣପାତ କଲେନାହିଁ । ଯାହାକୁ ନେଇ ବର୍ଷିଛନ୍ତି ଆଦିବାସୀ ନେତା । ସରକାର ସବୁବେଳେ ଆଦିବାସୀଙ୍କ ନାଁରେ ବାହାବା ନେଇ ଭୋଟ ବ୍ଯାଙ୍କ ତିଆରି କରୁଛନ୍ତି । କିନ୍ତୁ ଆଦିବାସୀଙ୍କ ସ୍ବାର୍ଥ ସାଧନ ବଦଳରେ ଜମି ମାଫିଆଙ୍କୁ ସହଯୋଗ କରୁଛନ୍ତି । ଆଦିବାସୀଙ୍କ ବିରୋଧରେ ଷଡଯନ୍ତ୍ରକୁ ଆଦୌ ବରଦାସ୍ତ କରାଯିବ ନାହିଁ । ଆଦିବାସୀ ମହାସଂଘ ଯୁଦ୍ଧଂ ଦେହୀ ଡାକରା ଦେଇ ଗ୍ରାମବାସୀଙ୍କ ସହ ବୈଠକ କରି ରଣନୀତି ପ୍ରସ୍ତୁତ କରୁଛି ।
ବିକ୍ରି ହେଲା ଗାଁ, ବେଘର ହେବେ ଶତାଧିକ ଆଦିବାସୀ ପରିବାର। ଗାଁର ୫ ଶହରୁ ଉର୍ଦ୍ଧ୍ଵ ଲୋକ ଏବେ ଯିବେ କୁଆଡେ ? ଏତେ ବର୍ଷ ଧରି ଜମି ମାଲିକ କେଉଁଠି ଥିଲେ ? ପୂର୍ବରୁ ନିଜ ଜମି ନିଜ ଅକ୍ତିଆରରେ ରଖି ନଥିଲେ କିପରି ? ଏପଟେ ପ୍ରଶାସନ ଏତେ ସଂଖ୍ୟକ ଆଦିବାସୀଙ୍କ ସ୍ବାର୍ଥକୁ ଏଡ଼ାଇ ଜମି ମାଫିଆଙ୍କୁ ସହଯୋଗ କଲା କିପରି ? ଏପରି ଅନେର ପ୍ରଶ୍ନ ସାଧାରଣରେ ଉଙ୍କି ମାରୁଛି । ତେବେ ଜମି ହସ୍ତାନ୍ତର ପରେ ସରକାରୀ ଅନୁଷ୍ଠାନ ସମେତ ଶତାଧିକ ଘର ଉଚ୍ଛେଦ ବେଳେ ଏକ ବଡ ଧରଣର ଆଇନଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କା କରାଯାଉଛି ।
ତୃତୀୟ ଟେଷ୍ଟ ସମୟରେ ନଜର ଆସିପାରନ୍ତି ବିରାଟ
ନନ୍ଦିଘୋଷ ବ୍ୟୁରୋ: ଭାରତ-ଇଂଲଣ୍ଡ ଟେଷ୍ଟ ୧-୧ରେ ରହିଛି । ତୃତୀୟ ମ୍ୟାଚରେ କିଏ ଜିତିବ ଏହାକୁ ନେଇ ଚର୍ଚ୍ଚା ଜୋର ଧରିଛି । ଉଭୟ ଦଳ ଦମଦାର ଫର୍ମରେ ରହିଥିବାବେଳେ ତୃତୀୟ ମ୍ୟାଚଟି ସଂଘର୍ଷପୂର୍ଣ୍ଣ ହେବ ବୋଲି କୁହାଯାଉଛି । ଐତିହାସିକ ଲର୍ଡସ ଗ୍ରାଉଣ୍ଡରେ ଏହି ମ୍ୟାଚଟି ଖେଳାଯିବାକୁ ଥିବାବେଳେ କୁହାଯାଉଛି ଟିମ ଇଣ୍ଡିଆର ଷ୍ଟାର କ୍ରିକେଟର ବିରାଟ କୋହଲି ଏହି ମ୍ୟାଚ ସମୟରେ ମଇଦାନରେ ଉପସ୍ଥିତ ରହିପାରନ୍ତି । କାରଣ ଏବେ ଲଣ୍ଡନରେ ନିଜ ପରିବାର ସହ ରହିଛନ୍ତି ବିରାଟ । ସେ ନିକଟରେ ଟେନିସ ମ୍ୟାଚବେଳେ ନଜର ଆସିଥିଲେ । ଏଣୁ ଭାରତୀୟ ଦଳର ମନୋବଳ ବଢ଼ାଇବା ପାଇଁ ମଇଦାନରେ ଉପସ୍ଥିତ ରହିପାରନ୍ତି । ସେ ଟେଷ୍ଟ କ୍ରିକେଟରୁ ଅବସର ନେଇଥିଲେ ସୁଦ୍ଧା ଖେଳାଳିଙ୍କ ସହ ମିଶି ଅଧିକ ମନୋବଳ ବଢ଼ାଇ ପାରନ୍ତି ବୋଲି କୁହାଯାଉଛି ।