ଭୁବନେଶ୍ବର : ରାଜଧାନୀରେ ଆମ ବସ କର୍ମଚାରୀଙ୍କ ଦାଦାଗିରି। ଯାତ୍ରୀଙ୍କୁ ଆକ୍ରମଣ କରି ବସରୁ ଠେଲିଦେଲେ ଆମ ବସ୍ କର୍ମଚାରୀ। ଭୁଲ୍ରେ ଏମର୍ଜେନ୍ସି ବଟନରେ ହାତ ବାଜିଗଲା ବୋଲି ପିଟିଲେ କର୍ମଚାରୀ।ଗତକାଲି ଆମ ବସରେ ଭୁବନେଶ୍ବରରୁ କଟକ ଯାଉଥିଲେ ଜଣେ ଯାତ୍ରୀ। ୧୦ଟା ୧୬ ମିନିଟ ସମୟରେ ପାହାଳ ଛକ ନିକଟରେ ବସ୍ ବ୍ରେକ୍ ଦେଇଥିଲା। ଜଣେ ଯାତ୍ରୀ ଛିଡା ହୋଇଥିବାରୁ ତଳେ ପଡିଯିବା ଭୟରେ ସନ୍ତୁଳନ ହାରାଇ ଲୁହା ବାର୍କୁ ଜାବୁଡି ଧରିଥିଲେ। ଏହି ବାର୍ରେ ଲାଗିଥିବା ଜରୁରିକାଳୀନ ବଟନରେ ତାଙ୍କର ହାତ ବାଜିଯାଇଥିଲା। ଫଳରେ ବସ୍ ଅଟକି ଯାଇଥିଲା। ଏହି ଘଟଣାକୁ ନେଇ ତୁରନ୍ତ ଉଗ୍ର ହୋଇଉଠିଲେ ଆମ ବସ୍ କର୍ମଚାରୀ। ସେ କ’ଣ ପାଇଁ ଜରୁରିକାଳୀନ ବଟନ ଦବାଇଲେ ବୋଲି ଦୁଇ କର୍ମଚାରୀ ସଙ୍ଘବଦ୍ଧ ଭାବେ ଆକ୍ରମଣ କରିଥିଲେ। ଅନ୍ୟ ଯାତ୍ରୀଙ୍କ ଉପସ୍ଥିତରେ ବସ୍ ଭିତରେ ସମ୍ପୃକ୍ତ ଯାତ୍ରୀଙ୍କୁ ଆକ୍ରମଣ କଲେ। ତାଙ୍କୁ ମୁଥ ମାରି ବସ୍ରୁ ଠେଲି ଦେଇଥିଲେ। ବାହାରକୁ ନେଇ ନିସ୍ତୁକ ମାଡ ମାରିବା ସହ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ। କିଛି ଯାତ୍ରୀ ଏହାକୁ ବିରୋଧ କରିଥିଲେ ମଧ୍ୟ ଆମ ବସ୍ କର୍ମଚାରୀ କିଛି ଶୁଣିନଥିଲେ। ଆମ ବସ୍ କର୍ମଚାରୀ ମାଡ଼ ମାରିବା ଭିଡିଓ ଏବେ ସୋସିଆଲ ମାଡିଆରେ ଭାଇରାଲ ହେଉଛି।
କମୁଛି ଜଳସ୍ତର ! ପ୍ରଥମ ଜଳ ବିହୀନ ସହର ହେବ କାବୁଲ
ନନ୍ଦିଘୋଷ ବ୍ୟୁରୋ : ଆଫଗାନିସ୍ତାନର ରାଜଧାନୀ କାବୁଲଣେ ଏବେ ଚଳ ସଙ୍କଟ ଦେଖାଦେଲାଣି । ହୀନ୍ଦୁକୁଶ ପାହାଡ ମଝିରେ ଥିବା ଏହି ସହରକୁ ଖାଲି ଆପଗାନିସ୍ତାନର ରାଜଧାନୀ ବୋଲି ଜଣାଯାଏ ନାହିଁ, ବରଂ ଏକ ସାଂସ୍କୃତିକ ଓ ଆର୍ଥିକ କ୍ଷେତ୍ର ଭାବେ ଜଣାଯାଇଥାଏ । ଏବେ ଏହି କାବୁଲ ଏମିତି ଏକ ଦେଶ ହେବ, ଯେଉଁଠାରେ ୨୦୩୦ ସୁଦ୍ଧା ଜଳ ସଙ୍କଟ ଦେଖାଦେବ । ଏକ ରିପୋର୍ଟରେ ମାଧ୍ୟମରେ ଏହି ଚେତାବନୀ ଦିଆଯାଇଛି ।
ଏକ ରିପୋର୍ଟ ଅନୁସାରେ ଗତ ଦଶନ୍ଧି ମଧ୍ୟରେ ୨୫ରୁ ୩୦ ମିଟର ତଳକୁ ଖସିଛି ଭୂଜଳ ସ୍ତର । ପ୍ରତିବର୍ଷ, ବ୍ୟବହୃତ ଜଳ ଅପେକ୍ଷା ୪୪ ନିୟୁତ ଘନ ମିଟର ଅଧିକ ଜଳ ଭୂମିରୁ ବାହାର କରାଯାଉଛି। ଏହାର ଅର୍ଥ ହେଉଛି ଯେ ଜଳ ସ୍ତରର ପ୍ରାକୃତିକ ପୁନଃପୂରଣ ଅପେକ୍ଷା ପାଣି ବହୁତ ଦ୍ରୁତ ଗତିରେ ଶୋଷଣ କରାଯାଉଛି।
ବର୍ଷ ବର୍ଷ ଧରି ଚାଲିଥିବା ସଂଘର୍ଷ କାବୁଲରେ ଆଧୁନିକ ଜଳ ପ୍ରଣାଳୀରେ ନିବେଶକୁ ବାଧା ଦେଇଛି। ଫଳସ୍ୱରୂପ, ଭୂତଳ ଜଳ ଦ୍ରୁତ ଗତିରେ ହ୍ରାସ ପାଉଛି ଓ ଯାହା ବାକି ଅଛି ତାହା ମଧ୍ୟ ବିଷାକ୍ତ ହୋଇଯାଇଛି। ୟୁନିସେଫର ଏକ ରିପୋର୍ଟ ଅନୁଯାୟୀ, କାବୁଲର ଅଧାରୁ ଅଧିକ ବୋରୱେଲ ଶୁଖିଗଲାଣି ଏବଂ ପ୍ରାୟ ୮୦ ପ୍ରତିଶତ ଭୂତଳ ଜଳ ଦୂଷିତ ହୋଇଗଲାଣି। ଯଦି ଏହି ପରିସ୍ଥିତି ଜାରି ରହେ, ତେବେ ୨୦୩୦ ସୁଦ୍ଧା, ଏଠାକାର ଭୂତଳ ଜଳ ଉତ୍ସଗୁଡ଼ିକ ସମ୍ପୂର୍ଣ୍ଣ ଭାବରେ ଶେଷ ହୋଇଯିବ।
୧. ଜଳବାୟୁ ପରିବର୍ତ୍ତନର ପ୍ରଭାବ: ଜଳ ସଙ୍କଟର ସବୁଠାରୁ ବଡ଼ କାରଣ ହେଉଛି ପରିବର୍ତ୍ତିତ ପାଣିପାଗ ଚକ୍ର। ଗତ କିଛି ବର୍ଷ ଧରି ଆଫଗାନିସ୍ତାନରେ ତୁଷାରପାତ ହ୍ରାସ ପାଉଛି, ସମୟ ପୂର୍ବରୁ ତୁଷାର ତରଳିଯାଉଛି ଏବଂ ମରୁଡ଼ିର ଘଟଣା ବାରମ୍ବାର ଘଟୁଛି। ୨୦୨୩ ମସିହାରେ ସ୍ୱାଭାବିକ ଅପେକ୍ଷା ୪୦-୫୦% କମ୍ ବର୍ଷା ହୋଇଥିଲା, ଯାହା ଯୋଗୁଁ ଭୂତଳ ଜଳ ପୁନଃଭରଣ ହେବାର ସୁଯୋଗ ପାଇନଥିଲା।
୨. ପ୍ରଶାସନିକ ବିଫଳତା: ଜଳ ପରିଚାଳନା, ପାଇପଲାଇନ ମରାମତି ଏବଂ ବର୍ଷାଜଳ ଅମଳ ଭଳି ମୌଳିକ କାର୍ଯ୍ୟଗୁଡ଼ିକୁ ନିରନ୍ତର ଅବହେଳା କରାଯାଇଛି। ସରକାରୀ ବିଫଳତା ଜଳ ସଙ୍କଟକୁ ଆହୁରି ଖରାପ କରିଛି। ପଞ୍ଜଶିର ନଦୀରୁ ପାଣି ଆଣିବା ପାଇଁ ୧୭୦ ନିୟୁତ ଡଲାରର ପ୍ରକଳ୍ପ ବର୍ଷ ବର୍ଷ ଧରି କାଗଜପତ୍ରରେ ଅଟକି ରହିଛି।
୩. ଦ୍ରୁତ ଗତିରେ ବଢ଼ୁଥିବା ଜନସଂଖ୍ୟା: ୨୦୦୧ ମସିହାରେ କାବୁଲର ଜନସଂଖ୍ୟା ୧୦ ଲକ୍ଷ ଥିଲା ବେଳେ ଏବେ ଏହା ୬୦ ଲକ୍ଷ ଅତିକ୍ରମ କରିଗଲାଣି। ଯୁଦ୍ଧ, ଆଭ୍ୟନ୍ତରୀଣ ବିସ୍ଥାପନ ଏବଂ ଅସ୍ଥିର ଶାସନ ଯୋଗୁଁ ଲକ୍ଷ ଲକ୍ଷ ଲୋକ କାବୁଲରେ ବସବାସ କଲେ। ଫଳସ୍ୱରୂପ ସୀମିତ ଜଳସମ୍ପଦ ଉପରେ ଏକ ବଡ଼ ବୋଝ ପଡ଼ିଲା।
କାବୁଲରେ ୫୦୦ ରୁ ଅଧିକ ବୋତଲବନ୍ଦ ପାଣି ଓ ମୃଦୁ ପାନୀୟ କମ୍ପାନୀ କାର୍ଯ୍ୟ କରୁଛନ୍ତି, ଯେଉଁମାନେ ନିର୍ବିଚାର ଭାବରେ ଭୂତଳ ଜଳର ଶୋଷଣ କରୁଛନ୍ତି। କେବଳ ଆଲୋକୋଜେ କମ୍ପାନୀ ପ୍ରତିବର୍ଷ ୧ ବିଲିୟନ ଲିଟର ପାଣି ବାହାର କରୁଛି। ଏହା ବ୍ୟତୀତ ୪୦୦ ହେକ୍ଟରରେ ବିସ୍ତାରିତ ସବୁଜଗୃହଗୁଡ଼ିକ ବାର୍ଷିକ ପ୍ରାୟ ୪ବିଲିୟନ ଲିଟର ପାଣି ବ୍ୟବହାର କରୁଛନ୍ତି।
ଯଦି ଅନ୍ତର୍ଜାତୀୟ ସମ୍ପ୍ରଦାୟ ଏବଂ ଆଫଗାନ ସରକାର ଶୀଘ୍ର କୌଣସି ଦୃଢ଼ ପଦକ୍ଷେପ ନ ନିଅନ୍ତି, ତେବେ ପରିସ୍ଥିତି ଆହୁରି ଖରାପ ହେବ। ଆକଳନ କରାଯାଉଛି ଯେ କାବୁଲରୁ ପ୍ରାୟ ୩୦ ଲକ୍ଷ ଲୋକ ବିସ୍ଥାପିତ ହୋଇପାରନ୍ତି। ଏହି ସଙ୍କଟ କେବଳ ରାଜଧାନୀ ପର୍ଯ୍ୟନ୍ତ ସୀମିତ ରହିବ ନାହିଁ, ବରଂ ଦେଶର ଅନ୍ୟାନ୍ୟ ଅଞ୍ଚଳକୁ ମଧ୍ୟ ବ୍ୟାପିପାରେ। ବିଶେଷକରି ଉତ୍ତର, ଉତ୍ତର-ପଶ୍ଚିମ ଏବଂ ଉତ୍ତର-ପୂର୍ବ ପ୍ରଦେଶଗୁଡ଼ିକରେ ମରୁଡ଼ି ଦ୍ରୁତ ଗତିରେ ବ୍ୟାପିବାରେ ଲାଗିଛି। ଏଠାରେ ଫସଲ ନଷ୍ଟ ହେଉଛି ଏବଂ ପଶୁପାଳନ ମରୁଛି। ଖାଦ୍ୟ ଓ କୃଷି ସଂଗଠନ ଅନୁଯାୟୀ, ଚାଷ ଓ ପଶୁପାଳନ ଉପରେ ନିର୍ଭରଶୀଳ ଲକ୍ଷ ଲକ୍ଷ ଲୋକଙ୍କ ଜୀବିକା ବିପଦରେ ପଡ଼ିଛି।
ରାଧିକା ଯାଦବ ହତ୍ୟାକାଣ୍ଡର ନୂଆ ଖୁଲାସା, ୧୫ ଦିନ ଶୋଇନଥିଲେ ରାଧିକାଙ୍କ ବାପା ଦୀପକ
ନନ୍ଦିଘୋଷ ବ୍ୟୁରୋ ; ଦିନକୁ ଦିନ ରାଧିକା ଯାଦବ ହତ୍ୟାକାଣ୍ଡକୁ ନେଇ ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ଟେସିନ ଖେଳାଳି ରାଧିକା ଯାଦବଙ୍କ ହତ୍ୟା ମାମଲାର ଅଭିଯୁକ୍ତ ବାପା ଦୀପକ ପଚରାଉଚରା କରୁଥିବା ସମୟରେ କିଛି ନୂଆ କଥା ଜଣାପଡିଛି । ସୂତ୍ର ଅନୁସାରେ ଦୀପକ ହତ୍ୟାକାଣ୍ଡର ୧୫ ଦିନ ଅସ୍ଥିର ହୋଇପଡିଥିଲେ । ରାତିରେ ମଧ୍ୟ ସେ ଶୋଇନଥିଲେ । କାହା ସହିତ ଘରେ ମଧ୍ୟ କଥା ବି ହେଉନଥିଲେ । ସେତେବେଳେ ରାଧିକା ବାପାଙ୍କ କାଉସିଲିଙ୍ଗ ମଧ୍ୟ କରିଥିଲେ । ବାପାଙ୍କ ଚାପରେ ସୋସିଆଲ ମିଡିଆ ଆକାଉଣ୍ଟକୁ ମଧ୍ୟ ଡିଲିଟ କରିଦେଇଥିଲେ ।
ଦୀପକ ରାଧିକାଙ୍କୁ ବାରମ୍ବାର ଏକାଡେମୀ ବନ୍ଦ କରିବାକୁ କହୁଥିଲେ । ଲୋକଙ୍କ କଥାରେ ଚାପରେ ଥିବା ବାପା ଦୀପକଙ୍କୁ ରାଧିକା ଭରଷା କରିବାକୁ କହିଥିଲେ । କିନ୍ତୁ ଲୋକଙ୍କ କଥାକୁ ନେଇ ଦୀପକ ଚିନ୍ତିତ ଥିଲେ । ଲେକମାନେ ତାଙ୍କ ଝିଅ ରୋଜଗାରରେ ଚଳୁଥିବା କଥା କହୁଥିଲେ । ଯେତେବେଳେ ଦୀପକ ରାଧିକାଙ୍କୁ ଏକାଡେମୀ ବନ୍ଦ କରିବାକୁ କହିଥିଲେ । ସେତେବଳେ ସେ ତାଙ୍କ ଟଙ୍କାକୁ ନଷ୍ଟ କରିବାକୁ ଦେବେ ନାହିଁ ବୋଲି ଆଶ୍ବସନା ଦେଇଥିଲେ ।
କିଛି ଦିନରୁ ହତ୍ୟା କରିବା ଯୋଜନା କରିଥିଲେ ପିତା ଦୀପକ । ଯୋଜନା ମୁତାବକ ଗୁରୁବାର ଦିନ ରାଧିକାଙ୍କୁ ହତ୍ୟା କରିଥିଲେ । ପୋଲିସ ମଧ୍ୟ କାର୍ଟ୍ରିଜ୍ ଜବତ କରିଛି । ଏମିତି କିଛି ନଥିଲା କି ପିତା ସହିତ ରାଧିକାଙ୍କ ହଠାତ ଝଗଡା ହୋଇଥିଲା । ହତ୍ୟାଦି ରାଧିକାଙ୍କ ମାଆଙ୍କ ଜନ୍ମଦିନ ଥିଲା । ସେ ମାଆଙ୍କ ଜନ୍ମଦିନରେ କିଛି ସ୍ବତନ୍ତ୍ର ଖାଦ୍ୟ ପ୍ରସ୍ତୁତ କରୁଥିଲେ ।
ପୋଲିସ ପଚରାଉଚରା କରିବା ସମୟରେ ଜଣାପଡିଛି କି, ବାପା ଦୀପକଙ୍କ ଝଇଅ ରାଧିକା ସହ ୧୫ ଦିନ ଧରି ଝଗଡା ଲାଗିରହିଥିଲା । ଷଡଯନ୍ତ୍ର କରି ରାଧିକାଙ୍କ ଭାଇଙ୍କୁ ଘରୁ ବାହାରକୁ ପଠାଯାଇଥିଲା । ଯଦି ଭାଇ ଗଣେ ଥାନ୍ତେ ହତ୍ୟା କରାଯିବା ସମ୍ଭବ ହୋଇନଥାନ୍ତା ।
ସାମ୍ନାକୁ ଆସିଲା ରାଧିକା ଯାଦବଙ୍କ ହ୍ୱାଟସଆପ୍ ଚାଟ୍
ନନ୍ଦିଘୋଷ ବ୍ୟୁରୋ : ଗୁରୁଗ୍ରାମର ରାଧିକା ଯାଦବ ହତ୍ୟା ମାମଲା ବର୍ତ୍ତମାନ ସାରା ଏକ ନୂଆ ମୋଡ ଆସିଛି । ଅଭିଯୁକ୍ତ ବାପା ଦୀପକ ଯାଦବ ବର୍ତ୍ତମାନ ଗୋଟିଏ ଦିନିଆ ପୋଲିସ ରିମାଣ୍ଡରେ ଅଛନ୍ତି। ତାଙ୍କୁ ପଚରାଉଚରା ଚାଲିଛି। ସେ ତାଙ୍କ ଅପରାଧ ସ୍ୱୀକାର କରିଛନ୍ତି। ଏହି ସମୟରେ, ରାଧିକାଙ୍କ ହ୍ୱାଟସଆପ୍ ଚାଟ୍ ଭାଇରାଲ ହୋଇଛି। ଏଥିରେ ରାଧିକା ତାଙ୍କ ଟେନିସ୍ ପ୍ରଶିକ୍ଷକଙ୍କୁ ସେହି ସମସ୍ୟା ବିଷୟରେ କହିଛନ୍ତି ଯାହା ଯୋଗୁଁ ସେ ଭାରତରେ ରହିବାକୁ ଚାହୁଁ ନଥିଲେ।
ଏକ ଚ୍ୟାନେଲରେ ରାଧିକାଙ୍କ ହ୍ୱାଟସଆପ୍ ଚାଟ୍ ଅଛି। ଏହା ଅନୁଯାୟୀ, ରାଧିକା ପ୍ରଶିକ୍ଷକଙ୍କୁ କହିଥିଲେ ଯେ ସେ ବିଦେଶରେ ରହିବାକୁ ଚାହାଁନ୍ତି। ରାଧିକା ଲେଖିଛନ୍ତି- ଏଠାରେ ବହୁତ ପ୍ରତିବନ୍ଧକ ଅଛି। ମୁଁ ମୋ ଜୀବନ ବଞ୍ଚିବାକୁ ଚାହୁଁଛି, ଏହାକୁ ଉପଭୋଗ କରିବାକୁ ଚାହୁଁଛି। ମୁଁ ମୋ ପରିବାରଠାରୁ ଦୂରେଇ ଯାଇ ଦୁବାଇ କିମ୍ବା ଅଷ୍ଟ୍ରେଲିଆରେ ରହିବାକୁ ଚିନ୍ତା କରୁଛି। ମୁଁ ଚୀନ୍ ଯିବି ନାହିଁ କାରଣ ସେଠାରେ ଖାଦ୍ୟ ବିକଳ୍ପ କମ୍ ଅଛି।
ଏଠାରେ, ପୋଲିସ ପଚରାଉଚରା ସମୟରେ, ଅଭିଯୁକ୍ତ ବାପା ଦୀପକ ପ୍ରକାଶ କରିଛନ୍ତି ଯେ ସେ ଗାଁର ଲୋକଙ୍କ ଗାଳିରେ ବହୁତ ବିରକ୍ତ ଥିଲେ। ସେମାନେ ପ୍ରତିଦିନ ବିରକ୍ତିକର କଥା କହି ତାଙ୍କୁ ଆଘାତ ଦେଉଥିଲେ। ସେମାନେ କହୁଥିଲେ ଯେ ତୁମେ ତୁମ ଝିଅର ଟଙ୍କାରେ ବଞ୍ଚୁଛ। ତୁମ ଝିଅ ଭୁଲ ଉପାୟରେ ଟଙ୍କା ରୋଜଗାର କରେ। ଏପରି ପରିସ୍ଥିତିରେ ବିରକ୍ତ ହୋଇ ସେ ଗତ ତିନି ଦିନ ଧରି ଯୋଜନା କରୁଥିଲେ ଯେ ସେ ଆତ୍ମହତ୍ୟା କରିବେ କି ତାଙ୍କ ଝିଅକୁ ହତ୍ୟା କରିବେ। ଗୁରୁବାର ଦିନ, ଏକାଡେମୀକୁ ଯିବାକୁ ମନା କରିବାରୁ ବିବାଦ ଯୋଗୁଁ ସେ ତାଙ୍କ ଝିଅକୁ ଚାରି ଗୁଳି କରି ହତ୍ୟା କରିଥିଲେ।
ପୋଲିସ ତଦନ୍ତରୁ ଜଣାପଡିଛି ଯେ ବାପା ଦୀପକ ଯାଦବଙ୍କ ମାନସିକ ଅବସ୍ଥା ଭଲ ନଥିଲା। ସେ ସବୁକିଛି ଭୁଲ ବୋଲି ଭାବି ରାଗିଯାଉଥିଲେ ଓ ସନ୍ଦେହ କରୁଥିଲେ। ଝିଅ କାହା ସହିତ କଥା ହେଉଛି ଓ ସେ ତାଙ୍କ ସହିତ କାହିଁକି କଥା ହେଉଛି… ସେ ତାଙ୍କ ଝିଅକୁ ଏପରି ପ୍ରଶ୍ନ ପଚାରୁଥିଲେ। ରାଧିକା ତାଙ୍କ ବାପାଙ୍କୁ ମଧ୍ୟ ପ୍ରତିଶ୍ରୁତି ଦେଇଥିଲେ ଯେ ସେ କିଛି ଭୁଲ କରିବେ ନାହିଁ। କିନ୍ତୁ ତଥାପି ଗୁରୁବାର ଦୀପକ ପାଞ୍ଚଟି ଗୁଳି ଚଳାଇ ରାଧିକାକୁ ହତ୍ୟା କରିଥିଲେ। ରାଧିକାଙ୍କ ଶରୀରରୁ ଚାରୋଟି ଗୁଳି ମିଳିଛି। ଅନ୍ୟ ଗୁଳିଟି କେଉଁଠି ଅଛି ତାହା ଜାଣିବାକୁ ପୋଲିସ ଚେଷ୍ଟା କରୁଛି।
ଭୁଶୁଡିଲା କୋଠା : ୩ ଉଦ୍ଧାର, ଫସିଛନ୍ତି ଅନେକ ଲୋକ
ଦିଲ୍ଲୀ : ଦିଲ୍ଲୀର ସୀଲମପୁର ଅଞ୍ଚଳରେ ଏକ ବଡ଼ ଦୁର୍ଘଟଣା ଘଟିଛି। ଏଠାରେ ଏକ ତିନିରୁ ଚାରି ମହଲା କୋଠା ଭୁଶୁଡ଼ି ପଡ଼ିଛି। ଅଗ୍ନିଶମ ବିଭାଗ ଅନୁଯାୟୀ, ଆଜି ସକାଳ ପ୍ରାୟ ୭ଟାରେ ସୀଲମପୁର ଅଞ୍ଚଳରେ ଏକ ଘର ଭୁଶୁଡ଼ି ପଡ଼ିବା ସୂଚନା ମିଳିଥିଲା। ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ, ଅଗ୍ନିଶମ ଗାଡ଼ିଗୁଡ଼ିକୁ ଘଟଣାସ୍ଥଳକୁ ପଠାଯାଇଥିଲା।
୩ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଆହୁରି କିଛି ଲୋକ ଭଗ୍ନାବଶେଷ ତଳେ ୧୨ ଲୋକ ଫସି ରହିଥିବା ଆଶଙ୍କା କରାଯାଉଛି । ଏହି ଦୁର୍ଘଟଣା ବିଷୟରେ ସୂଚନା ପାଇବା ମାତ୍ରେ ପୋଲିସ ଓ ଅଗ୍ନିଶମ ବାହିନୀ ଦଳ ଘଟଣାସ୍ଥଳରେ ପହଞ୍ଚିଥିଲେ। ବର୍ତ୍ତମାନ ପୋଲିସ, ଅଗ୍ନିଶମ ବାହିନୀ ଓ ଏନଡିଆରଏଫ ଟିମ୍ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ସ୍ଥାନୀୟ ଲୋକମାନେ ମଧ୍ୟ ଭଗ୍ନାବଶେଷ ତଳୁ ଲୋକଙ୍କୁ ଉଦ୍ଧାର କରିବା ଲାଗି ସାହଯ୍ୟ କରୁଛନ୍ତି ।
ଲଞ୍ଚ ବେଳେ ବୋମା ବିସ୍ଫୋରଣ, ଟିଟିପି କମାଣ୍ଡର ନହତ
ନନ୍ଦିଘୋଷ ବ୍ୟୁରୋ : ପାକିସ୍ତାନର ତେହରିକ-ଏ-ତାଲିବାନ (TTP)ର ଜଣେ ଆତଙ୍କବାଦୀ କମାଣ୍ଡରଙ୍କ ମୃତ୍ୟୁ ଘଟିଛି। ଆତଙ୍କବାଦୀ ଜଣକ ବୋମା ପରିଚାଳନା କରୁଥିବା ସମୟରେ ବିସ୍ଫୋରଣ ହୋଇ ତାଙ୍କର ମୃତ୍ୟୁ ହୋଇଛି । ସୂତ୍ର ଅନୁଯାୟୀ, ପାକିସ୍ତାନର ଉତ୍ତର-ପଶ୍ଚିମ ପ୍ରଦେଶ ଖାଇବର ପଖତୁନଖ୍ୱାରେ ଏକ କ୍ୱାଡକପ୍ଟର ଲଞ୍ଚ କରିବାକୁ ଚେଷ୍ଟା କରୁଥିବା ସମୟରେ, ଆତଙ୍କବାଦୀ ଏହାକୁ ପରିଚାଳନା କରୁଥିବା ସମୟରେ ବିସ୍ଫୋରଣ ହୋଇଥିଲା । ଏଥିରେ TTPର ଆତଙ୍କବାଦୀ କମାଣ୍ଡରଙ୍କ ମୃତ୍ୟୁ ହୋଇଥିଲା।
ମୃତ୍ୟୁବରଣ କରିଥିବା ଆତଙ୍କବାଦୀଙ୍କ ନାମ କମାଣ୍ଡର ୟାସିନ ଓରଫ ଅବଦୁଲ୍ଲା। ଆଫଗାନିସ୍ତାନ ସୀମାନ୍ତ ଖାଇବର ଜିଲ୍ଲାର ତିରାହ ଘାଟିରେ ଏକ କ୍ୱାଡକପ୍ଟର ଉଡ଼ାଇବାକୁ ଚେଷ୍ଟା କରୁଥିବା ସମୟରେ ଏକ ବୋମା ବିସ୍ଫୋରଣ ହେବାରୁ ଆତଙ୍କବାଦୀ ଅବଦୁଲ୍ଲାର ମୃତ୍ୟୁ ହୋଇଥିଲା।
ସୂତ୍ର ଅନୁଯାୟୀ, ବୋମା ବିସ୍ଫୋରଣରେ କମାଣ୍ଡର ଅବଦୁଲ୍ଲାଙ୍କ ଆଉ ଦୁଇ ଜଣ ସାଥୀ ଗୁରୁତର ଆହତ ହୋଇଛନ୍ତି। ସେ କହିଛନ୍ତି ଯେ ୟାସିନ ଏବଂ ତାଙ୍କ ଗୋଷ୍ଠୀ ମେ ୨୪ ତାରିଖରେ ଆନୁଷ୍ଠାନିକ ଭାବରେ ନିଷିଦ୍ଧ ଟିଟିପିରେ ଯୋଗ ଦେଇଥିଲେ।
ତେହେରିକ-ଏ-ତାଲିବାନ ପାକିସ୍ତାନର ଏକ ଆତଙ୍କବାଦୀ ସଂଗଠନ। ଏହି ସଂଗଠନ ୨୦୦୭ ମସିହାରେ ଗଠିତ ହୋଇଥିଲା। ସଂଗଠନର ପ୍ରତିଷ୍ଠାତା ନେତା ଥିଲେ ବୈତୁଲ୍ଲା ମେହସୁଦ। ଏହାର ମୂଳ ଆଫଗାନିସ୍ତାନ/ପାକିସ୍ତାନ ସୀମାରେ ଅବସ୍ଥିତ। କିଛି ଆକଳନ ଅନୁଯାୟୀ, ଟିଟିପିର ୩୦,୦୦୦ ରୁ ୩୫,୦୦୦ ସଦସ୍ୟ ଅଛନ୍ତି।
ଚୀନ୍ ତିଆରି କଲା ନୂଆ ଟ୍ରେନ୍, ଘଣ୍ଟାକୁ ଗଡିବ ୬୦୦ କିଲୋମିଟର…
ନନ୍ଦିଘୋଷ ବ୍ୟୁରୋ : ବିଶ୍ୱର ଅନେକ ଦେଶରେ ବୁଲେଟ୍ ଟ୍ରେନ୍ ବିଷୟରେ ଚର୍ଚ୍ଚା ହେଉଛି । ଭାରତ ମଧ୍ୟ ବୁଲେଟ୍ ଟ୍ରେନ୍ ଆଡ଼କୁ ପଦକ୍ଷେପ ନେଇଛି। କିନ୍ତୁ ଚୀନ୍ ପୁଣିଥରେ ପ୍ରମାଣିତ କରିଛି ଯେ ସେ ସମସ୍ତଙ୍କଠାରୁ ଗୋଟିଏ ପାଦ ଆଗରେ। ପ୍ରକୃତରେ ଚୀନ୍ ଏପରି ଏକ ଟ୍ରେନ୍ ତିଆରି କରିଛି ଯାହା ବୁଲେଟ୍ ଟ୍ରେନର ଦୁଇଗୁଣ ଗତିରେ ଚାଲିବ। ଏହାକୁ ମ୍ୟାଗ୍ଲେଭ୍ ଟ୍ରେନ୍ କୁହାଯାଏ। ଏହା କେବଳ ଚୀନ୍ରେ ନୁହେଁ ବରଂ ବିଶ୍ୱର ସବୁଠାରୁ ଦ୍ରୁତତମ ଟ୍ରେନ୍ ହେବ। ଏହାର ସର୍ବାଧିକ ଗତି ଘଣ୍ଟା ପ୍ରତି ୬୦୦ କିଲୋମିଟର ପର୍ଯ୍ୟନ୍ତ ହୋଇପାରେ।
ଶୁକ୍ରବାର ଦିନ ବେଜିଂରେ ଅନୁଷ୍ଠିତ ୧୭ତମ ଆଧୁନିକ ରେଳ ପ୍ରଦର୍ଶନୀରେ ଏହାକୁ ପ୍ରଦର୍ଶିତ କରାଯାଇଥିଲା। ଚୀନ୍ ରେଳବାଇ ରୋଲିଂ ଷ୍ଟକ୍ କର୍ପୋରେସନ ଦ୍ୱାରା ବିକଶିତ ଏହି ଟ୍ରେନର କୌଣସି ଚକ ନାହିଁ, ଏହା ଚୁମ୍ବକୀୟ ଶକ୍ତିରେ ଚାଲିଥାଏ । ଏହାକୁ ଏପରି ଭାବରେ ଡିଜାଇନ୍ କରାଯାଇଛି ଯେ ଏହା ପବନର ବେଗ ଅପେକ୍ଷା ଅନେକ ଗୁଣ ଦ୍ରୁତ ଗତିରେ ଚାଲିପାରିବ। ଏହାର ଭିତର ଅଂଶ ଯାହା ଦେଖାଯାଇଛି ତାହା ମଧ୍ୟ ବହୁତ ସ୍ୱତନ୍ତ୍ର।
ମ୍ୟାଗ୍ଲେଭ ଅର୍ଥ ହେଉଛି ଚୁମ୍ବକୀୟ ଉଚ୍ଛେଦ । ଅର୍ଥାତ୍, ସେମାନେ ଚୁମ୍ବକୀୟ ଶକ୍ତି ବ୍ୟବହାର କରି ବାୟୁରେ ଭାସନ୍ତି, ସେମାନେ ଭାସନ୍ତି କାରଣ ସେମାନଙ୍କର ଚକ ନାହିଁ। ସେମାନଙ୍କର ଟ୍ରାକ ସହିତ ଘର୍ଷଣ ବହୁତ କମ୍ ଥାଏ । ଯାହା ଫଳରେ ସେମାନେ ଉଚ୍ଚ ଗତି ହାସଲ କରିପାରିବେ। ଏଗୁଡ଼ିକୁ ପାରମ୍ପରିକ ଟ୍ରେନ ଅପେକ୍ଷା ଅଧିକ କୁଶଳ ବୋଲି ବିବେଚନା କରାଯାଏ।
ମାଗ୍ଲେଭ ଟ୍ରେନ ନିର୍ମାଣ କରିଥିବା କର୍ପୋରେସନ ଅନୁଯାୟୀ, ଏହାର ପ୍ରଥମ ପର୍ଯ୍ୟାୟ ସମାପ୍ତ ହୋଇଛି। ଏହାର ବାଣିଜ୍ୟିକ ବ୍ୟବହାର ପୂର୍ବରୁ ଏହାକୁ ଏପର୍ଯ୍ୟନ୍ତ ପରୀକ୍ଷଣ କରାଯାଇ ନାହିଁ। ଚୀନ ଗଣମାଧ୍ୟମ ଅନୁଯାୟୀ, ଏହି ଟ୍ରେନ ଚୀନର ରେଳ ନେଟୱାର୍କ ବ୍ୟତୀତ ପ୍ରମୁଖ ସହରଗୁଡ଼ିକ ମଧ୍ୟରେ ଚଳାଚଳ କରିବ। ଉଦାହରଣ ସ୍ୱରୂପ, ଏହି ଟ୍ରେନ ବେଜିଂ ଓ ସାଂଘାଇ ମଧ୍ୟରେ ୧୨୦୦ କିଲୋମିଟର ଦୂରତା ମାତ୍ର ଅଢ଼େଇ ଘଣ୍ଟାରେ ୬୦୦ କିଲୋମିଟର ପ୍ରତି ଘଣ୍ଟା ବେଗରେ ଅତିକ୍ରମ କରିବ । ବର୍ତ୍ତମାନ ଏହି ଦୂରତା ଅତିକ୍ରମ କରିବାକୁ ପ୍ରାୟ ସାଢ଼େ ୫ ଘଣ୍ଟା ସମୟ ଲାଗେ। ଏହି ଟ୍ରେନ ଚାଚଳ ପରେ ଏହା ଆହୁରି ଶିଘ୍ର ପହଞ୍ଚିବ ।
ସିଆରଆରସିର ବରିଷ୍ଠ ଇଞ୍ଜିନିୟର ଶାଓ ନାନଙ୍କ ଉଦ୍ଧୃତି ଦେଇ ଦି ପେପର ଲେଖିଛନ୍ତି ଯେ ଏହି ଟ୍ରେନ୍ ୨ ହଜାର କିଲୋମିଟର ମଧ୍ୟରେ ଏକ ବିମାନ ଏବଂ ଏକ ହାଇ-ସ୍ପିଡ୍ ଟ୍ରେନ୍ ମଧ୍ୟରେ ଥିବା ବ୍ୟବଧାନକୁ ପୂରଣ କରିବ। ଏହା ସୁରକ୍ଷା ସହିତ ଯାତ୍ରା ସମାପ୍ତ କରିବାରେ ସମୟ ବଞ୍ଚାଇବ।
ଚୀନ୍ ଦ୍ୱାରା ପ୍ରଦର୍ଶିତ ଟ୍ରେନ୍ର ମଡେଲ୍ ସମ୍ପୂର୍ଣ୍ଣ ସ୍ୱୟଂଚାଳିତ ହେବ। ଏଥିପାଇଁ ଏଥିରେ 5G ଯୋଗାଯୋଗ, AI ଭିଡିଓ କ୍ୟାପଚର ଏବଂ ବିଭିନ୍ନ ପ୍ରକାରର ସେନ୍ସର ରହିବ। ଶାଓନାନ୍ କହିଛନ୍ତି ଯେ ଚୀନ୍ର ପ୍ରଥମ ମ୍ୟାଗ୍ଲେଭ୍ ଲାଇନ୍ ୨୦୦୩ ମସିହାରେ ଜର୍ମାନୀ ସହାୟତାରେ ଆରମ୍ଭ ହୋଇଥିଲା । ଯାହା ସାଂଘାଇର ପୁଡୋଙ୍ଗ୍ ଅନ୍ତର୍ଜାତୀୟ ବିମାନବନ୍ଦରକୁ ସହର ସହିତ ସଂଯୋଗ କରିଥିଲା। ୨୦୧୬ ମସିହାରେ, ଚୀନ୍ ଚାଙ୍ଗସାରେ ଏହାର ପ୍ରଥମ ଘରୋଇ ମ୍ୟାଗ୍ଲେଭ୍ ଲାଇନ୍ ଆରମ୍ଭ କରିଥିଲା । ତା’ପରେ ୨୦୧୭ ମସିହାରେ ବେଜିଂରେ ଏହା ଆରମ୍ଭ ହୋଇଥିଲା। ତଥାପି, ସେମାନଙ୍କର ସର୍ବାଧିକ ଗତି ଏପର୍ଯ୍ୟନ୍ତ ଘଣ୍ଟା ପ୍ରତି ୧୨୦ କିଲୋମିଟର ପର୍ଯ୍ୟନ୍ତ ସୀମିତ।
ଗତ ବର୍ଷ ହିଁ, ଚୀନ୍ ଏହାର ମ୍ୟାଗ୍ଲେଭ୍ ହାଇପରଲୁପ୍ ପ୍ରକଳ୍ପର ପରୀକ୍ଷଣ କରିଥିଲା, ଯାହା ଘଣ୍ଟା ପ୍ରତି ସର୍ବାଧିକ ୧୦୦୦ କିଲୋମିଟର ବେଗରେ ପହଞ୍ଚିବା ପାଇଁ ଡିଜାଇନ୍ କରାଯାଇଥିଲା। ହାଇପରଲୁପ୍ ପ୍ରଯୁକ୍ତିବିଦ୍ୟା, ଯାହା ଏପର୍ଯ୍ୟନ୍ତ ପରୀକ୍ଷାମୂଳକ ପର୍ଯ୍ୟାୟରେ ଅଛି । ଟ୍ରେନଗୁଡ଼ିକୁ ଚଲାଇବା ପାଇଁ ଚୁମ୍ବକୀୟ ପ୍ରଚଳନ ପ୍ରଣାଳୀ ସହିତ କମ୍-ଚାପ ଭାକ୍ୟୁମ୍ ଟ୍ୟୁବ୍ ବ୍ୟବହାର କରେ।
ଆଜି ମୁମ୍ଵାଇରୁ ଫେରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ
ଭୁବନେଶ୍ବର : ଆଜି ମୁମ୍ଵାଇରୁ ଫେରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ। ଦିନ ୧୧ଟାରେ ସେ ଭୁବନେଶ୍ଵର ବିମାନ ବନ୍ଦରରେ ପହଞ୍ଚିବେ। ମୁମ୍ବାଇରୁ ଓଡ଼ିଶା ଫେରିବେ ବିରୋଧୀ ଦଳ ନେତା ନବୀନ ପଟ୍ଟନାୟକ। ଗତ ଜୁନ ୨୦ ତାରିଖରେ ଅସ୍ତ୍ରୋପଚାର ପାଇଁ ସେ ମୁମ୍ଵାଇ ଯାଇଥିଲେ। ଜୁନ୍ ୨୨ ତାରିଖରେ କୋକିଳାବେନ ଧୀରୁ ଭାଇ ଅମ୍ଵାନୀ ହସପିଟାଲରେ ହୋଇଥିଲା ସର୍ଭିକାଲ ଆର୍ଥ୍ରାଇଟିସ ଅପରେସନ। ନବୀନ ପଟ୍ଟନାୟକ ସଂପୂର୍ଣ୍ଣ ସୁସ୍ଥ ହୋଇଛନ୍ତି। ତାଙ୍କ ପାଇଁ ସାରା ରାଜ୍ୟବାସୀ ଆଶୁ ଆରୋଗ୍ୟ କାମନା କରିଥିଲେ। ଗତ ୭ ତାରିଖରେ ସେ ହସ୍ପିଟାଲରୁ ଡିସଚାର୍ଜ ହୋଇଥିଲେ। ଆଜି ଭୁବନେଶ୍ଵର ଫେରୁଛନ୍ତି।
ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ଆସିଲା ପ୍ରାଥମିକ ତଦନ୍ତ ରିପୋର୍ଟ
ନନ୍ଦିଘୋଷ ବ୍ୟୁରୋ ; ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ଆସିଲା ପ୍ରାଥମିକ ତଦନ୍ତରି ପୋର୍ଟ। ଏୟାର ଇଣ୍ଡିଆର ବୋଇଂ ୭୮୭ ବିମାନଟି ଅହମ୍ମଦାବାଦରେ ଉଡ଼ାଣ ଭରିବାର କିଛି ସେକେଣ୍ଡ ପରେ ଦୁର୍ଘଟଣାଗ୍ରସ୍ତ ହୋଇଥିଲା। ଭାରତୀୟ ବିମାନ ଦୁର୍ଘଟଣା ତଦନ୍ତ ବ୍ୟୁରୋ AAIB ଏହି ଦୁର୍ଘଟଣା ଉପରେ ଏକ ପ୍ରାରମ୍ଭିକ ରିପୋର୍ଟ ପ୍ରକାଶ କରିଛି। ରିପୋର୍ଟରେ ଅନେକ ଆଶ୍ଚର୍ଯ୍ୟଜନକ ଖୁଲାସା ହୋଇଛି। ଉଡ଼ାଣ ଭରିବା ପରେ ଉଭୟ ଇଞ୍ଜିନ୍ ହଠାତ୍ ବନ୍ଦ ହୋଇଯାଇଥିଲା। ଯେଉଁ କାରଣରୁ ବିମାନଟି ଉଠିବାକୁ ଆଉ ଶକ୍ତି ପାଇପାରିଲା ନାହିଁ । ଏହି କାରଣରୁ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। AAIB ରିପୋର୍ଟ ଅନୁଯାୟୀ, ବିମାନଟି ଠିକ୍ ଭାବରେ ଉଡ଼ାଣ ଭରିଥିଲା। ଏହା ପରେ, ସବୁକିଛି ସ୍ୱାଭାବିକ ଥିଲା ଏବଂ ଏହା ଆବଶ୍ୟକ ଉଚ୍ଚତାରେ ମଧ୍ୟ ପହଞ୍ଚିଥିଲା। କିନ୍ତୁ ତା’ପରେ ଉଭୟ ଇଞ୍ଜିନର ଇନ୍ଧନ ସ୍ୱିଚ୍ RUNରୁ CUTOFFକୁ ଘୁଞ୍ଚିଗଲା। ଏହାର ଅର୍ଥ ହେଉଛି ଇଞ୍ଜିନକୁ ଇନ୍ଧନ ମିଳିବା ବନ୍ଦ ହୋଇଗଲା। ଯେତେବେଳେ ଇନ୍ଧନ ଇଞ୍ଜିନ ପର୍ଯ୍ୟନ୍ତ ପହଞ୍ଚିଲା ନାହିଁ ସେତେବେଳେ ଇଂଜିନ ବନ୍ଦ ହୋଇଗଲା। ଶକ୍ତି ମିଳିବା ବନ୍ଦ ହୋଇଯିବାରୁ ପ୍ଲେନ୍ ଦୁର୍ଘଟଣାଗ୍ରସ୍ତ ହେଲା। ପାଇଲଟମାନଙ୍କ ମଧ୍ୟରେ ହୋଇଥିବା କଥାବାର୍ତ୍ତା ପ୍ରକାଶ ପାଇଛି। ରିପୋର୍ଟରେ ଉଡ଼ାଣର ଦୁଇ ପାଇଲଟ୍ ସୁମିତ ସବରୱାଲ ଏବଂ ସହ-ପାଇଲଟ୍ କ୍ଲାଇଭ୍ କୁନ୍ଦରଙ୍କ ମଧ୍ୟରେ ହୋଇଥିବା କଥାବାର୍ତ୍ତା ପ୍ରକାଶ ପାଇଛି । ଇଞ୍ଜିନ୍ କାହିଁକି ବନ୍ଦ ହୋଇଗଲା ଏହା ସବୁଠାରୁ ବଡ଼ ପ୍ରଶ୍ନ। ରିପୋର୍ଟରୁ ଜଣାପଡୁଛି ଯେ ଏହା ଏକ ଯାନ୍ତ୍ରିକ ତ୍ରୁଟି ହୋଇପାରେ। ତଥାପି ଏଥିରେ ମାନବଜନିତ ତ୍ରୁଟି ହେବାର ମଧ୍ୟ ସମ୍ଭାବନା ରହିଛି। ବିମାନ ଦୁର୍ଘଟଣାର ଏକ ବିସ୍ତୃତ ତଦନ୍ତ ଏବେ ଚାଲିଛି। ବର୍ତ୍ତମାନ ଉଭୟ ଇଞ୍ଜିନ କିପରି ଆପେ ଆପେ ବନ୍ଦ ହୋଇଗଲା ତାହା ତଦନ୍ତ କରାଯାଉଛି।
ଆଜିଠୁ ସାରା ରାଜ୍ୟରେ ଗଡ଼ିଲା ବସ୍
ଭୁବନେଶ୍ବର : ରାଜ୍ୟ ଘରୋଇ ବସ ମାଲିକ ସଂଘର ନିଷ୍ପତ୍ତି ଅନୁସାରେ ଆଜିଠୁ ସାରା ରାଜ୍ୟରେ ଗଡ଼ିଲା ବସ୍ । ଗତକାଲି ବସ ଚଳାଚଳ ନେଇ ସୂଚନା ଦେଇଥିଲେ ଘରୋଇ ବସ ମାଲିକ ସଂଘ। ଯାତ୍ରୀଙ୍କ ସ୍ବାର୍ଥକୁ ଦୃଷ୍ଟିରେ ରଖି ସଂଘ ନେଇଛି ନିଷ୍ପତ୍ତି। କୌଣସି ଅପ୍ରୀତିକର ପରିସ୍ଥିତି ଉପୁଜିଲେ ପୋଲିସ ଓ ପ୍ରଶାସନର ସହାୟତା ନିଆଯିବ। ରାଜ୍ୟ ସରକାର ସୁରକ୍ଷା ଯୋଗାଇବା ପାଇଁ ଦାବି ହୋଇଛି। ଡ୍ରାଇଭର ମହାସଂଘର ଆନ୍ଦୋଳନ ଯୋଗୁଁ ବନ୍ଦ ଥିଲା ବସ ଚଳାଚଳ। ଡ୍ରାଇଭର ମହାସଂଘ ଜିଦଖୋର ମନୋଭାବରୁ ନିବୃତ ରହିବାକୁ କଟକ ବସ ମାଲିକ ସଂଘ ନିବେଦନ କରିଛି। ଯଦି ସରକାର ଡ୍ରାଇଭର ମହାସଂଘର ଦାବିକୁ କିଛିଟା ମାନି ନେଇଛନ୍ତି ତାହେଲେ ସେମାନଙ୍କୁ ଲେଖି କରି ଦେବାରେ ଅସୁବିଧା କେଉଁଠି ରହିଛି। ଏହାସହିତ ଆମେ ବସଚଳାଚଳା କାଁ ଭାଁ ଜାରି ରଖିଥିଲୁ। କିନ୍ତୁ ବାଟରେ ଆମ ଗାଡ଼ିକୁ ଅଟକାଇ କେତେକ ଡ୍ରାଇଭର ମହାସଂଘର କର୍ମକର୍ତ୍ତା ଗାଡ଼ି ଭଙ୍ଗାରୁଜା କରିଛନ୍ତି। ଏହି କ୍ଷତିର ଭରଣା କରିବ କିଏ ? ଏ ନେଇ ପ୍ରଶ୍ନ ଉଠାଇଛନ୍ତି ରାଜ୍ଯ ବସ ମାଲିକ ସଂଘ। ସେପଟେ ଡ୍ରାଇଭର ମହାସଂଘର ଆନ୍ଦୋଳନ ଯୋଗୁ ଟ୍ରକ୍ ପରିବହନ ବନ୍ଦ ରହିଛି। ବିଭିନ୍ନ ସ୍ଥାନରୁ ଆସି ପାରୁନି ଜିନିଷପତ୍ର। ଆନ୍ଦୋଳନ ଯୋଗୁ ଗଡ଼ୁନି ଟ୍ରକ।ଏନେଇ ଓଡ଼ିଶା ରାଜ୍ୟ ଟ୍ରକ୍ ମାଲିକ ସଂଘ ସାଧାରଣ ସମ୍ପାଦକ କହିଛନ୍ତି, ସମସ୍ତ ଡ୍ରାଇଭର ଧର୍ମଘଟରେ ଅଛନ୍ତି। ତେଣୁ ମାଲିକମାନେ ନିରୁପାୟ। ଏଭଳି ସ୍ଥିତିରେ ବସ ମାଲିକ ସଂଘ କେମିତି ଗାଡ଼ି ଚଳାଇବେ, ତାହା ସେମାନଙ୍କୁ ଜଣା। କିନ୍ତୁ ଧର୍ମଘଟ ପ୍ରତ୍ୟାହାର ନେଇ ଡ୍ରାଇଭର ମହାସଂଘ କୌଣସି ସୂଚନା ଦେଇନଥିବା କହିଛନ୍ତି ଓଡ଼ିଶା ରାଜ୍ୟ ଟ୍ରକ୍ ମାଲିକ ସଂଘ ସାଧାରଣ ସମ୍ପାଦକ।