ନୂଆଦିଲ୍ଲୀ : ବିହାର ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗ। ସଂସଦରେ ଏହାକୁ ନେଇ ଅଚଳାବସ୍ଥା ଜାରି ରହିଛି। ପ୍ରତିବାଦରେ ବିରୋଧୀ ସାଂସଦ କରିଛନ୍ତି ଡଷ୍ଟବିନ ପ୍ରୋଟେଷ୍ଟ। ଆଜି ପଞ୍ଚମ ଦିନରେ ବି ସଂସଦ ହୋଇଥିଲା ଅଚଳ। ବିହାର ସ୍ପେସାଲ ଇଣ୍ଟେନସିଭ ରିଭିଜନକୁ ନେଇ ସଂସଦ ଭବନ ବାହାରେ ପ୍ରତିବାଦ କରିଥିଲେ ଇଣ୍ଡିମେଣ୍ଟ ସାଂସଦ। ବିକ୍ଷୋଭରେ ସାମିଲ ହୋଇଥିଲେ ବିରୋଧୀ ଦଳ ନେତା ରାହୁଲ ଗାନ୍ଧି, ପ୍ରିୟଙ୍କା ଗାନ୍ଧିଙ୍କ ସମେତ ବହୁ ନେତା। ବିକ୍ଷୋଭରେ ସାଙ୍କେତିକ ଭାବେ ବିହାର ଏସଆଇଆରକୁ ଚିରିବା ସହ ଡଷ୍ଟବିନରେ ପକାଇଥିଲେ ସାଂସଦ। ଗତ ୨୧ ତାରିଖଠାରୁ ଏହି ପ୍ରସଙ୍ଗରେ ସଂସଦରେ ବିକ୍ଷୋଭ ଜାରି ରଖିଛନ୍ତି ସାଂସଦ। ଏସଆଇଆର ଯୋଗୁ ବର୍ତ୍ତମାନ ସୁଦ୍ଧା ୫୬ ଲକ୍ଷରୁ ଅଧିକ ଭୋଟର ବାଦ୍ ପଡିଥିବା ନେଇ ସୂଚନା ମିଳିଥିବାବେଳେ ଆହୁରି ବହୁ ଅଧିକ ଭୋଟର ବାଦ୍ ପଡିବା ଆଶଙ୍କା ସୃଷ୍ଟି ହୋଇଛି। ଏହାକୁ କେନ୍ଦ୍ର କରି ବିରୋଧୀ ସାଂସଦମାନେ ତୀବ୍ର ହଟ୍ଟଗୋଳ କରିବା ସହ ସଂସଦ ଭବନ ବାହାରେ ପ୍ରତିବାଦ କରିଛନ୍ତି।
ରାଜଧାନୀ କ୍ଯାପିଟାଲ ହସ୍ପିଟାଲରେ ହନ୍ତସନ୍ତ ରୋଗୀ, ଡାକ୍ତରଙ୍କ ଅଭାବରୁ ବଢୁଛି ସମସ୍ଯା
ଭୁବନେଶ୍ବର : କ୍ଯାପିଟାଲ ହସ୍ପିଟାଲରେ ହନ୍ତସନ୍ତ ରୋଗୀ । ଡାକ୍ତରଙ୍କ ଅଭାବରୁ ବଢୁଛି ସମସ୍ଯା । ରାଜଧାନୀର ପ୍ରମୁଖ କ୍ଯାପିଟାଲ ହସପିଟାଲର ରେଜିଷ୍ଟ୍ରେସନ୍ କାଉଣ୍ଟରରୁ ଆରମ୍ଭକରି, ରୋଗୀସେବା ଓ ଔଷଧ କାଉଣ୍ଟରରେ ପ୍ରତିଦିନ ଦେଖିବାକୁ ମିଳୁଛି ଲମ୍ବା ଧାଡ଼ି । ଘଣ୍ଟା ଘଣ୍ଟା ଧରି ଠିଆହେବା ପରେ ବି ଅନେକ ସମୟରେ ନିରାଶ ଫେରୁଛନ୍ତି ରୋଗୀ ଓ ତାଙ୍କ ସମ୍ପର୍କୀୟ । ବିଶେଷକରି ପ୍ରତିଦିନ ଦୁର୍ଘଟଣା ଜନିତ ମାମଲା ଅଧିକ ଆସୁଥିବାରୁ ଡାକ୍ତରଙ୍କ ଅଭାବ ବଢାଇଛି ଚିନ୍ତା । ମେଡ଼ିସିନ୍, ହାର୍ଟ ଓ ମହିଳା ପ୍ରସୂତି ବିଭାଗ ନିକଟରେ ବି ଭିଡ଼ ଜମୁଛି । ଅବଶ୍ଯକ ସଂଖ୍ଯକ ଡାକ୍ତର ଓ କର୍ମଚାରୀ ନଥିବାରୁ ରୋଗୀ ସେବାର ଏପରି ବିକଳ ଚିତ୍ର ଦେଖିବାକୁ ମିଳୁଥିବା ଅଭିଯୋଗ ହୋଇଛି । ପ୍ରତିଦିନ ୫ ହଜାରରୁ ଅଧିକ ରୋଗୀ ହସପିଟାଲକୁ ଆସୁଛନ୍ତି । ୪ ଶହରୁ ଅଧିକ ଆଡମିଟ ହେଉଛନ୍ତି । କିନ୍ତୁ ଡାକ୍ତର ଅଭାବରୁ ବାଧ୍ଯହୋଇ ଅନ୍ଯତ୍ର ଯିବାକୁ ପଡୁଥିବା ରୋଗୀ ଓ ତାଙ୍କ ସମ୍ପର୍କୀୟ ଅଭିଯୋଗ କରିଛନ୍ତି ।
ଡାକ୍ତରଖାନାରେ ୬୦ ଟି ଡାକ୍ତର ଓ ନର୍ସିଂ ଅଫିସରଙ୍କ ପଦବୀ ଖାଲିପଡ଼ି ଥିବା କହିଛନ୍ତି କ୍ଯାପିଟାଲ ହସପିଟାଲ ନିର୍ଦ୍ଦେଶକ I ଏନେଇ ପ୍ରତ୍ୟେକ ମାସ ଲିଖିତ ଆକାରରେ ସରକାରଙ୍କୁ ସୂଚନା ଦିଆଯାଇଛି । ଆଉଟ ସୋର୍ସିଂ ଆଧାରରେ ଯେତିକି ସମ୍ଭବ ପୁରା କରିବାକୁ ଚେଷ୍ଟା କରାଯାଉଛି । ୨ ଟି ବିଭାଗକୁ ମିଶାଇ ୨ ଶହ ରୁ ଅଧିକ ଡ଼ାକ୍ତର ଅଛନ୍ତି । ଆବଶ୍ୟକ ଡାକ୍ତର ଓ ନର୍ସିଂ ଅଫିସର ପଦବୀ ପୂରଣ ହୋଇପାରିଲେ ଆହୁରି ଉନ୍ନତ ମାନର ଚିକିତ୍ସା ଯୋଗାଇଦିଆ ଯାଇ ପାରିବ ବୋଲି କହିଛନ୍ତି କ୍ଯାପିଟାଲ ହସପିଟାଲ ନିର୍ଦ୍ଦେଶକ ।
ସମୁଦ୍ର ଆଁ ଭିତରେ ଲୀନ ହୋଇଯିବ ଗାଁ, ଭୟରେ ଦିନ କାଟୁଛନ୍ତି ଗଞ୍ଜାମ ୩ ଖଣ୍ଡ ଗାଁ ଲୋକ
ବ୍ରହ୍ମପୁର : ଗାଁ ମୁହାଁ ମହୋଦଧି । ଅଶାନ୍ତ ହେଉଛି ପାରାବାର । ସମୁଦ୍ର ଗର୍ଭରେ ଗାଁ ଲୀନ ହେବା ଆଶଂକା । ପାଣିରେ ଧୋଇ ହେଲା ଆଶ୍ରୟ ସ୍ଥଳୀ, ଜେଟି ଘର, ମଶାଣି ଓ ମନ୍ଦିର । ଆଉ ମାତ୍ର ଶହେ ମିଟର ଦୂରରେ ରହିଛି ସମୁଦ୍ର । ଆତଙ୍କିତ ଗ୍ରାମବାସୀ । ଏହି ଦୃଶ୍ଯ ହେଉଛି ଗଞ୍ଜାମ ଜିଲ୍ଲା ଛତ୍ରପୁର ବ୍ଲକର ଆର୍ଯ୍ୟପଲ୍ଲୀ ଗାଁ । ଦିନ ଥିଲା ଗାଁରୁ ପ୍ରାୟ ଦୁଇ କିଲୋମିଟର ଦୂରରେ ଥିଲା ସମୁଦ୍ର। କିନ୍ତୁ ଧିରେ ଧିରେ ସମୁଦ୍ର ଅଶାନ୍ତ ହେବା ସହ ଗାଁ ଆଡ଼କୁ ମୁହାଁଇଛି । ଏବେ ସମୁଦ୍ରରୁ ଆଉ ମାତ୍ର ଶହେ ମିଟର ଦୂରରେ ରହିଛି ଆର୍ଯ୍ୟପଲ୍ଲୀ ଗାଁ । ଆଗାମୀ ଦିନରେ ଯଦି ବାତ୍ୟା ଆସେ ତେବେ ଆର୍ଯ୍ୟପଲ୍ଲୀ ଗାଁ ସମ୍ପୂର୍ଣ୍ଣ ସମୁଦ୍ରରେ ଲୀନ ହୋଇଯିବ ବୋଲି ଆଶଂକା କରିଛନ୍ତି ଗ୍ରାମବାସୀ । ପାଞ୍ଚ ଦିନ ହେବ ଭୟଙ୍କର ଲହଡି ଆସୁଛି । ଆଗକୁ ପୂର୍ଣ୍ଣିମା ଥିବାରୁ ଆତଙ୍କିତ ଅବସ୍ଥାରେ ଅଛନ୍ତି ଲୋକେ ।
ସମୁଦ୍ର ଅଶାନ୍ତ ରହିଥିବା ଯୋଗୁଁ ବହୁତ ଦିନ ହେଲା ସମୁଦ୍ରକୁ ମାଛ ମାରିବା ପାଇଁ ଯାଇପାରି ନାହାନ୍ତି ସ୍ଥାନୀୟ ମତ୍ସ୍ୟଜୀବୀ । ବିଭିନ୍ନ ସମୟରେ ଏଭଳି ସ୍ଥିତି ଦେଖିବାକୁ ମିଳୁଥିବା ଯୋଗୁଁ ଅଧିକାଂଶ ମତ୍ସ୍ୟଜୀବୀ ବାହାର ରାଜ୍ୟକୁ ଦାଦନ ଖଟିବା ନିମନ୍ତେ ଗଲେଣି । କେବଳ ପୁରୁଷ ନୁହେଁ ବରଂ ଗାଁର ମହିଳା ମାନେ ମଧ୍ୟ ବ୍ରହ୍ମପୁର ଓ ଛତ୍ରପୁରକୁ ଯାଇ ମୂଲ ଲାଗି ପରିବାର ପ୍ରତିପୋଷଣ କରୁଛନ୍ତି । ୨୦୧୬ରେ ଜିଲ୍ଲା ପ୍ରଶାସନକୁ ଉପକୂଳରେ ପଥର ବନ୍ଧ ନିର୍ମାଣ କରିବା ପାଇଁ କୁହାଯାଇଥିଲା । କିନ୍ତୁ ଆଜି ପର୍ଯ୍ୟନ୍ତ ତାହା ହୋଇ ପାରିଲା ନାହିଁ । ଗାଁର ଆଶ୍ରୟସ୍ଥଳ, ଜେଟି, ମଶାଣି ସମୁଦ୍ର ଭିତରେ ଲିନ ହୋଇଗଲାଣି । ଶବ ଶତ୍କାର କରିବାକୁ ଜାଗା ନାହିଁ । ବନ୍ଦରର ଅବ୍ୟବସ୍ଥା ଯୋଗୁଁ ଗାଁ ଭିତରକୁ ସମୁଦ୍ର ପଶି ଆସୁଥିବା ଲୋକେ ଅଭିଯୋଗ କରିଛନ୍ତି । ଡଙ୍ଗା ଓ ଜାଲକୁ ଜଗି ବାହାରେ ଶୋଉଥିବା କହିଛନ୍ତି ଗ୍ରାମବାସୀ । ରାମେୟାପାଟଣା ଓ ପୋଡ଼ମପେଟା ମଧ୍ଯ ସମାନ ସ୍ଥିତି । ଆଗାମୀ ଦିନରେ ପଦକ୍ଷେପ ନନେଲେ ଆନ୍ଦୋଳନ କରିବାକୁ ଗ୍ରାମବୀସୀ ଚେତାବନୀ ଦେଇଛନ୍ତି ।
ପ୍ରଶାସନିକ ଅବହେଳାରୁ ଖତ ଖାଉଛି ଲକ୍ଷାଧିକ ଟଙ୍କାର ଜିମ୍ ସାମଗ୍ରୀ
ଜୟପୁର : ଡମ୍ପିଂୟାର୍ଡରେ ପଡ଼ିଛି ଲକ୍ଷ ଲକ୍ଷ ଟଙ୍କାର ଜିମ୍ ସାମଗ୍ରୀ । ଖତ ଖାଉଛି ପିଲାଙ୍କ ଖେଳଣା ଓ ଖେଳ ସାମଗ୍ରୀ । ଇଏ ହେଉଛି ଜୟପୁର ପୌର ପାଳିକାର ଦୃଶ୍ଯ । ପ୍ରଶାସନ ଅବହେଳାରୁ ମୋ ଖତ ସେଣ୍ଟରେ ପଡିଛି ଲକ୍ଷ ଲକ୍ଷ ଟଙ୍କାର ଜିନିଷ । ଜୟପୁର ଲୋକଙ୍କ ଆମୋଦ ଓ ସ୍ବାସ୍ଥ୍ଯର ଉନ୍ନତି ପାଇଁ ନିର୍ମାଣ ହୋଇଥିଲା ପାର୍କ । ଆଉ ସେଠାରେ ପିଲାଙ୍କ ଖେଳନା ସାମଗ୍ରୀ ସହ ଖୋଲାଯାଇଥିଲା ଓପନ ଜିମ୍ । ହେଲେ ଏବେ କେଉଁଠି ପାର୍କରେ ତାଲା ଝୁଲୁଛି ତ କେଉଁଠି ମୋ ଖତ ସେଣ୍ଟରରେ ଏସବୁ ସାମଗ୍ରୀ ଫିଙ୍ଗା ଯାଇଛି । ସହରରେ ୩୨ଟି ପାର୍କ ଓ ଶିଶୁ ବିନୋଦନ କେନ୍ଦ୍ର ନିର୍ମାଣ କରାଯାଇଥିଲା । କେନ୍ତୁ ସେସବୁ ବ୍ଯବହାର କରିବା ବଦଳରେ ଏମସିସିରେ ପରିତ୍ଯକ୍ତ ଅବସ୍ଥାରେ ପଡ଼ିଥିବାରୁ ବିଭିନ୍ନ ମହଲରୁ ପ୍ରତିକ୍ରିୟା ପ୍ରକାଶ ପାଇଛି ।
ସେପଟେ ଏପରି ଅଭିଯୋଗ ପରେ ଏନେଇ ଅନୁଧ୍ଯାନ କରାଯିବ ବୋଲି କହିଛନ୍ତି ପୌରପାଳିକା ନିର୍ବାହୀ ଯନ୍ତ୍ରୀ । ଯେଉଁ ସାମଗ୍ରୀ ଗୁଡ଼ିକ ବ୍ଯବହାର ଉପଯୋଗୀ ସେସବୁକୁ ଲଗାଯିବା ସହ ଖରାପ ହୋଇଥିବା ଉପକରଣକୁ ବଦଳାଯିବ ବୋଲି କହିଛନ୍ତି । ଖୁବଶୀଘ୍ର ପାର୍କ ଗୁଡ଼ିକ ମରାମତି କରାଯାଇ ଲୋକଙ୍କ ଉଦ୍ଦେଶ୍ଯରେ ଖୋଲିବାକୁ ନିର୍ଦ୍ଦେଶ ଦିଆଯାଇଥିବା ସେ ସୂଚନା ଦେଇଛନ୍ତି । ରକ୍ଷଣାବେକ୍ଷଣ ପାଇଁ ସ୍ବୟଂ ସହାୟକ ଗୋଷ୍ଠୀକୁ ଦାୟିତ୍ବ ଦିଆ ଯାଇଥିବା ବେଳେ ସଠିକ ଅର୍ଥ ପ୍ରଦାନ କରାଯାଉ ନଥିବାରୁ ଏପରି ସ୍ଥିତି ସୃଷ୍ଟି ହୋଇଥିବା ଅଭିଯୋଗ ହୋଇଛି ।..
ଅବ୍ଯବସ୍ଥା ଘେରରେ ରାଉରକେଲା ବିଶ୍ରାଛକ ବସଷ୍ଟାଣ୍ଡ
ରାଉରକେଲା : କେଉଁଠି ରାସ୍ତାରୁ କଂକ୍ରିଟ ଉଠି ପାଣି ଜମା ହେଉଛି ତ କେଉଁଠି ଲୁହା ରଡ଼ ଉଠିଲାଣି । ପରିତ୍ଯକ୍ତ ଅବସ୍ଥାରେ ବସ ବେ । ବସଷ୍ଟାଣ୍ଡ କୋଠାଘରୁ ଅତଡ଼ା ଖସୁଥିବାରୁ ଆତଙ୍କିତ ଯାତ୍ରୀ । ଇଏ ହେଉଛି ରାଉରକେଲା ନୂଆ ବସଷ୍ଟାଣ୍ଡର ଦୃଶ୍ଯ । ବିଶ୍ରା ଛକ ନିକଟରେ ଥିବା ଏହି ନୁଆ ବସ୍ ଷ୍ଟାଣ୍ଡରୁ ପ୍ରତିଦିନ ୪ ଶହରୁ ଅଧିକ ବସ୍ ଓ ହଜାର ହଜାର ଯାତ୍ରୀ ରାଜ୍ୟ ଓ ରାଜ୍ୟ ବାହାରକୁ ଯାତାୟାତ କରନ୍ତି । ବସଷ୍ଟାଣ୍ଡକୁ ଆସୁଥିବା ଯାତ୍ରୀ ବିଭିନ୍ନ ଅସୁବିଧାର ସମ୍ମୁଖୀନ ହେଉଥିବା ବେଳେ ବସ କର୍ମଚାରୀମାନେ ମଧ୍ୟ ସ୍ଥିତିକୁ ଦେଖି ଆସିବାକୁ ଡରୁଛନ୍ତି । ଭିଡ଼, ବିପଦପୂର୍ଣ୍ଣ କୋଠା ଓ ଅନୁପଯୁକ୍ତ ରାସ୍ତା ଯୋଗୁଁ ଯାତ୍ରୀ, ବ୍ୟବସାୟୀ, ବସ୍ ମାଲିକ ଓ ଜନସାଧାରଣ ବିଭିନ୍ନ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହେଉଛି ।
ବସଷ୍ଟାଣ୍ଡର ଏପରି ସ୍ଥିତି ଦେଖି ଏହାର ପୁନଃ ନିର୍ମାଣ ପାଇଁ ନିଷ୍ପତ୍ତି ହୋଇଛି । ରାଉରକେଲା ଘରୋଇ ବସ୍ ଷ୍ଟାଣ୍ଡକୁ ଏକ ଅତ୍ୟାଧୁନିକ ବସ୍ ଟର୍ମିନାଲର ରୂପ ଦିଆଯିବ ବୋଲି ରାଉରକେଲା ମହାନଗର ନିଗମ କମିଶନର କହିଛନ୍ତି । ପ୍ରସ୍ତାବିତ ନୂତନ ବସ୍ ଷ୍ଟାଣ୍ଡରେ ମୋଟ ୩୬ଟି ‘ବସ୍ ବେ’ ସହ ଆରଏସପି ଠାରୁ ନିଆଯାଇଥିବା ଜାଗାରେ ଦୂରଗାମୀ ବସ୍ଗୁଡିକ ପାଇଁ ଏକ ଅତିରିକ୍ତ ପାର୍କିଂ ସ୍ଥଳ ନିର୍ମାଣ କରାଯିବ ବୋଲି କହିଛନ୍ତି ଆରଏମସି କମିଶନର। ବସଷ୍ଟାଣ୍ଡର ପୁନଃ ନିର୍ମାଣ କାର୍ଯ୍ୟ ରାଉରକେଲା ସ୍ମାର୍ଟ ସିଟି ଲିମିଟେଡ୍ ଓ ରାଉରକେଲା ଉନ୍ନୟନ କର୍ତ୍ତୃପକ୍ଷ ମିଳିତ ସହଯୋଗରେ କରାଯିବ ବୋଲି ନିଷ୍ପତ୍ତି ହୋଇଛି ।…
ଭୁଲ ପ୍ରମାଣପତ୍ର ଯୋଗୁଁ ସରକାରଙ୍କ ବର୍ଦ୍ଧିତ ଭତ୍ତାରୁ ବଞ୍ଚିତ ହେଉଛନ୍ତି ହିତାଧିକାରୀ…
ମୁନିଗୁଡା : ଜନ୍ମରୁ ଶତପ୍ରତିଶତ ଦିବ୍ଯାଙ୍ଗ ହୋଇଥିଲେ ବି ଉପଯୁକ୍ତ ଭିନ୍ନକ୍ଷମ ପ୍ରମାଣପତ୍ର ପାଇବାରୁ ବଞ୍ଚିତ। ସରକାରୀ ବାବୁଙ୍କ ଅବହେଳା ଯୋଗୁ ଏଭଳି ହିନିମାନିଆ ହେଉଚନ୍ତି ଦିବ୍ଯାଙ୍ଗ ହିତାଧିକାରୀ। ଫଳରେ ସରକାରଙ୍କ ବର୍ଦ୍ଧିତ ଭତ୍ତା ପାଇପାରୁନାହାନ୍ତି। ରାୟଗଡ଼ା ଜିଲ୍ଲା ମୁନିଗୁଡ଼ା ବ୍ଲକ ଅମ୍ବାଦଳା ପଞ୍ଚାୟତ ଇନ୍ଦିରାପଡ଼ା ଗାଁର ସୁଲତାନ ସୁନା । ଜନ୍ମରୁ ଭିନ୍ନକ୍ଷମ। ନା ଚାଲିପାରନ୍ତି ନା କିଛି କାମ କରିପାରନ୍ତି । ଏମିତିକି ନିଜର ନିତ୍ୟକର୍ମ ପାଇଁ ମଧ୍ୟ ଅନ୍ୟ ଉପରେ ନିର୍ଭର କରିଥାନ୍ତି । ସୁଲତାନ ଭିନ୍ନକ୍ଷମ ପ୍ରମାଣ ପତ୍ରଟିଏ ପାଇଁ ଅନେକ ସାମର୍ଥ୍ଯ ଶିବିରିକୁ ଯିବା ପରେ ଶେଷରେ ତାଙ୍କୁ ପ୍ରମାଣ ପତ୍ର ମିଳିଛି ହେଲେ ତା ପୁଣି ୪୦ ପ୍ରତିଶତର । ସମାନ ସ୍ଥିତି ଗୁପ୍ତେଶ୍ବରୀ ବାତ୍ରାଙ୍କ ଅବସ୍ଥା।
ସେ କଥା କହି ପାରନ୍ତିନି କି ଶୁଣି ପାରନ୍ତିନି । ତାଙ୍କୁ ୨୦୧୦ ମସିହା ନଭେମ୍ବର ୧୮ ତାରିଖରେ ଜିଲ୍ଲା ମୁଖ୍ୟ ଚିକିତ୍ସାଳୟ ପକ୍ଷରୁ ୯୦ ପ୍ରତିଶତ ଭିନ୍ନକ୍ଷମ ପ୍ରମାଣପତ୍ର ମିଳିଥିଲା । ହେଲେ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିରରେ ଡିଜିଟାଇଜେସନ ଜରିଆରେ ୧୮ ପ୍ରତିଶତ ଭିନ୍ନକ୍ଷମ ଥିବା ସାର୍ଟିଫିକେଟ ମିଳିଛି । ଆଶ୍ଚର୍ଯ୍ୟର କଥା ଯେଉଁ ବ୍ଯକ୍ତିକୁ ୨୦୧୦ରେ ୪ ଜଣ ଡାକ୍ତରଙ୍କ ଦସ୍ତଖତ ଥାଇ ୯୦% ଭିନ୍ନକ୍ଷମ ପ୍ରମାଣପତ୍ର ମିଳିଥିଲା ସମାନ ବ୍ଯକ୍ତିକୁ ୨୦୧୫ରେ କେମିତି ୧୮ ପ୍ରତିଶତ ହେଲା ? ସେଥିପାଇଁ ଦାୟୀ କିଏ ?
ରାୟଗଡା ଜିଲ୍ଲା ମୁନିଗୁଡା ବ୍ଲକରେ ଭିନ୍ନକ୍ଷମ ମାନଙ୍କୁ ଚିହ୍ନଟ ପାଇଁ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିର ଆୟୋଜିତ କରାଯାଇଥିଲା । ଏହି ଶିବିରରେ ବ୍ଲକର ୧୭ଟି ପଞ୍ଚାୟତର ଦିବ୍ଯାଙ୍ଗମାନେ ଯୋଗଦେଇଥିଲେ । ଶିବିର ଆୟୋଜନ ହୋଇ ଜିଲ୍ଲା ପ୍ରଶାସନ କାମ ସରିଦେଇଛି ସଥ। ହେଲେ ଏବେ କେତେକ ଭିନ୍ନକ୍ଷମମାନଙ୍କୁ ଉଚିତ ପ୍ରମାଣପତ୍ର ମିଳିନଥିବା ଅଭିଯୋଗ ହୋଇଛି । ସରକାର ଭୂମିହୀନ ଭିନ୍ନକ୍ଷମଙ୍କୁ ୪ ଡିସିମିଲ ଜାଗା ଓ ଆବାସ ଯୋଜନାରେ ସାମିଲ କରିବା ଭଳି ଅନେକ ଯୋଜନା ପ୍ରଣୟନ କରୁଛନ୍ତି । ହେଲେ ଭୂମିହୀନମାନଙ୍କୁ ସଠିକ ଯାଞ୍ଚ ନକରି ଭୁଲ ପ୍ରମାଣ ପତ୍ର ଦିଆଯିବାରୁ ସୁବିଧା ସୁଯୋଗରୁ ବଞ୍ଚିତ ହେଉଛନ୍ତି ଅନେକ ହିତାଧିକାରୀ ।
ଲୋକଙ୍କ ଭରସା ସାଜିଥିଲା ବାଉଁଶ ପୋଲ, ନଦୀର ସୁଅରେ ଭାସିଯିବାରୁ ଯନ୍ତ୍ରଣାରେ ୨ ବ୍ଲକ ବାସିନ୍ଦା
ଉଦଳା : ଗଙ୍ଗାହାର ନଦୀ ଉପରେ ଲୋକଙ୍କ ଭରସା ସାଜିଥିଲା ବାଉଁଶ ପୋଲ । ଯାହା କିଛି ଦିନ ପୂର୍ବରୁ ନଦୀର ସୁଅରେ ଭାସିଯାଇଛି । ମୟୂରଭଞ୍ଜ ଜିଲ୍ଲା ଗୋପବନ୍ଧୁନଗର ବ୍ଲକରେ ପ୍ରବାହିତ ଗଙ୍ଗାହାର ନଦୀ ଉପରେ ସ୍ଥାୟୀ ପୋଲଟିଏ ନିର୍ମାଣ କରିବାକୁ ଶୁଣିନି ପ୍ରଶାସନ । ବାଧ୍ଯ ହୋଇ ଗ୍ରାମବାସୀ ନିଜ ଉଦ୍ଯମରେ ବାଉଁଶ ପୋଲ ନିର୍ମାଣ କରି ଯାଆସ କରୁଥିଲେ । ହେଲେ ବାଉଁଶ ପୋଲଟି ନଦୀର ସୁଅରେ ଭାସିଯିବାରୁ ଏବେ ଯନ୍ତ୍ରଣାରେ ୨ ବ୍ଲକ ବାସିନ୍ଦା ।
ଏହି ବାଉଁଶ ପୋଲଟି ଗୋପବନ୍ଧୁନଗର ବ୍ଲକ ଏବଂ ବଡ଼ସାହି ବ୍ଲକକୁ ସଂଯୋଗ କରୁଥିଲା । ଏହା ଉପରେ ଗୋପବନ୍ଧୁନଗର ବ୍ଲକ ରାଣୀବନ୍ଧ ପଞ୍ଚାୟତରୁ ବଡ଼ସାହି ବ୍ଲକକୁ ଯିବା ପାଇଁ ୪ ପଞ୍ଚାୟତର ଲୋକେ ନିର୍ଭର କରୁଥିଲେ । ହେଲେ ପୋଲଟି ଭାଙ୍ଗିଯିବାରୁ ବାଧ୍ଯ ହୋଇ ୧୦ କିଲୋମିଟର ବୁଲି ବୁଲି ଯାଉଛନ୍ତି ଲୋକେ । ଅନେକ ଦିନର ଏହି ସମସ୍ଯା ପ୍ରତି କେହି ଦୃଷ୍ଟି ଦେଉନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଆଜି ବି ଗ୍ରାମବାସୀ ବାଉଁଶ ପୋଲ ଉପରେ ନିର୍ଭର କରୁଛନ୍ତି । କେବେ ଲୋକଙ୍କ ଯାତନାର ଅନ୍ତ ହେବ ତାହା ଉପରେ ସମସ୍ତଙ୍କ ନଜର ରହିଛି ।
ବ୍ରାହ୍ମଣୀରେ କମିଛି ବନ୍ଯା, ପଟ୍ଟାମୁଣ୍ଡାଇରେ ଲୋକଙ୍କ ବଢିଛି ଦୁର୍ଦ୍ଦଶା
ପଟ୍ଟାମୁଣ୍ଡାଇ : ବ୍ରାହ୍ମଣୀରେ କମିଛି ପାଣି । କମିଛି ବନ୍ୟା ପ୍ରକୋପ। ବନ୍ୟାଯିବା ପରେ ବଳି ଯାଇଛି ତା ପରର ଦୁଃଖ । କେଉଁଠି ଘର ଧୋଇ ହୋଇଯାଇଛି ତ ଆଉ କେଉଁଠି ଘର ଉପରେ ମାଡିଯାଇଛି ବନ୍ୟାପାଣି । ତ ଆଉ କେଉଁଠି ଘରର କାନ୍ଥ ଦବି ଯାଇଛି । ଏ ହେଉଛି କେନ୍ଦ୍ରାପଡ଼ା ପଟ୍ଟାମୁଣ୍ଡାଇର ଦୃଶ୍ଯ । ଖାଲି ସେତିକି ନୁହେଁ ନଳକୂପ ବୁଡିଯାଇଥିବା ବେଳେ ବୋରିଂ ମଧ୍ୟ ଅଚଳ ହୋଇପଡିଛି ।
ଦୀର୍ଘ ୧୦ ଦିନ ହେଲା ଜମିରେ ପାଣି ଜମି ରହିବାରୁ ତଳି ସବୁ ପଚି ନଷ୍ଟ ହୋଇଗଲାଣି । ଚାଷ ଆରମ୍ଭରୁ ବନ୍ଯା ଚାଷୀଙ୍କ ମେରୁଦଣ୍ଡ ଭାଙ୍ଗି ସାରିଲାଣି । ଯଦି ସରକାର କମ ଅବଧିର ଧାନ ବିହନ ମାଗଣାରେ ବନ୍ୟା ବିପନ୍ନଙ୍କୁ ଯୋଗାଇ ଦିଅନ୍ତେ ହୁଏତ ଚାଷୀ ପୁଣି ଚାଷ କରିପାରନ୍ତେ ବୋଲି କହିଛନ୍ତି ।
ପଟ୍ଟାମୁଣ୍ଡାଇରେ ଆଜି ବି ଅନେକ ସ୍ଥାନରେ ପାଣି ଜମି ରହିଛି । ଲୋକେ ବନ୍ଯା ପାଣି ଫୁଟାଇ ପିଉଥିବା ବେଳେ ଅନେକଙ୍କ ଚୁଲି ଜଳିନି । କୁଟା, ଘାସ ସବୁ ବନ୍ୟା ପାଣି ଲାଗି ପଚି ଯିବାରୁ ଗୋଖାଦ୍ୟର ଘୋର ଅଭାବ ଦେଖାଦେଇଛି । ଅନ୍ଯପଟେ ସ୍ଥାନୀୟ ବିଡିଓ କହିଛନ୍ତି, ଗୋଖାଦ୍ଯ ଯୋଗାଇ ଦିଆଯିବା ସହ କ୍ଷୟକ୍ଷତିର ଆକାଳନ କରାଯାଇ ସରକାରଙ୍କ ଜଣାଇ ଦିଆଯାଇଛି । ନିର୍ଦ୍ଦେଶ ଆସିଲେ କ୍ଷତିପୂରଣ ଯୋଗାଇ ଦିଆଯିବ । ବନ୍ଯା ବିପନ୍ନଙ୍କୁ ସରକାର ଶୀଘ୍ର ସହାୟତା ଯୋଗାଇଦେବାକୁ ଦାବି ହୋଇଛି ।
ପ୍ରଧାନମନ୍ତ୍ରୀଙ୍କ ନିକ୍ଷୟ ମିତ୍ର କାର୍ଯ୍ୟକ୍ରମ ଅଧୀନରେ ସୁନ୍ଦରଗଡ଼ରେ ଯକ୍ଷ୍ମାରୋଗୀଙ୍କୁ ପୁଷ୍ଟିକର ସହାୟତା ପ୍ରଦାନ କରିଛି ବେଦାନ୍ତ ଆଲୁମିନିୟମ
ଭୁବନେଶ୍ବର : ଭାରତର ସର୍ବବୃହତ ଆଲୁମିନିୟମ ଉତ୍ପାଦକ ବେଦାନ୍ତ ଆଲୁମିନିୟମ, ସୁନ୍ଦରଗଡ଼ ଜିଲ୍ଲାର ବାଲିଶଙ୍କରା ବ୍ଲକରେ ଟିବିରୋଗୀଙ୍କୁ ସହାୟତା କରିବାପାଇଁ ପ୍ରଧାନମନ୍ତ୍ରୀଙ୍କ ‘ନିକ୍ଷୟମିତ୍ର’ କାର୍ଯ୍ୟକ୍ରମ ସହ ହାତ ମିଶାଇଛି। ‘ଟିବିମୁକ୍ତ ଭାରତ ଅଭିଯାନ’କୁ ସମର୍ଥନ କରିବା ଉଦ୍ଦେଶ୍ୟରେ କମ୍ପାନୀ ସୁନ୍ଦରଗଡ଼ ଜିଲ୍ଲା ପ୍ରଶାସନ ସହିତ ମିଶି ୬୩ଜଣ ଯକ୍ଷ୍ମାରୋଗୀଙ୍କୁ ଏକବର୍ଷ ପାଇଁ ପୁଷ୍ଟିକର କିଟ୍ପ୍ର ଦାନ କରିଛି। କାର୍ଯ୍ୟକ୍ରମରେ ସୁନ୍ଦରଗଡ଼ର ମୁଖ୍ୟ ଜିଲ୍ଲା ଚିକିତ୍ସା ଅଧିକାରୀ ଡାକ୍ତର ସୁରେଶ ଚନ୍ଦ୍ର ମହାନ୍ତି, ଆଶାକର୍ମୀ ଏବଂ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ଉପସ୍ଥିତିରେ ପୁଷ୍ଟିକର କିଟ୍ ହସ୍ତାନ୍ତର କରାଯାଇଥିଲା।
କମ୍ପାନୀର ସମ୍ପ୍ରଦାୟ-କେନ୍ଦ୍ରିତ ସ୍ୱାସ୍ଥ୍ୟସେବା ପଦକ୍ଷେପ ବିଷୟରେ କହିବାକୁ ଯାଇ, ବେଦାନ୍ତ ଆଲୁମିନିୟମର ସିଇଓ ରାଜୀବ କୁମାର କହିଛନ୍ତି, “ନିକ୍ଷୟମିତ୍ର ମାଧ୍ୟମରେ, ଆମେ ଏକ‘ଯକ୍ଷ୍ମାମୁକ୍ତଭାରତ’ର ଜାତୀୟ ମିଶନରେ ଅର୍ଥପୂର୍ଣ୍ଣ ଯୋଗଦାନ ଦେବାକୁ ଲକ୍ଷ୍ୟ ରଖିଛୁ। ପୁଷ୍ଟିକର ସହାୟତା ଟିବି ଆରୋଗ୍ୟର ଏକ ଗୁରୁତ୍ୱପୂର୍ଣ୍ଣ ଉପାଦାନ। ଆଜି ପର୍ଯ୍ୟନ୍ତ, ଆମେ ଝାରସୁଗୁଡା ଏବଂ କଳାହାଣ୍ଡିରେ ୫୫୦ରୁ ଅଧିକରୋଗୀଙ୍କୁ ସମର୍ଥନ କରିଛୁ ଏବଂ ଏବେ ଏହି ସେବାକୁ ସୁନ୍ଦରଗଡକୁ ବିସ୍ତାର କରିବାକୁ ଆମେ ଉତ୍ସାହିତ। ଯାହା ଦେଶର ଦୁର୍ଗମ ଅଞ୍ଚଳରେ ଲୋକଙ୍କ ସ୍ୱାସ୍ଥ୍ୟପ୍ରତି ଆମର ପ୍ରତିବଦ୍ଧତାକୁ ଆହୁରି ମଜବୁତ କରୁଛି।”
ସୁନ୍ଦରଗଡର ଡିଏମଓ ଡକ୍ଟର ସୁରେଶ ଚନ୍ଦ୍ର ମହାନ୍ତି କହିଛନ୍ତି, “ସାଧାରଣତଃ ଦୂରଦୂରାନ୍ତ ଅଞ୍ଚଳରେ ଗୁଣାତ୍ମକ ସ୍ୱାସ୍ଥ୍ୟସେବା ପହଂଚାଇବା ଏକ ଚ୍ୟାଲେଞ୍ଜ। ଯକ୍ଷ୍ମାରୋଗୀମାନଙ୍କୁ ଚିକିତ୍ସା ସହିତ ନିରନ୍ତର ପୁଷ୍ଟିସାର ଆବଶ୍ୟକ। ବେଦାନ୍ତର ସମର୍ଥନ ଯକ୍ଷ୍ମା ଚିକିତ୍ସା ଫଳାଫଳକୁ ଉନ୍ନତ କରିବ ଏବଂ ତୃଣମୂଳସ୍ତରରେ ଉତ୍ତମଯତ୍ନ ସୁନିଶ୍ଚିତ କରିବା ପାଇଁ ସରକାରଙ୍କ ପ୍ରୟାସକୁ ମଜବୁତ କରିବ।”
ବେଦାନ୍ତ ଆଲୁମିନିୟମ ଶିକ୍ଷା, ସ୍ୱାସ୍ଥ୍ୟସେବା, ସ୍ଥାୟୀଜୀବିକା, ଭିତ୍ତିଭୂମି ଏବଂ ତୃଣମୂଳ କ୍ରୀଡା ଏବଂ ସଂସ୍କୃତିକୁ ପ୍ରୋତ୍ସାହିତ କରି ସ୍ଥାନୀୟ ସମ୍ପ୍ରଦାୟକୁ ସଶକ୍ତ କରିବା ପାଇଁ ସମର୍ପିତ ରହିଛି। ଏହି ପ୍ରୟାସ ଗୁଡ଼ିକ ବେଦାନ୍ତ ଆଲୁମିନିୟମର କାର୍ଯ୍ୟକ୍ଷମ କ୍ଷେତ୍ର ମଧ୍ୟରେ ଏବଂ ବାହାରେ ପରିବର୍ତ୍ତନ ଆଣିବା ପ୍ରତି ପ୍ରତିବଦ୍ଧତାକୁ ରେଖାଙ୍କିତ କରେ, ଓଡ଼ିଶାର ସାମଗ୍ରିକ ଅଭିବୃଦ୍ଧି ଏବଂ ପ୍ରଗତି ପ୍ରତି ସମ୍ପ୍ରଦାୟର ଅବଦାନର ଭାବନାକୁ ପ୍ରୋତ୍ସାହିତ କରେ। ସ୍ଥାନୀୟ କର୍ତ୍ତୃପକ୍ଷ ଏବଂ ସମ୍ପ୍ରଦାୟ ଅଂଶୀଦାରମାନଙ୍କ ସହିତ ଘନିଷ୍ଠ ଭାବରେ ସହଯୋଗ କରି, କମ୍ପାନୀ ନିଶ୍ଚିତ କରେ ଯେ ଏହାର ହସ୍ତକ୍ଷେପଗୁଡ଼ିକ ସାମାଜିକ-ଆର୍ଥିକ ପ୍ରଗତି ଆଡ଼କୁ ନେଇଯିବ।
ଅଶ୍ଳୀଳ ବିଷୟବସ୍ତୁ ଦେଖାଉଥିବା ୨୫ଟି OTT ପ୍ଲାଟଫର୍ମ ଏବଂ ୱେବସାଇଟ୍ ବ୍ୟାନ୍
ନନ୍ଦିଘୋଷ ବ୍ୟୁରୋ : ୨୫ଟି ଭିଡିଓ ପ୍ଲାଟଫର୍ମକୁ ବ୍ୟାନ କଲେ କେନ୍ଦ୍ର ସରକାର। ଅଶ୍ଳୀଳ କଣ୍ଟେଣ୍ଟ ପାଇଁ ପଦକ୍ଷେପ ନେଇଛନ୍ତି କେନ୍ଦ୍ର ସରକାର। ULLU, ALTT, Desiflix, Big Shots ଭଳି ଅନେକ ଲୋକପ୍ରିୟ ଷ୍ଟ୍ରିମିଂ ଆପ୍ଲିକେସନ ଉପରେ ପ୍ରତିବନ୍ଧକ ଲଗାଇଛନ୍ତି। ଅଶ୍ଳୀଳ ବିଷୟବସ୍ତୁ ପ୍ରଦର୍ଶନ କରୁଥିବା ୨୫ଟି OTT ପ୍ଲାଟଫର୍ମକୁ ନିଷିଦ୍ଧ କରିଛନ୍ତି କେନ୍ଦ୍ର ସରକାର । ସରକାର କହିଛନ୍ତି ଯେ ଏହି ଆପ୍ଗୁଡ଼ିକ ମନୋରଞ୍ଜନ ନାମରେ ଦର୍ଶକଙ୍କୁ ଅଶ୍ଳୀଳ ଏବଂ ଆପତ୍ତିଜନକ ବିଷୟବସ୍ତୁ ପରିବେଶଣ କରୁଥିଲେ। ସରକାର ଏକ ବିଜ୍ଞପ୍ତି ଜାରି କରି ଇଣ୍ଟରନେଟ୍ ସେବା ପ୍ରଦାନକାରୀଙ୍କୁ ଏହି OTT ଆପ୍ଗୁଡ଼ିକୁ ଅବରୋଧ କରିବାକୁ କହିଛନ୍ତି। ନିଷିଦ୍ଧ ଆପ୍ ତାଲିକାରେ Alt, Ullu, Desi Flix ଭଳି ପ୍ରସିଦ୍ଧ ପ୍ଲାଟଫର୍ମ ମଧ୍ୟ ଅନ୍ତର୍ଭୁକ୍ତ। Alt ଆପ୍ ୨୦୧୭ ରେ ଟିଭି ପ୍ରଯୋଜିକା ଏକତା କପୁରଙ୍କ ଦ୍ୱାରା ଲଞ୍ଚ କରାଯାଇଥିଲା। Ullu ଆପ୍ ୨୦୧୮ ରେ IIT କାନପୁରରୁ ସ୍ନାତକ ବିଭୁ ଅଗ୍ରୱାଲ ଦ୍ୱାରା ସୃଷ୍ଟି କରାଯାଇଥିଲା।
ପୂର୍ବରୁ ୨୦୨୪ ମସିହାରେ ସରକାର ୧୮ଟି OTT ପ୍ଲାଟଫର୍ମକୁ ବ୍ୟାନ୍ କରିଥିଲେ। ଏହା ବ୍ୟତୀତ ୧୯ଟି ୱେବସାଇଟ୍, ୫୭ଟି ସୋସିଆଲ ମିଡିଆ ହ୍ୟାଣ୍ଡେଲ ଏବଂ ୧୦ଟି ଆପ୍ ମଧ୍ୟ ବ୍ଲକ୍ କରାଯାଇଥିଲା। ଏପରି ପରିସ୍ଥିତିରେ, ପ୍ରଶ୍ନ ଉଠୁଛି ଯେ ଯେଉଁ ଉପଭୋକ୍ତାମାନେ ଏହି ନିଷିଦ୍ଧ OTT ପ୍ଲାଟଫର୍ମଗୁଡ଼ିକୁ ଏକ ବର୍ଷ ପାଇଁ ସବସ୍କ୍ରାଇବ କରିଛନ୍ତି ସେମାନଙ୍କର କଣ ହେବ।
ସରକାରୀ ସୂତ୍ର ଅନୁଯାୟୀ, ଏହି ପ୍ଲାଟଫର୍ମଗୁଡ଼ିକ କର୍ତ୍ତୃପକ୍ଷଙ୍କ ଦ୍ୱାରା ‘ସଫ୍ଟ ପର୍ଣ୍ଣ’ ଭାବରେ ବର୍ଣ୍ଣିତ ବିଷୟବସ୍ତୁ ହୋଷ୍ଟ ଏବଂ ବଣ୍ଟନ କରୁଥିବା ଜଣାପଡ଼ିବା ପରେ ଏହି ନିଷ୍ପତ୍ତି ନିଆଯାଇଛି, ଯାହା ଦେଶର IT ନିୟମ ଏବଂ ବିଦ୍ୟମାନ ଅଶ୍ଳୀଳତା ଆଇନକୁ ଉଲ୍ଲଂଘନ କରିଛି। ଏହି ପ୍ରତିବନ୍ଧକର ଲକ୍ଷ୍ୟ ହେଉଛି, ଅଶ୍ଳୀଳ ସାମଗ୍ରୀର ସହଜ ଉପଲବ୍ଧତାକୁ ରୋକିବା, ବିଶେଷକରି ନାବାଳକମାନଙ୍କ ପାଇଁ, ଏବଂ ନିଶ୍ଚିତ କରିବ ଯେ ଡିଜିଟାଲ ବିଷୟବସ୍ତୁ ଶାଳୀନତା ଏବଂ ଆଇନର ସୀମା ମଧ୍ୟରେ ରହିବ।