ଭାରତର ଯୁବ ପ୍ରତିଭା ଦିବ୍ୟା ଦେଶମୁଖ ମହିଳା ଚେସ ବିଶ୍ବ କପ ୨୦୨୫ ନିଜ ନାମରେ କରିଛନ୍ତି । ମାତ୍ର ୧୯ ବର୍ଷ ବୟସରେ ଦିବ୍ୟା ଏହି ସୌଭାଗ୍ୟ ଅର୍ଜନ କରିଛନ୍ତି । ଜର୍ଜିଆରେ ଆୟୋଜିତ ହୋଇଥିବା ଏହି ଟୁର୍ଣ୍ଣାମେଣ୍ଟର ଫାଇନାଲରେ ଭାରତର କୋନେରୁ ହମ୍ପିଙ୍କୁ ଟାଇ-ବ୍ରେକରେ ପରାସ୍ତ କରିଥିଲେ ଦିବ୍ୟା । ଏହା ଫଳରେ ବିଶ୍ବ କପ ଜିତିବାରେ ଦିବ୍ୟା ପ୍ରଥମ ଭାରତୀୟ ମହିଳା ହୋଇପାରିଛନ୍ତି । ସେ ଭାରତର ଚତୁର୍ଥ ମହିଳା ଗ୍ରାଣ୍ଡମାଷ୍ଟର ମାନ୍ୟତା ପାଇଛନ୍ତି । ଗତ ବର୍ଷ ଜୁନିୟର ବିଶ୍ବ ଚାମ୍ପିୟନଶିପ ଜିତିବା ପରେ ଦିବ୍ୟା ବୁଦାପେଷ୍ଟରେ ଚେସ ଅଲିମ୍ପିୟାଡରେ ଭାରତର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ । ଦିବ୍ୟାଙ୍କ ଏହି ଉପଲବ୍ଧି ଭାରତୀୟ ଚେସ ଇତିହାସରେ ଏକ ନୂଆ ଅଧ୍ୟାୟ ଯୋଡ଼ିଛି । ଏହି ଉପଲବ୍ଧି ହାସଲ କରିବା ପରେ ଦିବ୍ୟାଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଭିନନ୍ଦନ ଜଣାଇଛନ୍ତି । ଏଥିସହିତ ଶାନଦାର ପ୍ରୟାସ ପାଇଁ ହମ୍ପିଙ୍କୁ ମଧ୍ୟ ଉତ୍ସାହିତ କରିଥିଲେ । ଫାଇନାଲ ପୂର୍ବରୁ ଶନିବାର ଓ ରବିବାର ଖେଳା ଯାଇଥିବା ଗେମ ଡ୍ର ରହିଥିଲା । ସେଥିରେ ଦୁଇ ଖେଳାଳି ଶାନଦାର ପ୍ରଦର୍ଶନ କରିଥିଲେ ।
କାନ ଧରି ଉଠ୍-ବସ୍ ହେଲେ SDM, କ’ଣ ଘଟିଥିଲା ଜାଣନ୍ତୁ….
ଉତ୍ତରପ୍ରଦେଶରେ ଏକ ଅଜବ ଘଟଣା ଦେଖିବାକୁ ମିଳିଛି । ଜଣେ ଆଇଏଏସ ଅଧିକାରୀ ନିଜ କାନ ଧରି ଉଠ-ବସ ହେଉଥିବାର ଦୃଶ୍ୟ ସାମ୍ନାକୁ ଆସିଛି । ଉକ୍ତ ଘଟଣାର ଭିଡିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଜଣେ ଏସଡିଏମଙ୍କ ଏପରି କାହିଁକି, କଲେ ଏବେ ତାହା ସଭିଙ୍କ ମନରେ ପ୍ରଶ୍ନ ଉଠିଛି । ଜଣାପଡ଼ିଛି ଯେ, ଉତ୍ତରପ୍ରଦେଶରର ଶାହଜହାଁପୁରରେ EWS ପ୍ରମାଣପତ୍ରକୁ ନେଇ ବିବାଦ ସୃଷ୍ଟି ହୋଇଥିଲା । ତାହାକୁ ନେଇ ଓକିଲମାନେ ତିନି ଦିନ ଧରି ଧାରଣାରେ ବସିଥିଲେ । ନୂଆ ଏସଡିଏମ ହସ୍ତକ୍ଷେପ କରିବା ପରେ ସ୍ଥିତି ଆହୁରି ବିଗିଡ଼ି ଯାଇଥିଲା । ଘଟଣାକୁ ଶାନ୍ତ କରିବା ପାଇଁ ଏସଡିଏମ୍ ନିଜ କାନ କରି ଉଠ-ବସ୍ ହୋଇଥିଲେ, ଯାହାର ଭିଡିଓ ସୋସିଆଲ ମିଡ଼ିଆରେ ଭାଇରାଲ ହୋଇଯାଇଥିଲା ।
ଜଏନିଂ ପରେ ନବାଗତ ଏସଡିଏମ ଧାରଣା ସ୍ଥଳକୁ ଯାଉଥିଲେ । ଏହି ସମୟରେ ଜଣେ ଓକିଲ ଫାଟକରେ ପରିସ୍ରା କରୁଥିବାର ସେ ଦେଖିଥିଲେ । ତେଣୁ ତାହା ନ କରିବାକୁ ସେ ଓକିଲଙ୍କୁ କହିଥିଲେ । ତେବେ ତହସିଲ ପରିସରରେ ଅପରିଷ୍କାର ଶୌଚାଳୟରେ ସେ ପରିସ୍ରା କରିହେବନି ବୋଲି ଓକିଲ କହିଥିଲେ । ଏହା ମଧ୍ୟରେ ମାମଲାକୁ ଶାନ୍ତ କରିବା ପାଇଁ ଏସଡିଏମ ଓକିଲମାନଙ୍କୁ ଅପିଲ କରିଥିଲେ । ମାତ୍ର ସ୍ଥିତି ବିଗିଡ଼ି ଯିବାରୁ ଏସଡିଏମ ନିଜ କାନ ଧରି ଉଠ-ବସ୍ ହୋଇ କ୍ଷମା ପ୍ରାର୍ଥନା କରିଥିଲେ । ସେ କହିଥିଲେ, ’ମଁ ଏହି ତହସିଲର ସବୁଠାରୁ ବଡ଼ ଅଧିକାରୀ, ମୋ ପାଇଁ ଯଦି କାହାର କିଛି କ୍ଷତି ହୋଇଛି, ତେବେ ସେଥିପାଇଁ ମୁଁ କ୍ଷମା ମାଗୁଛି । ସେ ୫ ଥର ଉଠ-ବସ ହୋଇଥିଲେ । ଏସଡିଏମଙ୍କ ଏହି ବିନମ୍ର ଅପିଲ ପରେ ଓକିଲଙ୍କ କ୍ରୋଧ ଶାନ୍ତ ହୋଇଥିଲା ।
ଶ୍ରମିକଙ୍କ ନାଁରେ ଫଲସ ବିଲ୍ କରି ଲକ୍ଷାଧିକ ଟଙ୍କା ଚଳୁ ଅଭିଯୋଗ
ନନ୍ଦିଘୋଷ ବ୍ୟୁରୋ: ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ଝରିପାଲ ପଞ୍ଚାୟତରେ ମନରେଗା କାମରେ ଦୁର୍ନୀତି ଅଭିଯୋଗ । କାମ ନକରି ଶ୍ରମିକଙ୍କ ନାଁରେ ଭୂତ ବିଲ କରି ଲକ୍ଷାଧିକ ଟଙ୍କା ଚଳୁ କରାଯାଇଥିବା ଅଭିଯୋଗ ହୋଇଛି । ଏଭଳି ସଙ୍ଗୀନ ଆପତ୍ତି ଉଠାଇଛନ୍ତି ଗ୍ରାମବାସୀ।
ମନରେଗା କାମରେ ଦୁର୍ନୀତି । ଶ୍ରମିକଙ୍କ ନାଁରେ ଫଲସ ବିଲ କରି ଲକ୍ଷାଧିକ ଟଙ୍କା ଚଳୁ ଅଭିଯୋଗ । ବଙ୍ଗୋମୁଣ୍ଡା ବ୍ଳକ ଝରିଆଲ ପଞ୍ଚାୟତରେ ମେଟ୍ରିଆଲ କାମ ନ ହୋଇ ଟଙ୍କା ଆତ୍ମସାତ ହୋଇଥିବା ଅଭିଯୋଗ ହୋଇଛି । ପୋଖରୀ କଡରେ ଗାର୍ଡୱାଲ ନିର୍ମାଣ, ପାହାଚ ନିର୍ମାଣ, କଂକ୍ରିଟ ରାସ୍ତା ସହ ଅନ୍ଯାନ୍ଯ କାମ ନାଁରେ ଲକ୍ଷାଧିକ ଟଙ୍କା ଲୁଟ କରାଯାଇଛି । ୨୦୨୪-୨୫ ଓ ୨୦୨୫-୨୬ ଆର୍ଥିକ ବର୍ଷରେ ତଲରବନ୍ଦ ଟେଙ୍କ ରାଣୀପୁର, ବେହେରାବନ୍ଦ ଟେଙ୍କ ରାଣୀପୁର, ଉପରବନ୍ଦ ଟେଙ୍କ ରାଣୀପୁର, ଝରିଆଲରୁ ଝାକରପଡା ରାସ୍ତା, ନର୍ଲାବନ୍ଦରୁ ବାଲିଖମାର ରାସ୍ତା, ରାଣୀପୁର ଝରିଆଲ ଆରଡି ରାସ୍ତା ଠାରୁ ରୁରାଲ ପାର୍କ, ପ୍ଳେଗ୍ରାଉଣ୍ଡ, ନୂଆବନ୍ଧ ପାଇଁ ଟଙ୍କା ଉଠିଛି । ସଂପୃକ୍ତ କାମ ନାଁରେ ୨୩ ଲକ୍ଷ ୩ ହଜାର ୭୯୧ ଟଙ୍କା ବିଲ ହୋଇଛି । ହେଲେ ବାସ୍ତବରେ କାମ ଠିକ ଭାବେ ହୋଇନଥିବା ଅଭିଯୋଗ ହୋଇଛି।
ଦୁର୍ନୀତି ସଂପର୍କରେ କିଛି ଦିନ ପୂର୍ବରୁ ବଙ୍ଗୋମୁଣ୍ଡା ବିଡିଓଙ୍କୁ ଅଭିଯୋଗ କରିଥିଲେ ଗ୍ରାମବାସୀ । ଘଟଣାର ନିରପେକ୍ଷ ତଦନ୍ତ କରି ଦୋଷୀ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ପଞ୍ଚାୟତବାସୀ । ଏପଟେ ଝରିପାଲ ସରପଞ୍ଚ ଅଭିଯୋଗକୁ ଖଣ୍ଡନ କରିବା ସହ ବ୍ଯକ୍ତିଗତ ଅକ୍ରୋଶ ରଖି ଏଭଳି କରାଯାଉଥିବା କହିଛନ୍ତି ।
‘ଅପରେସନ ସିନ୍ଦୂର’ ସ୍ବତନ୍ତ୍ର ଆଲୋଚନା, ଏମିତି କହିଲେ ରାହୁଲ ଗାନ୍ଧୀ
ନନ୍ଦିଘୋଷ ବ୍ୟୁରୋ: ଅପରେସନ ସିନ୍ଦୂରରେ ସେନାକୁ ପୂର୍ଣ୍ଣ ସ୍ଵାଧୀନତା ଦିଆଯାଇନଥିଲା। ଯାହା ସିଡିଏସ୍ ଅନୀଲ ଚୌହ୍ଵାନ କହୁ କହୁ କହି ଦେଇଥିଲେ। ଶତ୍ରୁପକ୍ଷକୁ ଉଚିତ ଶିକ୍ଷା ଦେବା ପାଇଁ ଦରକାର ରାଜନୈତିକ ଇଚ୍ଛାଶକ୍ତି, ଯାହାକି ୧୯୭୧ରେ ବାଂଲାଦେଶ ଯୁଦ୍ଧ ବେଳେ ଇନ୍ଦିରା ଗାନ୍ଧି ଦେଖାଇଥିଲେ। ଆତଙ୍କବାଦ ବିଶ୍ଵ ପାଇଁ ଅଭିଶାପ। ଏହା ଶତ ପ୍ରତିଶତ ଶତ। କୌଣସି ରାଷ୍ଟ୍ର ଆତଙ୍କବାଦକୁ ସମର୍ଥନ କରେ ନାହିଁ। ଅପରେସନ ସିନ୍ଦୂରର ସଫଳତା ନେଇ ଭାରତ ସରକାର ସବୁ ରାଷ୍ଟ୍ରକୁ ପ୍ରତିନିଧି ପଠାଇ ସମର୍ଥନ ଯୋଗାଡ଼ କଲେ। କିନ୍ତୁ ପହଲଗାଁଓ ଆକ୍ରମଣ ଘଟଣାରେ ପାକିସ୍ତାନ ଦାୟୀ ବୋଲି କୌଣସି ରାଷ୍ଟ୍ର କହି ନାହାନ୍ତି। ଭାରତ ସରକାରଙ୍କୁ ଆହ୍ଵାନ ଦେଇ ରାହୁଲ ଗାନ୍ଧି କହିଛନ୍ତି, ଏ ଯୁଦ୍ଧ ବିରାମ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ମଧ୍ୟସ୍ଥିରେ ହୋଇଛି।
ଯାହାକୁ ଟ୍ରମ୍ପ ନିଜେ ୨୯ ଥର କହିଲେଣି। ରାହୁଲ ଗାନ୍ଧି ଚ୍ୟାଲେଞ୍ଜ ଦେଇ କହିଛନ୍ତି, ଆଜି ଏଇ ଗୃହରେ ଭାରତ ସରକାର କୁହନ୍ତୁ, ଟ୍ରମ୍ପ ମିଛ କହୁଛନ୍ତି। ଅପରେସନ ସିନ୍ଦୂରର ସମୟକୁ ନେଇ ସରକାରଙ୍କୁ ଧୋଇଛନ୍ତି ରାହୁଲ। ସେ କହିଛନ୍ତି, ପ୍ରତିରକ୍ଷା ମନ୍ତ୍ରୀ କହିଲେ, ରାତି ଗୋଟା ୫ରେ ଆରମ୍ଭ ହେଲା ଅପରେସନ ସିନ୍ଦୂର। ରାଜନାଥ ଏହା କହିଲେ, ଏହା ୨୨ ମିନିଟ ଯାଏ ଚାଲିଥିଲା। ତା ପରେ ସେ ପୁଣି କହିଲେ, ରାତି ୧ଟା ୩୫ ମିନିଟରେ ଆମେ ପାକିସ୍ତାନକୁ ଜଣାଇଲୁ ଆମେ ଆତଙ୍କବାଦୀଙ୍କ ଆଡ୍ଡାକୁ ଧ୍ଵଂସ କରିଛୁ। କିନ୍ତୁ ଆମେ ଏହାକୁ ଆଗକୁ ବଢ଼ାଇବାକୁ ଚାହୁଁନାହୁଁ। ବୋଧହୁଏ ପ୍ରତିରକ୍ଷା ମନ୍ତ୍ରୀ କଣ କହୁଛନ୍ତି, ଜାଣିପାରୁ ନାହାନ୍ତି। ଏହାର ଅର୍ଥ ପାକିସ୍ତାନକୁ ଆମେ ସିଧାସଳଖ କହିଲୁ, ସେ ଆମେ ଲଢିବାକୁ ପ୍ରସ୍ତୁତ ନୋହୁଁ । କେନ୍ଦ୍ର ସରକାର ସ୍ଵାଧୀନତା ନ ଦେବାରୁ ଆମକୁ କେତେକ ଯୁଦ୍ଧ ବିମାନ ହରାଇବାକୁ ପଡ଼ିଲା ବୋଲି କହିଛନ୍ତି ରାହୁଲ ଗାନ୍ଧି। ମିଲିଟାରି କେନ୍ଦ୍ରକୁ ଟାର୍ଗେଟ କରିବାକୁ ସ୍ଵାଧୀନତା ଦିଆନଯିବାରୁ ଏପରି ହେଲା ବୋଲି କହିଛନ୍ତି ରାହୁଲ ଗାନ୍ଧି।
କୌଣସି ଆତଙ୍କବାଦୀ ସଂଗଠନ ଉପରେ ବ୍ୟାନ ଲଗାଇଲେ କ’ଣ ଫାଇଦା ମିଳିଥାଏ?
କୌଣସି ଆତଙ୍କବାଦୀ ସଂଗଠନ ଉପରେ ବ୍ୟାନ ଲଗାଇବା ଏକ ଗମ୍ଭୀର ଓ ରଣନୀତିକ ନିଷ୍ପତ୍ତି ହୋଇଥାଏ । ଏହା ଦେଶର ସୁରକ୍ଷା ଓ ଜନତାଙ୍କ ହିତ ପାଇଁ ନିଆଯାଇଥାଏ । ରାଷ୍ଟ୍ରୀୟ ଓ ବିଶ୍ବ ସୁରକ୍ଷାକୁ ସୁନିଶ୍ଚିତ କରିବା ହେଉଛି ଏହାର ଉଦ୍ଦେଶ୍ୟ । ସରକାର ଆତଙ୍କବାଦୀ ସଂଗଠନ ଉପରେ ପ୍ରତିବନ୍ଧକ ଲଗାଇ ସେମାନଙ୍କର ଗତିବିଧିକୁ ସୀମିତ କରିଥାନ୍ତି । ନିକଟରେ ଆମେରିକା ଆତଙ୍କୀ ସଂଗଠନ ଦି ରେଜିଷ୍ଟାନ୍ସ ଫ୍ରଣ୍ଟ ବା TRFକୁ ବିଦେଶୀ ଆତଙ୍କୀ ସଂଗଠନ ଘୋଷିତ କରିଛି । ଏହାକୁ ଭାରତର ବଡ଼ କୂଟନୈତିକ ବିଜୟ ବୋଲି କୁହାଯାଉଛି । ଟିଆରଏଫ ପହଲଗାମ ଆତଙ୍କୀ ଆକ୍ରମଣ ପାଇଁ ନିଜକୁ ଦାୟୀ କରିଥିଲା । ତେବେ କୌଣସି ଆତଙ୍କବାଦୀ ସଂଗଠନ ଉପରେ ବ୍ୟାନ ଲଗାଇବା ଫଳରେ କ’ଣ ଫାଇଦା ମିଳିଥାଏ, ତାହା ଏକ ବଡ଼ ପ୍ରଶ୍ନ ।
କୌଣସି ଆତଙ୍କବାଦୀ ସଂଗଠନକୁ ଚଳାଇବା ପାଇଁ ଧନର ଆବଶ୍ୟକତା ପଡ଼ିଥାଏ । ବ୍ୟାନ ଲଗାଯିବା ପରେ ଏପରି ସଂଗଠନଗୁଡ଼ିକର ବ୍ୟାଙ୍କ ଖାତା ଓ ସମ୍ପତ୍ତି ଜବତ କରାଯାଇପାରେ । ସେହି କାରଣରୁ ହତିଆର କିଣିବା ଓ ଆତଙ୍କୀ କାର୍ଯ୍ୟକଳାପ କରିବାର କ୍ଷମତା ହ୍ରାସ ପାଇଥାଏ । ଏପରି କି ପ୍ରତିବନ୍ଧିତ ସଂଗଠନର ସଦସ୍ୟଙ୍କୁ ଗିରଫ କରାଯିବା, ସେମାନଙ୍କ ଉପରେ ମକଦ୍ଦମା ଚାଲିବା ସହଜ ହୋଇଯାଇଥାଏ । ଆତଙ୍କୀ ସଂଗଠନ ସହ ଜଡ଼ିତ ବ୍ୟକ୍ତିକୁ ୧୦ ବର୍ଷ ପର୍ଯ୍ୟନ୍ତ ଜେଲ ବା ଆଜୀବନ କାରାବାସର ନିୟମ ରହିଛି । ପ୍ରତିବନ୍ଧିତ ସଂଗଠନର ସଦସ୍ୟଙ୍କୁ ଅପରାଧୀ ବୋଲି ଗ୍ରହଣ କରାଯାଇଥାଏ । ସେମାନଙ୍କୁ ଗିରଫ କରିବା, ଯାଞ୍ଚ କରିବା କ୍ଷେତ୍ରରେ ପୋଲିସକୁ ସହାୟତା ମିଳିଥାଏ । ଆତଙ୍କୀ କାର୍ଯ୍ୟକଳାପ ଉପରେ ଲଗାମ ଲାଗିବାରେ ସହାୟକ ହୋଇଥାଏ ।
କୌଣସି ଆତଙ୍କବାଦୀ ସଂଗଠନକୁ ବ୍ୟାନ କରିବା ପରେ ସୁରକ୍ଷା ଏଜେନ୍ସି ସଂଗଠନର ଗତିବିଧି ଉପରେ କଡ଼ା ନଜର ରଖିଥାଏ । ଫଳରେ ଆତଙ୍କବାଦୀ ଆକ୍ରମଣରର ସମ୍ଭାବନା କମ୍ ହୋଇଯାଇଥାଏ । ଆତଙ୍କୀ ସଂଗଠନର ଫଣ୍ଡିଂ ରୋକିବା ଫଳରେ ଅବୈଧ ଧନର ପ୍ରବାହ କମ୍ ହୋଇଥାଏ, ଯାହାକି ଅର୍ଥବ୍ୟବସ୍ଥାକୁ ସ୍ଥିର ରଖିଥାଏ । ଆତଙ୍କବାଦ ବିପକ୍ଷରେ କଠୋର ପଦକ୍ଷେପ ସମାଜରେ ବିଶ୍ବାସ ବଢ଼ିଥାଏ ଓ ଲୋକମାନେ ସୁରକ୍ଷିତ ଅନୁଭବ କରିଥାନ୍ତି । ଆତଙ୍କବାଦ ବିପକ୍ଷରେ କାର୍ଯ୍ୟାନୁଷ୍ଠାନ ଦ୍ବାରା ଦେଶର ବିଶ୍ବ ଛବି ମଜବୁତ ହୋଇଥାଏ । ଅନ୍ୟ ଦେଶ ସହ ସହଯୋଗ ବଢ଼ିଥାଏ । ଭାରତ ନିକଟରେ ୬୭ ଆତଙ୍କୀ ସଂଗଠନକୁ ପ୍ରତିବନ୍ଧିତ କରିଥିବା ନେଇ ଗୃହ ମନ୍ତ୍ରଣାଳୟ ତରଫରୁ ଜାରି ସୂଚୀରେ ଉଲ୍ଲେଖ କରାଯାଇଛି ।
ଶୋଚନୀୟ ହୋଇପଡିଛି ଆଗଲପୁର ବ୍ଲକ ପଟୁଆପାଳିରୁ ବଙ୍ଗାବାହାଲ ରାସ୍ତା
ନନ୍ଦିଘୋଷ ବ୍ୟୁରୋ: ରାସ୍ତା ସାରା ମୃତ୍ଯୁର ସିଡି । ଶୋଚନୀୟ ହୋଇପଡିଛି ଆଗଲପୁର ବ୍ଲକ ପଟୁଆପାଳିରୁ ବଙ୍ଗବାହାଲ ରାସ୍ତା । କାଦୁଅ ପଚପଚ ଖାଲଢିପ ରାସ୍ତାରେ ଯିବା ଆସିବା କରୁଛନ୍ତି ପାଞ୍ଚଖଣ୍ଡ ପଞ୍ଚାୟତ ବାସୀ । ଶୀଘ୍ର ପ୍ରଶାସନ ଦୃଷ୍ଟି ଦେବାକୁ ଦାବି କରିଛନ୍ତି ଗ୍ରାମବାସୀ ।
ରାସ୍ତା ସାରା ଖାଲ ଖମା। ଆଉ ତା ଭିତରେ ପାଣି ପଚପଚ । କାଦୁଅ ରାସ୍ତାରେ ଯାଆସ କରୁଛନ୍ତି ଲୋକେ । ଏ ହେଉଛି ଆଗଲପୁର ବ୍ଲକ ପଟୁଆପାଳିରୁ ବଙ୍ଗାବାହାଲ ରାସ୍ତାର ଅବସ୍ଥା । ଏହି ରାସ୍ତା ଦେଇ ପ୍ରତ୍ଯେକ ଦିନ ବ୍ଲକ, ହସ୍ପିଟାଲ, ସ୍କୁଲ କଲେଜକୁ ପାଞ୍ଚ ଖଣ୍ଡ ପଞ୍ଚାୟତର ଲୋକେ ଯିବା ଆସିବା କରନ୍ତି l ହେଲେ ମାଟି ରାସ୍ତା କାରଣରୁ ବର୍ଷା ଦିନେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । କେବଳ ସେତିକି ନୁହେଁ ଗାଁକୁ ଆମ୍ବୁଲାନ୍ସ ବି ଆସିପାରୁନାହିଁ ।
ପଟୁଆପାଳିରୁ ବଙ୍ଗାବାହାଲ ରାସ୍ତାର ଉନ୍ନତି ପାଇଁ ବ୍ଲକ ପ୍ରଶାସନ ପକ୍ଷରୁ ମହାତ୍ମାଗାନ୍ଧୀ କର୍ମ ନିଯୁକ୍ତି ଯୋଜନାରେ ୯ ଲକ୍ଷ ଟଙ୍କା ଯୋଗାଇ ଦିଆଯାଇଥିଲା । ହେଲେ ମାଟି କାମ ହେବାର ଦୁଇ ମାସ ନପୂରୁଣୁ ରାସ୍ତା ଅତି କଦର୍ଯ୍ୟ ହୋଇପଡ଼ିଛି l ନିମ୍ନ ମାନର କାମ ହୋଇଥିବାରୁ ଲୋକଙ୍କ ମଧ୍ୟରେ ଘୋର ଅସନ୍ତାଷ ପ୍ରକାଶ ପାଇଛି l ଅନ୍ଯପଟେ ଘଟଣା ସଂପର୍କରେ ସ୍ଥାନୀୟ ବିଡିଓ ଅବଗତ ଥିବା କହିବା ସହ ଭଲ ରାସ୍ତା ନିର୍ମାଣ ପାଇଁ ପଦକ୍ଷେପ ନିଆଯିବ ବୋଲି କହିଛନ୍ତି ।
ପାକିସ୍ତାନ ସହ ଖେଳିବାକୁ ବିସିସିଆଇ କାହିଁକି ପ୍ରସ୍ତୁତ ହେଲା? ଭାରତ ସରକାର କାହିଁକି ସହମତି ପ୍ରକାଶ କଲେ?
ପୁଣି ଥରେ ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବୀ ଭାରତ-ପାକିସ୍ତାନ ଏସିଆ କପରେ ମୁହାଁମୁହିଁ ହେବାକୁ ଯାଉଛନ୍ତି । ତେବେ ପାକିସ୍ତାନ ସହ କ୍ରିକେଟ ଖେଳିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ କାହିଁକି ରାଜି ହେଲା, ତାହା ଜାଣିବାକୁ କ୍ରୀଡ଼ାପ୍ରେମୀଙ୍କ ମନରେ ଉତ୍ସାହ ଦେଖିବାକୁ ମିଳିଛି । ଏହି ଟୁର୍ଣ୍ଣାମେଣ୍ଟକୁ ଆହୁରି ଦେଢ଼ ମାସ ସମୟ ବାକି ରହିଛି । ସେପ୍ଟେମ୍ବର ୧୪ରେ ଭାରତ-ପାକ୍ ମ୍ୟାଚ ଖେଳାଯିବ । ନିକଟରେ WCL ୦୨୫ରେ ଭାରତ-ପାକ୍ ମ୍ୟାଚ ରଦ୍ଦ କରାଯାଇଥିଲା । ମାତ୍ର ଏବେ ଏସିଆ କପରେ ପାକିସ୍ତାନ ବିପକ୍ଷରେ ଭାରତ ଖେଳିବା ନେଇ ବିସିସିଆଇ ସମ୍ମତି ପ୍ରକାଶ କରିଛି । ତେଣୁ ଏହା କେଉଁ ପ୍ରକାରର ନିଷ୍ପତ୍ତି ବୋଲି ସାରା ଭାରତବର୍ଷରେ ଏବେ ଗୁଞ୍ଜରଣ ସୃଷ୍ଟି ହୋଇଛି । କ’ଣ ପାଇଁ ବିସିସିଆଇ ପାକିସ୍ତାନ ସହ ଖେଳିବାକୁ ପ୍ରସ୍ତୁତ ହେଲା, କ’ଣ ପାଇଁ ଭାରତ ସରକାର ଏହାକୁ ଅଗ୍ରାହ୍ୟ କଲେ ନାହିଁ, ଏଭଳି ପ୍ରଶ୍ନ ସବୁ ଏବେ ସାମ୍ନାକୁ ଆସୁଛି ।
ପହଲଗାମ ଆତଙ୍କବାଦୀ ଆକ୍ରମଣ ଓ ଅପରେସନ ସିନ୍ଦୁର ପରେ ଭାରତ ଓ ପାକିସ୍ତାନ ସମ୍ପର୍କରେ ଇତିହାସର ସବୁଠାରୁ ତଳସ୍ତରକୁ ଚାଲିଯାଇଛି । ଏହି ଉତ୍ତେଜନାପୂର୍ଣ୍ଣ ପରିସ୍ଥିତି ପରେ ବି ବିସିସିଆଇ କ’ଣ ପାଇଁ ଏସିଆ କପରେ ପାକିସ୍ତାନ ସହ ଖେଳିବାକୁ ରାଜି ହେଲା? ଏହା ପଛର କ’ଣ ରହିଛି କାରଣ? ୨୦୩୬ ଅଲିମ୍ପିକ୍ସ ପାଇଁ ଭାରତ ବିଡ୍ ଆହ୍ବାନ କରିବ । ଗତ ଦୁଇ ଦଶନ୍ଧି ଭାରତ ପାକିସ୍ତାନ ସହ ଭାରତ କୌଣସି ଦ୍ବିପାକ୍ଷିକ ସିରିଜ ଖେଳିନାହିଁ । କୌଣସି ମଲ୍ଟି ନ୍ୟାସନାଲ କମ୍ପିଟିସନରେ ଆୟୋଜନ କରିବା ପାଇଁ ନିଜର କୌଣସି କଟ୍ଟର ପ୍ରତିଦ୍ବନ୍ଦ୍ବୀର ଆପତ୍ତି ନହେବା ଜରୁରୀ । ଚଳିତ ବର୍ଷ ଭାରତ ଜୁନିୟର ହକି ବିଶ୍ବକପ ଓ ଏସିଆ କପର ଆୟୋଜନ କରିବ । ଏହି ଦୁଇ ଟୁର୍ଣ୍ଣମେଣ୍ଟ ପାଇଁ ଭାରତ ଆସିବାକୁ ପାକିସ୍ତାନକୁ ଅନୁମତି ଦେଇସାରିଛି । ବିସିସିଆଇ ସିଧାସଳଖ ଭାବେ ଭାରତ ସରକାରଙ୍କ ଅଧିନରେ ନାହିଁ । ଏସିଆ କପରେ ପାକିସ୍ତାନ ସହ ଖେଳିବା ପାଇଁ ଭାରତ ସରକାର ହକି ଟିମକୁ ଅନୁମତି ଦେବା ପରେ ବିସିସିଆଇର ପଥ ସହଜ ହୋଇଯାଇଥିଲା ।
ଏସିଆ କପ ୨୦୨୫ରେ ମୋଟ ୮ଟି ଟିମ୍ ଭାଗ ନେବେ । ଭାରତ ଏହି ଟୁର୍ଣ୍ଣାମେଣ୍ଟର ଆୟୋଜନ କରିବାର ଥିଲ, ମାତ୍ର ବିସିସିଆଇ ଏସିଆ କପର ନ୍ୟୁଟ୍ରାଲ ଭେନ୍ୟୁରେ ଆୟୋଜନ କରିବା ନେଇ ସହମତି ପ୍ରକାଶ କରିଥିଲା । ଏବେ ଟୁର୍ଣ୍ଣାମେଣ୍ଟର ଆୟୋଜନ ୟୁଏଇରେ ହେବ । ସେପ୍ଟେମ୍ବର ୧୪ରେ ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବୀଙ୍କ ମଧ୍ୟରେ ହାଇଭୋଲଟେଜ୍ ମ୍ୟାଚ ଖେଳାଯିବ ।
ଧରା ପଡ଼ିଲା ସ୍ତ୍ରୀକୁ ହତ୍ୟା ପରେ ଖଟ ତଳେ ଲୁଚାଇ ରଖି ଫେରାର ହୋଇଥିବା ଅଭିଯୁକ୍ତ ସ୍ବାମୀ
ନନ୍ଦିଘୋଷ ବ୍ୟୁରୋ: ସ୍ତ୍ରୀକୁ ହତ୍ୟା ପରେ ଖଟ ତଳେ ଲୁଚାଇ ରଖି ଫେରାର ମାରିଥିଲା ସ୍ୱାମୀ । ଶେଷରେ ପୋଲିସ ହାତରେ ଧରାପଡ଼ିଲା ଅଭିଯୁକ୍ତ ସ୍ୱାମୀ । ସମ୍ବଲପୁର ଅଇଁଠାପାଲି ଥାନା ଅନ୍ତର୍ଗତ କରମଟୋଲି କେନାଲପଡାରେ ଘଟିଛି ଘଟଣା । ମୃତ ମହିଳା ଫୁଲମଣୀ ମୁଣ୍ଡା। ଅଭିଯୁକ୍ତ ସ୍ଵାମୀ ଲରେନସ ମୁଣ୍ଡା । ଉଭୟଙ୍କ ଘର ଝାରଖଣ୍ଡ ରାଜ୍ୟରେ । ସେମାନେ ସମ୍ବଲପୁରରେ ଦୀର୍ଘ ବର୍ଷ ଧରି ଭଡାରେ ରହି ଶ୍ରମିକ ଭାବେ କାମ କରୁଥିଲେ । ଉଭୟଙ୍କର ଦ୍ୱିତୀୟ ବିବାହ ହୋଇଥିଲା । ଫୁଲମଣୀ ମୁଣ୍ଡାଙ୍କ ଵିବାହିତ ଝିଅ ଘରକୁ ଆସିଥିଲେ କିନ୍ତୁ ଘର ତାଲା ପଡିଥିବା ଦେଖି ଅଇଁଠାପାଲି ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ମୃତ ଦେହ ଉଦ୍ଧାର କରିଛି ଅଧିକ ତଦନ୍ତ ଜାରି ରଖିଛି । ଫେରାର ସ୍ୱାମୀକୁ ମଧ୍ୟ ଗିରଫ କରିଥିବା ଜଣା ପଡ଼ିଛି ।
ଅପହରଣ ପରେ ଦୁଷ୍କର୍ମ ଅଭିଯୋଗରେ ଯୁବକ ଗିରଫ
ନନ୍ଦିଘୋଷ ବ୍ୟୁରୋ: ଅପହରଣ ପରେ କାରରେ ନାବାଳିକାକୁ ସାରାରାତି ଦୁଷ୍କର୍ମ ଅଭିଯୋଗରେ ଯୁବକ ଗିରଫ । କୋରାପୁଟ ସହରରେ ନାବାଳିକାକୁ ଅପହରଣ କରି ଦୁଷ୍କର୍ମ କରିଥିଲା ଅଭିଯୁକ୍ତ । କାର ମଧ୍ୟରେ ସାରାରାତି ଦୁଷ୍କର୍ମ ଅଭିଯୋଗରେ ସୁଶୀଲ ହରିଜନ ନାମକ ଯୁବକକୁ ଗିରଫ କରିଛି ପୋଲିସ । କୋରାପୁଟ ଟାଉନ ଥାନା ପୁଲିସ ସୁଶୀଲକୁ ଗିରଫ କରି କୋର୍ଟ ଚଲାଣ କରିଛି । ସୁଶୀଲ ହରିଜନ ଗତ ୨୬ ତାରିଖ ରାତିରେ ନାବଳିକାଙ୍କୁ କାରରେ ଅପହରଣ କରି ଦୁଷ୍କର୍ମ କରିଥିଲା । ପରେ ସକାଳୁ ଛାଡି ଦେଇଥିଲା । ପୀଡିତା ଘରକୁ ଫେରି ପରିବାର ଲୋକଙ୍କୁ ଜଣାଇବା ପରେ ୨୭ ତାରିଖରେ ପରିବାର ପକ୍ଷରୁ ଟାଉନ ଥାନାରେ ଅଭିଯୋଗକରି ହୋଇଥିଲା । ଅଭିଯୋଗ ପାଇବା ପରେ ଥାନା ଅଧିକାରୀ ମାମଲା ରଜୁକରି ଅଭିଯୁକ୍ତ ସୁଶୀଲକୁ ଗିରଫ କରିବା ସହ କାରକୁ ଜବତ କରିଛନ୍ତି ।
ଏଣିକି ସପ୍ତାହରେ ୫ ଦିନ ପାଇଁ ଖୋଲିବ ବ୍ୟାଙ୍କ ? ସଂସଦରେ ଉତ୍ତର ରଖିଲେ କେନ୍ଦ୍ର ସରକାର
ସପ୍ତାହକୁ ବ୍ୟାଙ୍କ ୫ ଦିନ ପାଇଁ ବ୍ୟାଙ୍କ ଖୋଲିବା ପ୍ରସଙ୍ଗକୁ ନେଇ ଆସିଛି ଏକ ବଡ଼ ଖବର । ଭାରତୀୟ ବ୍ୟାଙ୍କ ସଂଘ (ଆଇବି) ତରଫରୁ ଉକ୍ତ ପ୍ରସ୍ତାବ ଉପରେ ନିଜର ସ୍ଥିତି ସ୍ପଷ୍ଟ କରାଯାଇଛି । । ଜୁଲାଇ ୨୮ରେ ଲୋକସଭାରେ ଅର୍ଥ ମନ୍ତ୍ରଣାଳୟ ତରଫରୁ ଏକ ଲିଖିତ ଉତ୍ତରରେ କୁହାଯାଇଥିଲା ଯେ, ପ୍ରତ୍ୟେକ ଶନିବାର ବ୍ୟାଙ୍କ ଛୁଟିଦିନ ଘୋଷିତ କରିବା ନେଇ ଆଇବିଏ ତରଫରୁ ପ୍ରସ୍ତାବ ଦିଆଯାଇଛି । ବର୍ତ୍ତମାନ ଏହି ପ୍ରସ୍ତାବ ବିଚାରାଧୀନ ରହିଛି । ଏବେ ସରକାରୀ ବ୍ୟାଙ୍କ (ପିଏସବି)ରେ ମାସର ଦ୍ବିତୀୟ ଓ ଚତୁର୍ଥ ଶନିବାର ଛୁଟି ରହିଛି । ଏଥିସହିତ ସରକାରୀ ବ୍ୟାଙ୍କରେ କର୍ମଚାରୀଙ୍କ ସ୍ଥିତି ସମ୍ପର୍କରେ ସରକାର କହିଥିଲେ ।
ଅଲଇଣ୍ଡିଆ ବ୍ୟାଙ୍କ ଅଫିସର୍ସ କନଫେଡେରେସନ (AIBOC) ମଧ୍ୟ ପ୍ରତ୍ୟେକ ଶନିବାରକୁ ଛୁଟି ଘୋଷଣା କରିବାକୁ ପ୍ରସ୍ତାବ ରଖିଛି । ଏହାଦ୍ବାରା କର୍ମଚାରୀଙ୍କ ଉତ୍ପାଦକତା, ବିକାଶ କାର୍ଯ୍ୟ କ୍ଷମତା ବଢ଼ିବ ଓ କାର୍ଯ୍ୟାଳୟରେ କାର୍ଯ୍ୟସଂସ୍କୃତି ବଢ଼ିବ ବୋଲି କୁହାଯାଇଛି । ଏହାପୂର୍ବରୁ ୧୦ମ ଦ୍ବିପାକ୍ଷିକ ବୁଝାମଣା ଓ ସପ୍ତମ ଯୁଗ୍ମ ନୋଟ ପରେ ଆଇବିଏ ଓ କର୍ମଚାରୀ ୟୁନିୟନ / ଅଧିକାରୀ ସଂଘ ମଧ୍ୟରେ ବୁଝାମଣା ହୋଇଥିଲା । ୨୦୧୫ରେ ନୋଟିଫିକେସନ ଜାରି କରାଯାଇ ପ୍ରତି ମାସର ଦ୍ବିତୀୟ ଓ ଚତୁର୍ଥ ଶନିବାରକୁ ସାର୍ବଜନିକ ଛୁଟି ଘୋଷଣା କରାଯାଇଥିଲା ।