ନନ୍ଦିଘୋଷ ବ୍ୟୁରୋ : ଜାପାନ ପ୍ରଧାନମନ୍ତ୍ରୀ ସିଗେରୁ ଇସିବାଙ୍କ ଇସ୍ତଫା। ଗତ ଜୁଲାଇରେ ହୋଇଥିବା ସଂସଦ ନିର୍ବାଚନରେ ଦଳର ଶୋଚନୀୟ ପରାଜୟ ପରେ ସେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ଗତ ବର୍ଷ ଅକ୍ଟୋବରରେ ଦାୟିତ୍ବ ନେବାପରଠାରୁ ଇସିବା ଦଳ ଭିତରେ ଥିବା ଦକ୍ଷିଣ ପନ୍ଥୀ ଗୋଷ୍ଠୀଙ୍କଠାରୁ ତୀବ୍ର ବିରୋଧର ସମ୍ମୁଖୀନ ହୋଇଆସୁଥିଲେ। ନିର୍ବାଚନରେ ପରାଜୟକୁ ନେଇ ତାଙ୍କ ଦଳ ଲିବରାଲ ଡେମୋକ୍ରାଟିକ ପାର୍ଟି ଭିତରୁ ତାଙ୍କୁ ବିରୋଧ କରାଯାଉଥିଲା। ଆମେରିକା ପକ୍ଷରୁ ଲାଗୁ ହୋଇଥିବା ଟାରିଫ ଓ ଏହାର ଅର୍ଥନୈତିକ ପ୍ରଭାବ ସମ୍ପର୍କରେ ସେ ସ୍ବର ଉତ୍ତୋଳନ କରିଆସୁଥିଲେ। ଏହା ସହ ଦରବୃଦ୍ଧି ଏବଂ ଅନ୍ୟାନ୍ୟ ପ୍ରସଙ୍ଗରେ ସେ ଦଳ ଭିତରୁ ବିରୋଧର ସମ୍ମୁଖୀନ ହୋଇଥିଲେ। ତାଙ୍କ ସ୍ଥାନରେ କାହାକୁ ନିଯୁକ୍ତି ଦିଆଯିବ ସେନେଇ ଦଳ ପକ୍ଷରୁ ଖୁବ୍ ଶୀଘ୍ର ନିଷ୍ପତ୍ତି ନିଆଯିବ। ସେ କହିଛନ୍ତି- ଦଳର ପରବର୍ତ୍ତୀ ନେତୃତ୍ବ କିଏ ନେବେ ତାହାକୁ ସେ ବିଚାର କରିବେ। ଦେଶ ଭିତରେ ଓ ବାହାରେ ଜାପାନ ଅନେକ ଚାଲେଞ୍ଜର ସମ୍ମୁଖୀନ ହେଉଥିବା ସ୍ଥିତିର ପ୍ରଧାନମନ୍ତ୍ରୀଙ୍କ ଇସ୍ତଫା ରାଜନୈତିକ ଅସ୍ଥିରତା ସୃଷ୍ଟି କରିଛି। ଦଳ ଭିତରେ ବିଦ୍ରୋହ ତୀବ୍ର ଆକାର ଧାରଣ କରୁଥିବାରୁ ଦଳକୁ ବିଭାଜନରୁ ରକ୍ଷା କରିବା ଲାଗି ଇସିବା ଏହି ପଦକ୍ଷେପ ନେଇଥିବା କୁହାଯାଇଛି। ଗତ ଜୁଲାଇରେ ୨୪୮ ଆସନ ବିଶିଷ୍ଟ ଅପରହାଉସ ନିର୍ବାଚନରେ ଶାସକ ମେଣ୍ଟ ସଂଖ୍ଯା ଗରିଷ୍ଠତା ହାସଲ କରିବାରେ ବିଫଳ ହୋଇଥିଲା।
ଆସନ୍ତାକାଲିଠାରୁ ଆରମ୍ଭ ହେବ ପିତୃପକ୍ଷ
ପୁରୀ : ଭାଦ୍ରବ ମାସ ପୂର୍ଣ୍ଣିମା । ଏକମାସ ଧରି ଆରମ୍ଭ ହେଉଛି ପିତୃପକ୍ଷ । ଆଶ୍ୱିନ ମାସ ଅମାବାସ୍ୟା ଯାଏଁ ଅପରପକ୍ଷ । ୧୫ ଦିନ ଧରି ଚାଲିବ ପିତୃପକ୍ଷ । ବିଶ୍ୱାସ ରହିଛି ଏହି ସମୟରେ ସମସ୍ତ ପିତୃପୁରୁଷ ମାନେ ଶ୍ରାଦ୍ଧ, ପିଣ୍ଡଦାନକୁ ଅପେକ୍ଷା କରିଥାନ୍ତି । ତେଣୁ ଶ୍ରଦ୍ଧାର ସହ ଶ୍ରାଦ୍ଧ ଏହି ସମୟରେ ରୀତିନୀତି ଅନୁସାରେ କରାଯାଇଥାଏ । ପିତୃ ପୁରୁଷମାନେ ସେମାନଙ୍କ ବଂଶଧରମାନଙ୍କ ଦ୍ୱାରା କରାଯାଇଥିବା ତର୍ପଣ, ଶ୍ରାଦ୍ଧ ଏବଂ ପିଣ୍ଡଦାନ ଇତ୍ୟାଦିରେ ସନ୍ତୁଷ୍ଟ ହୋଇ ସେମାନେ ବଂଶ ବୃଦ୍ଧି, ସୁଖ ଏବଂ ସମୃଦ୍ଧତା ପାଇଁ ଆଶୀର୍ବାଦ କରିଥାନ୍ତି ।
ହିନ୍ଦୁ ଧର୍ମରେ ଏହାର ରହିଛି ବିଶେଷ ମହତ୍ବ । ନିୟମ ନିଷ୍ଠାର ସହ ଏହି ଅପରପକ୍ଷ ବା ପିତୃପକ୍ଷକୁ ପାଳନ କରନ୍ତି ଶ୍ରଦ୍ଧାଳୁ । ପିତୃପକ୍ଷ ସମୟରେ ଖିଅର ହେବା ସମ୍ପୂର୍ଣ୍ଣ ନିଷିଦ୍ଧ ରହିଥିବା ବେଳେ ଏହି ସମୟରେ ନଖ ମଧ୍ୟ କଟାଯିବା ବାରଣ କରାଯାଛି । ଏପରିକି ଅପର ପାଗରେ ଅର୍ଥାତ ବାହାରେ ଭୋଜନ କରିବା ସମ୍ପୂର୍ଣ ନିଷିଦ୍ଧ କରାଯାଇଛି । ସେହିପରି ତିଳ ତର୍ପଣ, ଶ୍ରାଦ୍ଧ ଓ ପିଣ୍ଡଦାନ କରିବା ସମୟରେ ସମ୍ପୂର୍ଣ୍ଣ ଶୁଦ୍ଧପୂତ ଭାବେ ରହିବା କୁ ଶାସ୍ତ୍ରରେ ବର୍ଣ୍ଣନା କରାଯାଇଛି । ଶ୍ରୀକ୍ଷେତ୍ରରେ ବହୁ ପୁରାତନ ସମୟରୁ ତୀର୍ଥ ପୁଷ୍କରିଣୀରେ ଏହି ପିତୃପକ୍ଷ ସମୟରେ ଶ୍ରାଦ୍ଧ, ତର୍ପଣ ଏବଂ ପିଣ୍ଡ ଦାନ କରିବା ଶୁଭ ବୋଲି ବିବେଚନା କରାଯାଏ । ତେଣୁ ଶ୍ରଦ୍ଧାଳୁଙ୍କ ଆଗମନ ଆରମ୍ଭ ହୋଇଯାଇଛି ।
କଟକ ସହରରେ ଜୋରସୋର ଚାଲିଛି ମାଆଙ୍କ ମୂର୍ତ୍ତି ନିର୍ମାଣ କାମ
କଟକ : କଟକରେ ଜମିଲାଣି ପାର୍ବଣ ମାହୋଲ । ଦଶହରା ପାଖେଇ ଆସୁଥିବାରୁ ବିଭିନ୍ନ ମଣ୍ଡପରେ ଜୋରସୋର ଚାଲିଛି ପ୍ରସ୍ତୁତି । ଅଧିକାଂଶ ମଣ୍ଡପ ଗୁଡ଼ିକରେ ମାଆଙ୍କ ମୂର୍ତ୍ତିକାମ ଆଗେଇ ଚାଲିଛି । ମୂର୍ତ୍ତି ସବୁ ଏକମାଟିଆ ସରିଥିବାବେଳେ ଦୋମାଟିଆ କରି ମହାଳୟାରୁ ଆରମ୍ଭ ହେବ ଖଡ଼ିଚଢ଼ା । ରାଜ୍ଯ ବାହାରୁ କାରିଗରମାନେ ଆସି ମୂର୍ତ୍ତି ନିର୍ମାଣରେ ଲାଗିଛନ୍ତି । ସେପଟେ ପୂଜା ପାଇଁ ସମସ୍ତ ପ୍ରସ୍ତୁତି କରାଯାଉଥିବା କହିଛନ୍ତି ପୂଜକ ।
ମୂର୍ତ୍ତି ଗଢ଼ା ସାଙ୍ଗକୁ ମେଢ଼ କାମ ବି ଜୋରସୋରରେ ଆଗେଇ ଚାଲିଛି । ବିଶେଷ କରି ଜରି ମେଢ କାରିଗର ଜାପାନୀ ସିଂଙ୍କ ଟିମକୁ ଏବେ ଫୁରସତ ନାହିଁ । ସୁନେଲି ଓ ରୂପେଲି ମେଢ ନିର୍ମାଣ ପାଇଁ କଟକ ସହର, ରାଜ୍ୟ ଓ ରାଜ୍ଯ ବାହାରୁ ବଇଣା ଆସିଛି । ୧୦-୧୨ ଦିନ ଭିତରେ ମେଢ କାମ ସାରି ପୂଜା ମଣ୍ଡପକୁ ପଠାଇବେ । କଟକର ବିଭିନ୍ନ ସ୍ଥାନରେ ସୁନା, ଚାନ୍ଦି ମେଢ଼ ବଢ଼ିଥିଲେ ସୁଦ୍ଧା ଜରିମେଢ଼ ଅଧିକ ଆକର୍ଷଣୀୟ ହେଉଥିବା କହିଛନ୍ତି କାରିଗର । ବର୍ଷା ଯୋଗୁଁ କାମ ସାମାନ୍ଯ ମାନ୍ଦା ଥିବାବେଳେ ଆଗକୁ ପାଗ ଅନୁକୂଳ ହେଲେ ଦୁର୍ଗାପୂଜା ପ୍ରସ୍ତୁତି ଆହୁରି ଜୋର ଧରିବ ବୋଲି ସମସ୍ତଙ୍କ ଆଶା ରଖିଛନ୍ତି ।
ପୋଷା କୁକୁରଙ୍କୁ ନେଇ ସ୍ପା ସେଣ୍ଟରେ କୁକୁର ପ୍ରେମୀଙ୍କ ଭିଡ଼
ଭୁବନେଶ୍ବର : ସୁନ୍ଦର ଦିଶିବା ପାଇଁ ସମସ୍ତେ ଆଗ୍ରହୀ । ଏଥିପାଇଁ ରାଜଧାନୀରେ ସ୍ଥାନେ ସ୍ଥାନେ ଖୋଲିଛି ସେଲନ, ସ୍ପା ସେଣ୍ଟର । ଭଳିକି ଭଳି ଟ୍ରିଟମେଣ୍ଟ କରି ନିଜକୁ ସୁନ୍ଦ ଭାବେ ସଜାଏ ମଣିଷ । ମଣିଷଙ୍କ ପରି ପୋଷା କୁକୁର ମାନଙ୍କ ପାଇଁ ମଧ୍ଯ ରହିଛି ସ୍ପା ସେଣ୍ଟର । ଚୁଟି କଟାଠୁ ଆରମ୍ଭ କରି ଗାଧୋଇବା, ନଖ କଟା ସହ ଫେସିଆଲ ବଡ଼ି ମସାଜ ସବୁ ଯୋଗାଇ ଦେଉଛନ୍ତି ସ୍ପା ସେଣ୍ଟର କର୍ମଚାରୀ । ରାଜଧାନୀର ପଟିଆ ଅଞ୍ଚଳରେ ଖୋଲିଛି ଦି ଡଗ୍ ସ୍ପା ଗୃମିଙ୍ଗ ସେଣ୍ଟର । ଯେଉଁଠି ପୋଷା କୁକୁର ଲଭରମାନଙ୍କ ଚାହିଦା ମୁତାବକ ସେବା ଯୋଗାଇ ଦେଉଛନ୍ତି ପ୍ରଶିକ୍ଷିତ କର୍ମଚାରୀ I ଉଚ୍ଚମାନର ସାମ୍ପୁ, କଣ୍ଡିସନର ଲଗାଇଇ ଗାଧୋଇବା ପରେ ସୁନ୍ଦ ହେୟାର ଷ୍ଟାଇଲ କରି ମାଲିକଙ୍କୁ ହସ୍ତାନ୍ତର କରନ୍ତି କର୍ମଚାରୀ ।
ସ୍ପା ସେଣ୍ଟରରେ ସଂକ୍ରମଣ ଯେପରି ନହୁଏ ସେଥିପାଇଁ ଅଧିକ ଧ୍ଯାନ ଦେଇଥାନ୍ତି କର୍ମଚାରୀ । କାମ କରିବା ସମୟରେ ଯଦି କୁକୁର କାମୁଡ଼ନ୍ତି ଦେବେ ସେଥିପାଇଁ ମଧ୍ଯ ସୁରକ୍ଷା ବ୍ଯବସ୍ଥା ରହିଛି । ଗ୍ରାହକଙ୍କ ଚାହିଦା ମୁତାବକ କୁକୁରଙ୍କ ସମସ୍ତ ଯତ୍ନ ନେଇ କାମ କରିଥାନ୍ତି କର୍ମଚାରୀ । ଖାଲି ସେତିକୁ ନୁହେଁ କୁକୁରଙ୍କ ପାଇଁ ବିଭିନ୍ନ ପ୍ରସାଧନ ସାମଗ୍ରୀ ମଧ୍ଯ ଏଠାରେ ଯୋଗାଇ ଦିଆଯାଉଛି । ଦିନକୁ ଦିନ ରାଜଧାନୀରେ ପୋଷା କୁକୁରଙ୍କ ସଂଖ୍ଯା ବଢୁଥିବାରୁ ଏହି ସ୍ପା ସେଣ୍ଟରର ବି ଚାହିଦା ବଢୁଥିବା କହିଛନ୍ତି ପଶୁପ୍ରେମୀ ।
ବିପଦରେ କୋରାପୁଟ ଜିଲ୍ଲା ପାତ୍ରପୁଟ ନିକଟ ଐତିହାସିକ ଲୁହା ବ୍ରିଜ
ଜୟପୁର : ବ୍ରିଟିଶ ଅମଳର ମୁକସାକ୍ଷୀ ପାତ୍ରପୁଟ ଲୁହା ବ୍ରିଜ । ୧୯୩୧ରେ ହୋଇଥିଲା ନିର୍ମାଣ । ଏହି ଐତିହାସିକ ପୋଲ ଏବେ ବିପଦରେ । ଜୟପୁର ଠାରୁ ବୈପାରିଗୁଡା ୨୬ ନମ୍ବର ଜାତୀୟ ରାଜପଥ ପାତ୍ରପୁଟ ନିକଟରେ ଶହେବର୍ଷ ହେଲା ସାଜିଛି ଯାତାୟାତର ମାଧ୍ଯମ । ପ୍ରତିଦିନ ହଜାର ହଜାର ଭାରିଜାନ ଓ ବସ ଟ୍ରକ ଏହାରୁ ଉପଦେଇ ଯିବା ଆସିବା କରୁଛି । କିନ୍ତୁ ମରାମତି କରାଯାଉନାଥିବାରୁ ଏହା କୌଣସି ସମୟରେ ଭୁଷୁଡ଼ିବା ଆଶଂକା ସୃଷ୍ଟି ହୋଇଛି । ଦୁଇବର୍ଷ ତଳେ ଏହି ପୋଲ ପାର୍ଶ୍ବରେ ଏକ ନୁଆ ପୋଲ ପାଇଁ ଟେଣ୍ଡେର କରାଯାଇ କାମ ଆରମ୍ଭ ହେଇଥିଲା । କିନ୍ତୁ ଠିକାଦାର କାମ ନକରିବାରୁ କାର୍ଯ୍ଯାଦେଶ ବାତିଲ୍ କରାଯାଇଛି । ତେଣୁ ତୁରନ୍ତ ନୁତନ ଏକ ପୋଲ ନିର୍ମାଣ କରିବା ସହ ଏହି ଐତିହାସିକ ପୋଲକୁ ପର୍ଯ୍ୟଟନ ସ୍ଥଳର ମାନ୍ୟତା ହେବାକୁ ଦାବୀ କରିଛି କୋଲାବ ବ୍ରିଜ୍ ସୁରକ୍ଷା ସମିତି ।
ଛତିଶଗଡ, ଆନ୍ଧ୍ର ପ୍ରଦେଶ ସମେତ ମାଲକାନଗିରି ଜିଲ୍ଲାକୁ ଯିବାପାଇଁ ଏହା ଯାତାୟାତର ମାଧ୍ଯମ । ହେଲେ ଏହି ଐତିହାସିକ ପୋଲ ଏବେ ବିପଦଶଙ୍କୁଳ ଅବସ୍ଥାରେ ଥିବାରୁ ଦୁର୍ଘଟଣା ଘଟିବା ଆଶଂକା ସୃଷ୍ଟି ହୋଇଛି । ତେଣୁ ଏହାର ଶୀଘ୍ର ଏକ ବିକଳ୍ପ ବ୍ରିଜ୍ ନିର୍ମାଣ କରିବାକୁ ବହୁବାର ଜିଲ୍ଲା ପରିଷଦ ବୈଠକରେ ମଧ୍ଯ ଦାବି ଉଠିଛି । ସେପଟେ ଜାତିୟ ରଜପଥ ବିଭାଗ ଅଧିକ୍ଷଣ ଯନ୍ତ୍ରୀ କହିଛନ୍ତି, ଏହାର ମରାମତି କରାଯିବା ସହ ନୁତନ ପୋଲ ପାଇଁ ଖୁବଶୀଘ୍ର ଟେଣ୍ଡେର ଆହ୍ବାନ କରାଯିବ ।
ବୈଜ୍ଞାନିକ ପ୍ରଣାଳୀରେ ସାପ କାମୁଡାକୁ ସିପିଆର
ଭୁବନେଶ୍ବର : ଅନ୍ଧ ବିଶ୍ବାସ ବନାମ ବିଜ୍ଞାନ। ଝଡାଫୁଙ୍କା କି ତନ୍ତ୍ରମନ୍ତ୍ର ନୁହେଁ । ବୈଜ୍ଞାନିକ ପ୍ରଣାଳୀରେ ସାପ କାମୁଡାକୁ ସିପିଆର । ଗୋଲେଡନ ଆୱାରକୁ ବୁଷ୍ଟ ଦେବ ସିପିଆର ଓ ଭିଏଲଏସ ପ୍ରଣାଳୀ । ତାଲିମ ନେଲେ ସାପ ଉଦ୍ଧାରକାରୀ । ବିଷାକ୍ତ ସାପ କାମୁଡି ଦେଇଛି । ଅଚେତ ହୋଇ ପଡିଛି ରୋଗୀ । ସିପିଆର ଓ ଭିଏଲଏସ ପ୍ରଣାଳୀରେ ଉଠାଉଛନ୍ତି ଟିମ୍ । ତେବେ ଏ ଦୃଶ୍ଯ ସତ ସତିକା ନୁହେଁ । ସାପ କାମୁଡାର ଶିକାର ହେଲେ ଗୋଲେଡନ ଆୱାର କ୍ରସ ନ କରିବା ପାଇଁ କଣ ବେସିକ ଟ୍ରିଟମେଣ୍ଟ ଦିଆଯିବ ସେନେଇ ଚାଲିଛି ପ୍ରଶିକ୍ଷଣ । ବେସିକ ଲାଇଫ ସପୋର୍ଟ ଓ CPR ପ୍ରଣାଳୀ ଦ୍ଵାରା ଅଚେତ୍ ସାପ କାମୁଡ଼ା ରୋଗୀଙ୍କ ଛାତି ନିର୍ଦ୍ଦିଷ୍ଟ ଚାପ ଦେଇ, ପାଟି ପଟେ ନିଜ ମୁହଁରେ ପବନ ଫୁଙ୍କିଲେ ରୋଗୀ ଚେତା ଫେରି ପାଇଥାଏ । ବିଏମସି ହସପିଟାଲ ପକ୍ଷରୁ ଡକ୍ଟର ନିରଞ୍ଜନ ପାଢୀଙ୍କ ତ୍ବତ୍ତବଧାନରେ କର୍ମଶାଳାରେ ଏନେଇ ଦିଆଯାଇଛି ପ୍ରଶିକ୍ଷଣ ।
ସ୍ନେକ୍ ହେଲ୍ପ ଲାଇନ ସଦସ୍ୟମାନଙ୍କୁ ଏନେଇ ବିଶେଷ BLS ଏବଂ CPR ଟ୍ରେନିଙ୍ଗ ଦିଆଯାଇଛି । ଏହାଦ୍ଵାରା ସେମାନେ ମଧ୍ୟ ନିଜ ନିଜ ଅଞ୍ଚଳ ଜରୁରୀ ପରିସ୍ଥିତିରେ ଜୀବନ ବଞ୍ଚେଇବା ପାଇଁ ସକ୍ଷମ ହୋଇ ପାରିବେ । ସାପ କାମୁଡିଲେ ଲୋକଙ୍କ ହୃଦପିଣ୍ଡ ବନ୍ଦ ହୋଇଯାଏ । ମେଡିକାଲ ଗଲାବେଳେ ହୃଦ ସ୍ପନ୍ଦନ ବନ୍ଦ ହୁଏ । ସେ ଜୀବିତ କି ମୃତ୍ଯୁ ଜଣା ପଡେନି । ଏପରି ସ୍ଥିତିରେ ସିପିଆର ଦେଲେ ଗୋଲ୍ଡେନ ଆୱାର ଭିତରେ ରୋଗୀକୁ ହସପିଟାଲ ପହଞ୍ଚାଇ ଜୀବନବଞ୍ଚାଇବା ସମ୍ଭବ ହେବ । ଏବେ ଓଡ଼ିଶାରେ ବର୍ଷକୁ ଖାଲି ସାପ କାମୁଡ଼ା ଯୋଗୁଁ ପ୍ରାୟ ୧ ହଜାର ଲୋକଙ୍କ ମୃତ୍ଯୁ ହେଉଛି । ତେଣୁ ଏହି ପ୍ରଶିକ୍ଷଣ ଅନେକ ଲୋକଙ୍କୁ ମୃତ୍ଯୁ ମୁଖରୁ ବଞ୍ଚାଇବାରେ ସହାୟକ ହୋଇପାରିବ ।
ଦୃଢ ଇଚ୍ଛା ଆଗରେ ହାର ମାନିଲା ଗରିବୀ, ନିଟ୍ ପରୀକ୍ଷାରେ ଉତୀର୍ଣ୍ଣ ହୋଇ ପ୍ରଶଂସା ସାଉଁଟୁଛନ୍ତି ଦୁଇ ସାଙ୍ଗ
ଖୋର୍ଦ୍ଧା : ଖୋର୍ଦ୍ଧା ଜିଲ୍ଲା, ବୋଲଗଡ଼ ବ୍ଲକ ଆରିକିମାର ଦେବପ୍ରକାଶ ସାହୁ ଓ ରୀତେଶ ବେହେରା । ଦୁହେଁ ପିଲା ଦିନର ସାଙ୍ଗ । ପିଲା ଦିନରୁ ଏକାଠି ଖେଳିବା ସହ ପାଠ ପଢିଛନ୍ତି ଦୁହେଁ । ଆଉ ଏବେ ଏକାଠି ମିଶି ଡାକ୍ତର ପଢିବେ । ରୋଗୀ ସେବା କରିବେ । ଦୁହେଁ ସର୍ବ ଭାରତୀୟ ମେଡିକାଲ ପ୍ରବେଶିକା ପରୀକ୍ଷାରେ ସଫଳତା ପାଇଛନ୍ତି । କଟକ SCB ମେଡିକାଲ କଲେଜରେ ଏମବିବିଏସ ପାଠ ପଢିବାକୁ ଯୋଗ୍ୟତା ହାସଲ କରିଛନ୍ତି । ଡାକ୍ତରୀ ପଢି ଆଗାମୀ ଦିନରେ ମାଗଣାରେ ରୋଗୀ ସେବା କରିବେ ବୋଲି କହିଛନ୍ତି ଦୁହେଁ ।
ଏକା ସାଙ୍ଗରେ ଦୁଇ ସାଙ୍ଗଙ୍କ ଏହି ଅଭୂତପୂର୍ବ ସଫଳତାରେ ଆରିକିମା ଉଚ୍ଚ ବିଦ୍ୟାଳୟରେ ଖୁସିର ମାହୋଲ ଖେଳିଯାଇଥିଲା । ସ୍କୁଲର ସମସ୍ତ ଶିକ୍ଷକ, ଶିକ୍ଷୟତ୍ରୀ ଉଭୟ ସାଥି ତଥା ସ୍କୁଲର ସୁନାମ ଧନ୍ୟ ଛାତ୍ରଙ୍କୁ ଅଭିନନ୍ଦନ ଜଣାଇବା ସହ ମିଠା ଖୁଆଇ ଶୁଭ ମନାସି ଥିଲେ। ଦୃଢ଼ ଇଚ୍ଛା, ପରିଶ୍ରମ ଓ ସଂଘର୍ଷ ଯେ, ସଫଳତାର ପଥକୁ ସଜାଇଦିଏ । ଦେବପ୍ରକାଶ ଓ ରୀତେଶ ତାହାର ଜ୍ଵଳନ୍ତ ଉଦାହରଣ ।
ଶରତର ଆଗମନରେ ମନ ମୋହୁଛି କାଶତଣ୍ଡୀ
କଣ୍ଟାମାଳ: କାଶତଣ୍ଡୀ ଫୁଲେ ମହୀ ଦିଶଇ ଧବଳ । ସରୋବରେ ଫୁଟିଅଛି କୁମୁଦ କମଳ । ଧରାକୁ ଛୁଇଁଛି ପାର୍ବଣ । ସଜେଇ ହୋଇଛି ପ୍ରକୃତି ରାଣୀ । ମାଆ ଦୁର୍ଗାଙ୍କ ଆଗମନର ବାର୍ତ୍ତା ଦେଉଛି କାଶତଣ୍ଡୀ । ସତେ ଯେମିତି ମାଆଙ୍କ ସ୍ବାଗତ ପାଇଁ ବାହୁମେଲାଇ ବସିଛି କାଶତଣ୍ଡୀ ଫୁଲ । ବୌଦ୍ଧ ଜିଲ୍ଲା କଣ୍ଟାମାଳର ନଇକୂଳ, ଧାନ ଖେତ, ପୋଖରୀତୁଠ, ସବୁଠି ଦେଖିବାକୁ ମିଳୁଛି କାଶତଣ୍ଡୀର ସମ୍ଭାର । କଅଁଳିଆ ପବନରେ ଦୋଳିଖେଳି ଖେଳି ବାଟୋଇଙ୍କୁ ଆନମନା କରୁଛି ଧୋବ ଫରଫର କାଶତଣ୍ଡୀ । ସତେ ଯେମିତି ଶସ୍ଯ ଶ୍ଯାମଳା ଧରଣୀରେ ନୀଳ ଆକାଶ ତଳେ ଖିଲିଖିଲି ହସୁଛି କାଶତଣ୍ଡୀ । ଯାହାକୁ ଦେଖି କବି ଲିଖନୀରୁ ଝରିପଡୁଛି ଅନେକ କବିତା ।
ଧରାପୃଷ୍ଠରେ ପାର୍ବଣ ଆସିଲେ କାଶତଣ୍ଡୀର ପସରା ଦେଖିବାକୁ ମିଳେ । ଓଡ଼ିଆ ସଂସ୍କୃତି ଓ କାଶତଣ୍ଡୀ ମଧ୍ୟରେ ରହିଛି ଅନେକ ନିବିଡ଼ତା । କାଶତଣ୍ଡୀ ମାଆ ଦୁର୍ଗାଙ୍କ ଆବାହନର ସଂକେତ ଦିଏ । ପାର୍ବଣ ଋତୁର ବନ୍ଦନା ଗାଇବା ପାଇଁ ସତେଯେମିତି ଆନମନା ହୋଇଛି ପ୍ରକୃତିରାଣୀ । ଧରଣୀ କୋଳରେ ବେଶ ଶୋଭା ପାଉଛି ଧବଳରାଣୀ କାଶତଣ୍ଡୀ ।
ବିପଦଶଙ୍କୁଳ ଅବସ୍ଥାରେ ଯାଜପୁର କଳିଙ୍ଗନଗର ଶିଳ୍ପାଞ୍ଚଳର ପ୍ରମୁଖ ରାସ୍ତା
ଯାଜପୁର ରୋଡ : ରାସ୍ତା ନୁହେଁ ତ ମରଣଯନ୍ତା । ପାଦେ ପାଦେ ଭୟ । ଟିକିଏ ଅସାବଧାନ ହେଲେ ଦୁର୍ଘଟଣା ସୁନିଶ୍ଚିତ । ଏ କୌଣସି ଉପାନ୍ତ ଇଲାକା ନୁହେଁ, ଖୋଦ ଯାଜପୁର ଜିଲ୍ଲା କଳିଙ୍ଗନଗର ଶିଳ୍ପାଞ୍ଚଳର ପ୍ରମୁଖ ରାସ୍ତାର ଦୃଶ୍ୟ । ଯାଜପୁର ରୋଡ଼ ନୂଆଗଡ଼ ଠାରୁ ମିଲିଟାରୀ ଛକ ଦେଇ ଡ଼ୁବୁରୀ ପର୍ଯ୍ୟନ୍ତ ୧୫ କି.ମି ଲମ୍ବିଛି ଏହି ରାସ୍ତା । ଏହି ରାସ୍ତା ଦେଇ ଦୈନିକ ହଜାର ହଜାର ସଂଖ୍ୟାରେ ଭାରିଯାନ ବିଭିନ୍ନ ସ୍ଥାନ ସମେତ ରାଜ୍ୟ ବାହାରକୁ ଚଳାଚଳ କରୁଛି । ହେଲେ ମରାମତି ଅଭାବରୁ ଏହି ରାସ୍ତାର ବିଭିନ୍ନ ସ୍ଥାନରେ ବଡବଡ ଗାତ ସୃଷ୍ଟି ହୋଇଛି । ଖାଲରେ ପାଣି ଜମି ରହୁଥିବାରୁ ଯାତ୍ରୀ ଓ ଜନସାଧାରଣ ଅକଥନୀୟ ଦୁର୍ଦ୍ଦଶା ଭୋଗିବା ସହ ଦୁର୍ଘଟଣାର ଶିକାର ହେଉଛନ୍ତି । ଅନେକ ସମୟରେ ଲୋକଙ୍କ ଜୀବନ ହାନୀ ହେଉଛି । ଯାହାକୁ ନେଇ ସ୍ଥାନୀୟ ଲୋକ ଓ ଯାତ୍ରୀ ଅସନ୍ତୋଷ ବ୍ୟକ୍ତ କରିଛନ୍ତି । ସରକାର ଏଥିପ୍ରତି ଦୃଷ୍ଟି ଦେବାକୁ ବିଭିନ୍ନ ମହଲରେ ଦାବି ହୋଇଛି ।
କଳିଙ୍ଗନଗର ଶିଳ୍ପାଞ୍ଚଳର ପ୍ରମୁଖ ରାସ୍ତାର ଦୂରାବସ୍ଥା ପାଇଁ ଲୋକେ ବର୍ଷା ଦିନେ ନାନା ଦୁର୍ଦ୍ଦଶା ଭୋଗୁଛନ୍ତି । ଏହି ରାସ୍ତାର ମାନପୁର ନିକଟରେ ଏକ ରେଲୱେ ଓଭରବ୍ରିଜ ରହିଛି । ଏହି ବ୍ରିଜ ଉପରେ ମଧ୍ୟ ବଡ଼ବଡ଼ ଗର୍ତ୍ତ ସୃଷ୍ଟି ହୋଇଛି । ଫଳରେ ଏଠାରେ ବାରମ୍ବାର ଦୁର୍ଘଟଣା ଘଟୁଛି। ଦୀର୍ଘ ଦିନରୁ ଏପରି ସମସ୍ୟା ଦେଖାଯାଉଥିଲେ ମଧ୍ୟ ପୂର୍ତ୍ତ ବିଭାଗ ଅଧିକାରୀ ଏଥିପ୍ରତି ଦୃଷ୍ଟି ଦେଉନଥିବା ଅଭିଯୋଗ ହୋଇଛି । ଖୁବଶୀଘ୍ର ବିଭାଗୀୟ ଅଧିକାରୀଙ୍କ ସହ ଆଲୋଚନା କରାଯାଇ ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଯାଜପୁର ଜିଲ୍ଲାପାଳ ।
ମୟୂରଙ୍କ ସୁରକ୍ଷା ଓ ଅଣ୍ଡା ସଂରକ୍ଷଣ କରୁନି ବନବିଭାଗ, ପ୍ରାଣୀ ଉଦ୍ୟାନ କେଜରେ ଏଣେତେଣେ ପଡିଛି ମୟୂରଙ୍କ ଅଣ୍ଡା
ଢେଙ୍କାନାଳ : ବିପଦରେ ଜାତୀୟ ପକ୍ଷୀ ମୟୂର । ମୟୂରଙ୍କ ସୁରକ୍ଷା ଓ ଅଣ୍ଡା ସଂରକ୍ଷଣ ବ୍ୟବସ୍ଥା କରୁନି ବନବିଭାଗ । କେଜ ମଧ୍ୟରେ ଅଣ୍ଡା ଗୁଡ଼ିକ ଏଣେତେଣେ ହୋଇ ପଡିଛି । କିଛି ନଷ୍ଟ ହୋଇଗଲାଣି ତ ଆଉ କିଛି ବାଲିରେ ଗଡୁଛି । ଢେଙ୍କାନାଳ ଜିଲ୍ଲା କପିଳାସ ପ୍ରାଣୀ ଉଦ୍ୟାନରେ ଦେଖିବାକୁ ମିଳିଛି ଏଭଳି ଅବସ୍ଥା । ମୟୂରର ଅଣ୍ଡା ଗୁଡିକ ବନବିଭାଗ ସଂରକ୍ଷିତ କରିବାରେ ଅସମର୍ଥ ସାଜିଛି । ଢେଙ୍କାନାଳ ଜିଲ୍ଲାର ବିଭିନ୍ନ ସଂରକ୍ଷିତ ଜଙ୍ଗଲରେ ଅଛନ୍ତି ଶହ ଶହ ମୟୂର । ବିଶେଷ କରି କପିଳାସ ରେଞ୍ଜ ଅଧିନରେ ଥିବା କପିଳାସ ଅଭୟାରଣ୍ୟ, ହିନ୍ଦୋଳ ରେଞ୍ଜ ଅନ୍ତର୍ଗତ କୋଇ ଓ କନ୍ଧରା ଜଙ୍ଗଲରେ ଅଣ୍ଡିରା ଓ ମାଈ ପ୍ରଜାତିର ମୟୂର ଅଛନ୍ତି । ବିଶେଷ କରି ଅଣ୍ଡିରା ମୟୂର ମାନେ ପୁଚ୍ଛ ମେଲାଇ ନାଚିଥାନ୍ତି । ଯାହା ଦେଖିବା ଅତି ବିରଳ । ହେଲେ ବିଡମ୍ବନାର ବିଷୟ ରକ୍ଷଣାବେକ୍ଷଣ ଅଭାବରୁ ବିଭିନ୍ନ ସଂରକ୍ଷିତ ଜଙ୍ଗଲରେ ଶିକାରୀ ମାନଙ୍କ ଲୋଲୁପ ଦୃଷ୍ଟିର ଶିକାର ହେଉଛନ୍ତି ନୀରିହ ମୟୂର । ଏପରିକି ମୟୂର ଶିକାରରେ କିଛି ବନବିଭାଗ କର୍ମଚାରୀ, ଅଧିକାରୀ ଶିକାରୀ ମାନଙ୍କ ସହ ହାତ ମିଳାଇଥିବା ଅଭିଯୋଗ ହୋଇଛି ।
ସଂରକ୍ଷିତ ଜଙ୍ଗଲ ସମେତ କେଜ ମଧ୍ୟରେ ମୟୂରର ଅଣ୍ଡାକୁ ସଂରକ୍ଷଣ କରି ରଖିବାରେ ଧ୍ୟାନ ଦେଉନି ବନବିଭାଗ । ଅନ୍ୟ ପଟରେ ଶିକାରୀ ମାନେ ମୟୂର ଶିକାର କରି ଏହାର ପୁଚ୍ଛକୁ ବିଭିନ୍ନ ସ୍ଥାନରେ ବହୁମୂଲ୍ୟ ଟଙ୍କାରେ ବିକ୍ରି କରିଦେଉଛନ୍ତି । ୧୯୭୨ ମସିହାରୁ ମୟୂରକୁ ଜାତୀୟ ପକ୍ଷୀ ଭାବେ ଘୋଷଣା କରି କେନ୍ଦ୍ର ସରକାର ଦାୟିତ୍ଵ ସାରିଦେଇଛନ୍ତି । ହେଲେ ଜାତୀୟ ପକ୍ଷୀ କିପରି ସୁରକ୍ଷିତ ରହିବେ ? ଏହାର କିପରି ବଂଶବୃଦ୍ଧି ହୋଇପାରିବ ସେଥିପାଇଁ ଜାତୀୟ, ରାଜ୍ୟ ଓ ଜିଲ୍ଲାସ୍ତରରେ କୌଣସି ଯୋଜନା ପ୍ରସ୍ତୁତ ହେଉନାହିଁ । ଫଳରେ ଦିନ ଆସିବ ଜନମାନସରୁ ମୟୂର ଲୋପ ପାଇଯିବା ଆଶଙ୍କା ଦେଖାଦେଇଛି । ଏପଟେ ଘଟଣାକୁ ସ୍ବୀକାର କରିଛନ୍ତି ଜିଲ୍ଲା ବନଖଣ୍ଡ ଅଧିକାରୀ।