ଇମରାନଙ୍କୁ କରାଯାଇଛି କି ହତ୍ୟା ? ୫ଟି କାରଣ ବଢ଼ାଉଛି ସସପେନ୍ସ

ନନ୍ଦିଘୋଷ ବ୍ୟୁରୋ: ପୂର୍ବତନ କ୍ରିକେଟର ତଥା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଜେଲ୍ ମଧ୍ୟରେ କରାଯାଇଛି ହତ୍ୟା । ଏମିତି କିଛି ଦାବି ଆଫଗାନିସ୍ତାନ ମିଡିଆ ଦାବି କରିବା ପରେ ସାରା ବିଶ୍ବରେ ଚର୍ଚ୍ଚା ଆରମ୍ଭ ହୋଇଯାଇଛି । ଇମ୍ରାନଙ୍କ ପରିବାର ଲୋକଙ୍କୁ ଗତ ତିନି ସପ୍ତାହ ହେବ ତାଙ୍କ ସହ ଭେଟ ହେବାକୁ ଦିଆଯାଉ ନଥିବା ବେଳେ ଏମିତି ଖବର ଆସିଛି । ଇମ୍ରାନଙ୍କୁ ଭେଟିବାକୁ ତାଙ୍କ ଭଉଣୀ ଅଲିମା, ଉଜମା ଏବଂ ନୁରିନ ବାରମ୍ବାର ଅଦିୟାଲା ଜେଲକୁ ଯାଇଥିଲେ ବି ଭାଇ ସହ ତାଙ୍କର ଭେଟ ହୋଇ ପାରିନି । ଯାହାକୁ ନେଇ ଆଫଗାନିସ୍ତାନ ମିଡ଼ିଆର ଦାବିକୁ ଦୃଢ଼ କରୁଛି ।

ପାକିସ୍ତାନରେ ଏବେ ସ୍ଥିତି ଏମିତି ଯେ, ଇମ୍ରାନଙ୍କ ସମର୍ଥକ ଜେଲ ବାହାରେ ଜମା ହୋଇ ବିକ୍ଷୋଭ କରିବା ଆରମ୍ଭ କରିଦେଇଛନ୍ତି । ଖବରକୁ ନେଇ ନା ସରକାର କିଛି କହୁଛନ୍ତି, ନା ଜେଲ୍ ପ୍ରଶାସକ ବି ମୁହଁ ଖୋଲୁଛନ୍ତି । ଏପରିକି ସରକାରୀ ସ୍ତରରେ ଦୁଇ ସପ୍ତାହ ହେବ ଇମ୍ରାନଙ୍କ କୌଣସି ଫଟୋ ବି ଜାରି କରାଯାଇନି । ଏସବୁ ଭିତରେ ଏମିତି ୫ଟି ସଙ୍କେତ ମିଳୁଛି, ଯାହା ଇମ୍ରାନଙ୍କ ସହ କିଛି ଘଟିବା ଆଶଙ୍କାକୁ ଆହୁରି ମଜଭୁତ କରୁଛି । ପ୍ରକୃତରେ ଇମ୍ରାନଙ୍କ ମୃତ୍ୟୁ ଘଟିଛି ନାହିଁ ତାହା ଏବେ ବି ଅସ୍ପଷ୍ଟ ରହିଛି । ହେଲେ ଏମିତି ଆଶଙ୍କାକୁ ନେଇ ମିଳୁଥିବା ସେହି ୫ଟି ସଙ୍କେତ କ’ଣ ଆସନ୍ତୁ ଜାଣିବା ।

ଡକ୍ଟରଙ୍କୁ ଭେଟିବାକୁ ଦିଆ ନଯିବାର ପଛର କାରଣ କ’ଣ ?

୨୦୨୫ ମାର୍ଚ୍ଚରେ ପିଆଇଏମଏସ ହସ୍ପିଟାଲର ମେଡିକାଲ ଟିମ୍ ଇମ୍ରାନଙ୍କ ସ୍ବାସ୍ଥ୍ୟର ଯାଞ୍ଚ କରିଥିଲେ । ହେଲେ ପିଟିଆଇ ପକ୍ଷରୁ ଦାବି କରାଯାଇଛି, ଏହି ମେଡିକାଲ ଚେକ୍ ଅପ୍ ଲୋକ ଦେଖାଣିଆ ଥିଲା । ଏହାପରେ କୌଣସି ବିଶ୍ବାସନୀୟ ଡକ୍ଟରଙ୍କୁ ତାଙ୍କର ସ୍ବାସ୍ଥ୍ୟାବସ୍ଥା ପରୀକ୍ଷା କରିବାକୁ ଦିଆଯାଇନି । ଇମ୍ରାନଙ୍କୁ ସପ୍ତାହକୁ ଦୁଇଥର ତାଙ୍କ ପରିବାର, ଓକିଲ ଓ ବନ୍ଧୁ ଦେଖା କରିପାରିବେ ବୋଲି କୋର୍ଟ ଆଦେଶ ଦେଇଥିଲେ । ହେଲେ, କାହାକୁ ବି ତାଙ୍କ ସହ ଭେଟ କରିବାକୁ ଦିଆଯାଉନି । ଏମିତି ସ୍ଥିତିରେ ତାଙ୍କ ସ୍ବାସ୍ଥ୍ୟାବସ୍ଥାକୁ ନେଇ ପ୍ରଶ୍ନ ଉଠିବାରେ ଲାଗିଛି ।

କାହିଁକି ଓକିଲଙ୍କୁ ଭେଟିବାକୁ ଦିଆଯାଉନି ?

ଇସଲାମାବାଦ ହାଇକୋର୍ଟଙ୍କ ସ୍ପଷ୍ଟ ନିର୍ଦ୍ଦେଶ ଥିଲା ଇମ୍ରାନଙ୍କୁ ତାଙ୍କ ଓକିଲ ନିୟମିତ ଭାବେ ଭେଟିବା ସୁନିଶ୍ଚିତ କରିବା । ହେଲେ ଗତ ମାସରୁ ତାଙ୍କୁ ଭେଟିବାକୁ ଓକିଲଙ୍କୁ ବି ଅନୁମତି ଦିଆଯାଉନି । ଏମିତି ସ୍ଥିତିରେ ଇମ୍ରାନଙ୍କୁ ନେଇ କିଛି ଲୁଚା ଯାଉଥିବା ନେଇ ପିଟିଆଇର ଦାବି ଆଶଙ୍କାକୁ ଆହୁରି ବଢ଼ାଇ ଦେଇଛି ।

ପରିବାରକୁ ଭେଟିବାକୁ ଅନୁମତି ମିଳୁନି କାହିଁକି ?

ଇମ୍ରାନଙ୍କ ତିନି ଭଉଣୀ ଅଲିମା ଖାନ, ନୁରିନ ଖାନ ଏବଂ ଉଜମା ଖାନଙ୍କୁ ବାରମ୍ବାର ଗେଟ୍ ପାଖରୁ ଫେରାଇ ଦିଆଯାଉଛି । ନଭାମ୍ବର ୨୫ ରାତିରେ ତିନି ଭଉଣୀ ଜେଲ ବାହାରେ ଶହ ଶହ ସମର୍ଥକଙ୍କ ସହ ବିକ୍ଷୋଭ କରିବା ସହ ଧାରଣାରେ ବସିଥିଲେ । ଇମ୍ରାନଙ୍କ ସହ କିଛି ଘଟିଥିବା ସେମାନେ ଅଭିଯୋଗ କରିଥିଲେ । ଏପରିକି ନୁରିନ ପଞ୍ଜାବ ପୋଲିସ ଉପରେ ଆକ୍ରମଣ ଅଭିଯୋଗ ବି ଲଗାଇଥିଲେ । ବିନା କୌଣସି ଚେତାବନୀ ଦେଇ ଷ୍ଟ୍ରିଟ ଲାଇଟ ବନ୍ଦ କରି ପୋଲିସ ଆକ୍ରମଣ କରିଥିବା ଅଭିଯୋଗ କରିଥିଲେ । ୭୧ ବର୍ଷିୟ ନୁରିନ ଖାନ କହିଥିଲେ, ପୋଲିସ ତାଙ୍କ ଚୁଟି ଧରି ରାସ୍ତାରେ ଘୋଷାଡ଼ି ଥିଲା । ଅନ୍ୟ ମହିଳାଙ୍କୁ ବି ପୋଲିସ ଧକ୍କା ମାରିବା ସହ ଚାପୁଡ଼ା ମାରିଥିଲା । ଆକ୍ରମଣରେ ସାମିଲ ସମସ୍ତ ପୋଲିସ କର୍ମଚାରୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ସେ ପଞ୍ଜାବ ଆଇଜିପିଙ୍କୁ ଦାବି କରିଥିଲେ ।

ଦୁଇ ସପ୍ତାହ ହେବ ଇମ୍ରାନଙ୍କ ସୂଚନା ନାହିଁ

ପିଟିଆଇ ନେତାଙ୍କ କହିବା କଥା, ଇମ୍ରାନ ଖାନଙ୍କୁ କୌଣସି ଗୁପ୍ତ ସ୍ଥାନକୁ ସିପ୍ଟ କରିଦିଆଯାଇଛି କିମ୍ବା ଅଜ୍ଞାତବାସରେ ରଖାଯାଇଛି । ଗତ ଦୁଇ ସପ୍ତାହ ହେବ ଜେଲରୁ ତାଙ୍କୁ ନେଇ କୌଣସି ଅଧିକାରିକ ଫଟୋ କି ସୂଚନା ଆସିନାହିଁ । ତେବେ ଏହା ପ୍ରଥମ ଘଟଣା ପୂରା ଦୁଇ ସପ୍ତାହ ହେବ ଇମ୍ରାନଙ୍କୁ ନେଇ କୌଣସି ସୂଚନା ଦିଆଯାଇନି । ଯାହା ସନ୍ଦେହକୁ ଆହୁରି ବଢ଼ାଇ ଦେଉଛି ।

ହଠାତା ଜରୁରୀ ବୈଠକ କାହିଁକି ଡକାଇଲେ ମୁନିର ?

ଇମ୍ରାନ ଖାନଙ୍କୁ ନେଇ ରହସ୍ୟ ଲାଗି ରହିଥିବା ବେଳେ ପାକିସ୍ତାନ ସେନା ପ୍ରମୁଖ ଜେନେରାଲ ଅସୀମ ମୁନିର ହଠାତ ଉଚ୍ଚସ୍ତରୀୟ ସୁରକ୍ଷା ବୈଠକ ଡକାଇଛନ୍ତି । କୁହାଯାଉଛି, ଏହି ମିଟିଂରେ ଆଇଏସଆଇ, ମିଲେଟ୍ରି ଇଣ୍ଟେଲିଜେନ୍ସ ଓ ଗୃହ ମନ୍ତ୍ରାଳୟର ବରିଷ୍ଠ ଅଧିକାରୀ ଉପସ୍ଥିତ ଥିଲେ । ବୈଠକର ଏଜେଣ୍ଡା ସାର୍ବଜନୀନ କରାଯାଇନାହିଁ । ତେବେ ଏମିତି ସ୍ଥିତିରେ ମୁନିର ବୈଠକ ଡାକିବାକୁ ନେଇ ପାକିସ୍ତାନରେ ଶାସନ ଓ ସେନା ମଧ୍ୟରେ କିଛି ବଡ଼ ଖେଳ ହେଉଥିବାକୁ ସଙ୍କେତ ମିଳୁଛି ।