ନନ୍ଦିଘୋଷ ବ୍ୟୁରୋ : ଭେନେଜୁଏଲା ରାଷ୍ଟ୍ରପତିଙ୍କୁ ଗିରଫ କରିବାର ପ୍ରଥମ ଫଟୋ ଛାଡ଼ିଲା ଆମେରିକା। ଭେନେଜୁଏଲା ରାଷ୍ଟ୍ରପତି ମାଦୁରୋଙ୍କୁ ଗିରଫ ପରେ ପ୍ରଥମ ଫଟୋ ପ୍ରଦାନ କରିଛି ଆମେରିକା । ମାଦୁରୋଙ୍କ ଆଖିରେ ପଟି ବାନ୍ଧି ଦିଆଯାଇଛି ଯାହା ଦ୍ୱାରା ସେ ତାଙ୍କ ଚାରିପାଖରେ କିଛି ଦେଖିପାରିବେ ନାହିଁ। ସେ ଇୟରମଫ୍ ମଧ୍ୟ ପିନ୍ଧିଛନ୍ତି। ଭେନେଜୁଏଲାର ରାଷ୍ଟ୍ରପତିଙ୍କୁ ଏକ ଆମେରିକୀୟ ଯୁଦ୍ଧଜାହାଜ ମାଧ୍ୟମରେ କାରାକାସରୁ ଆମେରିକା ପଠାଯାଉଛି। ତା’ପରେ ତାଙ୍କୁ ହେଲିକପ୍ଟର ଯୋଗେ ନ୍ୟୁୟର୍କ ନିଆଯିବ। ଶବ୍ଦ ଯୋଗୁଁ ସେ ଇୟରମଫ୍ ପିନ୍ଧିଛନ୍ତି। ତାଙ୍କ ପାଖରେ ଏକ ଛୋଟ, ଅଧା ଖାଲି ପାଣି ବୋତଲ ମଧ୍ୟ ଅଛି। ଆଖିରେ କଳାପଟି, ହାତକଡ଼ି, ହାତରେ ପାଣି ବୋତଲ ଧରିଥିବାରୁ ଏକ ଫଟୋ ଜାରି କରିଛି ଆମେରିକା। ଆମେରିକା ହେପାଜତରୁ ମାଡୁରୋଙ୍କ ପ୍ରଥମ ଫଟୋ ସାମ୍ନାକୁ ଆସିଛି। ଆମେରିକା ଭେନେଜୁଏଲାରାଜଧାନୀ କାରାକାସ ସମେତ ଅନେକ ଲକ୍ଷ୍ୟସ୍ଥଳରେ ବୋମା ମାଡ଼ କରିଥିଲା। ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଥିଲା। ଟ୍ରମ୍ପ ଦାବି କରିଥିଲେ ଯେ ମାଦୁରୋ ଏବଂ ତାଙ୍କ ପତ୍ନୀ ଆମେରିକାର ହେପାଜତରେ ଅଛନ୍ତି। ଆମେରିକୀୟ ସେନା ତୁରନ୍ତ ରାଷ୍ଟ୍ରପତି ମାଦୁରୋଙ୍କୁ ଆମେରିକାକୁ ନେଇଥିଲା। ଆମେରିକା କାହାର ଚାପ ଆଗରେ ମୁଣ୍ଡ ନୁଆଁଇବ ନାହିଁ ବୋଲି କହିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଅପରେସନକୁ ଲାଇଭ୍ ଦେଖିବା ଏକ ଟିଭି ଶୋ ଭଳି ଥିଲା ବୋଲି କହିଥିଲ ଟ୍ରମ୍ପ। ଆମେରିକାର ଆଟର୍ଣ୍ଣି ଜେନେରାଲ କହିଛନ୍ତି ଯେ ମାଡୁରୋଙ୍କ ବିରୁଦ୍ଧରେ ନ୍ୟୁୟର୍କରେ ବିଚାର କରାଯିବ। ମାଦୁରୋଙ୍କ ବିରୁଦ୍ଧରେ ନିଶା କାରବାର ଷଡଯନ୍ତ୍ର, କୋକେନ୍ ଆମଦାନୀ କରିବା, ମେସିନ୍ ଗନ୍ ଏବଂ ବିନାଶକାରୀ ଉପକରଣ ରଖିବା ଏବଂ ଆମେରିକା ବିରୁଦ୍ଧରେ ମେସିନ୍ ଗନ୍ ଏବଂ ବିନାଶକାରୀ ଉପକରଣ ରଖିବାର ଷଡଯନ୍ତ୍ର ଅଭିଯୋଗ ହୋଇଛି। ସେ ଖୁବ୍ ଶୀଘ୍ର ଆମେରିକାର କୋର୍ଟରେ ସମ୍ମୁଖୀନ ହେବେ ।
ବିଜେପି ସରକାରର ଛତିଶଗଡ଼ ପ୍ରୀତି: ସଂକଟରେ ଓଡ଼ିଶାର ଜୀବନରେଖା
ବିଜେପି ସରକାରର ଛତିଶଗଡ଼ ପ୍ରୀତି । ସଂକଟରେ ଓଡ଼ିଶାର ଜୀବନରେଖା । ବର୍ଷ ଆରମ୍ଭରୁ ଶୁଖିଲାଣି ଚିରସ୍ରୋତା ମହାନଦୀ । କେଉଁଠି ପଥର ତ କେଉଁଠି ବାଲିରେ ଉଠିଲା ଘାସ । ଯେଉଁଠି ଅକାତକାତ ପାଣି ଥିଲା ସେଠି ଏବେ ମରୁଭୂମି । ପାଣି ନଥିବାରୁ ନଈ ଉପରେ ନିର୍ଭର କରୁଥିବା ଲୋକେ ଏବେ ପ୍ରମାଦ ଗଣିଲେଣି । ବାରମ୍ବାର ଆଲୋଚନା ପର୍ଯ୍ୟାଲୋଚନା ପରେ ବି ସମସ୍ଯାରେ ସମାଧାନ ହେଉନି । ନଦୀରେ ପାଣି ଶୁଖିଶୁଖି ଯାଉଥିବାରୁ ରାଜ୍ୟରେ ଜଳ ଓ ବିଦ୍ୟୁତ ସଂକଟ ଉପୁଜିବ ବୋଲି ଆଶଂକା ସୃଷ୍ଟିହେଉଛି । ଛତିଶଗଡ଼ ପ୍ରତି ବିଜେପି ସରକାରଙ୍କ ଅହେତୁକ ଅନୁକମ୍ପା ଜଳଜଳ ହୋଇ ଦେଖାଯାଉଛି ବୋଲି ଅଭିଯୋଗ କରିଛନ୍ତି ସମ୍ବଲପୁରବାସୀ ।
ଉପରମୁଣ୍ଡରେ ଶହଶହ ବ୍ୟାରେଜ ନିର୍ମାଣ କରି ପାଣି ଅଟକାଇଛନ୍ତି ଛତିଶଗଡ଼ ସରକାର । ମହାନଦୀ ଟ୍ରିବ୍ୟୁନାଲ ଗଠନ ପରେ ମଧ୍ୟ କୌଣସି ନିର୍ଯାସ ବାହାରି ପାରିଲା ନାହିଁ । ଅଣ ମୌସୁମିରେ ବ୍ୟାରେଜର ଗେଟ ବନ୍ଦ କରିଦେଇଥିବାରୁ ହୀରାକୁଦରେ କ୍ରମାଗତ ଜଳସ୍ତର କମିବାରେ ଲାଗିଛି । ଡିସେମ୍ବର ମାସରୁ ଜୁନ ମାସ ପର୍ଯ୍ୟନ୍ତ ଓଡ଼ିଶାକୁ ବୁନ୍ଦାଏ ପାଣି ମିଳୁନାହିଁ । ଉଭୟ ରାଜ୍ୟ ଆପୋଷ ବୁଝାମଣା କରି ଖୁବଶୀଘ୍ର ସମସ୍ୟାର ସମାଧାନ ନକଲେ ଓଡ଼ିଶାର ଜୀବନ ରେଖା ଜୀବନ ହରାଇବ ବୋଲି କହିଛନ୍ତି ବୁଦ୍ଧିଜୀବୀ ।
ଅସୁରକ୍ଷିତ ଧାର୍ମିକ କ୍ଷେତ୍ର ପୁରୀ: ସିରିଜ ଦୁର୍ଘଟଣା ପରେ ଚେତିଲା ପ୍ରଶାସନ
ଅସୁରକ୍ଷିତ ଧାର୍ମିକ କ୍ଷେତ୍ର ପୁରୀ । ଗହଳି ଭିତରେ ମାନୁ ନାହାନ୍ତି ଅମାନିଆ । ଦୁର୍ଘଟଣା ଯୋଗୁଁ ପ୍ରାଣ ହରାଉଛନ୍ତି ପର୍ଯ୍ୟଟକ । ବଳଗଣ୍ଡି ଛକରେ ସିରିଜ ଦୁର୍ଘଟଣା ପରେ ପଶିଲା ଚେତା । ଏଣିକି ଗହଳି ଛକରେ ସ୍ପିଡ୍ ବ୍ରେକର ସହ ରହିବ ସୁରକ୍ଷା ବ୍ୟବସ୍ଥା । ବଳଗଣ୍ଡି ପରେ ପ୍ରମୁଖ ସ୍ଥାନରେ ବୋଲେରୋ ଦୁର୍ଘଟଣାରେ ଜଣେ ୫ ବର୍ଷିୟ ଶ୍ରେୟାନ୍ସଙ୍କ ମୃତ୍ୟୁ ପରେ ବିଭିନ୍ନ ସ୍ଥାନରେ ଟ୍ରାଫିକ ପୋଷ୍ଟ ନିର୍ମାଣ କରିବାକୁ ଉଠିଛି ଦାବି । ପ୍ରମୁଖ ଛକ ଅଠରନଳା ଓ ବଡ଼ଶଙ୍ଖ ଭଳି ଜନଗହଳିପୂର୍ଣ୍ଣ ଛକ ମାନଙ୍କରେ ସ୍କୁଲ ଥିବା ଯୋଗୁଁ ଟ୍ରାଫିକ ପୋଷ୍ଟ କରିବାକୁ ଦାବି କରିଛନ୍ତି ବୁଦ୍ଧିଜୀବୀ ଓ ସ୍ଥାନୀୟ ବାସିନ୍ଦା । ଏହାସହ ଯେଉଁମାନେ ମଦ ପିଇ ଗାଡ଼ି ଚଳାଉଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଲୋକେ ଦାବି କରିଛନ୍ତି ।
ବଳଗଣ୍ଡି ଛକରେ ସିରିଜ ଦୁର୍ଘଟଣା ଘଟି ଜେଜେ ଆଗରେ ଚାଲିଗଲା ନାତିର ଜୀବନ । ଦୁର୍ଘଟଣା ପରେ ଟାୟାର ଜାଳି ଲୋକେ ରାସ୍ତା ଅବରୋଧ କରିବା ସହ ଉତ୍ତେଜନା ସୃଷ୍ଟି ହୋଇଥିଲା । ପୂର୍ବରୁ ବଳଗଣ୍ଡି ଛକରେ ଟ୍ରାଫିକ ପୋଷ୍ଟ ଥିଲା । ତେବେ ଏହାକୁ ପରବର୍ତ୍ତୀ ସମୟରେ ହଟାଇ ଦିଆଯାଇଛି । ତେବେ ଦୁର୍ଘଟଣା ରୋକିବା ତଥା ସହରରେ ଟ୍ରାଫିକ ସୁ ନିୟନ୍ତ୍ରିତ କରିବା ନେଇ ବିଚାର ବିମର୍ଶ କରାଯାଉଥିବା ବେଳେ ଖୁବଶୀଘ୍ର ଏହା ଉପରେ ପଦକ୍ଷେପ ନିଆଯିବ ବୋଲି ଏସପି ସୂଚନା ଦେଇଛନ୍ତି। ପର୍ଯ୍ୟଟନ ଓ ଧାର୍ମିକ ସହର ପୁରୀରେ ଦିନକୁ ଦିନ ଭିଡ଼ ବଢୁ ଥିବା ବେଳେ ଯାନବାହାନ ଚଳପ୍ରଚଳ ସଂଖ୍ୟା ବି ବୃଦ୍ଧି ପାଇଛି । ତେଣୁ ପର୍ଯ୍ୟଟକଙ୍କ ସୁରକ୍ଷାକୁ ପ୍ରାଥମିକତା ଦେବାକୁ ଉଠିଛି ଦାବି ।
ଆଲୋଚନା ପାଇଁ ପ୍ରସ୍ତୁତ ଥିଲେ ମାଦୁରୋ ; ଡ଼ରରେ ଆକ୍ରମଣ କଲେ ଟ୍ରମ୍ପ
ନନ୍ଦିଘୋଷ ବ୍ୟୁରୋ : ଭେନେଜୁଏଲା ଏବଂ ଆମେରିକା ମଧ୍ୟରେ ଥିବା ତିକ୍ତତା ଏବେ ବିରାଟ ରୁପ ନେଇଛି । ଗତ କିଛିଦିନ ମଧ୍ୟରେ ଦକ୍ଷିଣ ଆମେରିକାର ଭେନେଜୁଏଲାର ରାଜଧାନୀ କାରାକାସ ଭୟଙ୍କର ବିସ୍ଫୋରଣରେ କମ୍ପି ଉଠିଛି । ସ୍ଥାନୀୟ ଗଣମାଧ୍ୟମ ଏବଂ ପ୍ରତ୍ୟକ୍ଷଦର୍ଶୀମାନେ ରଣନୈତିକ ଅଞ୍ଚଳ ନିକଟରେ ସନ୍ଦେହଜନକ ବିମାନ ଆକ୍ରମଣ ହୋଇଥିବା ରିପୋର୍ଟରେ ଦର୍ଶାଯାଇଛି । ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର ଦିନ କରିଛନ୍ତି ଯେ, ଆମେରିକା ସେନା ଭେନେଜୁଏଲାର ରାଷ୍ଟ୍ରପତି ନିକୋଲାସ ମାଦୁରୋ ଏବଂ ତାଙ୍କ ପତ୍ନୀଙ୍କୁ ବନ୍ଦୀ କରିଛି । ଟ୍ରମ୍ପଙ୍କ କହିବାନୁଯାୟୀ, କାରାକାସରେ ବ୍ୟାପକ ବିମାନ ଆକ୍ରମଣ କରାଯାଇଥିଲା । ଯାହା ପରେ ମାରୁଦୋ ଏବଂ ତାଙ୍କ ପତ୍ନୀଙ୍କୁ ଅଟକ ରଖାଯାଇଛି । ସେପଟେ ଗିରଫ େହବା ପୂର୍ବରୁ ଗୁରୁବାର ଦିନ ତାଙ୍କର ଶେଷ ସାକ୍ଷାତକାରରେ ମାଦୁରୋ କହିଥିେଲ ଯେ ସେ ଆମେରିକା ସହ ଡ୍ରଗ୍ସ ଓ ତେଲ ପ୍ରସଙ୍ଗରେ ଆଲୋଚନା କରିବାକୁ ପ୍ରସ୍ତୁତ ଥିଲେ , କିନ୍ତୁ ଆଲୋଚନା ପୂର୍ବରୁ ହିଁ ଆମେରିକା ଭେନେଜୁଏଲା ଉପରେ ଜୋରଦାର ଆକ୍ରମଣ କରିଥିଲା । ସୋସିଆଲ ମିଡିଆ ପୋଷ୍ଟରେ ଟ୍ରମ୍ପ କହିଛନ୍ତି ଯେ ଆମେରିକା ଭେନେଜୁଏଲା ଏବଂ ଏହାର ନେତୃତ୍ୱ ବିରୁଦ୍ଧରେ ଏକ ବଡ଼ ସାମରିକ ଅଭିଯାନ ସଫଳତାର ସହ ସମାପ୍ତ କରିଛି । ସେ ଆହୁରି ମଧ୍ୟ କହିଛନ୍ତି ଯେ ଆମେରିକାର ଆଇନ ପ୍ରବର୍ତ୍ତନ ସଂସ୍ଥାଗୁଡ଼ିକ ମଧ୍ୟ ଏହି ଅଭିଯାନରେ ସାମିଲ ଅଛନ୍ତି। ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋ ଗୁରୁବାର କହିଛନ୍ତି ଯେ ସେ ଆମେରିକା ସହିତ ନିଶା କାରବାର ଏବଂ ତୈଳ ପ୍ରସଙ୍ଗରେ ଯେକୌଣସି ସ୍ଥାନରେ, ଯେକୌଣସି ସମୟରେ କଥାବାର୍ତ୍ତା କରିବାକୁ ଇଚ୍ଛୁକ। ତେବେ ସୁଚନା ଥାଉ କି, ଗତ ତିନି ମାସ ଧରି, ଆମେରିକୀୟ ସେନା କାରିବିଆନ ଏବଂ ପୂର୍ବ ପ୍ରଶାନ୍ତ ମହାସାଗରରେ ନିଶା କାରବାର ସନ୍ଦେହଜନକ ଜାହାଜଗୁଡ଼ିକୁ ଟାର୍ଗେଟ କରିଆସୁଛି। ଟ୍ରମ୍ପ ପ୍ରଶାସନର ତଥାକଥିତ ନିଶା ବିରୋଧରେ ଯୁଦ୍ଧର ଅଂଶ ଭାବରେ ଏପର୍ଯ୍ୟନ୍ତ ୩୦ ରୁ ଅଧିକ ଆକ୍ରମଣ କରାଯାଇଛି। ଏହି ଆକ୍ରମଣରେ ଏ ଯାଏଁ ୧୧୦ରୁ ଅଧିକ ଲୋକଙ୍କ ଜୀବନ ଯାଇଥିବା ସୂଚନା ରହିଚି ।
ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍ ପାଇଁ ଟିମ ଇଣ୍ଡିଆ ଘୋଷଣା
ନ୍ୟୁଜିଲାଣ୍ଡ ଦିନିକିଆ ସିରିଜ୍ ପାଇଁ ଟିମ ଇଣ୍ଡିଆ ଘୋଷଣା କରାଯାଇଛି । ଦଳକୁ ଫେରିଲେ ଶ୍ରେୟସ ଆୟର, ରିଷଭ ପନ୍ତ । ବିରାଟ ଏବଂ ରୋହିତ ୧୫ ଜଣିଆ ଦଳରେ କାୟମ ରହିଛନ୍ତି । ଶୁବମନ ଗିଲ ଅଧିନାୟକ, ଶ୍ରେୟସ ଉପଅଧିନାୟକ ପଦ ସମ୍ଭାଳିବେ । ଜାନୁଆରୀ ୧୧ରୁ ବରୋଦାରେ ଖେଳାଯିବ ପ୍ରଥମ ମ୍ୟାଚ । ଜାନୁଆରୀ ୧୪ରେ ରାଜକୋଟ ଏବଂ ଜାନୁଆରୀ ୧୮ରେ ଇନ୍ଦୋରରେ ମ୍ୟାଚ୍ ଖେଳାଯିବ ।
ସବୁଠାରୁ ବଡ଼ କଥା ହେଉଛି ନ୍ୟୁଜିଲାଣ୍ଡ ବିପକ୍ଷ ସିରିଜରୁ କିଛି ଖେଳାଳି ବାଦ୍ ପଡ଼ିଛନ୍ତି । ଦକ୍ଷିଣ ଆଫ୍ରିକା ବିପକ୍ଷରେ ଶତକ ମାରିଥିବା ଋତୁରାଜ ଗାଏକ୍ବାଡଙ୍କୁ ବାଦ୍ ଦିଆଯାଇଛି । ସେହିପରି ମହମ୍ମଦ ଶାମି ମଧ୍ୟ ସ୍ଥାନ ପାଇ ନାହାନ୍ତି ।
ଭାରତୀୟ ଟିମ୍: ଶୁବମନ ଗିଲ୍ (ଅଧିନାୟକ), ଶ୍ରେୟସ ଆୟର (ଉପ ଅଧିନାୟକ), ରୋହିତ ଶର୍ମା, ବିରାଟ କୋହଲି, କେ.ଏଲ୍ ରାହୁଲ, ୱାଶିଂଟନ୍ ସୁନ୍ଦର, ରବୀନ୍ଦ୍ର ଜାଡେଜା, ମହମ୍ମଦ ସିରାଜ, ହର୍ଷିତ ରଣା, ପ୍ରସିଦ୍ଧ କ୍ରିଷ୍ଣା, କୁଲଦୀପ ଯାଦବ, ରିଷଭ ପନ୍ତ, ନୀତିଶ ରେଡ୍ଡୀ, ଅର୍ଶଦୀପ ସିଂ, ଯଶସ୍ବୀ ଜୟସ୍ବାଲ୍ ।
ଶୀତର ପ୍ରକୋପ ଭିତରେ ଦାରିଙ୍ଗବାଡ଼ିରେ ଜମୁଛି ହଜାର ହଜାର ପର୍ଯ୍ୟଟକଙ୍କ ଭିଡ଼
ଶୀତର ପ୍ରକୋପ ଭିତରେ କମିବା ବଦଳରେ ବଢିଛି ପିକନିକ । ବ୍ୟସ୍ତବହୁଳ ଜୀବନରୁ ସମୟ କାଢି ସଭିଏଁ ଧାଇଁ ଆସୁଛନ୍ତି ପ୍ରକୃତି କୋଳକୁ। ପ୍ରକୃତିର ଅପରୂପ ସୌନ୍ଦର୍ଯ୍ୟ ଦେଖିବାକୁ କନ୍ଧମାଳ ଦାରିଙ୍ଗବାଡ଼ିରେ ଜମୁଛି ହଜାର ହଜାର ପର୍ଯ୍ୟଟକଙ୍କ ଭିଡ଼ । ଡୁଲୁରୀ ପାଇନ ବଣରେ ଭୋଜି ଭାତର ଆସର ସହ ନାଚ ଗୀତର ମଜା ନେଉଛନ୍ତି ଲୋକ । ଭୋଜି ଭାତ ପାଇଁ ପାଇନ ବଣ ମୁଖ୍ୟ ଆକର୍ଷଣ ସାଜିଛି । ପ୍ରାକୃତିକ ସୌନ୍ଦର୍ଯ୍ୟକୁ ମନଭରି ଉପଭୋଗ କରିବା ସହ ଶୀତୁଆ ସକାଳର ଭରପୁର ମଜା ନେଉଛନ୍ତି । ବିଭିନ୍ନ ପର୍ଯ୍ୟଟନ ସ୍ଥଳୀ ବୁଲିବା ସହ ଆତ୍ମସନ୍ତୋଷ ଲାଭ କରୁଛନ୍ତି ପର୍ଯ୍ୟଟକ ।
ପର୍ଯ୍ୟଟନ ସ୍ଥଳୀରେ ପର୍ଯ୍ୟଟକଙ୍କ ଭିଡ଼ ସହ ବଣଭୋଜିର ଆସର ଜମୁଛି। କିନ୍ତୁ ପର୍ଯ୍ୟଟନ ସ୍ଥଳୀର ବିକାଶ ସହ ପର୍ଯ୍ୟଟକଙ୍କ ସୁରକ୍ଷା ଓ ବ୍ୟବସ୍ଥାକୁ ନେଇ ଉଠିଛି ପ୍ରଶ୍ନ ।ବଣ ଭୋଜିର ପ୍ରମୁଖ ପେଣ୍ଠ ସ୍ଥଳୀ ପାଇନ୍ ଜଙ୍ଗଲରେ ଦେଖିବାକୁ ମିଳିଛି କୁଢ଼କୁଢ଼ ଆବର୍ଜନା । ଏହି ଅଳିଆ ଆବର୍ଜନା ଭିତରେ ଭୋଜି କରିବା ସହ ଅସନ୍ତୋଷ ପ୍ରକାଶ କରିଛନ୍ତି ପର୍ଯ୍ୟଟକ। ସ୍ଥାନୀୟ ପ୍ରଶାସନ ଏଥିପ୍ରତି ଦୃଷ୍ଟି ଦେଉନଥିବା ଯୋଗୁଁ ପରିବେଶ ପ୍ରଦୂଷିତ ହେଉଥିବା ଅଭିଯୋଗ ହୋଇଛି।
ଆଜି ବିଶ୍ଵପ୍ରସିଦ୍ଧ ବରଗଡ଼ ଧନୁଯାତ୍ରାର ଅନ୍ତିମ ଦିନ: କଂସ ବଧ ସହିତ ପଡିବ ଯବନିକା
ଆଜି ବିଶ୍ଵପ୍ରସିଦ୍ଧ ବରଗଡ଼ ଧନୁଯାତ୍ରାର ଅନ୍ତିମ ଦିନ। ଆଜି କଂସ ବଧ ସହିତ ପଡିବ ଯବନିକା। ଗତକାଲି ଦଶମ ଦିନରେ ଅକ୍ରୁରଙ୍କ ସହିତ ମଥୁରାରେ ପହଞ୍ଚିଥିଲେ ଦୁଇଭାଇ କୃଷ୍ଣ ବଳରାମ । ପ୍ରଭୁଙ୍କୁ ଭବ୍ୟ ସ୍ୱାଗତ ସହ ଆନନ୍ଦ ଉଲ୍ଲାସର ନାଚିଉଠିଥିଲେ ମଥୁରାବାସୀ। ମଧୁବନ ତୋଟାରୁ ମଥୁରା ଭ୍ରମଣ ଆରମ୍ଭ କରିଥିଲେ ବାଙ୍କବିହାରୀ । ବାଟରେ ପୂଜାର୍ଚ୍ଚନା ସହ କଂସର ଆତଙ୍କରୁ ରକ୍ଷା ପାଇଁ ଲୋକେ ନିବେଦନ କରିଥିଲେ । ରଜକ ସହ ସାକ୍ଷାତ ପରେ ଖଜୁରଟିକ୍ରାରେ ଥିବା ରାଜକୀୟ ବଗିଚାରେ ପ୍ରଭୁଙ୍କ ସହ ସୁଦାମା ମାଳିଙ୍କ ଭେଟ ହୋଇଥିଲା । ତାପରେ ସ୍ଥାନୀୟ ଶ୍ୟାମାକାଳୀ ମନ୍ଦିରରେ କୁବୁଜାଙ୍କ ସହ ଦେଖା ହୋଇଥିଲା । ଭଗବାନଙ୍କୁ ପ୍ରାର୍ଥନା କରିବା ପରେ ପ୍ରଭୁଙ୍କ ସ୍ପର୍ଶରେ କୁବୁଜା ଉଦ୍ଧାର ହୋଇଥିଲା। ଏକ ସୁନ୍ଦରୀ ନାରୀରେ ପରିଣତ ହୋଇଥିଲା କୁବୁଜା । ମଥୁରାରେ ଭଗବାନ କୃଷ୍ଣଙ୍କର ଲୀଳା ଦେଖି କଂସର ଅତ୍ୟାଚାରରୁ ମଥୁରାବାସୀ ମୁକ୍ତି ପାଇବେ ବୋଲି ଆଶା ରଖିଛନ୍ତି।
ମହାରାଜା କଂସ ନଗର ଭ୍ରମଣ ସହ ରଂଗ ମହଲରେ ନାଚ ଗୀତର ମଜା ଉଠାଇଥିଲେ । ରାଜଦରବାରକୁ ପହଂଚି ନ୍ୟାୟ ବିଚାର କରିଥିଲେ । ଏହାପରେ କଂସ ସ୍ୱପ୍ନରେ କୃଷ୍ଣଙ୍କୁ ଦେଖି ବ୍ୟତିବ୍ୟସ୍ତ ହୋଇପଡିଥିଲେ । ହଠାତ୍ ନିଦରୁ ଉଠି ପଡ଼ି ନିଜ ମନ୍ତ୍ରୀ ପରିଷଦକୁ ଜଣାଇଥିଲେ । କଂସର ଛାୟା ଆସି କଂସକୁ ସତର୍କ କରାଇଥିବାବେଳେ ମନ୍ତ୍ରୀ ଓ ସେନାପତି ମହାରାଜା କଂସଙ୍କୁ ଆଶ୍ୱସ୍ତି କରିଛନ୍ତି । ବିଶ୍ଵପ୍ରସିଦ୍ଧ ଧନୁଯାତ୍ରାର ଅନ୍ତିମ ଦିନରେ କୃଷ୍ଣ ବଳରାମଙ୍କ ସହ ଗୋପାଳ ବାଳକଙ୍କ ମଥୁରା ଭ୍ରମଣ, କୁବଳୟା ହସ୍ତିବଧ, ଚାଣୁର ଓ ମୁଷ୍ଟିକ, ଅଷ୍ଟମଲ୍ଲ ବଧ, ଶିବଧନୁ ଭଗ୍ନ, କଂସ ବଧ ଓ ଉଗ୍ରସେନଙ୍କ ରାଜ୍ୟାଭିଷେକ ଆଦି ଦୃଶ୍ୟ ଅଭିନୀତ ହେବ। କଂସ ମୃତ୍ୟୁରେ ସମଗ୍ର ମଥୁରା ଓ ଗୋପପୁରରେ ଆନନ୍ଦର ଲହରୀ ସହ ସମାପନ ହେବ ଧନୁଯାତ୍ରା ।
ଥମୁନି ବାଂଲାଦେଶୀ ହିନ୍ଦୁ-ହତ୍ୟା, ଦୀପୁଙ୍କ ପରେ ଆଉ ଜଣଙ୍କୁ ଜାଳି ମାରିଦେଲେ…
ନନ୍ଦିଘୋଷ ବ୍ୟୁରୋ ; ଦେହରେ ଲାଗିଥିଲା ନିଆଁ ଏପଟେ ଆଖିପିଛୁଳାକେ ହେଉ୍ଥିଲା ଆକ୍ରମଣ । ଜୀବନ ବିକଳରେ ରାସ୍ତାରେ ଧାଉଁଥିଲେ ବାଂଲାଦେଶୀ ହିନ୍ଦୁ ଯୁବକ । ଆଉ ବିକଳ୍ପ ନପାଇ ଶେଷରେ ପୋଖରୀକୁ ମାରିଥିଲେ ଡିଆଁ । କିନ୍ତୁ ବଞ୍ଚାଇପାରିଲେନି ନିଜ ଜୀବନ ।
ବାଂଲାଦେଶରେ ଥମୁନି ଧାର୍ମିକ ବିବାଦ । ଦିନକୁ ଦିନ ବଢୁଛି ବାଂଲାଦେଶୀ ହିନ୍ଦୁଙ୍କ ଉପାରେ ଅତ୍ୟାଚାର । ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ହେଉଥିବା ବର୍ବର ଆକ୍ରମଣର ଆଉ ଏକ ହିନ୍ଦୁ ଶୀକାର ହୋଇଛନ୍ତି । ଢାକାରୁ ପ୍ରାୟ ୧୫୦ କିଲୋମିଟର ଦୂରରେ ଥିବା ଏକ ଗାଁରେ ଔଷଧ ଏବଂ ମୋବାଇଲ୍ ବ୍ୟାଙ୍କିଂ ବ୍ୟବସାୟ କରୁଥିବା ଖୋକନ ଚନ୍ଦ୍ର ଦାସଙ୍କ ଉପରେ ଆକ୍ରମଣ ହୋଇଛି । ବୁଧବାର ରାତିରେ ଇସଲାମିକ୍ ଉଗ୍ରବାଦୀମାନେ ନିର୍ମମ ଆକ୍ରମଣ କରିଥିଲେ । ଆକ୍ରମଣକାରୀମାନେ ଧାରୁଆ ଅସ୍ତ୍ରରେ ତାଙ୍କୁ ଆକ୍ରମଣ କରି ଜୀବନ୍ତ ଜାଳି ଦେବାକୁ ଉଦ୍ୟମ କରିଥିଲେ। ଖୋକନ ଚନ୍ଦ୍ର ଦାସଙ୍କ ପରିବାର କହିଛନ୍ତି ଯେ ସେ ବୁଧବାର ରାତିରେ ତାଙ୍କ ଦୋକାନରୁ ଘରକୁ ଫେରୁଥିବା ସମୟରେ ତାଙ୍କ ଉପରେ ଆକ୍ରମଣ ହୋଇଥିଲା। ଗୁରୁତର ଭାବରେ ପୋଡ଼ିଯାଇଥିବା ଖୋକନ ଦାସ ଜୀବନ ବିକଳରେ ନିକଟବର୍ତ୍ତୀ ପୋଖରୀକୁ ଡେଇଁ ନିଆଁ ଲିଭାଇବାରେ ସଫଳ ହୋଇଥିଲେ, କିନ୍ତୁ ତାଙ୍କ ମୁହଁ ଏବଂ ମୁଣ୍ଡ ଗୁରୁତର ଭାବରେ ପୋଡ଼ି ଯାଇଥିଲା। ପରେ ସ୍ଥାନୀୟ ଲୋକମାନେ ତାଙ୍କୁ ନିକଟସ୍ଥ ଏକ ହସ୍ପିଟାଲକୁ ନେଇଯାଇଥିଲେ, କିନ୍ତୁ ତାଙ୍କ ଅବସ୍ଥା ଗୁରୁତର ଥିବାରୁ ଢାକାକୁ ସ୍ଥାନାନ୍ତର କରାଯାଇଥିଲା, ଯେଉଁଠାରେ ଶୁକ୍ରବାର ସକାଳେ ତାଙ୍କର ମୃତ୍ୟୁ ହୋଇଥିଲା ।
ସେପଟେ ଏହି ଘଟଣାକୁ ନେଇ ପଶ୍ଚିମବଙ୍ଗ ବିଜେପି ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଦଳ ଏହାକୁ ଧାର୍ମିକ-ଭିତ୍ତିକ ହିଂସା ବୋଲି ବର୍ଣ୍ଣନା କରି କହିଛି ଯେ ଏହା ବାଂଲାଦେଶ ଏବଂ ପଶ୍ଚିମବଙ୍ଗ ଉଭୟରେ ଏକ ଚିନ୍ତାର ବିଷୟ । ମୁସଲିମ ବହୁଳ ବାଂଲାଦେଶରେ ଧାର୍ମିକ କାରଣରୁ ମାରାତ୍ମକ ଆକ୍ରମଣର ଶିକାର ହୋଇଥିବା ହିନ୍ଦୁଙ୍କ ତାଲିକାରେ ଖୋକନ ଦାସଙ୍କ ନାମ ଏବେ ସାମିଲ ହୋଇଛି। ମହମ୍ମଦ ୟୁନୁସଙ୍କ ନେତୃତ୍ୱାଧୀନ ମଧ୍ୟବର୍ତ୍ତୀକାଳୀନ ସରକାର ସମୟରେ ସଂଖ୍ୟାଲଘୁଙ୍କ ବିରୁଦ୍ଧରେ ହିଂସା ବୃଦ୍ଧି ପାଇବା ନେଇ ଅନ୍ତର୍ଜାତୀୟ ମାନବାଧିକାର ସଂଗଠନଗୁଡ଼ିକ ମଧ୍ୟ ଚିନ୍ତା ପ୍ରକାଶ କରିଛନ୍ତି। ବାଂଲାଦେଶରେ ସଂଖ୍ୟାଲଘୁଙ୍କ ବିରୁଦ୍ଧରେ “ନିରନ୍ତର ଶତ୍ରୁତା” ଉପରେ ଭାରତ ବାରମ୍ବାର ଗମ୍ଭୀର ଚିନ୍ତା ପ୍ରକାଶ କରିଛି ଏବଂ ପରିସ୍ଥିତି ଉପରେ କଡ଼ା ନଜର ରଖିବାକୁ ପ୍ରତିଶ୍ରୁତି ଦେଇଛି ।
ଅଙ୍ଗନବାଡ଼ି ପୋଷାକ ବଣ୍ଟନରେ ଦୁର୍ନୀତିର ଗନ୍ଧ: ପିଲାଙ୍କୁ ଦିଆଯାଉଛି ନିମ୍ନମାନର ପୋଷାକ
ଅଙ୍ଗନବାଡ଼ି ପୋଷାକ ବଣ୍ଟନରେ ଦୁର୍ନୀତିର ଗନ୍ଧ । ପିଲାଙ୍କୁ ଦିଆଯାଉଛି ନିମ୍ନମାନର ପୋଷାକ । ଗଞ୍ଜାମ ଜିଲ୍ଲାର ପ୍ରତ୍ୟେକ ବ୍ଲକରେ ଥିବା ଅଙ୍ଗନବାଡ଼ିରେ ଦିଆଯାଉଛି ନିମ୍ନମାନର ପୋଷାକ l ଯାହାକୁ ନେଇ ଅଭିଭାବକ ମହଲରେ ବଢୁଛି ଅସନ୍ତୋଷ। ପ୍ରତିବର୍ଷ ଅଙ୍ଗନବାଡ଼ି ୟୁନିଫର୍ମ, ଶୀତ ପୋଷାକ ଓ ଯୋତା ବାବଦକୁ ପୁଅଙ୍କ ପାଇଁ ୪୫୦ ଓ ଝିଅଙ୍କ ପାଇଁ ୫୫୦ ଟଙ୍କା ପ୍ରଦାନ କରାଯାଉଛି। ହେଲେ ପିଲାଙ୍କୁ ଦିଆ ଯାଉଥିବା ୟୁନିଫର୍ମ ପୂରା ନିମ୍ନମାନର । ଯାହା ପିନ୍ଧିବା ଉପଯୋଗୀ ନୁହେଁ। ବ୍ୟବହାର କରିବାର ମାତ୍ର ମାସେ ଦୁଇ ମାସ ମଧ୍ୟରେ ନଷ୍ଟ ହୋଇ ଯାଉଛି। ଚଳିତ ବର୍ଷ ପୋଷାକ ବଣ୍ଟନ ଶେଷ ହୋଇଥିବାବେଳେ ଏଥିରେ ଦୁର୍ନୀତି ହୋଇଥିବା ବୁଦ୍ଧିଜୀବୀ ଅଭିଯୋଗ କରିଛନ୍ତି। ଅନ୍ୟପଟେ ଏନେଇ ଦାୟିତ୍ୱରେ ଥିବା ସୁପରଭାଇଜରଙ୍କୁ ଅଭିଯୋଗ କରିଛୁ ବୋଲି କହିଛନ୍ତି ଅଙ୍ଗନବାଡ଼ି କର୍ମୀ l
ପ୍ରତିବର୍ଷ ଅଙ୍ଗନବାଡ଼ିକୁ ୟୁନିଫର୍ମ ଯୋଗାଇବା ପାଇଁ ପ୍ରତି ବ୍ଳକର କେତୋଟି ସ୍ୱୟଂ ସହାୟକ ଗୋଷ୍ଠୀକୁ ଟଙ୍କା ଦିଆଯାଏ। କିନ୍ତୁ ଯେଉଁ ପୋଷାକ ବଣ୍ଟନ କରାଯାଏ ତାହା ପିନ୍ଧିବା ଯୋଗ୍ୟ ନୁହେଁ। ପୋଷାକ ଖୁବ କମ୍ ଦିନରେ ନଷ୍ଟ ହେଉଥିବା ଯୋଗୁଁ ପିଲା ୟୁନିଫର୍ମ ପିନ୍ଧି ଆସୁନଥିବା ଦେଖିବାକୁ ମିଳୁଛି । ଅନ୍ୟପଟେ ନିମ୍ନମାନର ପୋଷାକ ବଣ୍ଟନକୁ ନେଇ ଭଞ୍ଜନଗର ଉପଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଯାଇଛି । ବ୍ଳକ ଶିଶୁ ମଙ୍ଗଳ ଅଧିକାରୀଙ୍କ ସହ ଆଲୋଚନା କରି ଏହାର ତଦନ୍ତ କରିବେ ବୋଲି ସେ ପ୍ରତିଶୃତି ଦେଇଛନ୍ତି l
ମୁସଲିମ୍ ହୋଇଥିଲେ ବି କାହିଁକି ହନୁମାନ ଭକ୍ତ ହୋଇଯାଇଥିଲେ ବଲିଉଡ ଅଭିନେତା ସଞ୍ଜୟ ଖାନ ?
ଆଜି ହେଉଛି ବଲିଉଡର ‘ଗୋଲ୍ଡେନ ବୟ’ ଭାବେ ପରିଚିତ ଥିବା ଅଭିନେତା ସଞ୍ଜୟ ଖାନଙ୍କ ୮୬ତମ ଜନ୍ମଦିବସ । ବଲିଉଡ ଠାରୁ ଆରମ୍ଭ କରି ଟିଭି ପର୍ଯ୍ୟନ୍ତ ସଞ୍ଜୟ ନିଜର ପରିଚୟ ସୃଷ୍ଟି କରିଥିଲେ । ୧୯୪୦ ମସିହା ଜାନୁଆରୀ ୩ ତାରିଖରେ କର୍ଣ୍ଣାଟକର ରାଜଧାନୀ ବେଙ୍ଗାଲୁରୁ ଠାରେ ସଞ୍ଜୟ ଜନ୍ମଗ୍ରହଣ କରିଥିଲେ । ସେ ଜଣେ ଅଭିନେତା ବ୍ୟତୀତ ଜଣେ ପ୍ରଯୋଜକ ଓ ନିର୍ଦ୍ଦେଶକ ଭାବେ ମଧ୍ୟ ପରିଚୟ ସୃଷ୍ଟି କରିଥିଲେ । ବଲିଉଡ ବ୍ୟତୀତ ସେ ଟେଲିଭିଜନ ଇଣ୍ଡଷ୍ଟ୍ରିରେ ମଧ୍ୟ କାମ କରିଥିଲେ । ସଞ୍ଜୟଙ୍କ ସହ ଏକଦା ଶୁଟିଂ ସମୟରେ ଏକ ବଡ଼ ଅଘଟଣ ଘଟିଥିଲା । ତା’ପରେ ସେ ଏକ ବର୍ଷରୁ ଅଧିକ ସମୟ ଧରି ହସ୍ପିଟାଲରେ ଭର୍ତ୍ତି ହୋଇଥିଲେ । ତେବେ ଏପରି କ’ଣ ଘଟିଥିଲା ଯେ, ସଞ୍ଜୟ ମୁସଲିମ ହୋଇ ବି ହନୁମାନ ଜୀ ଙ୍କର ଭକ୍ତ ହୋଇଯାଇଥିଲେ, ଏହି ପ୍ରଶ୍ନ ଆଜି ତାଙ୍କର ଅଗଣିତ ଫ୍ୟାନ୍ସଙ୍କ ମଧ୍ୟରେ ରହସ୍ୟମୟ ହୋଇ ରହିଛି ।
ସଞ୍ଜୟଙ୍କ ଜନ୍ମ ମୁସଲିମ ପରିବାରରେ ହୋଇଥିଲା । ତାଙ୍କର ପିତାଙ୍କ ନାମ ସାଦିକ ଅଲୀ ଖାନ ଓ ମା’ଙ୍କ ନାମ ଫତିମା ଖାନ ଥିଲା । ସଞ୍ଜୟ ଖାନଙ୍କ ଭାଇ ଫିରୋଜ ଖାନ ମଧ୍ୟ ବଲିଉଡର ଜଣେ ବଡ଼ ଅଭିନେତା-ନିର୍ଦ୍ଦେଶକ ଭାବେ ବେଶ୍ ପରିଚିତ ଅଟନ୍ତି । ସଞ୍ଜୟ କମ୍ ବୟସରୁ ହିରୋ ହେବାର ସ୍ବପ୍ନ ଦେଖିସାରିଥିଲେ । ରାଜ କପୁରଙ୍କ ଫିଲ୍ମ ‘ଆଓ୍ବାରା’ ଦେଖିବା ପରେ ସେ ଅଭିନୟ କ୍ଷେତ୍ରକୁ ଆସିବାକୁ ନିଷ୍ପତ୍ତି ନେଇଥିଲେ । ସଞ୍ଜୟ ଖାନଙ୍କ ପ୍ରକୃତ ନାମ ଶାହ ଅବ୍ବାସ ଅଲୀ ଖାନ ଥିଲା । ପରେ ସେ ହିନ୍ଦୁ ନାମ ବାଛିଥିଲେ ଓ ସଞ୍ଜୟ ଖାନ ପାଲଟି ଯାଇଥିଲେ । ଟିଭି ଶୋ ’ଦି ସ୍କ୍ବାର୍ଡ ଅଫ୍ ଟିପୁ ସୁଲତାନ’ର ଶୁଟିଂ ସମୟରେ ସେଟରେ ଅଗ୍ନିକାଣ୍ଡ ଘଟିଥିଲା । ସଞ୍ଜୟଙ୍କ ଶରୀରର ପାଖାପାଖି ୬୫ ଭାଗ ଜଳିଯାଇଥିଲା । ତାଙ୍କର ସର୍ଜରୀ ହୋଇଥିଲା ଓ ସେ ୧୩ ମାସ ପାଇଁ ହସ୍ପିଟାଲରେ ଭର୍ତ୍ତି ହୋଇଥିଲେ । ଏହି ଦୁର୍ଘଟଣା ପରେ ସଞ୍ଜୟ ଏକ ହନୁମାନ ମନ୍ଦିରର ପୂଜାରୀଙ୍କ ସହ ସାକ୍ଷାତ କରିଥିଲେ ବୋଲି ଏକ ସାକ୍ଷାତକାରରେ କହିଥିଲେ । ପୂଜାରୀ ସଞ୍ଜୟଙ୍କ ପାଇଁ ଏକ ପୂଜା ରଖିଥିଲେ ଓ ଶୀଘ୍ର ସୁସ୍ଥ ହେବା ପାଇଁ କାମନା କରିଥିଲେ ବୋଲି କହିଥିଲେ । ଉକ୍ତ ମନ୍ଦିର ଜୟପୁରରେ ଥିଲା । ପରେ ସଞ୍ଜୟ ଉକ୍ତ ମନ୍ଦିରକୁ ଯାଇଥିଲେ ଓ ହନୁମାନଙ୍କ ବିଷୟରେ ଅଧିକ ତଥ୍ୟ ପାଇଥିଲେ । ପରବର୍ତ୍ତୀ ସମୟରେ ସଞ୍ଜୟ ଭଗବାନ ହନୁମାନଙ୍କ ଉପରେ ଆଧାରିତ ‘ଜୟ ହନୁମାନ’ ସିରିୟଲ’ ନିର୍ମାଣ କରିଥିଲେ ।