ଏପ୍ରିଲରୁ ୧୬ରୁ ଓଡ଼ିଶାରେ ପ୍ରଥମ ପର୍ଯ୍ୟାୟ ଜନଗଣନା। ଏପ୍ରିଲ ୧୬ରୁ ମେ ୧୫ ଯାଏଁ ଚାଲିବ ଜନଗଣନା। ୩୦ ଦିନ ଧରି ପ୍ରଥମ ପର୍ଯ୍ୟାୟରେ ଘର ଗଣନା କରାଯିବ। ରାଜସ୍ବ ଓ ବିପର୍ଯ୍ୟୟ ପ୍ରଶମନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ପ୍ରଥମ ପର୍ଯ୍ୟାୟରେ ଘର ଏବଂ ଆସବାବପତ୍ର ଗଣନା ହେବ। ଦ୍ଵିତୀୟ ପର୍ଯ୍ୟାୟରେ ଘରକୁ ଘର ହେବ ଜନ ଗଣନା। ନିଯୁକ୍ତ ହେବେ ଲକ୍ଷାଧିକ ଜନଗଣନା ଅଧିକାରୀ। ଏହା ପୂର୍ବରୁ ସବୁ ଜିଲ୍ଲାପାଳଙ୍କ ସହ ଆଲୋଚନା କରିଛନ୍ତି ଉନ୍ନୟନ କମିଶନର। ଲୋକସେବା ଭବନରେ ଉନ୍ନୟନ କମିଶନରଙ୍କ ଅଧ୍ୟକ୍ଷତାରେ ରାଜ୍ୟସ୍ତରୀୟ ଜନଗଣନା ସମନ୍ୱୟ କମିଟି ବୈଠକରେ ତାରିଖ ଧାର୍ଯ୍ୟ ହୋଇଥିଲା। ରାଜ୍ୟରେ ଜନଗଣନା ପାଇଁ ୬ ମାସ ଧରି ପ୍ରସ୍ତୁତି ଚାଲିଥିଲା। ଭୁବନେଶ୍ୱର କଟକରେ ପ୍ରିଟେଷ୍ଟ ସରିଛି। ଆସନ୍ତା ୩ ମାସ ଧରି ଜନଗଣନା ଅଧିକାରୀଙ୍କୁ ଦିଆଯିବ ଟ୍ରେନିଂ। ୨୦୦ ଘର ପାଇଁ ଜଣେ ଜନଗଣନା ଅଧିକାରୀ ନିଯୁକ୍ତ ହେବେ। ୬ ଜଣ ଅଧିକାରୀଙ୍କ ପାଇଁ ଜଣେ ସୁପ୍ରଭାଇଜର ନିଯୁକ୍ତ ହେବେ। ପ୍ରାୟ ଲକ୍ଷେ ଜନଗଣନା ଅଧିକାରୀ ନିଯୁକ୍ତ କରାଯିବ। ଜଣେ ଜନଗଣନା ଅଧିକାରୀଙ୍କୁ 25 ହଜାର ଆର୍ଥିକ ପ୍ରୋତ୍ସାହନ ଦିଆଯିବ।ଏପ୍ରିଲରୁ ୧୬ରୁ ମେ ୧୫ ଭିତରେ ପ୍ରଥମ ପର୍ଯ୍ୟାୟରେ ଘର ଚିହ୍ନଟ ହେବ। ୨୦୨୭ ଫେବୃଆରୀରୁ ଦ୍ଵିତୀୟ ପର୍ଯ୍ୟାୟ ଜନଗଣନା ହେବ।
ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଭାବେ ଦାୟିତ୍ବ ଗ୍ରହଣ କଲେ ନିତିନ ନବୀନ
ବିଜେପିରେ ଆରମ୍ଭ ହେଲା ନବୀନ ଯୁଗ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପସ୍ଥିତିରେ ନିତିନ ନବୀନ ବିଧିବଦ୍ଧ ଭାବେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଭାବେ ଦାୟିତ୍ଵ ଗ୍ରହଣ କରିଛନ୍ତି। ପୂର୍ବତନ ଅଧ୍ୟକ୍ଷ ଜେପି ନଡ୍ଡାଙ୍କ ଠାରୁ ନୀତୀନ ନବୀନ ଦାୟିତ୍ୱ ନେଇଛନ୍ତି। ଦାୟିତ୍ୱ ନେବା ପରେ ବିଜେପିରେ ନବୀନ ଯୁଗ ଆରମ୍ଭ ହୋଇଛି।ବିଜେପି ଇତିହାସରେ ନୀତୀନ ନବୀନ ସବୁଠାରୁ କନିଷ୍ଠ ସଦସ୍ୟ ଭାବେ ଅଧ୍ୟକ୍ଷ ପଦ ଗ୍ରହଣ କରିଛନ୍ତି। ଅଧ୍ୟକ୍ଷ ପଦ ପାଇଁ ବିଜେପି ନିର୍ବାଚନ ତାରିଖ ଘୋଷଣା କରିଥିଲେ ହେଁ ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ଭରିଥିଲେ ନୀତୀନ ନବୀନ। ସେ ଏକମାତ୍ର ପ୍ରାର୍ଥୀ ରହିଥିବାରୁ ବିନା ନିର୍ବାଚନରେ ଅଧ୍ୟକ୍ଷ ଭାବେ ନିର୍ବାଚିତ ହୋଇଥିଲେ। ନୀତୀନ ନାମାଙ୍କନ ବେଳେ ୩୭ ସେଟ୍ ସମର୍ଥନର ପତ୍ର ଦାଖଲ ହୋଇଥିଲା।
ଖୋଦ୍ ପ୍ରଧାନମନ୍ତ୍ରୀ ମୋଦି ତାଙ୍କ ପ୍ରସ୍ତାବକ ରହିଥିଲେ। ଏହାବାଦ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ମଧ୍ୟ ନୀତୀନଙ୍କ ପାଇଁ ସମର୍ଥନ ପତ୍ର ବିଜେପିର ନିର୍ବାଚନ ଅଧିକାରୀଙ୍କ ନିକଟରେ ଦାଖଲ କରିଥିଲେ। ଅଧ୍ୟକ୍ଷ ହେବା ପୂର୍ବରୁ ଡିସେମ୍ବର ୧୪ରେ ନୀତୀନ ନବୀନଙ୍କୁ ଦଳର କାର୍ଯ୍ୟକାରୀ ରାଷ୍ଟ୍ରୀୟ ଅଧ୍ୟକ୍ଷ ଭାବେ ଦାୟିତ୍ୱ ପ୍ରଦାନ କରାଯାଇଥିଲା। ଏବେ ସେ ବିଧିବଦ୍ଧ ଭାବେ ଅଧ୍ୟକ୍ଷ ପଦ ସମ୍ଭାଳିଛନ୍ତି। ଅଧ୍ୟକ୍ଷ ପଦ ଗ୍ରହଣ କରିବା ପୂର୍ବରୁ ନୀତୀନ ଦିଲ୍ଲୀର ବିଭିନ୍ନ ପ୍ରସିଦ୍ଧ ମନ୍ଦିର ସମେତ ଗୁରୁଦ୍ୱାର ବଙ୍ଗଲା ସାହିବ ଯାଇଥିଲେ ଏହାପରେ ସେ ବିଜେପି ମୁଖ୍ୟାଳୟରେ ପହଞ୍ଚିଥିଲେ। ତାଙ୍କୁ ସେଠାରେ ଭବ୍ୟ ସ୍ୱାଗତ କରାଯାଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଓ କେନ୍ଦ୍ର ପରିବହନ ମନ୍ତ୍ରୀ ନୀତୀନ ଗଡକରୀ ପ୍ରମୁଖ ବିଜେପି ମୁଖ୍ୟାଳୟରେ ନିତିନ ନବୀନଙ୍କୁ ସ୍ୱାଗତ କରିଥିଲେ। ୪୫ ବର୍ଷୀୟ ନୀତୀନ ନବୀନ ସବୁଠାରୁ କନିଷ୍ଠ ସଦସ୍ୟ ଭାବେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ହେବାର ରେକର୍ଡ କରିଛନ୍ତି। ସେ ହେଉଛନ୍ତି ବିଜେପି ନେତା ତଥା ପୂର୍ବତନ ବିଧାୟକ ନବୀନ କିଶୋର ପ୍ରସାଦ ସିହ୍ନାଙ୍କ ପୁଅ। ବିହାରର ବାଙ୍କିପୁର ବିଧାନସଭା ଆସନରୁ କ୍ରମାଗତ ୫ଥର ଜିତିଛନ୍ତି ନବୀନ। ଏଯାଏ ସେ କେବେ ବି ପରାଜିତ ହୋଇନାହାନ୍ତି।
ଖୋର୍ଦ୍ଧା-ବଲାଙ୍ଗୀର ନୂଆ ରେଳ ଟନେଲରେ ଫାଟ: ଟନେଲର ସ୍ଥାୟିତ୍ବକୁ ନେଇ ଉଠିଲା ପ୍ରଶ୍ନ
ଖୋର୍ଦ୍ଧା-ବଲାଙ୍ଗୀର ନୂଆ ରେଳ ଟନେଲରେ ଫାଟ । ଟନେଲର ସ୍ଥାୟିତ୍ବକୁ ନେଇ ଉଠିଲା ପ୍ରଶ୍ନ । ୭ନମ୍ବର ଟନେଲ ସରଫେସରେ ଦେଖା ଦେଇଛି ଫାଟ । ଟନେଲର ଚାରିପାଖରେ ହୋଇଛି ଫାଟ । ନୂତନ ଟନେଲରେ ଫାଟ ଦେଖା ଯିବାପରେ ଏହା ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ଠିକା ସଂସ୍ଥାର କାର୍ଯ୍ୟକାରିତା ଓ ସ୍ଥାୟିତ୍ବକୁ ନେଇ ଉଠିଛି ପ୍ରଶ୍ନ । ଖୋର୍ଦ୍ଧା- ବଲାଙ୍ଗୀର ରେଳପଥର ୭-ନମ୍ବର ଟନେଲରେ ଦେଖା ଦେଇଛି ଏହି ଫାଟ । ଫାଟଟି କାହା ନଜରକୁ ଆସିନଥିବା ବେଳେ ହଠାତ ଆମ କ୍ୟାମେରାରେ ଦୃଶ୍ୟମାନ ହୋଇଥିଲା । ଆମେ ସଙ୍ଗେ ସଙ୍ଗେ ଟନେଲ ସୁରକ୍ଷା ଯାଞ୍ଚ ପାଇଁ ଆସିଥିବା ଇଷ୍ଟ କୋଷ୍ଟ ରେଳ ବିଭାଗ GMଙ୍କ ଦୃଷ୍ଟି ଆକର୍ଷଣ କରିଥିଲୁ । ଏହା ସରଫେସରେ ଛୋଟ କ୍ରାକ ବୋଲି କହିଥିବା ବେଳେ ରେଳ ବିଭାଗର ଯନ୍ତ୍ରୀ ମାନଙ୍କୁ ଏହାର ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଛି ବୋଲି କହିଛନ୍ତି ପୂର୍ବତଟ ରେଳ ବିଭାଗର ଜିଏମ ପରମେଶ୍ବର ଫଙ୍କୁଆଲ ।
ଈଶାନ କିଶନ କି ଶ୍ରେୟସ ଆୟର, ଟି-୨୦ରେ ୪ ନମ୍ବର ସ୍ଥାନରେ କିଏ ସୁଯୋଗ ପାଇବ ?
ଆସନ୍ତାକାଲି ଅର୍ଥାତ ଜାନୁଆରୀ ୨୧ ତାରିଖରୁ ଭାରତ-ନ୍ୟୁଜିଲାଣ୍ଡ ମଧ୍ୟରେ ୫ ମ୍ୟାଚ ବିଶିଷ୍ଟ ଟି-୨୦ ସିରିଜ ଆରମ୍ଭ ହେବ । ଏହି ଫର୍ମାଟରେ ଟିମ୍ ଇଣ୍ଡିଆର ପ୍ଲେଇଂ-୧୧ କ’ଣ ରହିବ ତାହାକୁ ନେଇ ଫ୍ୟାନ୍ସଙ୍କ ମଧ୍ୟରେ ଉତ୍ସକତା ଦେଖିବାକୁ ମିଳିଛି । ନାଗପୁରର ବିଦର୍ଭ କ୍ରିକେଟ ଆସୋସିଏସନ ଷ୍ଟାଡିୟମରେ ଏହି ମ୍ୟାଚ ଖେଳାଯିବ । ଭାରତୀୟ ସମୟ ସନ୍ଧ୍ୟା ୭ଟାରୁ ମ୍ୟାଚ ଆରମ୍ଭ ହେବ । ପାଖାପାଖି ୪ ଦଶନ୍ଧି ପରେ ଭାରତକୁ ଘରୋଇ ପିଚରେ ଦିନିକିଆ ସିରିଜରେ ପରାସ୍ତ କରିବା ପରେ ଭ୍ରମଣକାରୀ ଦଳ ନ୍ୟୁଜିଲାଣ୍ଡର ମନୋବଳ ବେଶ୍ ବୃଦ୍ଧି ପାଇଛି ।
ତେବେ ଟିମ୍ ଇଣ୍ଡିଆର ଚତୁର୍ଥ ସ୍ଥାନରେ କିଏ ସୁଯୋଗ ପାଇବ ତାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଯାଇଛି । ଆଘାତ ଜନିତ ସମସ୍ୟା କାରଣରୁ ତିଲକ ବର୍ମା ଫିଟ୍ ହେବା ମୁସ୍କିଲ । ଏପରି ସ୍ଥିତିରେ ଶ୍ରେୟସ ଆୟରଙ୍କୁ ସୁଯୋଗ ମିଳିପାରେ । ତେବେ ଈଶାନ କିଶାନଙ୍କୁ ମଧ୍ୟ ସୁଯୋଗ ମିଳିପାରେ । ଯଦି ଟିମ୍ ମ୍ୟାନେଜମେଣ୍ଟ ଲେଫ୍ଟ-ରାଇଟ କମ୍ବିନେସନକୁ ଗୁରୁତ୍ବ ଦିଏ, ତେବେ ଈଶାନ କିଶନ ଜଣେ ମଜବୁତ ଦାବିଦାର । ବର୍ତ୍ତମାନ ସମୟରେ ସେ ଶାନଦାର ଫର୍ମରେ ଅଛନ୍ତି । ମାତ୍ର ଈଶାନ ପାଓ୍ବରପ୍ଲେ ବାହାରେ ଏତେ ପ୍ରଭାବୀ ନିହନ୍ତି । ତାଙ୍କୁ ୩ ନମ୍ବରରେ ଖେଳାଯାଇପାରେ ।
ଟି-୨୦କୁ ଯଶପ୍ରୀତ ବୁମ୍ରା ଓ ହାର୍ଦ୍ଦିକ ପାଣ୍ଡ୍ୟା ଫେରୁଛନ୍ତି । ଡେଥ ଓଭରରେ ବୁମ୍ରା ଜଣେ ବଡ଼ ହତିଆର ହୋଇଥିବା ବେଳେ ହାର୍ଦ୍ଦିକ ଟିମକୁ ସନ୍ତୁଳନ ଦେଇଥାନ୍ତି । ସେହିପରି ବରୁଣ ଚକ୍ରବର୍ତ୍ତୀ ନ୍ୟୁଜିଲାଣ୍ଡ ପାଇଁ ସବୁଠାରୁ ବଡ଼ ‘ଏକ୍ସ ଫ୍ୟାକ୍ଟର’ ପ୍ରମାଣିତ ହୋଇପାରନ୍ତି ।
ଟିମ୍ ଇଣ୍ଡିଆ ସ୍କ୍ବାଡ: ସୂର୍ଯ୍ୟକୁମାର ଯାଦବ (ଅଧିନାୟକ), ଅଭିଷେକ ଶର୍ମା, ସଞ୍ଜୁ ସାମସନ (ଓ୍ବିକେଟ କିପର), ଈଶାନ କିଶନ, ଶ୍ରେୟସ ଆୟର, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, କୁଲଦୀପ ଯାଦବ, ଯଶପ୍ରୀତ ବୁମ୍ରା, ବରୁଣ ଚକ୍ରବର୍ତ୍ତୀ, ରିଙ୍କୁ ସିଂହ, ଅର୍ଶଦୀପ ସିଂହ, ରବି ବିଷ୍ଣୋଈ, ହର୍ଷିତ ରାଣା ।
ଛତିଶଗଡ ଗରିଆବନ୍ଧରେ ୯ ନକ୍ସଲଙ୍କ ଆତ୍ମସମର୍ପଣ
ଭୁଶୁଡୁଛି ଲାଲ ଦୁର୍ଗ॥ ଛତିଶଗଡ ଗରିଆବନ୍ଧରେ ୯ ନକ୍ସଲଙ୍କ ଆତ୍ମ ସମର୍ପଣ। ଅସ୍ତ୍ରଶସ୍ତ୍ର ସହ ଗରିଆବନ୍ଧ ପୋଲିସ ନିକଟରେ ଆତ୍ମ ସମର୍ପଣ କରିଛନ୍ତି ନକ୍ସଲ। ଏମାନଙ୍କ ନାଁରେ ମୋଟ ୪୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ଥିଲା। ୩ଟି AK-୪୭, ଦୁଇଟି SLR ଓ ଗୋଟିଏ ୩୦୩-କାଲିବର ରାଇଫଲ୍ ସମେତ ଛଅଟି ସ୍ୱୟଂଚାଳିତ ଅସ୍ତ୍ରଶସ୍ତ୍ର ଜବତ ହୋଇଛି । ଛତିଶଗଡ଼ର ଗରିଆବନ୍ଧ ଜିଲ୍ଲାରେ ମାଓ ବିରୋଧୀ ଅଭିଯାନରେ ଏକ ବଡ଼ ସଫଳତା ମିଳିଛି। ସିନାପାଲି ଏବଂ SDK କ୍ଷେତ୍ର କମିଟିରେ ସକ୍ରିୟ ଥିଲେ ଏହି ନଅ ଜଣ ହାର୍ଡକୋର ନକ୍ସଲ। ଆତ୍ମସମର୍ପଣ କରିଥିବା ନକ୍ସଲଙ୍କ ମଧ୍ୟରେ ଅଞ୍ଜୁ ଓରଫ କବିତା, ସୋନି ଓରଫ ବୁଦ୍ରି ଓ ଡମରୁ ଅଛନ୍ତି। ଏମାନଙ୍କ ନାଁରେ ୮ ଲକ୍ଷ ପୁରସ୍କାର ରାଶି ଥିଲା।ସମସ୍ତଙ୍କୁ ପୁନର୍ବାସ ଯୋଜନାରେ ଥଇଥାନ କରାଯିବ।
ସୁନ୍ଦରଗଡ଼ ଜିଲ୍ଲା ଜଲଦା ନିକଟରେ ଦୁର୍ଘଟଣାଗ୍ରସ୍ତ ହୋଇଥିବା ବିମାନର ଅଂଶବିଶେଷ ଯିବ କାନାଡ଼ା
ସୁନ୍ଦରଗଡ଼ ଜିଲ୍ଲା ଜଲଦା ନିକଟରେ ଦୁର୍ଘଟଣାଗ୍ରସ୍ତ ହୋଇଥିବାର ବିମାନର ଅଂଶବିଶେଷ ଯିବ କାନାଡ଼ା। ଏଥିପାଇଁ କାନାଡ଼ାରୁ ଆସୁଛି ସ୍ଵତନ୍ତ୍ର କଣ୍ଟେନର। ରାଉରକେଲାରେ ଏହି କଣ୍ଟେନର ପହଞ୍ଚିଵା ପରେ ଆସନ୍ତା ୨୪ ତାରିଖରେ ତାକୁ କଣ୍ଟେନରରେ କାନାଡା ନିଆଯିବ। ଗୋଟିଏ କଣ୍ଟେନରରେ ଇଞ୍ଜିନ ଓ ଆଉ ଏକ କଣ୍ଟେନରରେ ପାର୍ଟସ ନିଆଯିବ। ବର୍ତ୍ତମାନ ଇଣ୍ଡିଆ ଓ୍ଵାନ ଏୟାର ର ୪ ଜଣ ଇଞ୍ଜିନିୟର ଦୁର୍ଘଟଣା ସ୍ଥଳରେ ପହଞ୍ଚି ବିମାନ ଇଞ୍ଜିନ, ଯନ୍ତ୍ରାଂଶ ଓ ପାର୍ଟସ ଖୋଲୁଛନ୍ତି। ଗତ ୧୦ ତାରିଖରେ ଭୁବନେଶ୍ଵରରୁ ରାଉରକେଲା ଅଭିମୁଖେ ଯାଉଥିବାବେଳେ ବିମାନ VT-KSS-17-102 ଦୁର୍ଘଟଣାଗ୍ରସ୍ତ ହୋଇଥିଲା ବିମାନରେ ଦୁଇ ପାଇଲଟଙ୍କ ସମେତ ୬ ଜଣ ଯାତ୍ରୀ ଥିଲେ । ରାଉରକେଲା ପହଞ୍ଚିବାକୁ ଥିଲା ଆଉ ମାତ୍ର ୧୦ କିଲୋମିଟର ଥିବା ବେଳେ ବିମାନରେ ଯାନ୍ତ୍ରୀକ ତୃଟି ଦେଖାଦେଇଥିଲା । ପାଇଲଟ ବିମାନର ଜରୁରୀ ଅବତରଣ କରିଥିଲେ। ..ସେପଟେ ସୁସ୍ଥ ହେଲେ ପାଇଲଟ ନବୀନ କାଡ଼ଙ୍ଗା। ସେ ଜୟ ପ୍ରକାଶ ହସ୍ପିଟାଲର ଚିକିତ୍ସିତ ହେଉଥିଲେ। ଆଜି ଡିସଚାର୍ଜ ହୋଇ ହସ୍ପିଟାଲରୁ ଘରକୁ ଯିବେ।
ନିଶା ବେପାରର ହବ୍ ପାଲଟିଛି ଓଡ଼ିଶା: ଗୋଆରୁ ଓଡିଶାକୁ ଲମ୍ବିଛି ଚେର
ନିଶା ବେପାରର ହବ୍ ପାଲଟିଛି ଓଡ଼ିଶା। ଗୋଆରୁ ଓଡିଶାକୁ ଲମ୍ବିଛି ଚେର । ଚାଲାଣ ହେଉଛି ଦାମୀ ନିଶା ଦ୍ରବ୍ୟ । ଖବର ପାଇବା ପରେ ବ୍ୟାପକ ରେଡ଼ କଲା ଇଡି । ଆନ୍ତର୍ଜାତୀୟ ନିଶା କାରବାରରେ ମିଳିଥିଲା ଓଡିଶା ଲିଙ୍କ । ଚଢ଼ାଉ ବେଳେ ଜବତ ହୋଇଛି ବିପୁଳ ନିଶା ସାମଗ୍ରୀ। ମନି ଲଣ୍ଡରିଂ ମାମଲାର ତଦନ୍ତ କରିବା ବେଳେ ଏହାର ସୁରାଗ ମିଳିଥିଲା। ଓଡ଼ିଶା ସମେତ ୭ ରାଜ୍ୟର ୨୬ ଟି ସ୍ଥାନରେ ଚଢ଼ାଉ ହୋଇଛି । ନଗଦ ୩ କୋଟି ଟଙ୍କା ସହ ଜବତ ହୋଇଛି ବିପୁଳ ନିଶାଦ୍ରବ୍ୟ। ମାଫିଆଙ୍କୁ ଧରିବାକୁ ଓ ସେମାନଙ୍କ ସମ୍ପତ୍ତି ବାଜ୍ୟାପ୍ତି ନେଇ ପ୍ରୟାସ ଚାଲିଛି। ସେପଟେ ନିଶା ମାଫିଆଙ୍କ ପାଇଁ ଗଳା ବାଟ ପାଲଟିଛି ଭୁବନେଶ୍ୱର ବିମାନବନ୍ଦର। ଅନ୍ୟ ସ୍ଥାନକୁ ନିଶାଦ୍ରବ୍ୟ ଚାଲାଣ ହେଉଥିଲେ ମଧ୍ୟ ଭାୟା ପାଲଟିଛି ଭୁବନେଶ୍ୱର ବିମାନବନ୍ଦର।
ଭୁବନେଶ୍ଵର ୧ ନମ୍ଵର ହାଟରେ ପୁଣି ଅଗ୍ନିକାଣ୍ଡ: ଜଳିଗଲା ୪୦ରୁ ଅଧିକ ଦୋକାନ
ଭୁବନେଶ୍ଵର ୧ ନମ୍ଵର ହାଟରେ ପୁଣି ଅଗ୍ନିକାଣ୍ଡ। ଗତ ରାତିରେ ନିଆଁ ଲାଗି ୪୦ରୁ ଅଧିକ ଦୋକାନ ଜଳି ଯାଇଛି। ୧ କୋଟିରୁ ଅଧିକ ଟଙ୍କାର ସଂପତ୍ତି ପୋଡ଼ି ପାଉଁଶ। ସୂଚନା ଅନୁସାରେ ରାତି ପ୍ରାୟ ଦେଢ଼ ଟାରେ ନିଆଁ ଲାଗିଥିଲା। ଗ୍ୟାସ ସିଲିଣ୍ଡରରୁ ଏହା ଆରମ୍ଭ ହୋଇଥିବା କୁହାଯାଉଛି। ଅଗ୍ନିଶମ ବାହିନୀ ଆସି ନିଆଁକୁ ଆୟତ୍ତ କରିଛି। ତଥାପି ୪୦ରୁ ଅଧିକ ଦୋକାନ ପୁରା ଜଳି ପୋଡ଼ି ପାଉଁଶ ହୋଇଛି। ଆଜି ସକାଳେ ବିଏମସି ମେୟର ସୁଲୋଚନା ଦାସ ଓ ବିଏମସି କମିଶନର ଚଞ୍ଚଳ ରାଣା ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି। ଭୁବନେଶ୍ଵର ୧ ନମ୍ଵର ହାଟରେ ବାରମ୍ଵାର ନିଆଁ ଲାଗୁଛି। ଦୋକାନୀମାନେ ଏସଓପି ପାଳନ କରୁନଥିବା କୁହାଯାଇଛି। ତା ସହିତ ଦରକାରଠାରୁ ଅଧିକ ପଲିଥିନ ରଖୁଛନ୍ତି। ଜରି ପାଲ ଟାଣି ରାସ୍ତାକୁ ଢାଙ୍କି ଦେଉଥିବାରୁ ମଧ୍ୟ ସମସ୍ୟା ହେଉଥିବା କୁହାଯାଇଛି।
ଖୋର୍ଦ୍ଧା ପରିଛଳ ଜାମୁସାହି ଗୁଳିକାଣ୍ଡ ଘଟଣା ; ଦୁର୍ବୃତ୍ତ ଏବେ ବି ଫେରାର
ନନ୍ଦିଘୋଷ ବ୍ୟୁରୋ : ଖୋର୍ଦ୍ଧା ପରିଛଳ ଜାମୁସାହି ଗୁଳିକାଣ୍ଡ ଘଟଣାରେ ଦୁର୍ବୃତ୍ତ ଏବେ ବି ଫେରାର। ବିଭିନ୍ନ ଦିଗକୁ ନେଇ ତଦନ୍ତ ଜାରି ରହିଛି । ଗତକାଲି ରାତିରେ ବାସୁଦେବ ପରିଡ଼ାଙ୍କୁ ଗୁଳି କରି ହତ୍ୟା କରିଥିଲେ ଅଭିଯୁକ୍ତ । ଖୋର୍ଦ୍ଧା ମେଡିକାଲରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ଘଟଣା ସ୍ଥଳରେ ଖୋକା ପଡ଼ିଛି । ଦୁର୍ବୃତ୍ତ ମାନେ ଏକ ବାଇକରେ ଆସି ଫାୟରିଂ କରି ଫେରାର ହୋଇଯାଇଛନ୍ତି । ଘଟଣା ସ୍ଥଳରେ ବାଇକ ଛାଡ଼ି ଚମ୍ପଟ ମାରିଛନ୍ତି ଅଭିଯୁକ୍ତ । ବେଆଇନ ଖଣି କାରବାରକୁ ନେଇ ଗୁଳିମାଡ଼ ହୋଇଥିବା ସୂଚନା ରହିଛି । …. ଗତ ସନ୍ଧ୍ୟା ରେ ସେ ଶୌଚ ହେବାକୁ ଯାଇଥିବା ବେଳେ ଚାରି ଜଣ ଦୁବୃର୍ତ୍ତ ଦୁଇଟି ବାଇକ୍ ରେ ଆସି ଅତି ନିକଟ ରୁ ଫାୟାରିଂ କରିଥିଲେ। ସ୍ଥାନୀୟ ଲୋକ ଙ୍କ ସହାୟତାରେ ବାସୁଦେବଙ୍କୁ ଖୋର୍ଦ୍ଧା ମେଡିକାଲ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କଲେ। ଘଟଣା ସ୍ଥଳ ରେ ଖୋକା ପଡ଼ିଛି। ଦୁର୍ବୃତ୍ତ ମାନେ ଏକ motorcycle ରେ ଆସି ଫାୟରିଂ କରି ଫେରାର ହୋଇଯାଇଛନ୍ତି। ଘଟଣା ସ୍ଥଳ ରେ ବୁଲେଟ ମୋଟର ସାଇକେଲ ଛାଡ଼ି ଯାଇଛନ୍ତି। ପୋଲିସ ର ତଦନ୍ତ ଜାରି। ପୋଲିସ ଅପରାଧୀ ଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ରେଡ କରିଛି।
କଟକରେ ରାସ୍ତା ଉପରେ ଲହଡ଼ି ମାରୁଛି ନର୍ଦ୍ଦମା ପାଣି ; ଦୁର୍ଦ୍ଦଶାରେ ୱାର୍ଡ ନଂ ୧୦ ଓ ୧୨ ବାସିନ୍ଦା
ନନ୍ଦିଘୋଷ ବ୍ୟୁରୋ : ବିନା ବର୍ଷାରେ କଟକରେ ରାସ୍ତା ଉପରେ ଲହଡ଼ି ମାରୁଛି ନର୍ଦ୍ଦମା ପାଣି । ଦୁର୍ଦ୍ଦଶାରେ ୱାର୍ଡ ନଂ ୧୦ ଓ ୧୨ ବାସିନ୍ଦା । ଯିବା ଆସିବା କରିବା ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ସ୍ଥାନୀୟ ଲୋକେ । ଗତ ଦୁଇ ମାସ ଧରି ଏହି ଅଞ୍ଚଳରେ ଡ୍ରେନ କାର୍ଯ୍ୟ ଜାରି ରହିଥିବା ବେଳେ ଏହାର ପରିଚାଳନାରେ ଗୁରୁତର ତ୍ରୁଟି ଦେଖାଦେଇଛି । ବିଭାଗୀୟ ଅବହେଳା ଯୋଗୁଁ ନର୍ଦ୍ଦମା ପାଣି ନିଷ୍କାସିତ ହୋଇ ନପାରି ରାସ୍ତାକୁ ମାଡ଼ି ଆସୁଛି । ଏହି ଦୁର୍ଗନ୍ଧମୟ ପରିବେଶ ମଧ୍ୟରେ ଛୋଟ ପିଲାମାନେ ସ୍କୁଲ ଯିବା ଆସିବା କରିବା ଏକପ୍ରକାର ବିପଜ୍ଜନକ ହୋଇପଡ଼ିଛି । ଜଣେ ସ୍କୁଲ ଛାତ୍ରୀ ନର୍ଦ୍ଦମାରେ ଭାରସାମ୍ୟ ହରାଇ ପଡ଼ି ଯାଇଥିଲେ । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ଦେଖା ଦେଇଥିଲା । ଏହି ସମସ୍ୟା ସମ୍ପର୍କରେ ସେମାନେ ବାରମ୍ବାର ସ୍ଥାନୀୟ ଜନପ୍ରତିନିଧି ଏବଂ ସିଏମସି କର୍ତ୍ତୃପକ୍ଷଙ୍କୁ ଗୁହାରି ଜଣାଇଛନ୍ତି । ମାତ୍ର ଦୁଇ ମାସ ବିତିଯାଇଥିଲେ ସୁଦ୍ଧା ପ୍ରଶାସନ ପକ୍ଷରୁ କୌଣସି ଠୋସ୍ ପଦକ୍ଷେପ ନିଆଯାଉ ନାହିଁ। କେବଳ ପ୍ରତିଶ୍ରୁତିରେ କାମ ଚାଲିଥିବା ବେଳେ ବାସ୍ତବରେ ସ୍ଥିତି ସଂଗୀନ ହେବାରେ ଲାଗିଛି। ଯଦି ଆଗାମୀ କିଛି ଦିନ ମଧ୍ୟରେ ଏହି ସମସ୍ୟାର ସ୍ଥାୟୀ ସମାଧାନ ନହୁଏ, ତେବେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବା ସହ ‘ରାସ୍ତା ରୋକ୍’ କରିବେ ବୋଲି ଚେତାବନୀ ଦେଇଛନ୍ତି ।