ନନ୍ଦିଘୋଷ ବ୍ୟୁରୋ : ଆଜି ବିଜେଡି ଘେରିବ ବିଧାନସଭା । ତ୍ରିସ୍ତରୀୟ ପଞ୍ଚାୟତିରାଜ ବ୍ୟବସ୍ଥାରେ ଜନ ପ୍ରତିନିଧିଙ୍କ କ୍ଷମତାକୁ ସଙ୍କୁଚିତ କରିବା ଓ ହଡପ କରିବା ଅଭିଯୋଗରେ ଆଜି ବିଧାନସଭା ଘେରାଉ କରିବ ବିଜେଡି। ଏଥିରେ ସରପଞ୍ଚ, ୱାର୍ଡମେମ୍ବର, ସମିତି ସଭ୍ୟ, ଜିଲ୍ଲା ପରିଷଦ ସଦସ୍ୟ, ବ୍ଲକ ଅଧ୍ୟକ୍ଷ, ଜିଲ୍ଲା ପରିଷଦ ଅଧ୍ୟକ୍ଷ, ଗ୍ରାମର ମୁଖିଆ ତଥା ଅନ୍ୟ ଜନ ପ୍ରତିନିଧି ସାମିଲ ହେବେ। ସାମ୍ବାଦିକ ସମ୍ମିଳନୀରେ ଘୋଷଣା କରିଥିଲା ଦଳ । ଗଣତନ୍ତ୍ରକୁ ହତ୍ୟା କରି କର୍ମୀ ପୋଷିବା ଯୋଜନା ବନ୍ଦ କରିବାକୁ ଚେତାବନୀ ଦେଇଛି ବିଜେଡି । ଯେମିତି କର୍ମୀ ମାନେ ଗୁଣ୍ଡାରାଜ, ଦାଦାବଟି ଓ ପିସି ଆଦାୟ କରିବେ ସେଥିପାଇଁ ବ୍ୟବସ୍ଥା କରୁଛନ୍ତି ସରକାର ବୋଲି ବଡ଼ ଅଭିଯୋଗ ହୋଇଛି । ପଞ୍ଚାୟତୀରାଜ ବଜେଟକୁ ହ୍ରାସ କରାଯାଇଛି। ପିଏମ ଆବାସ ଯୋଜନା ୪୩୧୦ କୋଟିରୁ ୮୨୫ କୋଟି ହୋଇଛି । ଆମ ଓଡ଼ିଶା ନବୀନ ଓଡ଼ିଶାରେ ଅଧା କାମକୁ ସ୍ଥଗିତ ରଖାଯାଇ ହଇରାଣ କରାଯାଉଛି। କର୍ମୀଙ୍କ ଉତ୍ପିଡନରେ ଲୋକେ ତ୍ରାହି ତ୍ରାହି ଡାକିଲେଣି। ସାଧାରଣ ଲୋକଙ୍କ ସରକାର କହୁଛନ୍ତି କିନ୍ତୁ ଲୋକଙ୍କ ସ୍ୱର ଶୁଣିପାରୁ ନାହାନ୍ତି। ବିଜେପି କର୍ମୀଙ୍କୁ ପୋଷିବା ପାଇଁ ତ୍ରିସ୍ତରୀୟ ପଞ୍ଚାୟତିରାଜ ବ୍ୟବସ୍ଥାକୁ ଧ୍ୱଂସ କରାଯାଉଥିବା ଅଭିଯୋଗ ହୋଇଛି ।
ବିମାନ ଚକରେ ଲୁଚି କାବୁଲରୁ ଦିଲ୍ଲୀ ଆସିଲା ୧୩ ବର୍ଷର ବାଳକ
ନନ୍ଦିଘୋଷ ବ୍ୟୁରୋ : ବିମାନର ଲ୍ୟାଣ୍ଡି ଗିଅରରେ ଲୁଚି କାବୁଲରୁ ଦିଲ୍ଲୀ ପହଞ୍ଚିଲା ୧୩ ବର୍ଷୀୟ ବାଳକ । ଆଶ୍ଚର୍ଯ୍ୟଜନକ ଭାବରେ ବାଳକଟି ଜୀବିତ ଏବଂ ସୁସ୍ଥ ଅଛି । ତେବେ ଆଫଗାନିସ୍ତାନର ଜଣେ ୧୩ ବର୍ଷୀୟ ବାଳକ କୌତୁହଳବଶତଃ କାବୁଲରୁ ଦିଲ୍ଲୀ ଅଭିମୁଖେ ଉଡୁଥିବା KAM ଏୟାରଲାଇନ୍ସର ଏକ ବିମାନର ଲ୍ୟାଣ୍ଡିଂ ଗିଅର କମ୍ପାର୍ଟମେଣ୍ଟରେ ଲୁଚି ଭାରତ ପହଞ୍ଚିଥିବା ସୂଚନା ମିଳିଛି। ଏହି ଘଟଣା ରବିବାର ସକାଳ ୧୧ଟା ସମୟରେ ଇନ୍ଦିରା ଗାନ୍ଧୀ ଆନ୍ତର୍ଜାତୀୟ ବିମାନବନ୍ଦରରେ କାମ ଏୟାରଲାଇନ୍ସର ଫ୍ଲାଇଟ୍ ନମ୍ବର RQ-4401 ପହଞ୍ଚିବା ପରେ ଜଣାପଡ଼ିଥିଲା।
ଏହି ବାଳକ ବିମାନ ଅବତରଣ ପରେ ଫ୍ଲାଇଟ୍ ନିକଟରେ ଘୂରି ବୁଲୁଥିବା ବେଳେ ଏୟାରଲାଇନ୍ସ କର୍ମଚାରୀଙ୍କ ଦ୍ୱାରା ଧରାପଡ଼ି ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟି ଫୋର୍ସ (ସିଆଇଏସଏଫ) ଅଧିକାରୀଙ୍କୁ ହସ୍ତାନ୍ତର କରାଯାଇଥିଲା। ଜେରା ସମୟରେ ସେ କହିଛନ୍ତି, ସେ କାବୁଲ ବିମାନବନ୍ଦରକୁ ଗୋପନେ ପ୍ରବେଶ କରି ବିମାନର ପଛ ଲ୍ୟାଣ୍ଡିଂ ଗିଅର କମ୍ପାର୍ଟମେଣ୍ଟରେ ଲୁଚିଥିଲେ।
ତଦନ୍ତ ପରେ ତାଙ୍କୁ ସେହି ଦିନ ଅପରାହ୍ନ ୧୨:୩୦ରେ ସେହି ବିମାନରେ ଆଫଗାନିସ୍ତାନକୁ ଫେରାଇ ପଠାଇ ଦିଆଯାଇଥିଲା। ବିମାନର ଲ୍ୟାଣ୍ଡିଂ ଗିଅରରେ ଏକ ଲାଲ ରଙ୍ଗର ସ୍ପିକର ମିଳିଥିଲା, ଯାହା ବାଳକ ସାଙ୍ଗରେ ଥିବା ଜଣାପଡ଼ିଛି। ସୁରକ୍ଷା ଯାଞ୍ଚ ଓ ଆଣ୍ଟି-ସାବୋଟେଜ ପରୀକ୍ଷା ପରେ ବିମାନଟି ସୁରକ୍ଷିତ ବୋଲି ଘୋଷଣା କରାଯାଇଥିଲା।
ଆଜି ରତ୍ନଭଣ୍ଡାରକୁ ସ୍ଥାନାନ୍ତର ହେବ ଶ୍ରୀଜିଉଙ୍କ ଅଳଙ୍କାର ; ଶ୍ରୀମନ୍ଦିର ପ୍ରଶାସନ ପକ୍ଷରୁ ମାର୍ଗଦର୍ଶିକା ଜାରି
ନନ୍ଦିଘୋଷ ବ୍ୟୁରୋ : ଆଜି ଅସ୍ଥାୟୀ ରତ୍ନଭଣ୍ଡାରରୁ ସ୍ଥାୟୀ ରତ୍ନଭଣ୍ଡାରକୁ ସ୍ଥାନାନ୍ତର ହେବ ଶ୍ରୀଜିଉଙ୍କ ସମସ୍ତ ଅଳଙ୍କାର । ଶ୍ରୀମନ୍ଦିର ପ୍ରଶାସନ ପକ୍ଷରୁ ଜାରି ହୋଇଛି ମାର୍ଗଦର୍ଶିକା । ପୂର୍ବ ନିଷ୍ପତ୍ତି ଅନୁସାରେ ବଡି ଭୋରରୁ ଶ୍ରୀମନ୍ଦିର ଦ୍ୱାରାଫିଟା ଯିବା ସହ ଦୈନିକ ନୀତିକାନ୍ତି ଜାରି ରହିଛି। ଭିତର ଶୋଧ ନୀତି ଶେଷ ହେବା ସହ ମଙ୍ଗଳ ଆଳତି, ତଡପ ଲାଗି ନୀତି ଶେଷ ହୋଇ ଅବକାଶ ପୂଜା ନୀତି ଜାରି ରହିଛି। ସକାଳ ୧୦ଟାରୁ ଶ୍ରୀମନ୍ଦିରରେ ସର୍ବସାଧାରଣ ଦର୍ଶନ ବନ୍ଦ କରାଯିବା। ପରେ ନାଟମଣ୍ଡପ ଓ ଜଗମୋହନ ଶୋଧ କରାଯିବ। ଏହା ପରେ ଅସ୍ଥାୟୀ ଷ୍ଟ୍ରଙ୍ଗରୁମ୍ ବା ଖଟଶେଜ ଓ ଚାଙ୍ଗଡା ଘରୁ ରତ୍ନ ଅଳଙ୍କାରକୁ ସୁରକ୍ଷିତ ଭାବେ ମୁଖ୍ୟ ଭଣ୍ଡାର ଘରକୁ ସ୍ଥାନାନ୍ତର କରାଯିବ। ଏଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ପ୍ରାଧୀକୃତ ୧୧ ଜଣିଆ କମିଟି ଗଠନ କରାଯାଇଛି।
ଶ୍ରୀମନ୍ଦିର ମୁଖ୍ୟ ପ୍ରଶାସକ, ପୁରୀ ଜିଲ୍ଲାପାଳ, ଏସପି, ଏଏସଆଇ ଅଧିକାରୀ, ରତ୍ନଭଣ୍ଡାର ସବ କମିଟି ସଦସ୍ୟ ଗଣେଶ ଦାସ ମହାପାତ୍ର, ଦେଉଳ କରଣ, ତଢଉ କରଣ, ଭଣ୍ଡାର ମେକାପ, ରତ୍ନଭଣ୍ଡାର ତଦାରଖ କମିଟିର ୨ଜଣ ସଦସ୍ୟ ଜଷ୍ଟିସ ବିଶ୍ୱନାଥ ରଥ ଓ ସୁଦର୍ଶନ ପଟ୍ଟନାୟକ, ଛତିଶା ନିଯୋଗ ମହାନାୟକ ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର, ଗଜପତି ମହାରାଜାଙ୍କ ପ୍ରତିନିଧିଙ୍କ ସମେତ ଶ୍ରୀମନ୍ଦିର ନୀତି ଓ ଉନ୍ନୟନ ପ୍ରଶାସକ, ଅତରିକ୍ତ ମୁଖ୍ୟ ଯନ୍ତ୍ରୀ କମିଟିରେ ସାମିଲ୍ ରହିଛନ୍ତି। ମହାପ୍ରସାଦ ଓ ଭୋଗ ପାଇବାକୁ ଇଚ୍ଛୁକ ଭକ୍ତମାନେ ଶ୍ରୀମନ୍ଦିର ଉତ୍ତର ଦ୍ଵାର ଦେଇ ଆନନ୍ଦ ବଜାରକୁ ଯାଇ ପାରିବେ। ରତ୍ନଭଣ୍ଡାର ସ୍ଥାନାନ୍ତର କାର୍ଯ୍ୟ ସମାପ୍ତ ପରେ ପ୍ରବେଶ କଟକଣା ପ୍ରତ୍ୟାହାର ତଥା ଦର୍ଶନ ସ୍ୱାଭାବିକ କରାଯିବ।ପୋଲିସ ପ୍ରଶାସନ ପକ୍ଷରୁ ଶ୍ରୀମନ୍ଦିରର ଚାରି ଦ୍ଵାରରେ ଭକ୍ତଙ୍କୁ କଡା ଚେକିଂ କରି ଛଡାଯାଉଛି।
ମା’ଙ୍କୁ ପୂଜାକଲେ ବୃଦ୍ଧାଶ୍ରମର ଆବଶ୍ୟକତା ରହିବ ନାହିଁ : ସୁଲୋଚନା ଦାସ
ଭୁବନେଶ୍ୱର : ମହର୍ଷି ଦୟାନନ୍ଦଙ୍କ ପ୍ରତିଷ୍ଠିତ ସଂସ୍କାରବାଦୀ ସଂଗଠନ ଆର୍ଯ୍ୟ ସମାଜ ପକ୍ଷରୁ ସୋମବାର ନବରାତ୍ରର ପ୍ରଥମ ଦିବସ ଆଶ୍ୱିନ ଶୁକ୍ଳ ପତିପଦାର ପବିତ୍ର ତିଥିରେ ଚନ୍ଦ୍ରଶେଖରପୁର ଶ୍ରୀଅରବିନ୍ଦ ନଗରସ୍ଥିତ ସ୍ୱାମୀ ବ୍ରହ୍ମାନନ୍ଦ ଭବନଠାରେ ଆର୍ଯ୍ୟସମାଜ ଓଡ଼ିଶାର ସଭାପତି ଡଃ ଆର୍ଯ୍ୟକୁମାର ଜ୍ଞାନେନ୍ଦ୍ରଙ୍କ ପୌରହିତ୍ୟରେ ମହାସମାରୋହରେ ପାଳିତ ହୋଯାଇଛି । କାର୍ଯ୍ୟକ୍ରମକୁ ଆନୁଷ୍ଠାନିକ ଭାବେ ଉଦ୍ଘାଟନ କରି ଭୁବନେଶ୍ୱର ମହାନଗର ନିଗମର ମେୟର ଶ୍ରୀମତୀ ସୁଲୋଚନା ଦାସ କହିଲେ ଯେ, ମହର୍ଷି ଦୟାନନ୍ଦ ଭାରତବର୍ଷରେ ୧୫୦ ବର୍ଷ ତଳେ ମହିଳାମାନଙ୍କ ପାଇଁ ଯେଉଁ ସଂଗ୍ରାମର ସୂତ୍ରପାତ କରିଥିଲେ ଆଜି ମଧ୍ୟ ତାହାର ଆବଶ୍ୟକତା ରହିଛି । ସମାଜରେ ଆମେ ଯଦି ମା’ଙ୍କୁ ଠିକଣା ଭାବେ ମର୍ଯ୍ୟାଦା ଦେବା, ତେବେ ଆଉ ବୃଦ୍ଧାଶ୍ରମର ଆବଶ୍ୟକତା ରିହବ ନାହିଁ ବୋଲି ସେ କହିଥିଲେ । ମୁଖ୍ୟ ଅତିଥି ଭାବେ ଯୋଗଦେଇ ଭୁବନେଶ୍ୱର ଉର ବିଧାୟକ ସୁଶାନ୍ତ କୁମାର ରାଉତ, ଆର୍ଯ୍ୟ ସମାଜର ଏହି କାର୍ଯ୍ୟକ୍ରମକୁ ଭୂରୀ ଭୂରୀ ପ୍ରଶଂସା କରିବା ସହ ନୂତନ ଯୁବପିଢିଙ୍କ ପାଖରେ ଏହି ର୍ବାା ପହାଇବାକୁ ସେ ଆହ୍ୱାନ ଦେଇଥିଲେ ।
ବିଶିଷ୍ଟ ବୈଦିକ ବିଦ୍ୱାନ ପଣ୍ଡିତ ବୀରେନ୍ଦ୍ର କୁମାରଙ୍କ ପଣ୍ଡାଙ୍କ ସଂଯୋଜନାରେ ଅନୁଷ୍ଠିତ ଏହି ମହୋତ୍ସବରେ ସମ୍ମାନିତ ଅତିଥି ଭାବେ ଯୋଗଦେଇ ପ୍ରଫେସର ଡଃ ପ୍ରଫୁଲ୍ଲ କୁମାର ମିଶ୍ର କହିଲେ ଯେ, ଭାରତବର୍ଷରେ ମାତୃପୂଜାର ଏକ ଗୌରବମୟ ଇତିହାସ ରହିଛି । “ମା” ସବୁବେଳେ ସମାଜରେ ଅଗ୍ରପୂଜ୍ୟା, ଏ ର୍ବାା ଦେବା ପାଇଁ ମାତୃପୂଜାର ସୃଷ୍ଟି । ସାଧାରଣ ଲୋକଙ୍କୁ ବୁଝିବା ପାଇଁ ର୍ମୂିପୂଜାକୁ ଅଳଙ୍କାରିକ କରାଯାଇଛି । କିନ୍ତୁ ମା’ କରୁଣାର ଅବତାର । ପୁଣି ଦୁଷ୍ଟ ସଂହାରର ଭୂମିକାରେ ଅବତୀର୍ଣ୍ଣ ହୋଇଥାନ୍ତି । ପ୍ରଫେସର ଡଃ ହରେକୃଷ୍ଣ ଶତପଥୀ ମା’ଙ୍କୁ କଲ୍ୟାଣମୟୀ ଓ ଲୋକ କଲ୍ୟାଣ ପାଇଁ ସେ ଆବିର୍ଭୁତା ବୋଲି କହିଥିଲେ । କିନ୍ତୁ ଏହା ସତ୍ୟ ହୋଇଥିଲେ ମଧ୍ୟ ତା’ଭିତରେ ଏକ ଅନ୍ତର୍ନହିତ ଶକ୍ତି ଅଛି । ଏହାକୁ ଚେତାଇ ଦେବା ହିଁ ନବମାତୃକା ପୂଜା । ପରମହଂସ ସ୍ୱାମୀ ବ୍ରହ୍ମାନନ୍ଦ ସରସ୍ୱତୀ ଆର୍ଯ୍ୟସମାଜର ଏହି ଅଭିନବ ପରିକଳ୍ପନାର ପ୍ରଶଂସା କରିବା ସହ ଉପସ୍ଥିତ କନ୍ୟାମାନଙ୍କୁ ଆଶୀର୍ବାଦ ଦେଇ ଭାରତୀୟ ସଂସ୍କୃତିର ମହନୀୟତା ଉପରେ ଜାଣିବା ପାଇଁ ପରାମର୍ଶ ଦେଇଥିଲେ ।
ମୁଖ୍ୟବକ୍ତା ପ୍ରଗତିବାଦୀର ସମ୍ପାଦକ ବୀରୁପାକ୍ଷ ତ୍ରିପାଠୀ ସମାଜରେ ଦେଖା ଦେଇଥିବା ବିଲକ୍ଷଣ ଉପରେ ଆଲୋକପାତ କରିଥିଲେ । ଗୋଟିଏ ପଟେ ଆମେ ଧୁମ୍ଧାମରେ ମାତୃପୂଜା କରୁଛୁ, ଅନ୍ୟ ପଟେ ଆମେ କନ୍ୟା ଭ୍ରୁଣହତ୍ୟା କରୁଛେ । ଏଣୁ ଆଜି ସମୟ ଆସିଛି ମଣିଷ ସମାଜକୁ ସତର୍କ କରାଇବା ପାଇଁ ଆଜିର ଏହି ଅଭିନବ ମାତୃପୂଜା । ବିଶିଷ୍ଟ ବକ୍ତା ବାଗ୍ମୀ ପ୍ରଦ୍ୟୁମ୍ନ ଶତପଥୀ ଓଡ଼ିଶାରେ ମାତୃପୂଜାର ଆଧାରଶୀଳା ସନ୍ଥ ବଳରାମ ଦାସଙ୍କ ଲକ୍ଷ୍ମୀ ପୁରାଣ ବୋଲି ସେ କହିବା ସହ ମହର୍ଷି ଦୟାନନ୍ଦ ୧୫୦ ବର୍ଷ ତଳେ ଯେଉଁ ସଂସ୍କାରବାଦୀ ଆନ୍ଦୋଳନର ସୂତ୍ରପାତ କରିଥିଲେ ଆଜି ତାର ସୁଫଳର ଏକ ନିଦର୍ଶନ ନବମାତୃକା ପୂଜା । ଏହି ଅବସରରେ ପଣ୍ଡିତ ବିନୋଦ ବିହାରୀ ଦାସଙ୍କ ପୌରହିତ୍ୟରେ ବେଦଯଜ୍ଞ ଅନୁଷ୍ଠିତ ହୋଇଥିଲା । ବିଶିଷ୍ଟ ଶିକ୍ଷାବିତ୍ ଡଃ ବଦ୍ରୀନାଥ ପଟ୍ଟନାୟକ ଓ ଡଃ ନିବେଦିତା ପଟ୍ଟନାୟକ ଜଜମାନ ଆସନ ଗ୍ରହଣ କରିଥିଲେ । କାର୍ଯ୍ୟକ୍ରମରେ ପାଲାଚାର୍ଯ୍ୟ ସୁରେନ୍ଦ୍ରନାଥ ଛୋଟରାୟ, ପାଲାଚାର୍ଯ୍ୟ ନାରାୟଣ ଶୁକ୍ଲ ଓ ସ୍ୱାମୀ ଚିଦାନନ୍ଦ ବ୍ରହ୍ମଚାରୀ ଦେବୀସ୍ତୋତ୍ର ପାଠ କରିଥିଲେ । କରବର ଆର୍ଯ୍ୟ ସମାଜର ମା’ ସବିତା ଶୁକ୍ଲ ସ୍ୱାଗତ ସଙ୍ଗୀତ ଗାନ କରିଥିଲେ । କାର୍ଯ୍ୟକ୍ରମ ପ୍ରାରମ୍ଭରେ ଚିରଞ୍ଜନ ପଣ୍ଡା ସ୍ୱାଗତ ଭାଷଣ ଓ ଜନ୍ମେଞ୍ଜୟ ନାୟକ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମୁ ନଳିନୀକାନ୍ତ ରାଉତ, ବରୁଣରାଜ ଓ ଭବାନୀକାନ୍ତ ରାଉତ ପରିଚାଳନା କରିଥିଲେ । ଅନ୍ୟମାନଙ୍କ ମଧ୍ୟରେ ପୂର୍ବ ପ୍ରଶାସକ ସହଦେବ ଜୟସିଂ, ଧାରା ଶ୍ରୀରାଧା ଟ୍ରଷ୍ଟର ଅଧ୍ୟକ୍ଷ ଅମରେନ୍ଦ୍ର ମହାପାତ୍ର, ପ୍ରଫେସର ଡଃ ବୁଦ୍ଧଦେବ ମିଶ୍ର, ଡଃ ବିମୋଚପ୍ରଜ୍ଞା ତ୍ରିପାଠୀ, ଉତ୍କଳ ଆର୍ଯ୍ୟ ପ୍ରତିନିଧି ସଭାର ସମ୍ପାଦକ ଦୁଷ୍ମନ୍ତ କୁମାର ସ୍ୱାଇଁ, ଡଃ ଆଲୋକ ରଥ, ସୀତାବଲ୍ଲଭ ମହାପାତ୍ର ପ୍ରମୁଖ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ସମାଜର ବିଭିନ୍ନ ବର୍ଗର ୯ଜଣ ମା’ ସର୍ବଶ୍ରୀମତୀ ସ୍ୱର୍ଣ୍ଣପ୍ରଭା ପଟ୍ଟନାୟକ, କନକଲତା ବିଶ୍ୱାଳ, ପୁଷ୍ପରେଣୁ ଶତପଥୀ, ରାଜଶ୍ରୀ ମହାପାତ୍ର, ଜ୍ୟୋତିର୍ମୟୀ ନାୟକ, ଅମ୍ବିକା ପ୍ରଧାନ, ଆରତୀ ଜ୍ଞାନେନ୍ଦ୍ର, ବିୟୋତପ୍ରଜ୍ଞା ତ୍ରିପାଠୀ ଓ ବିଚିତ୍ରା ରଥଙ୍କୁ ମହର୍ଷି ଡିଗ୍ରୀ ମହିଳା ମହାବିଦ୍ୟାଳୟର କନ୍ୟାମାନେ ପୂଜାର୍ଚ୍ଚନା କରିଥିଲେ ।
ବନ୍ଦ ଥିବା ମଦ ଦୋକାନ ଖୋଲିବାକୁ ନେଇ ସରକାରଙ୍କୁ ବିରୋଧୀଙ୍କ ଟାର୍ଗେଟ….
ଭୁବନେଶ୍ୱର : ଓଡ଼ିଶା ହେବନି ମଦମୁକ୍ତ । ଓଲଟି ରାଜ୍ୟରେ ବନ୍ଦ ଥିବା ମଦ ଦୋକାନ ଖୋଲିବେ ସରକାର । ଏହାସହ ୪ଟି ନୂଆ ଠିପିଖୋଲା ମଦ ଦୋକାନ ଓ ୩ଟି ମଦ କାରଖାନା ଖୋଲିବେ ବୋଲି ଇଶାରା ଦେଇଛନ୍ତି । ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ବିଧାନସଭାରେ ଏପରି ଉତ୍ତର ଦେବା ପରେ ରାଜନୀତି ଜୋର ଧରିଛି । ମଦ ଦୋକାନ ଓ ମଦ ତିଆରି କାରଖାନା ଖୋଲିବେ । ନିର୍ବାଚନ ପୂର୍ବରୁ ନିଶାମୁକ୍ତ ଓଡ଼ିଶା କଥା କେମିତି କହିଲେ ବୋଲି ବିଜେଡି ପ୍ରଶ୍ନ କରିଛି । ମହିଳା ଏଥିରେ ବହୁତ ସମସ୍ୟାରେ ପଡିବେ ବୋଲି ବିଜେଡି ଅଭିଯୋଗ କରିଛି । ସେହିପରି କଂଗ୍ରେସ ଅଭିଯୋଗ କରିଛି ଯେ ଏହା ଦୁର୍ଭାଗ୍ୟଜନକ। ଯୁବ ବିକାଶ କଥା କହୁଛନ୍ତି କିନ୍ତୁ ମଦ ଦୋକାନ ଖୋଲିବାକୁ ଘୋଷଣା କରୁଛନ୍ତି । ଏହା ସରକାରଙ୍କ ଦୋମୁହାଁ ନୀତି । ସ୍କୁଲ ଖୋଲି ପାରୁନାହାଁନ୍ତି । ହେଲେ ମଦ ଦୋକାନ ଖୋଲୁଛି । ଯାହା ସରକାରଙ୍କ ଅସଲ ମୁଖା ଖୋଲି ଦେଇଛି ବୋଲି କଂଗ୍ରେସ କହିଛି ।
ବିଜେପି ବିଧାୟକ ମଦମୁକ୍ତ ଓଡ଼ିଶା ଚାହୁଁଥିବା ସତ୍ତ୍ବେ ସରକାରଙ୍କ ଉତ୍ତର ଆଗରେ ମୁଣ୍ଡ ନୁଆଇଁଛନ୍ତି । ମଦରୁ ରାଜସ୍ୱ ଆସୁଥିବାରୁ ମଦ ବନ୍ଦ ହେବନି ବୋଲି ବିଜେପି ବାଧ୍ୟ ହୋଇ ସଫେଇ ଦେଇଛି । ହେଲେ ଏହାକୁ ନ ମାନିବାକୁ ବିଜେପି ପରୋକ୍ଷରେ ମତ ଦେଇଛି । ମଦ ଯୋଗୁଁ ସାମାଜିକ ସଂପର୍କ ଖରାପ ହେଉଛି । ପରିବାର ନଷ୍ଟ ହେଉଛି । ବିଜେପି ବି ମଦ ବନ୍ଦ କରିବାକୁ ବାରମ୍ବାର କହୁଛି । ହେଲେ ଏବେ ସରକାର କେବଳ ନିଶାମୁକ୍ତ ଅଭିଯାନ ଗଣଦୌଡରେ ସୀମିତ ରଖିଥିବା ନେଇ ଚର୍ଚ୍ଚା ଜୋର ଧରିଛି ।
କାଲି ରତ୍ନଭଣ୍ଡାରକୁ ସ୍ଥାନାନ୍ତର ହେବ ଶ୍ରୀଜିଉଙ୍କ ସମସ୍ତ ଅଳଙ୍କାର
ପୁରୀ : କାଲି ଅସ୍ଥାୟୀ ରତ୍ନଭଣ୍ଡାରରୁ ସ୍ଥାୟୀ ରତ୍ନଭଣ୍ଡାରକୁ ସ୍ଥାନାନ୍ତର ହେବ ଶ୍ରୀଜିଉଙ୍କ ସମସ୍ତ ଅଳଙ୍କାର । ଶ୍ରୀମନ୍ଦିର ପ୍ରଶାସନ ପକ୍ଷରୁ ଜାରି ହୋଇଛି ମାର୍ଗଦର୍ଶିକା । ସକାଳ ୧୦ଟାରୁ ଶ୍ରୀମନ୍ଦିରରେ ସର୍ବସାଧାରଣ ଦର୍ଶନ ବନ୍ଦ । ଶୋଧ କରାଯିବ ନାଟମଣ୍ଡପ ଓ ଜଗମୋହନ । ପ୍ରଶାସନ କାର୍ଯ୍ୟାଳୟରେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଗୁରୁତ୍ୱପୂର୍ଣ୍ଣ ବୈଠକରେ ଏଭଳି ନିଷ୍ପତ୍ତି ନିଆଯାଇଛି । ଅସ୍ଥାୟୀ ଷ୍ଟ୍ରଙ୍ଗରୁମ୍ ବା ଖଟଶେଜ ଓ ଚାଙ୍ଗଡା ଘରୁ ରତ୍ନ ଅଳଙ୍କାର ଗୁଡିକ ସୁରକ୍ଷିତ ଭାବେ ମୁଖ୍ୟ ଭଣ୍ଡାର ଘରକୁ ସ୍ଥାନାନ୍ତର କରାଯିବ। ଏଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ପ୍ରାଧିକୃତ ୧୧ ଜଣିଆ କମିଟି ଗଠନ କରାଯାଇଛି । ଶ୍ରୀମନ୍ଦିର ମୁଖ୍ୟ ପ୍ରଶାସକ, ପୁରୀ ଜିଲ୍ଲାପାଳ, ଏସପି,ଏଏସଆଇ ଅଧିକାରୀ, ରତ୍ନଭଣ୍ଡାର ସବ କମିଟି ସଦସ୍ୟ ଗଣେଶ ଦାସ ମହାପାତ୍ର, ଦେଉଳ କରଣ, ତଢଉ କରଣ, ଭଣ୍ଡାର ମେକାପ ଉପସ୍ଥିତ ରହିବେ । ସେହିଭଳି ରତ୍ନଭଣ୍ଡାର ତଦାରଖ କମିଟିର ଦୁଇଜଣ ସଦସ୍ୟ ଜଷ୍ଟିସ ବିଶ୍ୱନାଥ ରଥ ଓ ସୁଦର୍ଶନ ପଟ୍ଟନାୟକ, ଛତିଶା ନିଯୋଗ ମହାନାୟକ ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର, ଗଜପତି ମହାରାଜାଙ୍କ ପ୍ରତିନିଧିଙ୍କ ସମେତ ଶ୍ରୀମନ୍ଦିର ନୀତି ଓ ଉନ୍ନୟନ ପ୍ରଶାସକ, ଅତରିକ୍ତ ମୁଖ୍ୟ ଯନ୍ତ୍ରୀ କମିଟିରେ ସାମିଲ୍ ରହିଛନ୍ତି । ମାହେନ୍ଦ୍ର ବେଳା ଅନୁସାରେ ସକାଳ ୭.୧୭ରୁ ଦିନ ୧୧.୧୭ ମଧ୍ୟରେ କମିଟିର ସଦସ୍ୟ ମାନେ ଶ୍ରୀମନ୍ଦିର ଭିତରକୁ ଯାଇ ଅଳଙ୍କାର ସ୍ଥାନାନ୍ତର ପ୍ରକ୍ରିୟା ଆରମ୍ଭ କରିବେ।
ମହାପ୍ରସାଦ ଓ ଭୋଗ ପାଇବାକୁ ଇଚ୍ଛୁକ ଭକ୍ତମାନେ ଶ୍ରୀମନ୍ଦିର ଉତ୍ତର ଦ୍ଵାର ଦେଇ ଆନନ୍ଦ ବଜାରକୁ ଯାଇ ପାରିବେ। ରତ୍ନଭଣ୍ଡାର ସ୍ଥାନାନ୍ତର କାର୍ଯ୍ୟ ସମାପନ ପରେ ପ୍ରବେଶ କଟକଣା ପ୍ରତ୍ୟାହାର ତଥା ଦର୍ଶନ ସ୍ୱାଭାବିକ କରାଯିବ । ନାଟମଣ୍ଡପ,ଗର୍ଭଗୃହ ଓ ଜଗମୋହନରେ ପାଳି ଥିବା ସେବାୟତ ହିଁ ଯାଇ ପାରିବେ । ପୋଲିସ ପ୍ରଶାସନ ପକ୍ଷରୁ ସକାଳ ୮ ଠାରୁ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଲାଗୁ କରାଯିବ । ଶ୍ରୀମନ୍ଦିର ଚାରି ଦ୍ଵାରରେ ଭକ୍ତଙ୍କୁ ଚେକିଂ କରି ଛଡାଯିବ। ବେହେରଣ ଦ୍ଵାର ନିକଟରେ ପ୍ରବେଶ ପାଇଁ ଦୁଇ ପ୍ରକାର ପାସ ବ୍ୟବସ୍ଥା କରାଯାଇଛି । ଅସ୍ଥାୟୀ ରତ୍ନଭଣ୍ଡାରରୁ ସମସ୍ତ ଅଳଙ୍କାର ସ୍ଥାୟୀ ରତ୍ନଭଣ୍ଡାରକୁ ସ୍ଥାନାନ୍ତର କାର୍ଯ୍ୟ ସମ୍ପୂର୍ଣ୍ଣ ହେବା ପରେ ପରିଚାଳନା କମିଟି ବୈଠକରେ ଭିତର ଓ ବାହାର୍ ରତ୍ନଭଣ୍ଡାର ଗଣତି ମଣତି ନେଇ ଚୂଡାନ୍ତ ନିଷ୍ପତି ନିଆଯିବ।
ଜିଏସଟି ସଂସ୍କାର ପରେ ଲାଗି ରହିଛି ଚର୍ଚ୍ଚା, କିଛି ଲାଭ ହେବନି କହିଲେ ବିଶେଷଜ୍ଞ…
ରାଉରକେଲା/ ଭୁବନେଶ୍ବର : ଜିଏସଟି ସଂସ୍କାର ଲାଗୁ ପରେ ବିଭିନ୍ନ ସାମଗ୍ରୀର ନୂଆ ଦର ଲାଗୁ। ନିତିଦିନିଆ ସାମଗ୍ରୀ, ପୋଷାକ, ଜୋତା, ଜୀବନ ବୀମା, ଛୋଟ କାର, ବାଇକ, ଟିଭି ଭଳି ସାମଗ୍ରୀ ଦର କମିଛି। ନୂଆ ଦାମରେ ଏସବୁ ସାମଗ୍ରୀ ବିକ୍ରି ଆରମ୍ଭ ହୋଇଛି।ନବରାତ୍ରିରୁ ଜିଏସଟି ବଚତ ଉତ୍ସବ ଆରମ୍ଭ ହୋଇଛି ବୋଲି କୁହାଯାଉଛି । ତେବେ ଅର୍ଥିନୀତି ସମୀକ୍ଷକଙ୍କ କହିବା କଥା, ଜିଏସଟି ହ୍ରାସ ହେଲେବି ସାମଗ୍ରୀ ଗୁଡିକର ବେସ୍ ପ୍ରାଇସ ବଢି ରହିଛି। ଲୋକେ ପୂର୍ବରୁ ଅଧିକ ଦରରେ ଜିନିଷ କିଣୁଛନ୍ତି। ତେଣୁ ଏହି ଜିଏସଟି କମାଇଲେ ମଧ୍ୟ ଲୋକଙ୍କ ପକେଟକୁ ବାଧୁଛି।ପୂର୍ବରୁ ୪ଟି ସ୍ଲାଵ ଥିବାରୁ ବ୍ୟବସାୟୀ ହିସାଵ ରଖିଵାରେ ଅସୁବିଧା ହେଉଥିଲା। ଏବେବି ବ୍ୟବସ୍ଥାରେ କିଛିଟା ସମସ୍ୟା ଥିବାରୁ ଏହାର ସଂଶୋଧନ ପାଇଁ ସରକାରଙ୍କୁ ଦାବି କରିଛନ୍ତି ବ୍ୟବସାୟୀ ସଂଘ। ଜିଏସଟି ସଂସ୍କାରକୁ ରାରରକେଲା ଶିଳ୍ପ ଓ ବଣିକ ସଂଘ ସ୍ବାଗତ କରିଛି। ଏହା ପରେବି ଗ୍ରାହକଙ୍କୁ ବିଶେଷ ଲାଭ ହେବ ନାହିଁ ବୋଲି କହିଛି ବଣିକ ସଂଘ।
ଜିଏସଟି କମିଲେ ସାଧାରଣ ଲୋକଙ୍କ କିଛି ଲାଭ ହେବନି କହିଛି କଂଗ୍ରେସ। ଜିଏସଟି ଉତ୍ସଵ କେନ୍ଦ୍ର ସରକାରଙ୍କ ଆଉ ଏକ ବାହାସ୍ପୋଟ। ଜିଏସଟି ସ୍ଲାବ ବଦଳିଲେ ଦରଦାମ କମିଯିବ କି ବୋଲି ପ୍ରଶ୍ନ କରିଛି କଂଗ୍ରେସ। ମନଇଚ୍ଛା ଦର ବଢାଇ ଜିଏସଟି ଛାଡ଼ କରିବାର ମାନେ କିଛି ନାହିଁ। କେବଳ ଜିଏସଟି ନାଁରେ ସାଧାରଣ ଲୋକଙ୍କୁ ଭୂଆଁ ବୁଲାଇବା ଛଡ଼ା କିଛି ନୁହେଁ। ଯଦି ରିହାତି ଦେବାକୁ ଚାହୁଁଛନ୍ତି ତାହେଲେ ଆଗାମୀ ୩ ବର୍ଷ ଧରି କୌଣସି ସାମଗ୍ରୀର ମୂଳ ଦର ନବଢ଼ାଇବାକୁ ପ୍ରତିଶ୍ରୁତି ଦିଅ ବୋଲି କହିଛି କଂଗ୍ରେସ। ନାଗରିକ ସୁରକ୍ଷା ମଞ୍ଚର କହିଛି, କେନ୍ଦ୍ର ସରକାର ଡାହାଣୀ ହୋଇ ଲାଗୁଛନ୍ତି ଗୁଣିଆ ହୋଇ ଝାଡୁଛନ୍ତି। ଏସବୁର ଉତ୍ତର ରଖିଛି ସରକାରୀ ଦଳ । ଗତ ୮ ବର୍ଷରେ ସମସ୍ତ ଅତ୍ୟାବଶ୍ୟକ ସାମଗ୍ରୀ ଦର ଏପରିକି ଖାଇବା ସାମଗ୍ରୀ ଓ ଔଷଧ ଆଦିର ଦାମ ୨ଶହରୁ ୩ଶହ ପ୍ରତିଶତ ବଢିଥିବାରୁ ଜିଏସଟି କମାଇଲେ କେତେ ମିଳିବ ବୋଲି ଉଠିଛି ପ୍ରଶ୍ନ ।
ନବୀନଙ୍କ ଶାସନରେ ଦ୍ରୁତ ପ୍ରଗତି : ସିଏଜି
ଭୁବନେଶ୍ବର : ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆର୍ଥିକ ସୁପରିଚାଳନାକୁ ମୋହର ମାରିଲେ ସିଏଜି । ୨୦୧୩-୧୪ରୁ ୨୦୨୨-୨୩ ପର୍ଯ୍ୟନ୍ତ ଓଡିଶା ଦେଶରେ ତୃତୀୟ ରାଜସ୍ବ ବଳକା ରାଜ୍ୟ । ୧୦ ବର୍ଷର ନବୀନ ସରକାରଙ୍କ ଆର୍ଥିକ ପରିଚାଳନାକୁ ଅନୁଶୀଳନ କରି ଏଭଳି ରିପୋର୍ଟ ପ୍ରକାଶ କରିଛନ୍ତି ମହାଲେଖାକାର । ୨୦୨୨-୨୩ରେ ରାଜ୍ୟର ବଳକା ରାଜସ୍ବ ୧୯ ହଜାର ୪୫୬ କୋଟି । ୨୦୦୦ ମସିହାରେ ଥିବା ଏକ ଅଭାବୀ ରାଜ୍ୟକୁ ବଳକା ରାଜସ୍ବ ରାଜ୍ୟରେ ପରିଣତ କରିବାରେ ନବୀନଙ୍କର ଥିଲା ବଡ଼ ଭୂମିକା । ସୁଚିନ୍ତିତ ଯୋଜନା, ଆର୍ଥିକ ସୁପରିଚାଳନା ଓ 5T ସରକାରର ସୁପ୍ରଶାସନ ଯୋଗୁଁ ନିଜସ୍ବ ଆର୍ଥିକ ସ୍ଥିତି ସୁଦୃଢ କରିବାରେ ସଫଳତା ପାଇଥିଲା । ନିରନ୍ତର ଭାବେ ରାଜସ୍ବ ଅଭିବୃଦ୍ଧି ଘଟିବା ସହ କେନ୍ଦ୍ର ଉପରେ ନିର୍ଭରଶୀଳତା ଦ୍ରୁତ ହ୍ରାସ ପାଇଥିଲା । ଏହାସହ ଜାରି ରହିଥିଲା ବହୁବିଧ ଜନକଲ୍ୟାଣକାରୀ ଯୋଜନା । ଯେଉଁଥିରେ ସାମିଲ ଥିଲା ବିଏସକେୱାଇ, ମିଶନ ଶକ୍ତି, କାଳିଆ, ଦକ୍ଷତା ବିକାଶ, 5T ସ୍କୁଲ, ଜନଜାତି ବିକାଶ, ଦୁର୍ବିପାକ ପରିଚାଳନା, ଭିତ୍ତିଭୂମି ବିକାଶ, ଜଳସେଚନ ସୁବିଧା ଓ ଦାରିଦ୍ର୍ୟ ଦୂରୀକରଣ ଭଳି କାର୍ଯ୍ୟକ୍ରମ । ସବୁଠୁ ବଡ଼ କଥା ହେଲା ନିଜସ୍ବ ପାଣ୍ଠିରେ ବିଜେଡି ସରକାର ଆରମ୍ଭ କରିଥିଲେ ଖାଦ୍ୟ ସୁରକ୍ଷା ଯୋଜନା । ଦୁଇ ଦଶନ୍ଧୀରୁ ଅଧିକ ଏଭଳି ସଫଳତା ପାଇଁ ସାଢେ ଚାରି କୋଟି ଓଡିଆଙ୍କର ନିରନ୍ତର ସମର୍ଥନ ପାଇଥିଲେ ନବୀନ । ଆଜି ସିଏଜିଙ୍କ ରିପୋର୍ଟ ପ୍ରକାଶ ପାଇବା ପରେ ସୋସିଆଲ ମିଡିଆ ଏକ୍ସରେ ପୋଷ୍ଟ କରି ନବୀନ ନିଜେ ଓଡ଼ିଶାବାସୀଙ୍କୁ ଧନ୍ଯବାଦ ଦେଇଛନ୍ତି ।
ନୂଆପଡାର ବିକାଶରେ ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କ ବହୁତ ଅବଦାନ ରହିଛି : ନବୀନ
ନୂଆପଡ଼ା : ପୂର୍ବତନ ମନ୍ତ୍ରୀ ଓ ନୂଆପଡ଼ାର ସ୍ବର୍ଗତ ବିଧାୟକ ରାଜେନ୍ଦ୍ର ଢୋଲକିଆଙ୍କ ପ୍ରତି ବିଜେଡି ସଭାପତି ନବୀନ ପଟ୍ଟନାୟକଙ୍କ ଗଭୀର ଶ୍ରଦ୍ଧାଞ୍ଜଳି। ଢୋଲକିଆଙ୍କ ପାଇଁ ଆୟୋଜିତ ଶ୍ରଦ୍ଧାଞ୍ଜଳି ସଭାରେ ନବୀନ ପଟ୍ଟନାୟକ କହିଛନ୍ତି, ନୂଆପଡାର ବିକାଶରେ ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କ ବହୁତ ଅବଦାନ ରହିଛି। ତାଙ୍କର ନିଷ୍ଠା, ପ୍ରତିବଦ୍ଧତା ଓ କଠିନ ପରିଶ୍ରମ ପାଇଁ ସେ ସବୁଦିନ ମନେ ରହିବେ। ଶାନ୍ତ, ସରଳ, ନିରହଂକାର ଗୁଣ ପାଇଁ ସମସ୍ତଙ୍କ ପ୍ରିୟ ଥିଲେ ରାଜେନ୍ଦ୍ର। ଢୋଲକିଆ ବାବୁଙ୍କ ଅଧୁରା କାମକୁ ପୁରା କରିବାକୁ ତାଙ୍କ ପରିବାର ସହ ବିଜୁ ଜନତା ଦଳ ଓ ସେ ନିଜେ ସମସ୍ତେ ଏକାଠି କାମ କରିବେ ବୋଲି ନବୀନ ପଟ୍ଟନାୟକ ପ୍ରତିଶୃତି ଦେଇଛନ୍ତି। ନବୀନ ପଟ୍ଟନାୟକ କହିଛନ୍ତି, ସ୍ବର୍ଗତ ଢୋଲକିଆ ବିଜୁ ଜନତା ଦଳର ଗୋଟେ ସ୍ତମ୍ଭ ଥିଲେ। ଦଳକୁ ମଜଭୁତ କରିବାରେ ତାଙ୍କର ବିଶେଷ ଅବଦାନ ଥିଲା। ସେ ସବୁବେଳେ ଲୋକଙ୍କ ସହ ଯୋଡି ହୋଇ ରହିଥିଲେ। ସାଧାରଣ ଲୋକଙ୍କ ସହ ସ୍ବର୍ଗତ ଢୋଲକିଆଙ୍କ ସମ୍ପର୍କ ବିଷୟ ଉଲ୍ଲେଖ କରି ନବୀନ ପଟ୍ଟନାୟକ କହିଛନ୍ତି, ସ୍ବର୍ଗତ ଢୋଲକିଆ ଲୋକଙ୍କ ସୁଖ ଦୁଃଖର ସାଥୀ ଥିଲେ। ସେ ବହୁବାର ବିଧାୟକ ହୋଇଛନ୍ତି, ମନ୍ତ୍ରୀ ହୋଇଛନ୍ତି। କିନ୍ତୁ ତୃଣମୂଳ ସ୍ତରରେରେ ସବୁବେଳେ ଯୋଡ଼ି ହୋଇ ରହୁଥିଲେ। ନୂଆପଡ଼ାର ବିକାଶରେ ସ୍ବର୍ଗତ ଢୋଲକିଆଙ୍କ ଅବଦାନ ବିଷୟରେ ସ୍ମରଣ କରାଇ ବିରୋଧୀ ଦଳ ନେତା କହିଛନ୍ତି, ଭିତ୍ତିଭୂମି ବିକାଶ, ବିଶେଷ କରି ନୂଆପଡ଼ାରେ ବିଜୁ ଏକ୍ସପ୍ରେସ ୱେ, ପିଇବା ପାଣି ଓ ଜଳସେଚନ କ୍ଷେତ୍ରରେ ଢୋଲକିଆ ବହୁତ ଭଲ କାମ କରିଛନ୍ତି।ଜନଜାତି ଭାଇ ଭଉଣୀଙ୍କ କଲ୍ୟାଣ ସହ ଶିକ୍ଷା ଓ ସ୍ୱାସ୍ଥ୍ୟର ବିକାଶ ପାଇଁ ଢୋଲକିଆ ବାବୁଙ୍କର ବହୁତ ଅବଦାନ ରହିଛି। ସମାଜସେବା କ୍ଷେତ୍ରରେ ତାଙ୍କର ବିଶେଷ ପରିଚୟ ଥିଲା। ଗରିବ ଲୋକଙ୍କ ବିବାହ, ଚକ୍ଷୁ ଚିକିତ୍ସା ଶିବିର, ଭିନ୍ନକ୍ଷମ ଶିବିର ଆୟୋଜନ କରି ସେ ଲୋକଙ୍କ ସେବା କରୁଥିଲେ। ଅନେକ ମନ୍ଦିର, ମସଜିଦ, ଚର୍ଚ୍ଚ, ଗୁରୁଦ୍ୱାରାର ପୁନଃରୁଦ୍ଧାରରେ ନିଜକୁ ସାମିଲ କରିଥିଲେ। ତାଙ୍କର ଶାନ୍ତ ସରଳ ଅମାୟିକ ଓ ନିରହଂକାର ଗୁଣ ଯୋଗୁଁ ସେ ସମସ୍ତଙ୍କର ଆଦରଣୀୟ ଥିଲେ। ନବୀନ ପଟ୍ଟନାୟକ କହିଛନ୍ତି, ସ୍ବର୍ଗତ ଢୋଲକିଆ ଆଜି ଆମ ଭିତରେ ନାହାନ୍ତି ସତ। କିନ୍ତୁ ନୂଆପଡାର ବିକାଶ ଓ ଲୋକଙ୍କ କଲ୍ୟାଣ ପାଇଁ ତାଙ୍କର ପ୍ରତିବଦ୍ଧତା, ନିଷ୍ଠା ଓ କଠିନ ପରିଶ୍ରମ ପାଇଁ ସେ ଲୋକଙ୍କ ହୃଦୟ ଜିତି ପାରି ଥିଲେ। ସେ ଲୋକଙ୍କ ପ୍ରିୟ ଥିଲେ ଏବଂ ସବୁବେଳେ ପ୍ରିୟ ହୋଇ ରହିଥିବେ। ଏ ଦୁଃଖ ସମୟରେ ସେ ନିଜେ ଏବଂ ପୁରା ବିଜୁ ଜନତା ଦଳ ଢୋଲକିଆ ବାବୁଙ୍କ ପରିବାର ସହ ରହିଛନ୍ତି ବୋଲି କହିଛନ୍ତି ନବୀନ ପଟ୍ଟନାୟକ। ଢୋଲକିଆଙ୍କ ପତ୍ନୀ, ପୁଅ ଓ ନୂଆପଡାବାସୀଙ୍କୁ ମଧ୍ୟ ଗଭୀର ସମବେଦନା ଜଣାଇଛନ୍ତି ନବୀନ ପଟ୍ଟନାୟକ।
ଛାତ୍ର ସଂସଦ ନିର୍ବାଚନକୁ ନେଇ ସରକାରଙ୍କ ଉପରେ ବର୍ଷିଲା ବିଜେଡି
ଭୁବନେଶ୍ବର : କହି ହେଉଥାଏ ପରକୁ, ବୁଦ୍ଧି ନ ଦିଶଇ ଘରକୁ। ଛାତ୍ର ସଂସଦ ନିର୍ବାଚନ କରିବାକୁ କହି ଏହାକୁ ଟାଳି ଚାଲିଥିବା ରାଜ୍ୟ ସରକାରଙ୍କୁ ଘେରିଛି ବିଜେଡି । କାହିଁକି ସରକାର ଛାତ୍ର ସଂସଦ ନିର୍ବାଚନ କରିବାକୁ ଆଗଭର ହେଉନାହାଁନ୍ତି ? କାହାକୁ ଡରୁଛନ୍ତି ସରକାର ? କୋଭିଡ୍, ଫାଇଲନ, ଫନି, ହୁଡ ହୁଡ ନାହିଁ । ରାଜ୍ୟରେ ବନ୍ୟା ପରିସ୍ଥିତି ମଧ୍ୟ ନାହିଁ । ତେବେ କାହିଁକି ସରକାର ଛାତ୍ର ସଂସଦ ନିର୍ବାଚନ କରୁନାହାଁନ୍ତି ବୋଲି ପ୍ରଶ୍ନ କରିଛି ଛାତ୍ର ବିଜେଡି । ABVP ଓ ଯୁବ ମୋର୍ଚ୍ଚା ମଧ୍ୟରେ କନ୍ଦଳ ଯୋଗୁଁ କ୍ୟାମ୍ପସ ସୁରକ୍ଷିତ ନୁହେଁ। ନିଜ ଭିତରେ ମାଡ ପିଟ୍ ପାଇଁ ବିଜେପି ସରକାର ଅଡ଼ୁଆରେ ଅଛନ୍ତି । ସରକାର ବିଧାନସଭାରେ ଉତ୍ତର ରଖି କହିଛନ୍ତି କି ବର୍ଷକ ମଧ୍ୟରେ ୧୭ ଜଣ ଛାତ୍ରୀ ବିଭିନ୍ନ ନିର୍ଯାତନାର ଶିକାର ହୋଇଛନ୍ତି । ତା ଭିତରୁ ୬ ଜଣ ଯୌନ ନିର୍ଯାତନା, ୨ଜଣ ଅସଦାଚରଣ ଓ ୯ ଜଣ ମାନସିକ ନିର୍ଯାତନାର ଶିକାର ହୋଇଛନ୍ତି । ଗତ ୧୫ ମାସରେ କ୍ୟାମ୍ପସରେ ୨୨ ଜଣ ଛାତ୍ରଛାତ୍ରୀ ଆତ୍ମହତ୍ୟା କରିଛନ୍ତି । ଏପରି ସ୍ଥିତିରେ ବ୍ଯାକଫୁଟରେ ସରକାର । ତେଣୁ ଉଚ୍ଚଶିକ୍ଷା ମନ୍ତ୍ରୀଙ୍କୁ ଛାତ୍ର ବିଜେଡି ଚ୍ୟାଲେଞ୍ଜ କରି କହିଛି କି, ଯଦି ଦମ ଅଛି ୫ରୁ ୭ ଦିନ ଭିତରେ ବିଜ୍ଞପ୍ତି ପ୍ରକାଶ କରନ୍ତୁ । ରଙ୍ଗ ମାରିଥିଲା ବିଜେପି, ଆମେ ଆଇ-କାର୍ଡ ପରିବର୍ତ୍ତନ କରିବୁ । ବାଲେଶ୍ଵରର ମୃତ ଛାତ୍ରୀଙ୍କ ଆଇ କାର୍ଡକୁ ଧରି କ୍ୟାମ୍ପସ ବୁଲିବୁ। ତାଙ୍କୁ ନ୍ୟାଯ ପ୍ରଦାନ ପାଇଁ ବିଜେଡି ଲଢେଇ ଜାରି ରଖିବ ବୋଲି କହିଛନ୍ତି ଛାତ୍ର ବିଜେଡି ସଭାପତି ଇପସିତା ସାହୁ ।