ନନ୍ଦିଘୋଷ ବ୍ୟୁରୋ : ଚିକିତ୍ସା ଅବହେଳାରୁ ଦୁଇ ଓଡିଆ ମସ୍ୟଜୀବୀଙ୍କ ମୃତ୍ୟୁ। କେରଳ କନୁର ଜିଲ୍ଲା ପାରିୟାରମ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ହୋଇଛି ମୃତ୍ୟୁ। ମୃତ ଦୁଇ ଓଡିଆ ମସ୍ୟଜୀବୀ ହେଲେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ବାଲିପାଟପୁର ଗ୍ରାମର ନିଗମ ବେହେରା ଓ ସୁବାସ ବେହେରା। ସୁବାସଙ୍କର ଗତକାଲି ମୃତ୍ୟୁ ହୋଇଥିବା ବେଳେ ଆଜି ଭୋର ସମୟରେ ନିଗମ ବେହେରାଙ୍କର ମୃତ୍ୟୁ ହୋଇଥିବା ଜଣା ପଡିଛି। ପରିବାର ଲୋକେ ରାଜ୍ୟ ସରକାରଙ୍କୁ ସହାୟତା ପାଇଁ ଅନୁରୋଧ କରିଛନ୍ତି। କେରଳ କନ୍ନୁର ଜିଲ୍ଲାରେ ମାଛଧରା କାର୍ଯ୍ୟରେ ନିୟୋଜିତ ହୋଇଛନ୍ତି ଓଡିଶାର ଅନେକ ମତ୍ସ୍ଯଜୀବୀ। ପ୍ରତିଦିନ ଗଭୀର ସମୁଦ୍ରକୁ ମାଛ ଧରିବାକୁ ଯାଉଥିଲେ। କ୍ୟାମ୍ପରେ ଶୋଇଥିବାବେଳେ ଗତ ୧୦ ତାରିଖ ଭୋର ସମୟରେ ଗ୍ୟାସ ସିଲିଣ୍ଡର ବିସ୍ଫୋରଣରେ ୪ ଓଡ଼ିଆ ମତ୍ସ୍ଯଜୀବୀ ଗୁରୁତର ହୋଇପଡିଥିଲେ। ସେମାନଙ୍କୁ କନୁର ଜିଲ୍ଲାର ପାରିୟାରମ ମେଡିକାଲ କଲେଜରେ ଚିକିତ୍ସା ଲାଗି ଭର୍ତ୍ତି କରାଯାଇଥିଲା। ଚିକିତ୍ସାରେ ଅବହେଳାରୁ ମୃତ୍ଯୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ
ଓଡ଼ିଆ ଡାକ୍ତରୀ ଛାତ୍ରୀ ଗଣଦୁଷ୍କର୍ମ ଘଟଣା: ଗିରଫ ଅଭିଯୁକ୍ତଙ୍କୁ ମୁହାଁମୁହିଁ ଜେରା
ନନ୍ଦିଘୋଷ ବ୍ୟୁରୋ : ପଶ୍ଚିମବଂଗ ଦୁର୍ଗାପୁରରେ ଘରୋଇ ମେଡିକାଲ କଲେଜରେ ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣା । ତଦନ୍ତକୁ ତ୍ୱରାନ୍ୱିତ କରିବା ପାଇଁ ପୋଲିସ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି । କିଛି ସମୟ ପୂର୍ବରୁ ଗିରଫ ଦୁଇ ଜଣ ଶେଖ ରିଆଜୁଦ୍ଦିନ ଏବଂ ଶେଖ ନାସିରୁଦ୍ଦିନଙ୍କୁ ତଦନ୍ତ ପାଇଁ ବିଜରା ଗାଁକୁ ନିଆଯାଇଥିଲା। ଉଭୟ ଅଭିଯୁକ୍ତଙ୍କୁ ମୁହାଁମୁହିଁ ଜେରା କରାଯାଇଥିବା ସୂଚନା।ଏଥିସହିତ ଏକାଧିକ ଗ୍ରାମବାସୀଙ୍କୁ ମଧ୍ୟ ପରଚାଉଚରା କରାଯାଇଛି। ଘଟଣାସ୍ଥଳରୁ କିଛି ପ୍ରମାଣ ମିଳିଥିବା ଜଣାପଡ଼ିଛି। ଖୁବଶୀଘ୍ର ଅଭିଯୁକ୍ତଙ୍କୁ ନେଇ ସିନ ରିକ୍ରିଏସନ କରାଯିବ। ଘଟଣା ସହିତ ଆଉ କାହାର ସମ୍ପର୍କ ଅଛି ନା ନାହିଁ ସେ ନେଇ ଛାନବିନ ଜାରି ରହିଛି। ବିଜରା ଅଂଚଳରେ ଆଉ କିଛି ଅଭିଯୁକ୍ତ ଲୁଚି ଥାଇପାରନ୍ତି।ସେଥିଲାଗି ଦୁର୍ଗାପୁରର ନ୍ୟୁ ଟାଉନସିପ୍ ପୋଲିସ ଷ୍ଟେସନ ଏବଂ ଦୁର୍ଗାପୁର ପୋଲିସ ଷ୍ଟେସନର ଏକ ମିଳିତ ପୋଲିସ ଟିମ ଛାନବିନ କରୁଛି।
ଜମ୍ମୁ-କାଶ୍ମୀରରେ ସେନାକୁ ବଡ଼ ସଫଳତା, କୁପୱାଡ଼ାରେ ଦୁଇ ଆତଙ୍କବାଦୀ ସଫା
ନନ୍ଦିଘୋଷ ବ୍ୟୁରୋ : ଜମ୍ମୁ ଓ କାଶ୍ମୀରର କୁପୱାଡା ଜିଲ୍ଲାରେ LoC ନିକଟରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ। ଏହି ଅପରେସନରେ ଦୁଇ ଆତଙ୍କବାଦୀ ନିପାତ । ଏହି ଅଞ୍ଚଳରେ ଆହୁରି ଆତଙ୍କବାଦୀ ଲୁଚି ରହିଥିବା ସନ୍ଦେହ କରାଯାଉଛି । ସେନାର ଅପରେସନ ଏବେ ବି ଜାରି ରହିଛି। ସୁରକ୍ଷା ବାହିନୀ ଅନୁପ୍ରବେଶ ଉଦ୍ୟମ ସମ୍ପର୍କରେ ସୂଚନା ପାଇବା ପରେ ଅପରେସନ ଆରମ୍ଭ ହୋଇଥିଲା। ଭାରତୀୟ ସେନା ସମଗ୍ର ଅଞ୍ଚଳକୁ ଘେରାବନ୍ଦୀ କରି ସର୍ଚ୍ଚ ଅପରେସନକୁ ଜୋରଦାର କରିଛି। ଗତ କିଛି ଦିନ ମଧ୍ୟରେ ସୀମା ପାରରୁ ଆତଙ୍କବାଦୀ କାର୍ଯ୍ୟକଳାପ ପୁଣି ଥରେ ବୃଦ୍ଧି ପାଇଛି।
ଆତଙ୍କବାଦୀଙ୍କ ଆଡ୍ଡାର ପର୍ଦ୍ଦାଫାସ
ସେନା ଏବଂ ପୋଲିସଙ୍କ ମିଳିତ ଅଭିଯାନରେ ୱାରସନ ଅଞ୍ଚଳର ବ୍ରିଜଥୋର ଜଙ୍ଗଲରେ ଏକ ଆତଙ୍କବାଦୀ ଆଡ୍ଡା ଠାବ କରିଥିଲେ। ସୁରକ୍ଷା ବାହିନୀ ଦୁଇଟି AK-ସିରିଜ ରାଇଫଲ, ଚାରୋଟି ରକେଟ ଲଞ୍ଚର, ଏକ ବଡ଼ ପରିମାଣର ଗୁଳିଗୋଳା ଏବଂ ଅନ୍ୟାନ୍ୟ ଯୁଦ୍ଧ ସାମଗ୍ରୀ ଜବତ କରିଥିଲେ। ଅଧିକାରୀଙ୍କ ଅନୁଯାୟୀ, ଶ୍ରୀନଗରରେ ଭାରତୀୟ ସେନାର ଚିନାର କୋରପସ ଦ୍ୱାରା ପ୍ରାପ୍ତ ଗୁପ୍ତ ସୂଚନା ଆଧାରରେ ଏହି ଅଭିଯାନ ଆରମ୍ଭ କରାଯାଇଥିଲା। ଅଞ୍ଚଳରେ ଲୁଚି ରହିଥିବା ଅନ୍ୟ ଆତଙ୍କବାଦୀଙ୍କୁ ଖୋଜିବା ପାଇଁ ସର୍ଚ୍ଚ ଅପରେସନ୍ ଜାରି ରହିଛି।
ଗୁଜରାଟ ଭାବନଗରରେ ଧସିଲା ୩ ମହଲା କୋଠା
ନନ୍ଦିଘୋଷ ବ୍ୟୁରୋ : ଗୁଜରାଟ ଭାବନଗରରେ ଧସିଲା ୩ ମହଲା କୋଠା। ଭଗ୍ନାବଶେଷ ତଳେ ଦବି ଯାଇ ଜଣକର ମୃତ୍ୟୁ ହୋଇଥିବା ଜଣାପଡିଛି। ୩ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା। ଏବେବି କିଛି ଭଂଗା କୋଠା ତଳେ ଫସିଥିବା ଜଣାପଡିଛି। ଫସିଥିବା ଲୋକଙ୍କୁ ଉଦ୍ଧାର ଲାଗି ଚାଲିଛି ରେସକ୍ଯୁ ଅପରେସନ। ଗତକାଲି ମଧ୍ୟରାତ୍ରିରେ ଧସିପଡିଥିଲା କୋଠାୟ। ପ୍ରଶାସନ ପକ୍ଷରୁ ଜୋରସୋରରେ ଉଦ୍ଧାରକାର୍ଯ୍ୟ ଜାରି। ଆହତମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲକୁ ନିଆଯାଇଛି। ବାକି ଲୋକଙ୍କୁ ଉଦ୍ଧାର କରିବା ପାଇଁ ପ୍ରୟାସ ଜାରି ରହିଛି। ଅଗ୍ନିଶମ ବାହିନୀ ଦଳ ଘଟଣାସ୍ଥଳରେ ଉପସ୍ଥିତ ଅଛନ୍ତି।
ଥାନାରୁ ଚମ୍ପଟ ଅଭିଯୁକ୍ତ ! ପଦାରେ ପଡ଼ିଲା କମିଶନରେଟ ପୋଲିସର ଢିଲା ସୁରକ୍ଷା
ନନ୍ଦିଘୋଷ ବ୍ୟୁରୋ : ପଦାରେ ପଡ଼ିଲା କମିଶନରେଟ ପୋଲିସର ଢ଼ିଲା ସୁରକ୍ଷା। କନେଷ୍ଟବଳଙ୍କୁ ଧକ୍କା ଦେଇ ମୋବାଇଲ ଚୋର ଥାନାରୁ ଚମ୍ପଟ ମାରିଛି। ରାଜଧାନୀ ଉପକଣ୍ଠ ଚନ୍ଦକା ଥାନାରେ ଏଭଳି ଘଟଣା ଘଟିଛି। ଫେରାର ଅଭିଯୁକ୍ତ ହେଉଛି ପଶ୍ଚିମବଙ୍ଗର ରାଜା। ଅଭିଯୋଗ ଅନୁଯାୟୀ ଗତମାସ ୨୮ ତାରିଖ ରାତିରେ ଏକ ଆଇଫୋନ ଚୋରି ହୋଇଥିଲା। ଯେଉଁ ଅଭିଯୁକ୍ତକୁ ଦୁଇ ଦିନ ତଳେ ଚନ୍ଦକା ପୋଲିସ ଧରି ଅଧିକ ପଚରାଉଚରା କରୁଥିଲା। ଗତକାଲି ଅଭିଯୁକ୍ତ ଜଣଙ୍କ ବାନ୍ତି ଲାଗୁଥିବା ବାହାନା କରି ବାଥରୁମ ଯାଇଥିଲା। ଥାନାର ସେଣ୍ଟ୍ରି ସମେତ ଦୁଇ ଜଣ କନେଷ୍ଟବଳ ମଧ୍ୟ ତାକୁ ଜଗି ଛିଡ଼ା ହୋଇଥିଲେ। ହେଲେ ଅଭିଯୁକ୍ତ ଜଣଙ୍କ ଚତୁରତାର ସହ ଜଣେ କନେଷ୍ଟବଳଙ୍କୁ ଧକ୍କା ଦେଇ ବାହାର ପଟ ଗେଟରେ ଦୌଡ଼ି ପଳାଇଥିଲା। ରାଜା ଖସିଯିବା ପରେ ଚନ୍ଦକା ଥାନାର ଢିଲା ସୁରକ୍ଷା ବ୍ୟବସ୍ଥା ପଦାରେ ପଡ଼ିଛି। ଥାନାରେ ଏକାଧିକ କର୍ମଚାରୀ ଥାଇ ମଧ୍ୟ ଚୋର ଖସି ପଳାଇଯିବା କମିସନରେଟ ପୋଲିସର ଢିଲା ସୁରକ୍ଷାକୁ ପଦାରେ ପକାଇଛି। ସେପଟେ ୨୪ ଘଣ୍ଟାରୁ ଅଧିକ ସମୟ କାହାରିକୁ ଅଟକ ରଖିବାର ନିୟମ ନଥିବା ବେଳେ ଚନ୍ଦକା ପୋଲିସ ରାଜାକୁ କିଭଳି ଦୁଇ ଦିନ ଧରି ଅଟକ ରଖିଥିଲା ତାକୁ ନେଇ ପ୍ରଶ୍ନ ଉଠିଛି।
ରାଜ୍ୟରୁ ଫେରୁଛି ମୌସୁମୀ, ୬ ଜିଲ୍ଲାରୁ ପ୍ରତ୍ୟାବର୍ତନ ପ୍ରକ୍ରିୟା ଆରମ୍ଭ
ନନ୍ଦିଘୋଷ ବ୍ୟୁରୋ : ରାଜ୍ୟରୁ ଫେରୁଛି ମୌସୁମୀ । ୬ ଜିଲ୍ଲାରୁ ପ୍ରତ୍ୟାବର୍ତନ ପ୍ରକ୍ରିୟା ଆରମ୍ଭ। ଦକ୍ଷିଣ ପଶ୍ଚିମ ମୌସୁମୀ ବାୟୁ ଓଡ଼ିଶାର କିଛି ଅଂଶରୁ ବିଦାୟ ନେଇଛି । ମୟୂରଭଞ୍ଜ , କେନ୍ଦୁଝର, ଝାରସୁଗୁଡା,କେନ୍ଦୁଝର, ସମ୍ବଲପୁର, ଓ ସୁନ୍ଦରଗଡର କିଛି କିଛି ଜିଲ୍ଲାରୁ ମୌସୁମୀ ବିଦାୟ ନେଇଛି । ଆଗାମୀ ୨ରୁ ୩ ଦିନ ମଧ୍ୟରେ ଆଉ କିଛି ଜିଲ୍ଲାରୁ ମୌସୁମୀ ଫେରିବା ପାଇଁ ପାଗ ଅନୁକୂଳ ରହିଛି ବୋଲି ପୂର୍ବାନୁମାନକରିଛି ପାଣିପାଗ ବିଭାଗ । ସେପଟେ ୫ ଜିଲ୍ଲାକୁ ପ୍ରବଳ ବର୍ଷା ପାଇଁ ଚେତାବନୀ ଦେଲା ଆଂଚଳିକ ପାଣିପାଗ ବିଭାଗ । ରାଜ୍ୟରେ ଆଗାମୀ ୩ ଦିନ ପର୍ଯ୍ୟନ୍ତ ବିଭିନ୍ନ ଜିଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବା ନେଇ ସତର୍କତା ଜାରି କରିଛି ବିଭାଗ । ମାଲକାନଗିରି , କୋରାପୁଟ, ନବରଂଗପୁର କଳାହାଣ୍ଡି, ଗଜପତି, ଗଂଜାମ ,କନ୍ଧମାଳ ଓ ରାୟଗଡ଼ାରେ ବିଜୁଳି ଘଡଘଡି ସହ ହାଲୁକରୁ ମଧ୍ୟମ ଧରଣର ବର୍ଷାକୁ ନେଇ ୟେଲୋ ଓ୍ବାର୍ଣ୍ଣିଂ ଜାରି ହୋଇଛି ।
ସରଗରମ ବିହାର ରାଜନୀତି; ଏନଡିଏ ଓ ଇଣ୍ଡି ମେଣ୍ଟ ମଧ୍ୟରେ ଦେଖିବାକୁ ମିଳିପାରେ କଡ଼ା ଟକ୍କର
ନନ୍ଦିଘୋଷ ବ୍ୟୁରୋ : ସରଗରମ ବିହାର ରାଜନୀତି । ରାଜନେତାଙ୍କ ମଧ୍ୟରେ ଘଡିକେ ଘୋଡା ଛୁଟୁଛି । ଏନଡିଏ ଓ ବିରୋଧୀ ଇଣ୍ଡି ମେଣ୍ଟ ମଧ୍ୟରେ ଦେଖିବାକୁ ମିଳିପାରେ କଡ଼ା ଟକ୍କର । ଏବେ ସୁଦ୍ଧା ଇଣ୍ଡିମେଣ୍ଟରେ ଆସନ ଭାଗବଣ୍ଟା ଛିଣ୍ଡିପାରୁନଥିବା ବେଳେ ଆରଜେଡି ନେତା ତଥା ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ତାଙ୍କର ନିର୍ବାଚନ କ୍ଷେତ୍ର ଘୋଷଣା କରିଛନ୍ତି। ତେଜସ୍ୱୀ ଯାଦବ ଅକ୍ଟୋବର ୧୫ ତାରିଖରେ ରାଘୋପୁର ନିର୍ବାଚନମଣ୍ଡଳୀରୁ ତାଙ୍କର ନାମାଙ୍କନ ଦାଖଲ କରିବେ ।
ସେପଟେ ଏନଡିଏ ଓ ବରୋଧୀ ଇଣ୍ଡି ମେଣ୍ଟ ପାଇଁ କଣ୍ଟା ସାଜିପାରେ ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟି। ଆଗାମୀ ବିହାର ନିର୍ବାଚନ ପାଇଁ ୬୫ଟି ଆସନ ପାଇଁ ଦ୍ୱିତୀୟ ପ୍ରାର୍ଥୀ ତାଲିକା ଘୋଷଣା କରିଛି ଜେଏସପି। ହେଲେ କିଶୋରଙ୍କ ନାମ ଏହି ତାଲିକାରେ ନାହିଁ। ଗତ ସପ୍ତାହରେ, ଜେଏସପି ରାଜ୍ୟର ୨୪୩ ସଦସ୍ୟ ବିଶିଷ୍ଟ ବିଧାନସଭା ପାଇଁ ୫୧ ଜଣଙ୍କ ନାମ ସହିତ ପ୍ରାର୍ଥୀଙ୍କ ପ୍ରଥମ ତାଲିକା ଘୋଷଣା କରିଥିଲା। ତେବେ ଜେଏସପି ନିଶ୍ଚିତ ରୂପେ ଦୁଇ ମେଣ୍ଟକୁ ଟକ୍କର ଦେଇପାରେ ବୋଲି କହିଛନ୍ତି ରାଜନୈତିକ ବିଶେଷଜ୍ଞ। ସେପଟେ ଆରଜେଡି ରାଷ୍ଟ୍ରୀୟ ଜନତା ଦଳ ନେତା ତେଜସ୍ବୀ ଯାଦବଙ୍କୁ ଶକ୍ତ ଧକ୍କା ଦେଇପାରନ୍ତି ବଡ଼ ଭାଇ ତେଜ ପ୍ରତାପ। ତେଜପ୍ରତାପ ଜନଶକ୍ତି ଜନତା ଦଳ ଆଗାମୀ ବିଧାନସଭା ନିର୍ବାଚନ ପାଇଁ ୨୧ ଜଣ ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ କରିଛି । ଏହି ତାଲିକାରେ ସେ ମହୁଆ ବିଧାନସଭା ନିର୍ବାଚନମଣ୍ଡଳୀରୁ ନିର୍ବାଚନ ଲଢ଼ିବେ ବୋଲି ପ୍ରକାଶ କରିଛନ୍ତି।
ପଶ୍ଚିମବଙ୍ଗରେ ଓଡ଼ିଆ ଡାକ୍ତରୀ ଛାତ୍ରୀ ଗଣଦୁଷ୍କର୍ମ ଘଟଣା : ସମସ୍ତ ଅଭିଯୁକ୍ତ ଗିରଫ
ନନ୍ଦିଘୋଷ ବ୍ୟୁରୋ : ଓଡ଼ିଆ ଡାକ୍ତରୀ ଛାତ୍ରୀ ଗଣଦୁଷ୍କର୍ମ ଘଟଣାରେ ସମସ୍ତ ଅଭିଯୁକ୍ତଙ୍କୁ ଗିରଫ କରାଯାଇଛି । ଏହି ଗଣ ଦୁଷ୍କର୍ମ ଘଟଣାରେ ମୋଟ ୫ ଜଣ ଅଭିଯୁକ୍ତ ସାମିଲ ଥିଲେ । ମୁଖ୍ୟ ଅଭିଯୁକ୍ତ ବି ଗିରଫ ହୋଇଛି । ଗତକାଲି ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ଆସାନସୋଲ-ଦୁର୍ଗାପୁର ପୋଲିସ କମିଶନରେଟ କମିଶନର । ଏହି ଘଟଣାରେ ପଶ୍ଚିମବଙ୍ଗ ପୋଲିସ ପୀଡ଼ିତା ଓ ତାଙ୍କ ପରିବାରକୁ ସମସ୍ତ ପ୍ରକାର ସହଯୋଗ କରିବାକୁ ପ୍ରସ୍ତୁତ ଅଛନ୍ତି। ଘଟଣା ଘଟିବା ପରଦିନ ନିଜେ ପୋଲିସ କମିଶନର ପୀଡ଼ିତାଙ୍କୁ ମେଡିକାଲରେ ଭେଟିବା ସହ ତାଙ୍କ ବାପାଙ୍କ ସହ କଥା ହୋଇଥିଲେ।
ପୀଡ଼ିତାଙ୍କ ପରିବାର କିମ୍ବା ତାଙ୍କ ବାପାଙ୍କ ବ୍ୟକ୍ତିଗତ ସୁରକ୍ଷା ପାଇଁ ପୋଲିସ ଯୋଗାଇଦେବାକୁ କମିଶନର କହିଥିଲେ। କିନ୍ତୁ ପୋଲିସ ସୁରକ୍ଷା ଦେବାକୁ ମନା କରିଦେଇଥିଲେ। ଏହାସହିତ ପୀଡ଼ିତାଙ୍କ ପୁରୁଷ ବନ୍ଧୁଙ୍କୁ ତଦନ୍ତରେ ସହଯୋଗ ପାଇଁ ମଧ୍ୟ ପଚରାଉଚୁରା କରାଯାଉଛି। ସମସ୍ତ ଅଭିଯୁକ୍ତ ଗିରଫ ହେବା ପରେ ତାଙ୍କ ବିରୋଧରେ କଠୋର ଦଫା ଲାଗିଛି। ପୀଡ଼ିତା ଯେପରି ତ୍ବରିତ ନ୍ୟାୟ ପାଇବେ ସେନେଇ କମିଶନରେଟ୍ ପୋଲିସ ତତ୍ପର ଅଛି। ଏହି ଘଟଣା ଅତ୍ୟନ୍ତ ଦୁଃଖଦାୟକ। ପୀଡ଼ିତାଙ୍କ ପରିବାର ପ୍ରତି କମିଶନରେଟ୍ ପୋଲିସ ସମବେଦନା ଜଣାଉଛି। ପୀଡିତା ଏବେ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ସେଠି ମହିଳା ପୋଲିସ ସୁରକ୍ଷାକର୍ମୀ ନିୟୋଜିତ କରାଯାଇଛି। ଏହାସହିତ ପୀଡ଼ିତା ଓ ତାଙ୍କ ବାପାଙ୍କୁ ସ୍ଥାନୀୟ ପୋଲିସ ଅଧିକାରୀ, ଡିସିପି ଓ ବରିଷ୍ଠ ପୋଲିସ ଅଧିକାରୀଙ୍କ ଫୋନ ନମ୍ବର ଯୋଗାଇ ଦିଆଯାଇଛି। ଯେତେବେଳେ ବି ପୀଡ଼ିତା କିମ୍ବା ତାଙ୍କ ପରିବାର ଆବଶ୍ୟକ ମନେକରିବେ ତତକ୍ଷଣାତ ପୋଲିସ ସହାୟତା ଯୋଗାଇ ଦିଆଯିବ। ତେବେ ପୀଡ଼ିତାଙ୍କୁ ଭୁବନେଶ୍ବର ନେବା ପାଇଁ ବାପା କହୁଥିବା ନେଇ ସାମ୍ବାଦିକମାନେ ପ୍ରଶ୍ନ ପଚାରିବାରୁ ପୋଲିସ କମିଶନର କୌଣସି ମନ୍ତବ୍ୟ ଦେଇନାହାନ୍ତି
କଳାହାଣ୍ଡି ଓ ରାୟଗଡ଼ାର ୯୨ଟି ଗାଁରେ ବେଦାନ୍ତର ବାର୍ଷିକ ମୋତିଆ ବିନ୍ଦୁ ଅସ୍ତ୍ରୋପଚାର ଅଭିଯାନ ଆରମ୍ଭ
ନନ୍ଦୀଘୋଷ ବ୍ୟୁରୋ: ବେଦାନ୍ତ ଆଲୁମିନିୟମ, ଏହାର ପ୍ରମୁଖ ସ୍ୱାସ୍ଥ୍ୟସେବା ପଦକ୍ଷେପ, ପ୍ରୋଜେକ୍ଟ ‘ଆରୋଗ୍ୟ’ ଅଧୀନରେ ପ୍ରଥମ ପର୍ଯ୍ୟାୟରେ ୮ଟି ମୋତିଆବିନ୍ଦୁ ଅସ୍ତ୍ରୋପଚାର ଶିବିର ଆରମ୍ଭ କରିଛି । ଏଥିରେ କଳାହାଣ୍ଡି ଓ ରାୟଗଡ଼ା ଜିଲ୍ଲାର ୯୨ଟି ଗାଁରେ ବୃଦ୍ଧ ବ୍ୟକ୍ତିଙ୍କ ଦୃଷ୍ଟିଶକ୍ତି ଫେରାଇ ଆଣିବା ଏବଂ ଜୀବନର ମାନ ଉନ୍ନତ କରିବାକୁ ଉଦ୍ୟମ କରାଯାଉଛି । ଏହା ଭବାନୀପାଟଣାର ଜଗନ୍ନାଥ ନେତ୍ରାଳୟ ସହିତ ମିଳିତ ଭାବରେ ପରିଚାଳିତ ହେଉଛି । ଅକ୍ଟୋବର ୨୦୨୫ରୁ ମାର୍ଚ୍ଚ ୨୦୨୬ ପର୍ଯ୍ୟନ୍ତ ୮ଟି ପର୍ଯ୍ୟାୟରେ ମୋତିଆବିନ୍ଦୁ ଅସ୍ତ୍ରୋପଚାର ଅଭିଯାନ କରାଯିବ । ଯାହା ଦ୍ୱାରା ପଛୁଆ ସମ୍ପ୍ରଦାୟକୁ ମାଗଣା ପରାମର୍ଶ, ଅସ୍ତ୍ରୋପଚାର ଓ ଅସ୍ତ୍ରୋପଚାର ପରବର୍ତ୍ତୀ ଯତ୍ନ ନେଇ କାମ କରାଯାଉଛି । ପ୍ରଥମ ପର୍ଯ୍ୟାୟରେ, ପ୍ରାୟ ୪୦ ଜଣ ରୋଗୀଙ୍କର ଅସ୍ତ୍ରୋପଚାର ହେବ । ଏହି ଅଭିଯାନର ଲକ୍ଷ୍ୟ ୨୦୨୬ ଆର୍ଥିକ ବର୍ଷରେ ୩୫୦ରୁ ଅଧିକ ହିତାଧିକାରୀଙ୍କ ନିକଟରେ ପହଞ୍ଚିବା ।
ସୁଲଭ ଓ ଗୁଣାତ୍ମକ ଚକ୍ଷୁ ଚିକିତ୍ସା ଉପରେ ଦୃଢ଼ ଧ୍ୟାନ ଦେଇ, ବେଦାନ୍ତ ଲାଞ୍ଜିଗଡ଼ର ପ୍ରୋଜେକ୍ଟ ‘ଆରୋଗ୍ୟ’ କଳାହାଣ୍ଡି ଏବଂ ରାୟଗଡ଼ାରେ ସ୍ୱାସ୍ଥ୍ୟସେବା ପାର୍ଥମ୍ୟକୁ ପୂରଣ କରିଚାଲିଛି । ଆଜି ପର୍ଯ୍ୟନ୍ତ, ବେଦାନ୍ତ ଲାଞ୍ଜିଗଡ଼ର ନିରନ୍ତର ଚକ୍ଷୁ ଚିକିତ୍ସା ହସ୍ତକ୍ଷେପ ୧,୭୦୦ରୁ ଅଧିକ ବ୍ୟକ୍ତିଙ୍କୁ ସେମାନଙ୍କର ଦୃଷ୍ଟିଶକ୍ତି ଫେରିପାଇବାରେ ସାହାଯ୍ୟ କରିଛି ।
ଏପରି ପଦକ୍ଷେପକୁ ବେଦାନ୍ତ ଆଲୁମିନା ବ୍ୟବସାୟର ସିଇଓ ପଣବ କୁମାର ଭଟ୍ଟାଚାର୍ଯ୍ୟ ପ୍ରଶଂସା କରି କହିଛନ୍ତି, ‘ବେଦାନ୍ତ ଲାଞ୍ଜିଗଡ଼ରେ, ଆମର ସ୍ୱାସ୍ଥ୍ୟସେବା ପଦକ୍ଷେପଗୁଡ଼ିକ ଲୋକଙ୍କ ଜୀବନରେ ଏକ ସ୍ପଷ୍ଟ ପରିବର୍ତ୍ତନ ଆଣିବା ପାଇଁ ତିଆରି କରାଯାଇଛି । ଯାହା ନିଶ୍ଚିତ କରେ. ସବୁଠାରୁ ଦୂରବର୍ତ୍ତୀ ସମ୍ପ୍ରଦାୟ ମଧ୍ୟ ଗୁଣାତ୍ମକ ଚିକିତ୍ସା ସେବା ପାଇପାରିବେ । ପ୍ରୋଜେକ୍ଟ ଆରୋଗ୍ୟ ମାଧ୍ୟମରେ, ଆମେ ମୋବାଇଲ୍ ସ୍ୱାସ୍ଥ୍ୟ ୟୁନିଟଠାରୁ ଆରମ୍ଭ କରି ମୋତିଆବିନ୍ଦୁ ଅସ୍ତ୍ରୋପଚାର ଭଳି ବିଶେଷ ହସ୍ତକ୍ଷେପ ପର୍ଯ୍ୟନ୍ତ ପ୍ରତିରୋଧକ ଏବଂ ଚିକିତ୍ସାମୂଳକ ଚିକିତ୍ସା ସହିତ ହଜାର ହଜାର ପରିବାରଙ୍କ ନିକଟରେ ପହଞ୍ଚିପାରିଛୁ । ପ୍ରତ୍ୟେକ ରୂପାନ୍ତରିତ ଜୀବନ ସୁସ୍ଥ, ଓ ସୁନ୍ଦର ସମ୍ପ୍ରଦାୟ ଗଠନ କରିବା ପାଇଁ ଆମର ମିଶନର ପ୍ରକୃତ ପ୍ରଭାବକୁ ପ୍ରତିନିଧିତ୍ୱ କରେ ।’
ବେଦାନ୍ତ ଲାଞ୍ଜିଗଡ଼ର ପ୍ରମୁଖ ସ୍ୱାସ୍ଥ୍ୟସେବା ପଦକ୍ଷେପ, ପ୍ରୋଜେକ୍ଟ ଆରୋଗ୍ୟ, ଏହି ଅଞ୍ଚଳରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିଛି । ଆର୍ଥିକ ବର୍ଷ ୨୦୨୪-୨୫ରେ, ୬୬୦ରୁ ଅଧିକ ମୋବାଇଲ୍ ହେଲଥ ୟୁନିଟ୍ (MHU) ପରିଦର୍ଶନ କରାଯାଇଥିଲା । ଯାହା ଦୂରଦୂରାନ୍ତ ଗ୍ରାମଗୁଡିକର ୨୦ ହଜାର ୫ ଶହରୁ ଅଧିକ ଲୋକଙ୍କ ପାଖରେ ପହଞ୍ଚି ସ୍ୱାସ୍ଥ୍ୟସେବା ସେବା ଯୋଗାଇ ଦେଇଥିଲା । ଏହା ସହିତ, ୬୮୦ରୁ ଅଧିକ ସାମୁଦାୟିକ ସଚେତନତା ଅଧିବେଶନ ଆୟୋଜନ କରାଯାଇଥିଲା । ଯାହା ୧୫ ହଜାରରୁ ଅଧିକ ଲୋକଙ୍କୁ ପରିଷ୍କାର ପରିଚ୍ଛନ୍ନତା, ସୁସ୍ଥତା ଓ ରୋଗ ନିବାରଣ ବିଷୟରେ ପରାମର୍ଶ ଦେଇଥିଲା । ବେଦାନ୍ତ ଲାଞ୍ଜିଗଡ଼ ଶେଷ ମାଇଲ ପର୍ଯ୍ୟନ୍ତ ସ୍ୱାସ୍ଥ୍ୟସେବା ପହଞ୍ଚିବା ସୁନିଶ୍ଚିତ କରିବା ପାଇଁ ପ୍ରତିବଦ୍ଧ ଏବଂ ଓଡ଼ିଶାର ଆଦିବାସୀ ଅଧ୍ୟୁଷିତ ଅଞ୍ଚଳରେ ଏକ ଦାୟିତ୍ୱବାନ ବିକାଶ ସହଯୋଗୀ ଭାବରେ ସକ୍ରିୟ ଭୂମିକା ନିର୍ବାହ କରିଆସୁଛି ।
ଆସିଲା ବାଣ ଫୁଟା ପାଇଁ ସରକାରୀ ଗାଇଡଲାଇନ: ସନ୍ଧ୍ୟା ୭ ଟାରୁ ୯ ଟା ଭିତରେ ଫୁଟାଯିବ ବାଣ
ନନ୍ଦିଘୋଷ ବ୍ୟୁରୋ: ଆସିଲା ବାଣ ଫୁଟା ପାଇଁ ସରକାରୀ ଗାଇଡଲାଇନ । ଏଥର ବି ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ମାନି କେବଳ ଗ୍ରୀନ କ୍ରାକର ଫୁଟାଇବାକୁ ନିର୍ଦ୍ଦେଶନାମା ଜାରି କରିଛି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ । ଯେପରି ଶବ୍ଦ କି ବାୟୁ ପ୍ରଦୂଷଣ ନ ହୁଏ, ତାହାର ତଦାରଖ କରିବାକୁ ଏସପି ଓ ଜିଲ୍ଲାପାଳମାନଙ୍କୁ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଚିଠି କରାଯାଇଛି । ପ୍ରଦୂଷଣର ମାତ୍ରା ବଢୁଥିବାରୁ ଭୁବନେଶ୍ବର, କଟକ, ବାଲେଶ୍ବର, ରାଉରକେଲା, କଳିଙ୍ଗନଗର ଓ ତାଳଚେର ପରି ସହରକୁ ସ୍କାନରରେ ରଖାଯାଇଛି ।
ଏଥର ବି ଦୀପାବଳିରେ ସବୁଜ ବାଣକୁ ହଁ । ୭ ଟାରୁ ୯ ଟା ଯାଏଁ ବାଣ ଫୁଟାଇ ପାରିବେ ଲୋକ । ଏନେଇ ସୁପ୍ରିମକୋର୍ଟଙ୍କ ରହିଛି କଡ଼ା ନିର୍ଦ୍ଧେଶ। ଦୀପାବଳିରେ ବାଣ ଫୁଟାଇବା ପାଇଁ ୧୬ ସୂତ୍ରୀ ପରାମର୍ଶମୂଳକ ନିର୍ଦ୍ଦେଶାବଳୀ ଜାରି କରିଛି ପ୍ରଦୂଷଣ ନିୟନ୍ତ୍ରନ ବୋର୍ଡ଼ । ସବୁଜ ବାଣ ଶବ୍ଦ କି ବାୟୁ ପ୍ରଦୂଷଣ କରେନି । ବାଣର ଶବ୍ଦ ୧୨୫ ଡିବିରୁ ଅଧିକ ହୋଇପାରିବ ନାହିଁ । ବଗିଚା, ପାର୍କ, ହସ୍ପିଟାଲ, ଶିକ୍ଷା ସଂସ୍ଥା, କୋର୍ଟ, ଧାର୍ମିକ ସ୍ଥାନ, ସାଇଲେନସ ଜୋନର ୧୦୦ ମିଟର ଦୂରତା ଭିତରେ ବାଣ ନଫୁଟାଇବାକୁ ନିର୍ଦ୍ଦେଶ ରହିଛି ।
ସେହିପରି ଦୋକାନ, ଅଗ୍ନି ପ୍ରବଣ ସ୍ଥାନ, ରାସ୍ତା ଓ ଅଧିକ ଯାତାୟାତ ସ୍ଥାନରେ ବାଣ ଫୁଟାଇବାକୁ ମଧ୍ୟ ବାରଣ କରାଯାଇଛି । ୧୦ ବର୍ଷରୁ କମ୍ ବୟସର ଶିଶୁମାନେ ଶବ୍ଦ ସୃଷ୍ଟି କରୁଥିବା ବାଣଠାରୁ ଦୂରରେ ରହିବା ଉଚିତ । ବାଣ ଫୁଟାଇବା ସମୟରେ କଟନ ବା ସୂତା କପଡା ପରିଧାନ କଲେ ସୁରକ୍ଷତି ରହି ହେବ । ବାଣରେ ବେରିଅମ ଓ ଅନ୍ୟାନ୍ୟ ନିଷିଦ୍ଧ ରସାୟନିକ ଦ୍ରବ୍ୟ ବ୍ୟବହାର ହୋଇ ପାରିବ ନାହିଁ । ନିୟମ ଖିଲାପ କଲେ ୨୦୦୦ ଟଙ୍କା ଜରିମାନା ଗଣିବାକୁ ପଡ଼ିବ । ନିୟମାବଳୀକୁ କଡ଼ାକଡି ପାଳନ କରିବା ଦିଗରେ ଏସପି ଓ ଜିଲ୍ଲାପାଳମାନଙ୍କୁ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଚିଠି କରାଯାଇଛି । ତେବେ ବାଣଠାରୁ ଦୂରରେ ରହି ଦୀପାବଳିରେ କେବଳ ଦୀପ ଜଳାଇ ପାଳନ କରିବାକୁ ପରାମର୍ଶ ଦିଆଯାଇଛି ।
ଭୁବନେଶ୍ବର, କଟକ, ବାଲେଶ୍ବର, ରାଉରକେଲା, କଳିଙ୍ଗନଗର ଓ ତାଳଚେର ପରି ସହରରେ ସବୁ ସମୟରେ ପ୍ରଦୂଷଣର ମାତ୍ରା ଅଧିକ ଥାଏ । ଗତବର୍ଷ ଦୀପାବଳି ପୂର୍ବ ଦିନ ୧୦୦ ଏକ୍ୟୁ ଥିଲା । ହେଲେ ଦୀପାବଦଳି ସନ୍ଧ୍ୟାରେ ବାଣ ଫୁଟାରୁ ଏହା ବଢ଼ି ୨୩୦ରୁ ୩୪୦ ଏକ୍ୟୁରେ ପହଞ୍ଚିଥିଲା । ଶୂନ୍ୟରୁ ୫୦ ମଧ୍ୟରେ ଏକ୍ୟୁଆଇ ଭଲ, ୫୧ରୁ ୧୦୦ ମଧ୍ୟରେ ସନ୍ତୋଷଜନକ, ୧୦୧ରୁ ୨୦୦ ମଧ୍ୟରେ ମଧ୍ୟମ, ୨୦୧ରୁ ୩୦୦ ମଧ୍ୟରେ ଖରାପ, ୩୦୧ରୁ ୪୦୦ ମଧ୍ୟରେ ଅତ୍ୟନ୍ତ ଖରାପ ଓ ୪୦୧ରୁ ୫୦୦ ମଧ୍ୟରେ ଗୁରୁତର ବୋଲି ପ୍ରଦୂଷଣ ନିୟନ୍ତ୍ରଣ ବୋର୍ଡ ବିବେଚନା କରିଥାଏ । ବାଣରୁ ନିର୍ଗତ ଧୂଆଁ ଓ ଶିଳ୍ପ ବର୍ଯ୍ୟବସ୍ତୁ ବାୟୁମଣ୍ଡଳକୁ ପ୍ରବେଶ କରୁଛି । ଯେଉଁଥିରେ ରହିଛି ଅଙ୍ଗାରକାମ୍ଳ, ଗନ୍ଧକାମ୍ଳ, ଜବଖାକାମ୍ଳ ଓ ମିଥେନ ପରି ବିଷାକ୍ତ ଗ୍ୟାସ୍ । ଯାହା ସବୁଜ ଗୃହ ବାସ୍ପ । ଏଥିରେ ବାଣ ଫୁଟାରୁ ବାୟୁମଣ୍ଡଳରେ ସବୁଜ ଗୃହ ବାସ୍ପ ଆହୁରି ବଢିଯାଏ ।
ମୁକୁଳା ଫୁଟପାଥ୍, ମୁକୁଳା ଭାବେ କୋଠାବାଡି ନିର୍ମାଣ, ଯାନବାହନ ସଂଖ୍ୟା ବୃଦ୍ଧି, ରେଳ ଷ୍ଟେସନର ମାଲଗୋଦାମ, କଳକାରଖାନାର ଧୂଆଁ ସହରର ପ୍ରଦୂଷଣ ମାତ୍ରା ବୃଦ୍ଧି ହେବାର ମୁଖ୍ୟ କାରଣ ପାଲଟିଛି । ସେହି ସମୟରେ ବାଣ ପ୍ରଦୂଷଣକୁ ଦ୍ବିଗୁଣିତ କରି ଦେଇଥାଏ ।