ଏସଆଇ ପରୀକ୍ଷା ସ୍ଥଗିତ ନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ଓପିଆରବି ଦ୍ବାରା ପରିଚାଳିତ ସିପିଏସଇ-୨୦୨୪ର ସବ-ଇନସପେକ୍ଟର ପରୀକ୍ଷା ଆସନ୍ତା ୫ ଓ ୬ ତାରିଖରେ ହେବାର ଥିଲା । କିନ୍ତୁ କେଉଁ ପରିସ୍ଥିତିରେ ଏଭଳି ଘଟଣା ଘଟିଲା ଯେ, ପରୀକ୍ଷା ପୂର୍ବରୁ ତାହା ରଦ୍ଦ କରିବାକୁ ପଡିଲା ? ଏହା ଅତ୍ୟନ୍ତ ଦୁର୍ଭାଗ୍ୟଜନକ । ଏହା କେବଳ ଗୋଟିଏ ଘଟଣା ନୁହେଁ । କେଳେଙ୍କାରୀର ଲମ୍ବା ତାଲିକା ଦର୍ଶାଇଛନ୍ତି ନବୀନ । ୨୦୨୫ ଜୁଲାଇରେ ସମାନ ସ୍ଥିତିରେ ଓଟିଇଟି ପରୀକ୍ଷା ବାତିଲ କରାଯାଇଥିଲା । ସ୍ବତନ୍ତ୍ର ଓଟିଇଟି ପରୀକ୍ଷା ଆରମ୍ଭ ହେବାର ମାତ୍ର କେଇ ଘଣ୍ଟା ପୂର୍ବରୁ ପ୍ରଶ୍ନପତ୍ର ଲିକ ଯୋଗୁଁ ସାରା ରାଜ୍ୟରେ ହଇଚଇ ସୃଷ୍ଟି ହେଲା ଏବଂ ପରୀକ୍ଷା ରଦ୍ଦ ହେଲା ।

ଜୁଲାଇ ୩୦ ଓ ୩୧ ତାରିଖରେ ଓଡ଼ିଶା ସବ ଅର୍ଡିନେଟ ଷ୍ଟାଫ ସିଲେକସନ କମିଶନ ଦ୍ବାରା ପରିଚାଳିତ RI, ARI, ଅମୀନ, ଅଙ୍ଗନବାଡି କେନ୍ଦ୍ରର ସୁପରଭାଇଜର, ରାଜ୍ୟ ଖାଦ୍ୟ ସୁରକ୍ଷା ଯୋଜନାର ଅଧିକାରୀ ନିଯୁକ୍ତି ନେଇ ହେବାକୁ ଥିବା ମିଳିତ ନିଯୁକ୍ତି ପରୀକ୍ଷା ରଦ୍ଦ ହୋଇଥିଲା । ଅଗଷ୍ଟ ୨୨ରେ ଓଟିଇଟି ପରୀକ୍ଷା ଲାଗି ପୁନଃ ତାରିଖ ଘୋଷଣା ହେଲା । ହେଲେ ତାହା ମଧ୍ୟ ସ୍ଥଗିତ ହେଲା । ଏହାପରେ ଆଶାୟୀ ପରୀକ୍ଷାର୍ଥୀ ହତାଶ ହୋଇଥିଲେ । ଏହା ଦର୍ଶାଉଛି ଓଡିଶା ସରକାରଙ୍କର ନିଯୁକ୍ତି ପରୀକ୍ଷା ପରିଚାଳନାରେ ସ୍ବଚ୍ଛତା, ବିଶ୍ବସନୀୟତାର ଘୋର ଅଭାବ ରହିଛି । ଯାହାକି ଲକ୍ଷାଧିକ ଚାକିରି ଆଶାୟୀଙ୍କୁ ଭୀଷଣ ମାତ୍ରାରେ ପ୍ରଭାବିତ କରୁଛି । ବିଜେପି ସରକାରଙ୍କ ବ୍ୟବସ୍ଥାଗତ ବିଫଳତା ବୋଲି ଏହା ସୂଚାଇ ଦେଉଛି । ଯଦି ଲୋକଙ୍କ ବିଶ୍ବାସ ଜିତିବାକୁ ଚାହୁଁଛନ୍ତି ଯେଉଁମାନେ ଏଥିଲାଗି ଦାୟୀ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ନବୀନ ସୋସିଆଲ ମିଡିଆ ଏକ୍ସରେ ପରାମର୍ଶ ଦେଇଛନ୍ତି ।

ପୋଲିସ ଏସଆଇ ପରୀକ୍ଷାରେ ବଡ଼ ଧରଣର ଜାଲିଆତି । ବିକ୍ରି ହେଉଛି ଚାକିରି  । ପରୀକ୍ଷା ପୂର୍ବରୁ ମିଳିଛି ଏହି ଦୁର୍ନୀତିର ବଡ଼ ସୁରାଗ। ୧୨୦ ଆଶାୟୀଙ୍କୁ ବ୍ରହ୍ମପୁର ପୋଲିସର ପଚରା ଉଚରା  । ପରୀକ୍ଷା ସ୍ଥଗିତ, କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ । ଏସଆଇ ପରୀକ୍ଷାର ୧୨୦ ପ୍ରାର୍ଥୀଙ୍କୁ ବ୍ରହ୍ମପୁର ପୋଲିସ ଧରିବା ପରେ ଏତେ ବଡ଼ ଦୁର୍ନୀତିର ପର୍ଦ୍ଦାଫାସ ହୋଇଛି। ଏହି ଆଶାୟୀଙ୍କୁ ହାଇଦ୍ରାବାଦ ନେଉଥିଲା ପରୀକ୍ଷା ପରିଚାଳନାର ଦାୟିତ୍ଵ ନେଇଥିବା ସଂସ୍ଥା। ହାଇଦ୍ରାବାଦରେ କୋଚିଂ ଦେବା ପାଇଁ ସେମାନଙ୍କୁ ନିଆଯାଇଥିଲା। ସନ୍ଦେହ କରାଯାଉଛି, ସେଠାରେ କୋଚିଂ ବାହାନାରେ ଫିକ୍ସିଂ ହୋଇଥାନ୍ତା। ପରୀକ୍ଷାର୍ଥୀଙ୍କୁ ଅସାଧୁ ଉପାୟର ସୁଯୋଗ ମିଳିଥାନ୍ତା। ଯାହା ଫଳରେ ସେମାନେ ଚାକିରି ପାଇଥାନ୍ତେ। ବ୍ରହ୍ମପୁର ପୋଲିସ କୌଣସି ସୂତ୍ରରୁ ଖବର ପାଇଁ ପିଛା କରିଥିଲା ଏବଂ ସମସ୍ତଙ୍କୁ ଶ୍ରୀକାକୁଲମ୍ ରେ ଧରିଥିଲା। ସମସ୍ତଙ୍କୁ ଧରି ବ୍ରହ୍ମପୁର ଆଣିଛି ପୋଲିସ ଏବଂ ଅଧିକ ତଥ୍ୟ ହାସଲ ପାଇଁ ପଚରା ଉଚରା କରିଛି।

ଏତେ ବଡ଼ ଦୁର୍ନୀତିର ସୁରାଗ ମିଳିବା ପରେ ପରୀକ୍ଷାକୁ ସ୍ଥଗିତ ରଖିଛି ଓଡ଼ିଶା ପୋଲିସ ରିକ୍ରୁମେଣ୍ଟ ବୋର୍ଡ। ପରେ ନୂଆ ତାରିଖ ଘୋଷଣା ହେବ ବୋଲି କର୍ତ୍ତୃପକ୍ଷଙ୍କ ତରଫରୁ ଘୋଷଣା କରାଯାଇଛି। ସେପେଟ ରାଜ୍ୟ ସରକାର ଏହାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦେଇଛନ୍ତି। କ୍ରାଇମବ୍ରାଞ୍ଚର ଏକ ଟିମ୍ ବ୍ରହ୍ମପୁରରେ ପହଞ୍ଚି କରୁଛନ୍ତି ତନାଘନା। ଘଟଣାର ଚେର ଖୋଜୁଛି କ୍ରାଇମବ୍ରାଞ୍ଚ। ଏହି ଜାଲିଆତି ଧରାପଡ଼ିବା ପରେ ଓଡ଼ିଶା ପୋଲିସ ରିକ୍ରୁଟମେଣ୍ଟ ବୋର୍ଡ ପକ୍ଷରୁ ଆଶାୟୀ ମାନଙ୍କ ପାଇଁ ଜାରି କରାଯାଇଛି ହେଲ୍ପ ଲାଇନ୍ ନମ୍ବର। ହେଲ୍ପ ଲାଇନ ନମ୍ବରଟି ହେଲା ୯୦୪୦୪ ୯୩୨୨୩ । ଯଦି କିଏ କିଛି ଅଭିଯୋଗ କରିବାକୁ ଚାହୁଁଛି, ସେମାନେ ଏହି ନମ୍ଵରରେ ଯୋଗାଯୋଗ କରିପାରିବେ।

ସେପଟେ ପୋଲିସ ଏସଆଇ ପରୀକ୍ଷାର ଜାଲିଆତି ଧରାପଡ଼ିବା ପରେ ତାତିଛନ୍ତି ଆଶାୟୀମାନେ। ଭୁବନେଶ୍ଵରରେ ସେମାନେ ବିକ୍ଷୋଭ କରିଛନ୍ତି। ସେମାନେ ପ୍ରଶ୍ନ କରିଛନ୍ତି, କାହିଁକି ସରକାର ସ୍ଵଚ୍ଛତାର ସହିତ ପରୀକ୍ଷା କରିପାରୁ ନାହାନ୍ତି। ମେଧାବୀ ପିଲାଙ୍କ ଭାଗ୍ୟ ସହିତ ଖେଳୁଛନ୍ତି। ଜାଲିଆତିରେ ସଂପୃକ୍ତ ଥିବା ଲୋକଙ୍କ ବିରୋଧରେ କଡ଼ା ଆକ୍ସନ ସହିତ ସଂପୂର୍ଣ୍ଣ ସ୍ଵଚ୍ଛତାର ସହିତ ପରୀକ୍ଷା କରାନ୍ତୁ ବୋଲି ଦାବି କରିଛନ୍ତି ଆଶାୟୀମାନେ। ଓଡ଼ିଶା ପୋଲିସର ୬୦୯, ସଶସ୍ତ୍ର ପୋଲିସର ୨୫୩, ଅଗ୍ନିଶମ ସେବାର ୪୭ ଷ୍ଟେସନ ଅଫିସର ଓ ୨୪ଟି ଆସିଷ୍ଟାଣ୍ଟ ଜେଲର୍ ଭାବେ ସବଇନ୍ସପେକ୍ଟର ପଦବୀ ପାଇଁ ଗତ ଜାନୁଆରି ମାସରେ ପ୍ରକାଶିତ ହୋଇଥିଲା ବିଜ୍ଞପ୍ତି। ଓଡ଼ିଶା ପୋଲିସ ରିକ୍ରୁମେଣ୍ଟ ବୋର୍ଡ ତରଫରୁ ପରୀକ୍ଷା ହେବାର ଥିଲା। ତା ପୂର୍ବରୁ ଧରାପଡ଼ିଛି ଏହି ଜାଲିଆତି।